2 BaKorinti 10

ABulus tsin cɛɛt nɛ bafi ifa ni wu

1Imi ice hom aBulus, in tsin ra awon ni yin nek imen nhwyɛ ni ice ikyang Anet-Isheshek. Imi yet anet fɛ́ ba cɛɛt fok in bi nhwyɛ kin in ki di ayisi na ayisi. Awɛt ki in won karɔ yin ni in cɛɛt na agap, vit nnyim. 2In tsin ra awon ni yin fok, i bi di sak yin ni in cɛɛt nya-nyat izen fi in bi bɛ́ awo, nek imi rēn in da kyem in di tik naton bayɔng fɛ́ ba nye fok ikyɛng fi in nye yit yet nggɔn banet azatse. 3Ngma ni fi in se yit ni irɔm, in ras itsom yit tɛ bafi irɔm awo. 4Nek ares itsom yit yet afi irɔm awo, tit anyin-anyin e fɛ̀ Adakunom nesek, fi in di nyɔ yit ace ngma bafi ifa ni iyit. 5In di bara yit kaakyi kuri nanan, nɛ akaakyi kuri ikyɛng fi iceshek ice ayɛt iraye irēn Adakunom, in saas yit banet kuyiring ifoos ifɛ̀ Anet-Isheshek. 6Imi kana nye yit in da tabak yit bayɔng fɛ́ ba raba ifoos ifɛ̀, ki iyin shim yin i da fok yin ifɛ̀.

7Iyin yɛrɛ yin nkyɔrɔk na ayisi da di yin. Ke akak ayɛt yin di fok iwu yet afɛ̀ Anet-Isheshek, na a bang yiring ice wu fok kpaf ti iwu di yet afɛ̀ Anet-Isheshek, iyit yɔng anɔng bá. 8Ngma ni itsot kugwɔm fi in nye makiyi naton kukyem fɛ́ aTisa di nɔk mok in ki nok yin mo, da nek in ki kɔk yin sak ama awo, imi bɛ̀ ikyɛng nsum awo. 9Imi shim afumung hom na a sot tɛ afi ibara nasok ni iyɛ awo. 10Nek ba nye fok, “Afumung wu nanang, a bɛ̀ agap, awɛt ke a bɛ́ ashon yit na cɛɛt kpuu, kucɛɛt wu me ye kye, ikyɛng ibyɛs.” 11Won banet e na ba rēn fok vit ikyɛng fi in man ki jɛk yin ne na afumung iyit vit azɔng ni iyin, fi i se zɛɛt ni idɔng fi in ki tas yin ayisi na ayisi.

12Iyit kyem yit ni in mara yit ace yit na bayɔng fɛ́ ba kok ace bà fok iba wat bakak awo. Bayɔng fɛ́ ba tsɛt imara ace bà nɛ bakak, na ba shim ba tonoso kuzɛɛt bà, ba yet ashɔp. 13Awɛt iyit da tsot yit kugwɔm nin got yit nkum e awo. Tit nin tsot yit kugwɔm yit sak nkum arɔ fɛ́ Adakunom ki bɔ yit e, in di ra yit kutomong. Ni in di ta yit sak ni yin. 14Iyit mi shorop yit nkum iyit itsot kugwɔm yit naton yin tɛ bayɔng fɛ́ won dang bɛ́ ni yin awo, nek iyit ba in yet yit bafi imɛsɛng fi in ki bɛ́ yin ni ishara ifɛ̀ Anet-Isheshek. 15Itsot kugwɔm itomong yit, mi got nkum awo.

Ite iyɛ yit yet fok, inɔɔk atsak yin, ni ibang ya kashon, nɔng in da bang sɛ yit kawat ibarang kutomong nate yin. 16Ama anɔng, in da tsin in shara yit ifɛ̀ itek e ni mben nkak ashon ni nfiin, na narɔ fɛ́ vit iyit ni itsot kugwɔm naton kutomong fɛ́ bakak man ra. 17Kpaf ti fi i di se ni ijɛk ni ifumung Adakunom ye, “Won ayɔng fɛ́ a da tsot kugwɔm, na a nye anɔng ayit ikyɛng fɛ́ aTisa mi nye.”#10:17 Ban di yin: ARimiya 9:24. 18Nek itere fɛ́ anet nyes ice wu ne fɛ́ ba di ras kutomong awo, tit ayɔng fɛ́ aTisa tere.

Currently Selected:

2 BaKorinti 10: IbaasNT

Highlight

Copy

Compare