BaFilipi 1

1Kufumung kang ne na aBulus nɛ aTimoti, basam Anet-Isheshek aYeso.

Ba jɛk iko sak na banet Adakunom ngma fɛ́ ba ka ba moon na Anet-Isheshek aYeso na aFilipi, ngma nɛ bafi iyɛrɛ bafi ikuus nɛ bashɔn bafi ikuus:

2Won itek ni kukyang fi ku nes na Ada yit Adakunom nɛ aTisa yit aYeso Kristi, ni ku se ni yin.

Itonong ifeng aBulus nɛ awon wu

3In nesek ifeng sak na Adakunom in kaakyi izen fi in yiring ni yin. 4Na kaakyɛ awon fi in ras nek iyin ngma, in ras awon ni iyɛ ikan 5nek imoon ice yin ni itaas ifɛ̀ itek e me deng, neme ni kunom imɛsɛng e sak atut, 6in rēn tsɛngtsɛng fok, ayɔng fɛ́ a mi tumung kutomong kutek ayɛt yin, da ya kashon ni iko sak igang e, ma kunom fɛ́ Anet-Isheshek aYeso bi bɛ́s wu.

7I se gyat imi ni in fok anɔng yɔk ngma yin, nek i se yin ayɛt iyɛ hom. Nek ke ni in se ni nyang ke ni in tsin tɛnɛng ni itonong atsak ifɛ̀ itek e ayi, ngma yin i te yin kufiri ni imi ayɛt itek Adakunom e. 8Adakunom wu a da kyem a tak iyɛ ingash fi in bɛ́ mok iyin kusum, ti kuri ishim fɛ́ Anet-Isheshek aYeso bɛ́ ni yit.

9Awon hom yet, fok ishim yin ni bang rasak, nɔng irēn yin ta aney ayɛt irèn iyɛrɛ, 10nɔng i da kyem i di kam yin ikyɛng fi idung se gyat, nek i di nye yin kusot kucɛ́l, vit ibeseng sak kunom ibɛ́ Anet-Isheshek, 11ni i shining yin ni nggɔn kusot kutabat fi in nes na aYeso Kristi nek iratek ni itere Adakunom.

Iya-inyang aBulus bɛ́ ni iya kashon Ifɛ̀ Itek

12Ábaruneng, in shim ni rēn yin yɔkɔnɔng fok, ikyɛng fi ite ni imi, ibang bɛ́ ni iya kashon ifɛ̀ itek e. 13Anɔng e mi bɛ́ na awɛshɛk na bafi itosok kari igwɔm ngma nɛ nshɛrɛp banet fok imi se ni nyang nek Anet-Isheshek. 14Nek inyang fi in tsin ya ide, baruneng ayɛt aTisa dot mi sɛ agap iyɛ ishara Ifɛ̀ Adakunom gbagba, vit nnyim.

15I yet atsak fok, bakak shara Ifɛ̀ Anet-Isheshek nek kuhwye ni ifup, awɛt bakak shara ni kuyiring kutek. 16Bafɛ́ ama me shara ayɛt ishim, ba rēn fok ba di sak azeng nek itɛnɛng ifɛ̀ itek e. 17Wat bafɛ́ ashon e, shara Ifɛ̀ Anet-Isheshek mok ishim iyɛ bà, vit atsak ayɛt e, ba di fok ba di ki tusung kudaam ni imi mo ni nyang. 18Awɛt kudaam e yet akyɛ? Ikyɛng fi idung sas yet fok na kaakye irèn, won na ba shara Anet-Isheshek, ke ayɛt kuyiring mbɔɔs kɛ kufɛ́ atsak ayi. Nek anɔng wu fi in di bi iyɛ ikan.

Ey, in da ya kashon ni iyɛ ikan, 19nek imi rēn fok, ayɛt awon yin ni igbingding fɛ́ Kabik aYeso Kristi nesek, ikyɛng fi i te ni mi da bɛ ni iwuruk hom. 20In bi iyɛ ngash ni ite iyɛ fok, in da sɔ nsum awo, tit nkum yɔkɔnɔng sak ashon in da yit iyɛ makiyi nɔng Anet-Isheshek da sɛ iratek ni kusot hom, kɛ ni in se ni kutset kɛ ni in ku ayi. 21Wɔn imi, kutset yet ni in se ayɛt Anet-Isheshek, iku yet awɛng. 22Ki in da bang sot ni kutset, i da sot in da ya kashon ni kutomong kutek. Ngma na anɔng, ingan de fi in da kasa de yɛ. 23Nkyɔrɔk nfa me di te nate: A di se ki in tseng in tsin sot na Anet-Isheshek, mok anɔng e wu a dung sas imi; 24awɛt nek itek yin, i se yɛɛt ni in bang se ni kutset. 25Iyɛ hom mi di tonong tsɛngtsɛng fok, in da bang sot, in da ya kashon ni iyin ngma, nɔng i da rasak yin ni bɛ yin iyɛ ikan ayɛt atsak yin, 26nɔng ayɛt kusot kufiri hom ni iyin, ifeng yin ayɛt Anet-Isheshek aYeso da bang shining dot nek imi.

27Ayɛt akaakyi ikyɛng: won kusot yin ni ku tseng kpaf ni ifɛ̀ itek Anet-Isheshek. Ama anɔng, kɛ ni in kyem in bi in ki di yin kɛ ni in fok ifɛ̀ natoon yin ayi, ikyɛng fi in shim in fok yet, i mi tup yin atak gak ni se yin bazining na abik, na ra yin itsom te anet azining nek inɔɔk atsak yin ni ifɛ̀ itek e 28bafi ifa ni iyin bi ki shirik yin awo, anɔng e da ka ba tonong fok ba da ka ba ngɔɔt. Awɛt iyin bi sɛ yin isheshek ni bɔk Adakunom ikyɛng wu. 29Nek ikyɛng itek fɛ́ a ki nye yin ne yet fok ni nɔk yin atsak na Anet-Isheshek kyɛk awo, tit fok ni i sɔ yin mgbang nek iwu, 30ayet iyin yɔng i tsin bɔrɔng yin kyɔn ti fi i kin di yin, ite ni imi, fi i tsin foos yin fok in se ni de yɔkɔnɔng ana.

Currently Selected:

BaFilipi 1: IbaasNT

Highlight

Copy

Compare