1 BaTesaloni 2

Kutomong aBulus na aTesaloni

1Iyin rēn yin ábaruneng, fok itsen fi in kin ki bɛ́ yin ne, i kin yet ifɛ́ abap awo. 2Ngma ni izot ni itok fin in kin sɔ yit na aFilipi, kyɔn ti iyin di rēn yin, ngma na anɔng, in sɛs yit agap na Adakunom yit, fi in ki tas yin mo ifɛ̀ itek, ngma ni iraye fi in sɛs yit. 3Nek itabak fi iyit mi ki nye yin ne, yet ifi mbɔɔs kɛ iyiring imaan e awo, kɛ nek in tsɛt yit in ki gorok yin awo. 4Anɔng awo, kucɛɛt yit yet kufɛ́ banet fɛ́ Adakunom mi di te ncicɛ wu, fɛ́ ba di sak iyɛ nek ishara ifɛ̀ itek. In tsin tsɛt yit in tɛrɛk yit banet iyɛ awo, tit Adakunom fɛ́ a mara ayɛ yit. 5Iyin rēn yin fok, iyit kin ra yit kutomong na arɔtɔt anu kɛ in nɛt yit nse yit mok in ki mɔɔt yin mo awo, Adakunom rēn anɔng. 6Iyit kin tsɛt yit itere banet awo, kɛ ni yin kɛ na akak awo.

Tɛ batom aYeso, zɔng ki kunanang yit se naton yin. 7Ngma na anɔng, tɛ batom aKristi, in kin ki bereng yin hwyɛ, kpaf tɛ anyi nggon di berese nabin nnon wu. 8In ki shim yin gyet awo, fi isak ayɛt itɛrɛk iyɛ in nyeseng yit ni ishara ifɛ̀ Adakunom kyek awo, in nɔɔk yit kutset yit bà, nek iyin mi ki nɔ yit ni iyɛ. 9Ábaruneng, in rēn fok, i rēn yiring yin kutomong ni mgbang fi in sɔ yit, in ras yit kutomong e katuk ni kunom, kɔng in bi sot yit kunanang na akak ni izen ishara ifɛ̀ Adakunom sak ni yin.

10Iyin ice yin da kyem itak yin, Adakunom ice wu da kyem a cɛɛt akuce yit, kuri kusot aJɛrɛ, ni kusot kutabat yit, ni kusot avit inɛn fi in nye yit, ni iyin bafi inɔɔk atsak. 11Iyin rēn yin fok, in nye yit kusot yit ni iyin tɛ ada di nyes ni nnon wu, 12in ki gbingding yin, ni in ki tabak yin, ni in nye ni iyin, ni i nye yin kusot fi ku se gyat ashon Adakunom, iwu fɛ́ a ki yes yin sak ayɛt igwɔm ni ízɔk wu.

13Nek anɔng wu fi in nesek yit ifeng na Adakunom kaakyi izen, nek nkum fi i kin di shan yin ifɛ̀ Adakunom, fi i kin fok yin ni yit, i kin shan yin ide ti ifɛ̀ anet awe awo, tit ti ifɛ̀ Adakunom fi i se ni kutomong ayɛt yin bafi inɔɔk atsak. 14Ábaruneng, nek iyin mi sot yin bafi imɛɛs nggɔn banet Adakunom ayɛt Anet-Isheshek aYeso fɛ́ ba se na aJudiya. I sɔ yin izot ni bɔk bafi mben yin, kpaf tɛ fi bafi ikuus e yɔng kin di sɔ izot ni bɔk baYahuda, 15fɛ́ ba fɛt aTisa yit aYeso, nɛ batan, ama anɔng ba ki tun yit amatse. Ba beseng Adakunom iyɛ, ba se ni ifà na banet ngma kusum 16ba nye nyɛk fok ba ki ro yit ni ishara ifɛ̀ sak ni Ícɛn-iduk kɔn ba bi sɛ isheshek. Nek anɔng wu, ba di tusung ice bà inɛn. Kafa kawe Adakunom bi tik ni ba ni igang e.

ABulus ya iyɛ kudi banet aTesaloni

17Awɛt ábaruneng, neme fi in kana kam yit, (ni rɔm da ni kuyiring awo) in fi kizen gyeet, in ti in sɛ yit kudi yin awo, in bɛ̀ yit iyɛ ngash, in ya yit iyɛ makiyi ki in mi bɛ́ in ki di yin. 18Nek in tsɛt yit irèn in bi in ki di yin, amak e imi aBulus mi tsɛt in bɛ́ izen dot, awɛt aShetan di tɛnɛsɛ. 19Nek akyɛ de fi i yet ite iyɛ yit, ni ifeng yit, nɛ abong ízɔk fi in bi di nye yit mgbep ashon aTisa yit aYeso nizen kubɛ́ wu, ke da a yet iyin awɛ? 20Na tsak, iyin ba i yet yin ízɔk ni mgbep yit.

Currently Selected:

1 BaTesaloni 2: IbaasNT

Highlight

Copy

Compare