BaRoma 1

Ite ashow

1Kufumung kang ne ni bɔk aBulus, asam aYeso Kristi, fɛ́ ba ku yes na a sot atom aYeso, ba ku sak kyɛw nek ishara ifɛ̀ itek Adakunom. 2Ifɛ̀ itek deng fɛ́ Adakunom ki mang cɛɛt neme nanu batan wu ni Fumung aJɛrɛ. 3Ifɛ̀ itek e bi se azaton Arim wu, fi i ne ni irɔm, a kin ne ni izɔrɔk agwɔm aDauda, 4awɛt nek kusot Kabik ajɛrɛ tɛ Adakunom iwu yet Arim Adakunom. Adakunom kin tonong anɔng e, ni kukyem wu ni izen idoro ifaben aYeso Kristi aTisa yit. 5Ni bɔk aYeso wu fin kin di sɛ yit itek ni iyes in di sot yit batom aYeso, iyerek wu di sɛ iratek, in di sɛ in di sak Ícɛn-iduk ba di nesek atsak, nɛ ba di fok ifɛ̀ Adakunom, 6ngma ni iyin fɛ́ ba mi ki yes yin ni i sot yin bafɛ́ aYeso Kristi. 7Sak na ngma bayɔng fɛ́ ba se na aRoma, bayɔng fɛ́ Adakunom ka ba shim, fɛ́ ba ka ba yes batek. Won itek ni kusonong kukyang fi ku nes na Ada yit Adakunom nɛ aTisa yit aYeso Kristi ni ku bɛ́ ni yin.

8Ni mɛsɛng e, in tsin nesek ifeng sak na Adakunom hom ni iyerek aYeso Kristi nek iyin ngma, nek kucɛɛt inɔɔk atsak yin mi kat kaakɛ na azatse. 9Nek Adakunom fi in tsin ku ra kutomong ishara ifɛ̀ itekari wu, ni iyɛ hom ngma kusum, iwu fɛ́ a yet anet inɔɔk kanu ifɛ̀ naton hom fok, imi yiring ni iyin kaakyi izen, 10in ras awon, ni in tɔ ye, ki i yet ishim Adakunom, won na a di tarak kawat, ni in bɛ́ azɔng ni yin yɔkɔnɔng.

11Nek imi bi iyɛ ingash ku di yin, nɔng in da ki te yin awɛng nnang fɛ́ kabik nesek 12na anɔng, ngma yit in di ki sɛ yit agap, ayɛt inɔɔk atsak yit. 13Ábaruneng, imi shim ni i rēn yin fok, in mi tsɛt kubɛ́ azɔng ni yin (awɛt in mi ni in sɛ kawat awo). In shim kubɛ́ me, nek in di bɛ́ na bakak ayɛt yin ni ikuus kpaf ti nshɛrɛp Ícɛn-iduk.

14Ba mi di nɔk kutomong sak nɛ bafi ilem aGirik nɛ bayɔng fɛ́ ba yet ilem aGirik awo, sak na batsitsɛng nɛ áshɔp. 15Nek anɔng wu, in di bi iyɛ ingash ishara ifɛ̀ itek ni yin fi i se yin na aRoma bà.

16Nek imi fok nsum ishara ifɛ̀ itek awo, nek ide yet kukyem Adakunom fi ku nesek isheshek sak na kaangan fɛ́ a nɔɔk atsak, ba tun tumung ne baYahuda ni Ícɛn-iduk di kuus. 17Nek ayɛt de fɛ́ ba di tonoso kusot kutabat fi ku nes na Adakunom, nek ba sɛs kusot kutabat e ni irèn inɔɔk atsak, nkum itumung e sak ni igang e, kyɔn ti i se ni ijɛk, “Anet kusot kutabat, da sɛ kutset nek inɔɔk atsak wu.”

18Nek ishɔt Adakunom mi tik azatse naton ngma bayɔng fɛ́ ba raba inye ikyɛng fɛ́ Adakunom shim nɛ bayɔng fɛ́ ba raba ira atsak na ba nyɔ atsak ni nggɔn avit atsak bá. 19Nek ikyɛng fi i se yɛɛt na ba rēn naton Adakunom, ba mi rēn ide, nek Adakunom mang ka ba tonong ide. 20Nek kukyem Adakunom se vit nkum ni kusot Idakunom wu, nyɔng fɛ́ ayisi kyem a di awo. Awɛt neme ni itumung inye kazatse, ba mi tonong ina wɛshɛk, ba kyem ba rēn ina nek nkyɔrɔk fɛ́ ba kin nye ni itumung kazatse me. Nek anɔng, vit ayɔng fɛ́ a da kyem a ra nanan. 21Ngma ni irēn Adakunom fɛ́ ba rēn, ba raba dang ku nesek iratek tɛ Adakunom kɛ na ba ku nesek ifeng ayi, aza anɔng, kuyiring ba se kpɛɛ, agadiring áyɛ bá te ngmalak. 22Ba nye fok ba bɛ́ kutsitsɛng, awɛt ba yet áshɔp, 23na ba shesheng izɔk fi i yet ifɛ́ Adakunom fɛ́ ashɔɔm sak ni nkyɔrɔk fi da in shɔɔm awo tɛ nanon ni nkyɔrɔk fi in tsees na atak ni nyɔng fi in kɔk nafa aben.

24Nek anɔng, Adakunom ka ba nabak sak ni kuduk kuyiring bá, sak ni iras nkyɔrɔk fi in se gbɛk-gbɛk, sak ni iras nkyɔrɔk nsum fi in beseng nrɔm bá, 25nek ba mi tirik atsak Adakunom a sot mbɔɔs, ba ya ntong nɛ ba ra isam sak ni nkyɔrɔk fɛ́ ba nye aza Anet Inye me, iwu fɛ́ a kyem na ba ku tere ayɛ vit igang! Anɔng.

26Nek anɔng, Adakunom ka ba nabak ayɛt ifoos ikɔk nkyɔrɔk fi in tes ni nsum. Nek banyining bá monoso nrɔm ni kuri irèn ikak zɛɛt ni iyɔng fɛ́ Adakunom nye. 27Kpaf anɔng bà, batek e raba inyis ne banyining, na ba tsɛsɛk bafidang ba bamatek ki ikɔk e ka ba daam. Bamatek nɛ bamatek ras nkyɔrɔk nsum, na anɔng fɛ́ ba di kok ice bá ishɔt fi i se kpaf ni kutomong anyas bá.

28Ayet nek iba raba irēn Adakunom na yɛ bá, Adakunom ka ba nabak ayɛt kuduk kuyiring bá tɛ áshɔp na ba ras ntomong fi in se gyat ira awo. 29Nkum nggɔn bá ka sot nfɛ́ vit atsak kusum ni imaan e nɛ anyas nɛ nhwyɛ nɛ aduk nggɔn. Ba shining ni ifup ni ikok kutset ni kurēn ni mbɔɔs nɛ angmagalak áyɛ. Ba yet banet imonoso ncɛɛt, 30bafi imɔɔt bakak, bafi iraye Adakunom, bafi itok, bafi ikok ice, bafi inesek ice bá iratek, bafi imonoso anyas, bafi ibyɛs batek. 31Ba yet áshɔp, bafɛ́ avit atsak, vit iba ni ishim, vit iba ne angmishish. 32Ngma ni irēn ishɔt Adakunom fɛ́ ba rēn fok anet fɛ́ a ras nggɔn yɔng, a kyem na ba sok kutset wu, ngma na anɔng, iba nyeseng ni iras e kyɛk awo, ba nesek irun ama na bayɔng fɛ́ ba ras ina.

Currently Selected:

BaRoma 1: IbaasNT

Highlight

Copy