AMatiyu 6

AYeso ras itees naton Inesek Kunang

1“Nye yin yɛɛt kɔn kutomong kutek yin, bi sot kufi iyɛrɛ ayisi, nek ki i nye yin anɔng, vit iyin ni i sɛ izang narɔ Ada yin fɛ́ a se naton azanɛn.

2“Nek anɔng, izen fi i tsin nesek yin bayɔng fɛ́ ba yet bakan kunang, i bi fɛsɛm yin ádurung naton e awo, anɔng wu fɛ́ bafɛ́ nanu nafifaa di ras na arɔ inyis nɛ naton irén, nɔng banet da ka ba tere mo. Won in ki tak yin atsak, ba mi tsang shan nkum izang bá yɔng. 3I se gyat, ngma izen fi i shim i nye kunang, i bi won kubɔk imen ngɔn ni ku rēn ikyɛng fi kubɔk iyak ngɔn shim ku nye awo, 4nɔng kunang ngɔn bin se ni nɛt. Na anɔng wu fɛ́ Ada ngɔn fɛ́ a yɛrɛ ngma ikyɛng fɛ́ ba ras ni nɛt, da ka nɔk izang ngɔn.

AYeso ra itees naton awon

(ALuka 11:2-4)

5“Izen fi i da ra yin awon, i bi ra yin awon tɛ bafɛ́ nanu nafifaa awo, nek iba shim iras awon tsik ni nyeseng nɛ na narɔ inyis baYahuda nɛ naton irén, nɔng banet bin ka ba yɛrɛ. Won in ki tak yin atsak, ba mi tsang shan nkum izang bá yɔng. 6Awɛt i sɛ gyat, ngma izen fi i shim i ra yin awon, nɔ yin ayɛt itu yin, fam yin katitu, ra yin awon sak na Ada yin yɔng fɛ́ a se ni nɛt. Awɛt Ada yin yɔng fɛ́ a yɛrɛ ikyɛng fɛ́ ba ras ni nɛt, da ki nɔk yin izang yin. 7Izen fi i se yin na awon e, i bi woso itoos yin kucɛɛt tɛ banet fɛ́ ba se vit Adakunom awo, nek kuyiring bá yet fok ayet a woso itoos i da sak ba ka ba fok mo. 8I bi nye yin ti iba awo, nek Ada yin rēn ikyɛng fi i shim yin gyam dang ni i ku rip yin.

9“Ane wu fi i da ras yin awon,

‘Ada yit fɛ́ a se azanɛn,

won iyerek ngɔn ni isot jɛrɛ,

10won igwɔm ngɔn ni ibɛ́,

won na ba ras ikyɛng fi ngɔn shim azatse,

kyɔn tɛ ba di ras naton aza.

11Ki nɔk yit kuyak iwoso.

12Ki fuut yit anɛn yit,

kyɔn ti iyit di fuut yit bayɔng

fɛ ba ki ras yit anɛn.

13Ngɔn bi ki won yit,

ni in nɔ yit,

ni imara awo,

awɛt ki tun yit ni bɔk aShetan.’

14“Nek ki iyin fuut yin banet fɛ́ ba ki ra yin inɛn, anɛn ba, Ada yin fɛ́ a se azanɛn, da ki fuut yin anɛn yin bà. 15Awɛt ki da iyin fuut yin banet anɛn ba awo, Ada yin da ki fuut yin anɛn afiin awo.

AYeso ras itees naton itemak kanu

16“Izen fi i se yin ni itemak kanu, i bi sot yin mu tɛ bafɛ́ nanu nafifaa di nye awo, Nek ba tsip ayisi bá nɔng banet da bin rēn fok ba tsin ra itemak kanu. Won in ki tak yin atsak, ba mi tsang shan nkum izang bá yɔng. 17Awɛt ki i se yin ni itemak kanu, kusu yin ayisi, ni kon yin name ni ice, 18kɔn itemak kanu yin bi sot ikyɛng iyɛrɛ banet, nek Ada yin fɛ́ se ni nɛt kyɛk. Iwu Ada yin fɛ́ a tsin yɛrɛ ni nɛt da ki nɔɔk yin izang yin.

Itusung kurúm azanɛn

(ALuka 12:33-34)

19“I bi tusung yin ace yin kurúm azeng azatse awo, narɔ fi ize ni ibush beseng iko, ke na bakpatang tsɛ ba fo na ba yi ayi. 20Kaduk ni itusung yin ace yin kurúm azanɛn, karɔ fɛ́ vit ize ni ibush fi i da tsi ibeseng, ke fɛ bakpatang da tsɛ ba fo na ba di yi awo. 21Nek karɔ fi kurúm anet di se, azɔng wu fi kuyiring wu di nak bà.

22“Ayisi na a yet agaramun irɔm. Ke ayisi ngɔn yet atek, kurɔm ngɔn burang da sɛ mgbey. 23Awɛt ke ayisi ngɔn yet atset awo, kurɔm ngɔn kusum da se ngmalak, nek anɔng, ki mgbey fi in se ayɛt ngɔn in mi sot ahwyi, na tsak e ahwyi me da risik ngmalak.

24“Vit anet fɛ́ a da kyem a ra batek ari bafaa isam. Tit na rawu azining, na a shim azining e, ke na te nhwyɛ wu na azining, na byɛs azining ayi. I da kyem ira yin Adakunom isam ni tsin di ra yin itsɔm isam ni izen izining awo.

Yirik yin kudaam yin na aTisa

25“Nek anɔng, i mi tsin fɛ̀ ni iyin, i bi sak yin kudaam yin naton, ikyɛng iya, ke ifi sɔ, ke ikyɛng fi i da te yin ni irɔm awo. Kutset yin wat nayak awɛ? Kurɔm yin wat ares ite awɛ? 26Yɛrɛ yin nanon aton aza, da na tuus kuyak ke na na tusung nayak ni ikɔ awo, da na bi imyɛ awo, ngma na anɔng, Ada yin fɛ́ a se naton aza ya, ni ina. Iyin wat yin nanon ni ízɔk awɛ? 27Angan ayɛt yin nek kudot kudaam wu, a da kyem a di barang kizen hyihyit naton kutset wu yɛ?

28“Akyɛ sak fi iyin mak daam yin ace yin naton ares ɛ? Di yin fɛ́ ashoy ayit rasak. Da a ra kutomong ki ibat awo. 29Ngma na anɔng, agwɔm aSolomon ayɛt ízɔk wu, man kyem a te ares tɛ azining na awo. 30Iyin fi i bɛ̀ yin inɔɔk atsak hyihyit, ke Adakunom kyem a zem agam ayit yɔng fɛ́ a se ni kutset atut natson na ba te ni irong, a da ki te yin ares fɛ́ a wat ayɔng awɛ? 31Nek anɔng, i bi daam yin ace yin yɛ, ‘Akyɛ fi in da ya yit ɛ, akyɛ fi in da sɔ yit ɛ, akyɛ fi in da te yit ɛ?’ awo. 32Nek banet fɛ́ ba se ni nhwyi, kuri nkyɔrɔk fɛ́ ba tsɛsɛk yɔng, ama anɔng, Ada yin fɛ́ a se naton aza rēn fok iyin shim in ina ba. 33Tun tsɛsɛk yin igwɔm Adakunom ni itek de ni inyen. Ama anɔng, ngma nkyɔrɔk e nang da sot nfiin bà. 34Nek anɔng, i bi daam yin na katson awo, nek katson bi bɛ́ ni kudaam ka. Kaakyi kunom bi kudaam ko.

Currently Selected:

AMatiyu 6: IbaasNT

Highlight

Copy