AMatiyu 16

Banet tsɛt aYeso a ka ba tonong ikyɛng idi

1Bakak ayɛt BaFarasi nɛ BaSadusi tsɛ na aYeso, nɔng ba bin ku mara. Ba fɛ̀ ni wu, yɛ na a ka ba tonong ikyɛng idi, fi i da sak ba di rēn fok iwu ne na Adakunom.

2Wat aYeso fɛ̀ ni iba yɛ, “Ke kahwyɛ nye, nɛ kaza sɛng, ni nye yin, ‘Ey yaa! Kaza da se gyat.’ 3Wat nadiding, ‘Ki i di yin kaza seng, nɛ anɔk, ni nye yin atut ba da sɛ aduk awun iza.’ Iyin fi irēn taas yin kaza, awɛt ni irēn nkyɔrɔk fi in tsin tes yɔkɔnɔng ki gaat yin. 4Banet nnu nang yet ámaane, ba raba ikuus Adakunom! Ba tsɛt fok ma ba ka ba tonong ikyɛng idi abes, awɛt vit ikyɛng fɛ́ ba da ka ba tonong tit ifɛ́ aYunana.” AYeso ma ka ba won, a tseng.

AYiis BaFarasi nɛ BaSadusi

5Ni izen fɛ́ bafi imɛɛs aYeso tat sak ni nyi ku ya, ba te burum dang bereng akpam. 6AYeso fɛ̀ ni iba, “Ka na nye yin, nɔ yin ni nhwyɛ yin nɛ ayiis BaFarasi nɛ BaSadusi.”

7Ba kpa cɛɛt wɔɔn ba, ba fɛ̀, “Ke nek in won yit dang bereng yit akpam ɛ?”

8Wat aYeso rēn ikyɛng fɛ́ ba tsin cɛɛt natoon e, a ka ba rip yɛ, “Iyin bafi inɔɔk atsak gyegyet, akyɛ sak fi icɛɛt yin wɔɔn yin ni di tes yin kucɛɛt ite burum akpam ɛ? 9Iyin resek yin dang rēn yin ɛ? Iyin mi te burum yin fi in kin ya nɛ banet agup atoon nɛ ágbang akpam atoon, nakɔmɔng namang fi iyin kin tusung yin ɛ? 10Ke i mi te burum yin fi in kin ya na banet agup anaas nɛ ágbang akpam kanakataat, nakɔmɔng namang fi iyin kin tusung yin ɛ? 11Akyɛ sak fi i ki gaat yin irēn fok da akpam wu fi in di cɛɛt natoon e awɛ? Nye yin nhwyɛ nɛ ayiis BaFarasi nɛ BaSadusi.” 12Ama anɔng, ba da nɛ ba rēn fok da aYeso tsin cɛɛt naton ayiis yɔng fɛ́ ba di nyes akpam awo, a se ni i ka ba tonong fok na ba nye nhwyɛ ni itees BaFarasi nɛ BaSadusi.

ABitrus nɔɔk kanu ifɛ̀ naton aYeso

13Ni izen fɛ́ aYeso tsɛ ta ni mben aKaisariya aFilipi, a fɛ̀ na bafi imɛɛs wu, “Banet fɛ̀, imi, Arim Anet yet angan ɛ?”

14Wat iba fɛ̀ ni wu, “Bakak fɛ̀, ngɔn yet aYohana anet abatisma; bakak fɛ̀, ngɔn yet aIliya; wɛt bakak nye, ngɔn yet aIrimiya ke azining ayɛt batan ayi.”

15Wat iwu ka ba rip yɛ, “Awɛt iyin di yes yin angan ɛ?”

16ASiman Bitrus ku bun ni ifɛ̀ ye, “Ngɔn yet Anet-Isheshek, Arim Adakunom atset.”

17AYeso fɛ̀ ni iwu, “ASiman arim aYunana, ngɔn yet anet awɛng, nek ayet kurɔm ko ku da tonong ikyɛng deng awo, ayet Ada hom fɛ́ a se naton aza wu. 18Nek anɔng, in tsin da tak, ngɔn yet aBitrus, naton kuta kang ko fi in di ki nok bafi ikuus hom, fɛ́ vit agap ari-irong fi ku da kyem ka ya agap bá. 19In da ka nɔk ícarak itarak katitu igwɔm azanɛn, ngma ikyɛng fi i tekpaf yin azatse, i da sot ni itekpaf azanɛn; ngma ikyɛng fi i bisik yin azatse, i da sot ni bisik azanɛn.” 20Ama anɔng, a kɔrɔk bafi imɛɛs wu me kuto, yɛ da na ba tak akak fok iwu wu a yet Anet-Isheshek e awo.

AYeso tak kuri iku fɛ́ a bi ku

21Nkum izen e yɔng, aYeso kpa taas bafi imɛɛs wu ye, i se gbing-gbing na a tse na aRushelima, na a sɔ mgbang zizɛɛt ni bɔk bashɔn, nɛ bagbat áware, nɛ bafi itees ntsi aMusa. Ba bi ku fɛt, ni kunom kufɛ́ ataat, ba bi ku donong.

22ABitrus ku kɔrɔk ni ifam, a ku gyɔng yɛ, “ATisa, jɛm-jɛm! Ikyɛng deng da kyem ite ni ngɔn awo.”

23AYeso tirik, a fɛ̀ na aBitrus, “Sek azeng, aShetan! Ngɔn di yet kuta ituruk kutak, nek kuyiring ngɔn yet kufɛ́ Adakunom awo, tit kufɛ́ banet.”

24Wɛt aYeso fɛ̀ na bafi imɛɛs wu, “Ngma ayɔng fɛ́ a shim a di kuus mo, i se gbing-gbing na a nɔɔk nwaa ice wu, na a sok kukum itegak wu, na a di kuus mo. 25Nek ayɔng fɛ́ a shim a sɛ kutset wu, a da bit iko; awɛt ngma ayɔng fɛ́ a te nwaa kutset wu, nek a di kuus mo, a da sɛ iko. 26Ke anet sɛ kazatse kang ngma kusum na bit kutset wu, wɛt itek e yet akyɛ? Ke akyɛ de fɛ́ anet da kyem a nɔɔk nanu kutset wu yɛ? 27Nek Arim Anet bi bɛ́ ayɛt ízɔk Ada wu nɛ batomaza, na anɔng wu, a bi tarang kaakyɛ anet izang wu kpaf ni kuri kutomong fɛ́ a kin ra. 28Won in ki tak yin atsak, bakak di se ni nyeseng azeng, fɛ́ da ba bi bamang iku awo, sak izen ibun Arim Anet ayɛt igwɔm wu.”

Currently Selected:

AMatiyu 16: IbaasNT

Highlight

Copy