Ntomong Batom 6

Ba kasa banet itomong kanakataat

1Ni nnom e yɔng, ni izen fi kudot bafi ikuus e, se ni idi barasa, baYahuda fɛ́ ba cɛɛt ilem aGirik ayɛt ba te kanak fok, baYahuda fɛ́ ba cɛɛt ilem Aram, mak nesek bakumung bá nayak nninom e awo. 2Nek anɔng, batom aYeso kusɔk abe afaa me, tusung ngma bafi ikuus e, ba fɛ̀ ni iba ye, “I da se gyat iyit ni in won yit kutomong ishara ifɛ̀ Adakunom, ni in kpa yit ikabasa nayak awo. 3Nek anɔng ábaruneng, kasa yin banet kanakataat ayɛt yin, bayɔng fi i rēn yin, ba bi nggɔn ntek, ba mi shining na Kabik ne kutsitsɛng kutsik. Iyit da ka ba nɔk yit kutomong kang, 4nɔng iyit da bin nɔɔk yit ace ayɛt ira awon ni itees ifɛ̀ Adakunom.”

5Ikyɛng fɛ́ Batom aYeso me fɛ̀, itɛrɛk banet ngma kusum iyɛ makiyi. Ba kasa aIstifanus, anet fɛ́ a mi shining ayɛt atsak nɛ Kabik aJɛrɛ, nɛ aFilibus nɛ aPurokorus nɛ aNikano nɛ aTimon nɛ aParminas nɛ aNikolas anet Antakiya, ayɔng fɛ́ da a yet afɛ́ aYahuda awo, a yet ayɔng fɛ́ a tirik sak ni ikuus nggɔn baYahuda. 6Ba ka ba nabak ashon Batom aYeso. Batom e di sak mbɔk ni ba, ba ka ba ra awon.

7Ifɛ̀ Adakunom ya kashon ni i rasak. Kudot bafi ikuus di barasa ni aRushelima makiyi, áware dot nesek atsak ni ifɛ̀ aYeso.

Ba tekap aIstifanus

8Ni izen e yɔng, aIstifanus anet fɛ́ Adakunom mi ku shining ni itek wu ni kukyem, a nye nkyɔrɔk ajingjing ni ntomong abes nate banet. 9Wat banet bakak fɛ́ ba ka ba yes bafi inyis karɔ ka washak, fɛ́ ba yet baYahuda fɛ́ ba ne ni wɔp aSirin, nɛ Alekzandiriya, nɛ bayɔng fɛ́ ba ne ni mben aKilikiya, nɛ bafi mben Asiya, iba ba ba kpa nanan na aIstifanus. 10Awɛt ba kyem ba ku mes ni icɛɛt awo, nek Kabik aJɛrɛ ku nɔɔk kutsitsɛng makiyi ni icɛɛt e.

11Nek anɔng, ba tse ba sɔ ice banet bakak ni nɛt fɛ́ ba da fɛ̀, “Iyit fok yit aIstifanus na tsin nye aman-fɛ̀ naton aMusa nɛ Adakunom.”

12Nek anɔng, ba sak nhwyɛ banet nɛ bashɔn iwɔp nɛ bafi itees ntsi aMusa dorok. Iba di ngarak ni aIstifanus, ba ku tekap, ba tse ni wu sak na azumung bashɔn. 13Ba bɛ́ na banet bakak fɛ́ ba tse ba nɔɔk kanu ifɛ̀ mbɔɔs naton wu ye, “Anet yong di fit ibeseng iyerek karɔ iya ntong yit kang fɛ́ ka se Jɛrɛ ni ntsi aMusa. 14Nek iyit fok yit a fɛ̀ fok, aYeso anet aNazaret yong a bi fo karɔ kang, na shesheng nggɔn fɛ́ aMusa kin ki nɔɔk yit.”

15Ngma banet fɛ́ ba se na azumung e, di te ayisi gbit naton aIstifanus, ba di ayisi wu gyɛs tɛ atomaza.

Currently Selected:

Ntomong Batom 6: IbaasNT

Highlight

Copy