1 BaTesaloni 5

1Yɔkɔnɔng ábaruneng, naton izen ni nkɔs nnom, fi nkyɔrɔk nang bi te, i se gbing ma in ki jɛk yin ne awo, 2nek iyin rēn yin tsɛngtsɛng fok kunom Adakunom bi bɛ tɛ akpatang di bes natuk. 3Ni izen fɛ́ banet tsin nye, “Kukyang ni imen iyɛ,” wat gobok ni imaan e ka ba kpa, kpaf tɛ mgbang ites di kpa abin afa, ni ihwyet ka ba gaat.

4Awɛt ábaruneng iyin se yin ayɛt idun e, fi kunom e da ki sok yin amakɔt tɛ akpatang di bɛ́s banet awo. 5Ngma yin i yet yin nnon mgbey ni nnon kunom. Iyit yet yit bafɛ́ atuk kɛ bafɛ́ ahwyi awo. 6Nek anɔng, won in bi sot yit ti nshɛrɛp e yɔng fɛ́ ba se ni nda awo, tit ni in kana nye yit, in tekap yit kurɔm yit. 7Nek bayɔng fɛ́ ba se ni nda, ba mereng natuk, bayɔng fɛ́ ba sɔs na ba feng, ba feng na atuk. 8Awɛt iyit yet yit bafi inom, won ni in tekap yit nrɔm yit, won atsak ni ishim ni i sot tɛ akpara-gwɔm yit, ni ite iyɛ isɛ isheshek sot tɛ abong ni ice yit, 9Nek Adakunom ki sak yit mok iyɔm nɛ kafa kawe wu awo tit nek in sɛ yit isheshek ni bɔk aTisa yit aYeso Kristi. 10Iwu ku nek iyit nɔng kɛ ni in se yit ni ishemeng kɛ ni nda ayi, ni in se yit gung ni iwu. 11Nek anɔng, kana gbinding yin ni kana nok yin kpaf ti fi i se yin ne.

Itabak igang e

12Yɔkɔnɔng in shim in fɛ̀ ni yin ane ábaruneng, nesek yin bayɔng fɛ́ ba tsin bɔrɔng ni kutomong nate yin iratek, iba fɛ́ aTisa ka ba sak iyɛrɛ yin na ba ki gyɔs yin. 13Kaba bereng yin ayɛt iratek makiyi, ni ka ba tonoso yin ishim nek kutomong bá. Sot yin kyang na bafidang. 14Won in ki tak yin ábaruneng, tabak yin bafɛ́ arut, gbinding yin bafi nnyim, di sɛs yin bafi kurat, nye yin akabɔk na akaangan. 15Da akak na a tarang akak na anyas awo, tit na a nye nyɛk, nye yin itek sak na bafidang ni nshɛrɛp banet.

16Nye yin kafa kakan kaakyi izen; 17ya yin kashon na awon; 18nesek yin ifeng na akaakyi ikyɛng, nek anɔng wu fɛ́ Adakunom shim ni yin fi i se yin na Anet-Isheshek aYeso.

19I bi fɛt yin kurong abik awo; 20i bi byɛs yin itaas-ibes awo. 21Mara yin kaakye. Bereng yin ikyɛng fi i yet itek. 22Rayin kaakye fi i yet imaan e.

23Won Adakunom ice wu, ki sak yin ni sot yin jɛrɛ, na a ya kashon a ki tes yin jɛrɛ. Won kabik yin ngma kusum ni kutset yin ni kurɔm yin ni in sot vit ibeseng sak ni izen ibɛ́ aTisa yit aYeso Kristi. 24Nek iwu yɔng fɛ́ a ki yes yin, yet afi ifɛ̀ ni ishining, a da shining ifɛ̀ wu.

25Ábaruneng, ki ras yit awon. 26Te show ngma bafi ikuus ni kuri ishim bafi ikuus. 27In ra awon ni yin ni iyerek aTisa, sak yin na ba fa kufumung kang sak na baruneng ngma kusum.

28Won itek aTisa yit aYeso Kristi ni i sot gung ni yin.

Currently Selected:

1 BaTesaloni 5: IbaasNT

Highlight

Copy

Compare