2 BaKorinti 1

1Kufumung kang ne ni bɔk hom aBulus, atom fɛ́ aYeso Kristi kasa ni kushim Adakunom, nɛ aruneng yit aTimoti, sak na bafi ikuus fɛ́ ba se na aKorinti ni isherep banet Adakunom fɛ́ ba se ni mben Akaya ngma kusum: 2Won itek ni kukyang fi ku nes na Ada yit Adakunom nɛ aTisa yit aYeso Kristi ni ku sot kufiin.

Adakunom fɛ́ a rēn ki gbinding yit makiyi

3Won iratek ni i sot ifɛ̀ Ada yit Adakunom nɛ aTisa yit aYeso Kristi, Ada fɛ̀ a foos angmishish, iwu fɛ̀ a ki wɔrɔk yit, 4ni izen mgbang, nɔng iyit da kyem in di gbinding yit bayɔng fɛ̀ ba sɛ ayit izot, ni kuri iwɔrɔk fɛ̀ Adakunom ki gbinding yit mo bá. 5Nek ki in sɔ yit mgbang aKristi, nek in yet yit bafuu, anɔng wu fi in sɛs yit gbinding anɔng bá. 6Ki iyit tsin sɔ yit mgbang, in tsin nye yit anɔng, nɔng iyin di sɛ igbingding ni isheshek; ki iyit tsin sɛs yit igbingding, a sot iyin mi se yin gbinding nek akabɔk ni tsesek fi i nye yin ni izen mgbang yit. 7In bɛ́ yit ite iyɛ ni yin makiyi, nek in rēn yit fok, ti i di sɔ yin mgbang gung ni iyit, i da sɛ yin imen iyɛ fi in tsin sɛs yit bá.

8Ábaruneng, iyit shim ni rēn yin tsɛngtsɛng, naton kuri izot fi in tsin sɔ yit na Asiya awo, nek izot e tsi iwat agap yit, fi i sak in di nɔk yit nwaa kutset yit. 9Nek in di yit tɛ ba mi ki tsɛɛt yit ishɔt iku, awɛt ikyɛng e te anɔng, kɔn in bi te yɛndɛng yit ni kukyem yit, tit na Adakunom iwu fɛ́ a kyem a doro na bafaben. 10Iwu fɛ́ a ki tun yit ni izot iku dɔng. Ni wu fi in di te yit iyɛ fok a da tɛ a ki tun yit bá. 11Ise gbing-gbing iyin ni i ki ses yit mo na awon, nɔng banet dot di ki nesek ifeng akuce yit nek ishashang awon banet dot.

ABulus shesheng irèn itseet wu

12Nek itsot kugwɔm yit yet fok, iyit rēn yit na ayɛ yit fok, in nye yit kusot kutek na banet azatse, vit itonoso kutsitsɛng azatse tit kunang Adakunom, imak e ni izen fi in se yit gung ni iyin. 13Nek kaban fumung kang fi in tsin ki jɛk yin ne yet kuyɔng fi i da kyem i fa yin ni rēn yin iko, ite iyɛ hom yet fok, 14ti fi i ki rēn yit gyegyet yɔkɔnɔng, i bi tsot yin kugwɔm ni iyit, ni iyit tsot yit kugwɔm ni iyin atuk fɛ́ aYeso bi bes wu.

15Nek imi rēn anɔng wu fi in shim in tin bɛ́ azɔng narɔ yin ninyen, nɔng iyin da ti i sɛ yin awɛng e afɛ́ afaa. 16In shim in got azɔng narɔ yin, in bi ni in tatɔk sak na aMasedoniya, ama fi in ne na aMasedoniya, in bi tin got azɔng, nɔng i bi di te yin ni rèn sak na aJudiya. 17Iyin di yin ti in nyes nkyɔrɔk kpɛɛ yɛ? Ke i di yin ti ras nkyɔrɔk tɛ banet azatse fɛ́ ba nye, “Ey, ey” nɛ “Awey, awey” ni izen izining ɛ?

18Kyɔn tɛ fɛ́ Adakunom di yet a fɛ́ atsak, ifɛ́ yit sak ni yin mang yet ifɛ̀, “Ey” nɛ “Awey” ni izen izining awo. 19Nek aRim Adakunom, aYeso Kristi, ayɔng fi iyit shara yit ifɛ́ wu nate yin, imi nɛ aSilvanus nɛ aTimoti, ifɛ́ me ki mang yet aEy nɛ aWey awo tit Ey kyek kaakyi izen ayɛt wu. 20Nek ngma nkyɔrɔk fɛ̀ Adakunom man fɛ́ a bi nye, in ses ishining ayɛt aYeso. Nek anɔng wu in di shish yit Anɔng sak na Adakunom nek ízɔk wu. 21Iwu Adakunom fɛ̀ a ki te tsik yit ni iyin ayɛt Anet-Isheshek, iwu fɛ̀ a di korok name ni yit, 22a tɛ di te nagang wu naton yit, a ki te yit Kabik wu a ki yit yit mo sak ni ikyɛng fi i bi bɛ́ ashon.

23Adakunom wu fɛ̀ a yet anet icɛɛt hom, ki ikyɛng fi i di ro ni ibɛ́ na aKorinti yet nek in di kyɛk ikɔn fi in bɛ nek iyin. 24Ayet fok in shim in ki tonong yin igwɔm naton inɔɔk atsak yin awo, tit ni in nye yit ikyɛng fi i da ki bɛ́ yin na kafa kakan, nek i da bang nyeseng yin gbagba ayɛt inɔɔk atsak yin.

Currently Selected:

2 BaKorinti 1: IbaasNT

Highlight

Copy

Compare