BaYahuda 1
1
Adakunom cɛɛt nanu Arim wu
1Gbang-gbang yame, Adakunom kin cɛɛt ne bada badakop yit ne nanu batan ni nzam izén ni irén zizɛɛt. 2Awɛt ni izen iyeng, fi i yet ifi igang e, a cɛɛt ne yit nanu Arim wu. Ni iwu fɛ́ Adakunom kin di nye kazatse ngma. Adakunom sak Arim wu me na sot anet iya itekari azaton akaakyi ikyɛng. 3Arim wu me, wu fɛ́ a yet mgbey ízɔk Adakunom, a tɛ yet atutup nse Adakunom. Iwu fɛ́ a bereng kaakyi ikyɛng nek agap ifɛ̀ wu. Ama fɛ́ a mi kusu anɛn yit, a da ne sonong azanɛn ni bɔk iyak Agbat Azɔk Bazɔk. 4Ízɔk Arim Adakunom e naat agap ifɛ́ batomaza ni iratek, kyɔn ti iyerek fɛ́ Adakunom ku nɔk iwat nfuba me.
AYeso naat batomaza ni iratek
5Angan ayɛt batomaza me fɛ́ Adakunom kin man fɛ̀ ni wu ye,
“Ngɔn yet Arim hom,
atut imi mi sot Ada ngɔn ɛ?”
Kɛ na tɛ na fɛ̀,
“In da sot Ada wu,
ni iwu da sot
Arim hom ɛ”?
6Awɛt izen fɛ́ Adakunom da tom Arim wu afi imɛsɛng e azatse, a fɛ̀ ye,
“Won batomaza ngma kusum
na ba ku ya ntong.”
7Azaton batomaza, Adakunom fɛ̀ ye,
“Adakunom sak
batomaza wu
na ba sot ti nwun,
nɛ basam wu sot tɛ
alem irong.”
8Awɛt azaton Arim wu me Adakunom fɛ̀ ye,
“Wo Adakunom!
Won kuta igwɔm ngɔn,
ni ku sot gbakgbak,
ishɛn iya igwɔm ngɔn
yet ifi ikaba katsak.
9Ngɔn shim nggɔn kusot kutabat,
ni i rangɔn nggɔn anyas.
Nek anɔng, Adakunom
fɛ́ a yet Adakunom ngɔn,
a mi da kasa,
a mi da korok name
na fi iyɛ ikan
fɛ́ na wat na fɛ́ bafidang.”
10A tɛ fɛ̀,
“Wo aTisa!
Neme ni itumung e,
ngɔn ta itis azatse,
nazanɛn yet
kutomong mbɔk ngɔn.
11Nkyɔrɔk ngma bi gang,
in ba akop ti kukpin,
awɛt ngɔn sot gbakgbak.
12I bi kunung ina
ti kunyin-kukpin,
nɛ ba shesheng ina ti nkpin.
Awɛt ngɔn bi di nak anɔng
kaakyi izen,
ni kutset ngɔn sot vit nkum e.”
13A mang fɛ̀ na angan ayɛt batomaza wu me fok,
“Sonong ni bɔk iyak hom,
tit ma in sak bafi ifa ngɔn,
na aben atak ngɔn ɛ?”
14Akyɛ yet batomaza yɛ? Ba yet nabik fɛ́ na ra Adakunom kutomong, na ka ba toos na ba bin di sɛs bayɔng fɛ́ ba bi sɛ isheshek.
Currently Selected:
BaYahuda 1: IbaasNT
Highlight
Copy
Compare
Share
Want to have your highlights saved across all your devices? Sign up or sign in
© 2019 The Nigeria Bible Translation Trust and © 2019 Wycliffe Bible Translators, Inc.
