AFilimon 1

1Kufumung e ne ni imi aBulus, afi inyang mok Anet-Isheshek aYeso nɛ aTimoti aruneng yit, sak na aFilimon afidang yit nɛ afidang itomong yit, 2nɛ anganeng yit Afiya nɛ Akipus afidang yit ni itsom nɛ bafi ikuus fɛ́ ba nyiis ari ngɔn:

3Won itek ni kusot kukyang fi ku nes na Ada yit Adakunom nɛ aTisa aYeso Kristi ni ku se ni yin.

Ifeng nɛ awon

4In nesek Adakunom in ifeng ni izen fi in da yiring na awon, 5nek ni ifoos inɔɔk atsak ngɔn na aTisa aYeso, ni ishim fi ibɛ nek banet Adakunom kusum. 6In ra won, fok ni i ya kashon ayɛt inɔɔk atsak fi i ki moon yit, nɔng i da bin sɛ atsik irēn ngma nkyɔrɔk ntek fi in bɛ yit ayɛt Anet-Isheshek. 7Ishim fi ibɛ, mi di barang mo agap makiyi aruneng, i mi tɛrɛk banet Adakunom ayɛ.

Akabɔk fɛ́ aBulus tsɛt nek aOnisimus

8Nek anɔng, ngma ni kukyem fi in bɛ ayɛt Anet-Isheshek ni in fɛ̀ ni ngɔn ni i nye ikyɛng fi in fi in shim, 9ngma na anɔng, in tsin ra awon ni ngɔn nek ishim. Imi aBulus ni ikop in, ni kusot hom tɛ afi inyang Anet-Isheshek aYeso. 10In tsin ra awon ni ngɔn akuce ari hom aOnisimus. A sot ari hom ni imi ari inyang. 11A tsang yet aduk anet ni ngɔn, awɛt yɔkɔnɔng a mi sot anet atek sak ni yit ngma.

12In tsin ku yirik ni ngɔn, ti icek iyɛ hom. 13Zɔng ki in ku won azeng ni imi, nɔng a di ki nyes ikyɛng fi ngɔn tsang di ras e, ni inyang deng fi in se ne nek ishara ifɛ̀ itek. 14Awɛt in shim in ra ikyikak dang irēn ngɔn awo, nɔng itek ngɔn nye da sot tɛ ba da te mo i inɛn awo tit ni ishim iyɛ ngɔn. 15Nyɛn ikyɛng fi i sak ba da kam ni wu nfi kizen gyet, nɔng a da tɛ bun ni ngɔn vit nkum e, 16da tɛ asam kong awo, tit tɛ anet atek, aruneng yit. A mi sot icek iyɛ ni mi, a da dung nye itek sak ni ngɔn, tɛ anet awe nɛ aruneng yit ni kuus Adakunom.

17Nek anɔng, ki ngɔn di sok tɛ afidang itomong ngɔn, ni ku shan ni mbɔk nfa, kpaf ti imi wu i tsin di shan. 18Kɛ a mang da nye inɛn ke i ku kuus ikyikak ayi, ni yirik kuta me ni mi. 19Imi aBulus wu in jɛk kufumung e kang ni kubɔk in. Imi da ka tarang. (I yet ikyɛng icɛɛt awo, ngɔn ice ngɔn bɛ kuta kutset kufas fi i sɛ ni mi.) 20Nek anɔng aruneng, won ni in sɛ ikyikak ni bɔk ngɔn ayɛt aTisa; di terek iyɛ nek Anet-Isheshek. 21In tsin tɛ iyɛ fok i di ki fok, in tsin da jɛk e, in rēn fok i da nye kashon ni ikyɛng fi in fɛ̀ ni ngɔn.

22Ikyɛng izining fi ikyɛk yet fok, di nye kutu batsen, nek in bi ite iyɛ fok in bin ki sɛ yin nek ishan awon yin.

23Apafaras, afidang inyang hom ayɛt Anet-Isheshek aYeso, tsin da te show. 24Ngma na aMarkus nɛ Aristakus, nɛ aDemas, nɛ aLuka, bafidang itomong in.

25Won itek aTisa aYeso Kristi ni sot gung ni kabik yin.

Currently Selected:

AFilimon 1: IbaasNT

Highlight

Copy

Compare