AMatiyu 19

Itees fɛ́ aYeso nye naton ikam kuweneng

1Ama fɛ́ aYeso mi gang itees e, a won mben aGalili, a tseng sak ni mben aJudiya, fi in se ni inyi kukyɛk aJodan. 2Kudyɛng banet dot ku kuus mo, a ka ba tes kyang azɔng.

3BaFarasi bakak tsɛ ba shim ba ku mara, ba ku rip, yɛ, “Ntsi yit fɛ̀ ey, anet na arɔ abining wu nek kaakyi ikyɛng fi ite yɛ?”

4AYeso fɛ̀ ni iba, “Iyin ki mang fa yin ikyɛng fɛ́ ba jɛk ni kufumung ifɛ̀ Adakunom awɛ? Ba jɛk yɛ, ni imɛsɛng e, ‘Adakunom ka ba nye, amatek nɛ abining.’ 5A fɛ̀, ‘Nek anɔng, anet da won ada wu ni nggɔ wu, na di basak na abining wu, nɛ bafaa me sot kurɔm kuzining.’ 6Nkum atuk e yɔng da ba tɛ ba yet bafaa awo, tit kurɔm kuzining. Nek anɔng, ngma ikyɛng fɛ́ Adakunom mi mon, da anet akak na a kam ide awo.”

7Ba fɛ̀ ni iwu, “Wat akyɛ sak fɛ́ aMusa fɛ̀ ni ijɛk wu, fok anet da kyem a nɔɔk abining wu kufumung ikam iweneng, na te abining e ni irèn ɛ?”

8Wat aYeso fɛ̀ ni iba, “AMusa kin ka ba won nɛ ba kam nweneng, nek ákashalang ayɛ fi iyin bɛ̀ yin. Awɛt ikyɛng e kin se anɔng ni imɛsɛng e awo. 9Awɛt imi fɛ̀ ni yin, ngma anet fɛ́ a kam kuweneng nɛ abining wu, tit nek kujang, a tɛ a di bɔ akak, a se ni ira kujang.”

10Bafi imɛɛs wu fɛ̀ ni iwu, “Ki ikyɛng fi i se nate amatek nɛ abining yɔng, kaduk anet na a sot anɔng dang kuweneng.”

11Wat aYeso ka ba bun ni ifɛ̀ yɛ, “Ayet kaakyɛ anet fɛ́ a da kyem a shan itees yeng awo, tit bayɔng fɛ́ Adakunom mi ka ba nɔɔk irēn ye kyɛk. 12Bakak yet amaring neme ni ites ba. Wat bakak yet amaring, nek banet ka ba te ba sot anɔng. Wat bakak raba dang ra kuweneng nek iyɛ ngash igwɔm Azanɛn. Ayɔng fɛ́ a da kyem a shan itees yeng, na shan iye.”

AYeso tes nnon nabaane awɛng

13Ama anɔng, banet tses ni nnon sak na aYeso, nɔng a bin di saas mbɔk wu naton na, na te a di ras awon ni na. Awɛt bafi imɛɛs wu kpa ka ba kɔn.

14AYeso fɛ̀ ni iba, “Won yin nnon naban e na na bɛs ni imi! I bi ka ba ro yin awo, nek igwɔm Azanɛn yet ifɛ́ banet tɛ ba bang.”

15Ama fɛ́ a mi di saas kubɔk azaton na, a ya kashon ni kutseet wu.

Acam akak fɛ́ a bɛ̀ kurúm

16Atukak, anet akak tsɛ na aYeso, a ku rip yɛ, “Anet itees atek, akyi ikyɛng itek fi in da ra, in di sɛ kutset vit igang ɛ?”

17Wat aYeso fɛ̀ ni iwu, “Akyɛ sak fi ngɔn di risim naton ikyɛng fi iyet itek ɛ? Anet azining wu kyɛk fɛ́ a yet atek. Ki i shim i sɛ kutset, ni berese ntsi Adakunom nang.”

18Anet e tɛ rip aYeso, “Ntsi in ngan me yɛ?”

AYeso fɛ̀ ni iwu, “I bi fɛt akak awo; i bi ra kujang awo; i bi nye itsang awo; i bi bɔ mbɔɔs naton akak awo; 19nɔɔk ada ngɔn, ni nggɔ ngɔn iratek; shim afidang isot ngɔn ti ice ngɔn.”

20Acam e fɛ̀ ni iwu, “Imi mang bereng ntsi nang ngma, akyɛ fi i di kyɛk mo yɛ?”

21AYeso ku bun ni ifɛ̀ yɛ, “Ki ngɔn shim i da sot gyat, tse da tsi irɛp ngma ikyɛng fi ngɔn bɛ̀, nɔng i da bin kaba bakan e, i da ma sɛ kurúm azanɛn. Ama anɔng, ni bi ni di kuus mo.”

22Ni izen fɛ́ acam e fok anɔng, a yit irèn ni ibeseng iyɛ, nek a bɛ̀ kurúm makiyi.

23Wat aYeso fɛ̀ na bafi imɛɛs wu, “Won in ki tak yin atsak, i bi se ni mgbang fɛ́ arum da sɛ kunɔ ayɛt igwɔm Azanɛn! 24Won in bang ki tak yin, i bi se kaduk itsaap-igung ni i nɔ ni iyisi kufet, aza fɛ́ arum da nɔ ayɛt igwɔm azanɛn.”

25Ni izen fɛ́ bafi imɛɛs wu me fok anɔng, ikyɛng e ka ba te yɔɔt makiyi, ba kpa kana risim, “Wat ki ikyɛng e se anɔng, angan wu fɛ́ a bi kyem a sɛ isheshek e yɛ?”

26AYeso ka ba yɛrɛk, a ma fɛ̀, “Ikyɛng fi i gaat anet awe, kaakyi ikyɛng se begelek na Adakunom.”

27ABitrus ku bun ni ifɛ̀ ye, “Di, iyit yɔng in mi won yit kaakyi ikyɛng in da kuus yit mo! Akyɛ fi iyit da sɛ yit ɛ?”

28AYeso fɛ̀ ni iba, “Won in ki tak yin atsak, na kazatse kafas fɛ́ ka bi ne, ni izen fɛ́ Arim Anet bi sonong ni ízɔk kuta igwɔm wu. Iyin fi i di kuus yin, iyin bi sosok yin na ata igwɔm kusɔk abe afaa, ni ras yin icén kusɔk abe afaa ifi aIsrela ishɔt. 29Wɛt ngma ayɔng fɛ́ a mi wosong nasa, ke barunyining, ke banganyining, ke ada, ki nggɔ, ki nnon, ke akɔ ayi, nek imi, a da sɛ ikyɛng fi iwat idɔng hwyɛt, ama anɔng, a bi sɛ kutset vit igang. 30Awɛt banet dot fɛ́ ba se ashon yɔkɔnɔng, bi bun bafɛ́ ama, nɛ bakak dot fɛ́ ba se ama yɔkɔnɔng, bi bun bafɛ́ ashon.

Currently Selected:

AMatiyu 19: IbaasNT

Highlight

Copy