AMatiyu 2
2
Kubɛ́ bafi kutsik irēn
1Ama kutes aYeso na aBatalami ni mben aJudiya, na aHiridus tsin yet agbat agwɔm ni izen e yɔng. Banet kutsik irēn nse ádat, tsɛ na aRushelima, 2ba se ni irisim, “Ayɔng fɛ́ ba tes fɛ́ ayet agwɔm baYahuda me se kɛ? Iyit di yit àdat wu abatin, in bi in ku ya yit ntong.”
3Fɛ́ agwɔm aHiridus fok anɔng, a nɔ kudaam, gung nɛ banet aRushelima. 4Ama fɛ́ a mi tusung ngma bagbat áware, nɛ bágwɔm irēn ntsi aMusa, a ka ba rip karɔ fɛ́ ba fɛ̀ ba di ki tes Anet-Isheshek e. 5Ba fɛ̀ ni wu, “Ni wɔp aBatalami ni mben aJudiya, nek ikyɛng de fɛ́ atan e kin jɛk,
6‘Awɛt ngɔn aBatalami,
ni mben aJudiya,
ngɔn wu i rat awosong
ayɛt bágwɔm mben aYahuda awo;
nek ayɛt ngɔn wu fɛ́ agwɔm akak bi di ne,
ayɔng fɛ́ a bi yet anek banet aIsrela.’ ”
7AHiridus yes banet kutsik irēn nse ádat e ni nɛt, a shim a rēn akpaf izen fi iba di di àdat e. 8A ka ba tom sak na aBatalami me, a fɛ̀ ni iba, “Tseng yin, tsi tsɛt yin nggon e yelel. Nɔng ki i sɛ yin ika, ni bi ni di tak yin, nɔng in da tsin in ka ka ya ntong.”
9Ama fɛ́ ba ma fok ifɛ̀ agwɔm e, ba yit irèn, àdat e yɔng fɛ́ ba di iwu abatin, a ya kashon ni itseng ashon ba, a tsɛ a nyeseng narɔ fɛ́ ba di tes nggon e. 10Ni izen fɛ́ ba tɛ ba di àdat e, ba nye iyɛ ikan hwyɛ awo. 11Fɛ́ ba nɔ ari me, ba di nggon e ni nggɔ ka aMarya, ba te gururuk aben, ba ka ka ya ntong. Ama anɔng, ba tarak amala bá, ba nɔɔk kunang nkyɔrɔk itsɔm hwyɛ wo, ata asɛng, aluban nɛ amur#2:11 aluban nɛ amur: Mkpe fɛ́ ba di fesem kurong fi in se hwyɔlɔl nɛ name ikon fɛ́ na se hwyɔlɔl.. 12Ba tɛ ba bun sak ni wɔp bá; ba kuus irèn ikak zɛɛt, nek Adakunom mi tsang ka ba kɔrɔk kuto na nabos, yɛ da na ba tɛ ba got narɔ aHiridus awo.
Ba hwyet ni nggon e sak na aMasat
13Ama fɛ́ batsen e mi tseng, aTisa tom atomaza akak ne a tak aYusufu na nabos yɛ, “Dorok, sok nggon e ni nggɔ ka hwyet yin sak na aMasat. Di wey yin azɔng ma in ki tak yin, nek aHiridus da kpa itsɛt ika nɔng a da fɛt.” 14Nek anɔng, aYusufu sok kabang nggon e ni nggɔ ka, ba yit irèn natuk sak na aMasat. 15Ba sot azɔng sak izen iku aHiridus. Na anɔng fɛ́ ba di shining ikyɛng fɛ́ aTisa kin fɛ̀ nanu atan: “Na aMasat wu in yes ari hom.”
AHiridus fɛɛs nnon nabaane
16Ni izen fɛ́ aHiridus rēn fok banet kurēn nse ádat mi ku sak kyɛw, a kpa fes makiyi, a nɔɔk ifɛ̀ fok na ba fɛɛs ngma nnon namatek e fɛ́ na se nkum ayɛ afaa sak aben, fɛ́ na se ni wɔp aBatalami ni nwɔp in bakat, a sok kpaf izen fɛ́ banet kurēn nse ádat fɛ̀ ni iwu. 17Na anɔng, ikyɛng fɛ́ atan aIrimiya kin fɛ̀ di shining,
18“Ba fok nkun banet na Arama,
nanak nɛ kafa kawe makiyi.
Na aRahila tsin tos nek nnon wu.
A rawu dang shan akabɔk,
nek na mi kus.”#2:18 Ban di yin: ARimiya 31:15.
AYusufu tɛ a bun sak na aNazarat
19Ama iku aHiridus, atomaza aTisa tonong ice wu sak na aYusufu na nabos na aMasat, 20a fɛ̀ ni wu, “Dorok, sok kabang nggon e ni nggɔ ka, ti bun sak ni mben aIsrela, nek bayɔng fɛ́ ba se ni itsɛt kutset nggon e, ba mi kus.”
21Nek anɔng, a dorok a sok nggon e ni nggɔ ka, ba tseng sak ni mben aIsrela. 22Awɛt fɛ́ a fok yɛ Arkilayus wu a tsin ya igwɔm akatek wu aHiridus ni mben aJudiya, a fok nnyim ibun azɔng, nek ikyɛng fɛ́ ba mi ku tak na nabos, nek anɔng, ba kana kɔrɔk ba tsɛ ba sonong abak aGalili, 23ba tsɛ ba sot na kabang wɔp fɛ́ ba yes ika aNazaret. Na anɔng ba di shining ikyɛng fɛ́ ba kin jɛk yɛ, “Ba bi ku yes anet aNazaret.”
Currently Selected:
AMatiyu 2: IbaasNT
Highlight
Share
Copy
Want to have your highlights saved across all your devices? Sign up or sign in
© 2019 The Nigeria Bible Translation Trust and © 2019 Wycliffe Bible Translators, Inc.