2 BaTesaloni 3
3
Itsɛt awon
1Ni gang e ábaruneng, ki ras yit awon, mok ifɛ̀ aTisa bin sɛ iya kashon ziri ziri, ni i sɛ iratek kyɔn ti fi i kin di te ni iyin. 2Ki ra yit awon nɔng ba ki tun yit ni bɔk áduk e nɛ ámaan ánet, nek da ngma banet fɛ́ ba mi nɔɔk atsak awo. 3Awɛt aTisa yet afi itak ni ishining, a di ki nɔɔk yin agap na ki bereng yin kɔn i bi kpa yin ni bɔk amaan e. 4Iyit bɛ̀ yit ite iyɛ na aTisa fok i tsin nye yin ikyɛng fi in ki tak yin, i da ya yin kashon na anɔng. 5Won aTisa na bang ki tonong yin ayɛt ayɛ, ishim Adakunom ni igbingding Anet-Isheshek.
Itabak naton kusot arut
6Ábaruneng, in ki tak yin ifɛ̀ ni iyerek aTisa yit aYeso Kristi, iba nye yin ikyi ikak na afɛ́ arut ayɛt yin awo, iwu yɔng fɛ́ da a nye kusot kpaf ni itees fi i sɛ yin ni yit awo. 7Nek iyin ice yin i rēn yin kusot fi ku se gyat ni di kuus yin ikyɛng fi imɛɛs yin ni yit. In yet yit bafɛ́ arut awo, ni izen fi in se yit gung ni yin, 8da in man ya yit ikyɛng akak dang in ku tarang yit awo. Ka ni kuro, iyit bɔrɔng yit itiri kunom nɛ katuk ni tomong, kɔn in bi sot yit acet na akak yin. 9Da fok inye yit anɔng, nek in kyem yit ni yin i ki sɛ yit mo awo, tit nek in shim in sot yit ikyɛng imɛɛs sak ni yin. 10Nek ni izen fi in resek yit gung ni yin, in kin ki tak yin fok, “Ngma anet fɛ́ da a shim ira kutomong awo, ba bi ku nɔk kuyak awo.”
11In mi fok yit fok bakak ayɛt yin bɛ̀ karut. Ba shim iras kutomong awo; wɔn inɔs aze na aza kyɛk. 12Banet tɛ bayɔng, won in ki tak yin, in cɛɛt ni yin ni iyerek aTisa yit aYeso Kristi, won na ba men nhwyɛ bá, na ba tsɛt ikyɛng iya. 13Wat iyin ábaruneng, i bi rɔrɔng yin ni iras ikyɛng fi i se gyat awo.
14Ke akak rawu dang fok itabak fin in jɛk yit ni fumung kang, di te ayisi makiyi ni wu. I bi moon yin ice ni wu awo, nɔng a da fok nsum. 15Ngma na anɔng, i bi ku sok yin tɛ afi ifa yin awo, tit ku kɔrɔk yin kuto tɛ arunyining yin.
Ite show itek
16Won aTisa ice wu fɛ́ a nesek kukyang, na a ki nɔk yin iko kaakyi izen, na kaakyi irèn. ATisa na se gung ni yin.
17Imi aBulus wu in tsin jɛk ashow yong ni kubɔk hom, anɔng wu a tonong fi in di tes, ijɛk hom yong i se anɔng.
18Won itek aTisa yit aYeso Kristi ni i sot gung ni yin ngma.
Currently Selected:
2 BaTesaloni 3: IbaasNT
Highlight
Copy
Compare
Share
Want to have your highlights saved across all your devices? Sign up or sign in
© 2019 The Nigeria Bible Translation Trust and © 2019 Wycliffe Bible Translators, Inc.
