BaFilipi 4

1Nek anɔng, ábaruneng, iyin fi in di te iyɛ, fin in shim kudi yin gyet awo. Bacɛk iyɛ hom, nek ifeng ni izang fi in bi sɛ azanɛn, se ni nyeseng yin gak ni ikuus aTisa.

ABulus gbinding bafi ikuus aTisa aYeso

2In tsin ra awon na aYodiya nɛ aSintiki, na ba nosong ashi, nek ba bɛ́ kufiri na aTisa. 3Ngɔn, afi ifiri ni imi ni tomong atsak, kabɔk, di sɛ banyining yɔng fɛ́ ba mi nye nyɛk ni i di sɛs mo ni tomong itaas ifɛ̀ itek, ngma nɛ ba Kilemen ni nshɛrɛp bafi itomong e, bayɔng fɛ́ ayerek bá se ni ifumung kutset.

4Nye yin iyɛ ikan ayɛt aYeso kaakyi izen. In tsin bang ki tak yin, nye yin iyɛ ikan. 5Won nggɔn yin ni in tonong banet kuhwyɛ yin. Kubɛ́ aTisa bɛ́ bakat. 6Ikyikak bi ki daam yin awo, tit ayɛt akaakyɛ, taas yin Adakunom awon yin, nɛ kanak yin, ni ifeng yin ayɛt awon. 7Won kusot kukyang Adakunom fi ku wat kaakyi irēn, ni ku bereng áyɛ yin ni kuyiring yin ayɛt kufiri na Anet-Isheshek aYeso.

8Ni igang e, ábaruneng, ngma ikyɛng fi i yet atsak, ngma ikyɛng fi i se gyat, ngma ikyɛng fi i se kpaf, ngma ikyɛng fi i se cɛ́l, ngma ikyɛng fɛ́ ba shim ide, ngma ikyɛng fi i kyem, ki ikyikak dung sas ke i kyem na ba tere ide ayi, yiring yin ide. 9Ngma ikyɛng fi i man mɛɛs yin ni mi, ke idɔng fi i man sɛ yin ni mi, ke idɔng fi i man fok yin ni mi, ke idɔng fi i man di yin ni mi ayi, te yin ide ni tomong. Na anɔng wu, Adakunom fɛ́ a nesek kusot kukyang da sot gung ni yin.

ABulus feng bafi ikuus aFilipi nek kunang bá

10In bɛ̀ iyɛ ikan na aTisa makiyi nek iyin mi ti ibun yin ni ishim yin sak ni mi ni gang e. Na tsak e, i bɛ́ yin kuyiring e, awɛt i mi ni i sɛ yin kawat itonong e kyɛk awo. 11Da in tsin cɛɛt anɔng fok nek in bi kudaam awo, nek imi rēn izen fi kushɛrɛk di se. Imi mi mɛɛs kusot akabɔk na akaakyi izen. 12Imi rēn izen avit ni izen isɛ shɛrɛk. In mi mɛɛs irèn akabɔk na kaakyi izen, ke ni i yet izen ihwya ke izen nzong ayi, kɛ izen isɛ shɛrɛk ke izen avit ayi. 13In da kyem in nye akaakyi ikyɛng nek kukyem fɛ́ Anet-Isheshek di nesek.

14Ngma ne nɔng, i se gyat fi iyin di gbinding yin ayɛt ndaam fi in di se. 15Ama anɔng, iyin banet aFilipi i rēn yin fok, ni nnom imɛsɛng ishara ifɛ̀ itek deng, ni izen fi in kin won aMasedoniya, vit itusung bafi ikuus bakak fɛ́ ba kin moon ice ni imi ni irèn inesek ki ishashang ayi, ma iyin kyɛk; 16nek izen fi in kin se na aTesaloni, iwoso di toos yin ni kunang yin. 17Da iyet fok in tsin tsɛsɛk kunang awo, tit in tsin tsɛt ibarang fɛ́ ba da ki jɛk yin ayɛt izang yin e. 18In mi shan ikyɛng fi in shim ni yin juut-juut; In mi sɛ ikyɛng fi in tsɛt, yɔkɔnɔng fi in mi shan kunang yin ni bɔk Apaforiditus. Kunang fi ku bi itɛrɛk iyɛ, kunang inabak ashosh kutek fɛ́ Adakunom shan ni itɛrɛk iyɛ. 19Adakunom hom da ki tarang yin ngma ndaam yin ni irèn kurúm wu fi ku se dot ayɛt Anet-Isheshek aYeso.

20Won iratek ni sot ifɛ́ Ada yit Adakunom, ayɛ na ayɛ. Anɔng.

Ashow igang e

21Te show yin ngma banet Adakunom fɛ́ ba se ni kufiri na Anet-Isheshek aYeso. Baruneng fɛ́ ba se azeng ni imi, ki te show yin. 22Ngma banet Adakunom ki te show yin, amak e, bafɛ́ asa aKaisar.

23Won itek aTisa aYeso Kristi ni se ayɛt ayɛ yin. Anɔng.

Currently Selected:

BaFilipi 4: IbaasNT

Highlight

Copy

Compare