ISAIJA 9
9
Kapitlu 9
1Il-poplu li kien miexi fid-dlam
ra dawl kbir;
in-nies li joqogħdu f’art id-dlam
dawl idda fuqhom.#Mt 4,15-16; Lq 1,79.
2Int kattart il-ġens,
kabbart l-hena;
huma ferħu quddiemek,
bħalma jifirħu fi żmien il-ħsad,
bħalma jifirħu fi qsim il-priża.#S 126.
3Għax il-madmad li kien itaqqlu,
u l-ħatar ta’ fuq spallejh,
u l-bastun tal-argużin,
int kissirthom bħal f’jum Midjan.#Mħ 7,15-25; Is 10,25-26; 14,25.
4Għax kull qorq li jħabbat fit-taqtigħa,
kull mantell mgħargħar fid-demm
jispiċċa għall-ħruq,
biex jieklu n-nar.#Eżek 39,9.
5Għax tweldilna tifel#9,5: Tweldilna tifel: Għimmanu-el; ara 7,14; 8,8.,
ingħatalna iben;
is-setgħa tkun fuq spallejh, u jsemmuh:
“Kunsillier tal-għaġeb, Alla setgħan,
Missier għal dejjem, Prinċep tas-sliem.”#Ġen 49,10; Num 24,17; 2 Sam 7,12-16; S 72,7; Is 7,14; Mik 5,1-3; Żak 9,9; Lq 2,11.
6Kbira tkun setegħtu,
u s-sliem bla qjies
fuq it-tron ta’ David u s-saltna tiegħu.
Hu jwettaqha u jsaħħaħha
bil-ħaqq u s-sewwa,
minn issa u għal dejjem.
Il-ħeġġa tal-Mulej tal-eżerċti tagħmel dan.#Ġer 23,5; Lq 1,32-33; 2,14.
L-għadab ta’ Alla kontra Iżrael
7Bagħat Sidi kelma kontra Ġakobb,
u waqgħet fuq Iżrael.#Is 55,10-11.
8Il-poplu kollu jkun jaf,
Efrajm u dawk li jgħammru f’Samarija,
dawk li jgħidu mkabbra u suppervi f’qalbhom:
9“Waqa’ x-xaqquf, nibnu bil-ġebel minġur;
tqaċċat il-ġummajż, inxettlu ċ-ċedru.”
10U l-Mulej qajjem kontrih l-avversarji tiegħu,
u xewwex l-għedewwa tiegħu:
11Lil Aram#9,11: Aram: is-Sirja fuq il-Grigal tal-Palestina. Il-Filistin: li kienu jgħammru fix-xatt tal-Mediterran fil-Lbiċ tal-Palestina. mil-Lvant, u l-Filistin mill-Punent,
li belgħu lil Iżrael b’ħalq daqsiex.
B’danakollu l-kotra tiegħu ma reġgħetx lura,
u idu għadha merfugħa.#Prov 30,14; Ġer 10,25; Mik 3,3; Ħab 1,13.
12Il-poplu ma darx lejn min darbu,
u l-Mulej tal-eżerċti ma fittxewhx.#Ġer 5,3-6; Għam 4,6-11; Hos 7,10-15.
13Għalhekk il-Mulej qata’ minn Iżrael
ir-ras u d-denb,
il-palma u s-simar f’jum wieħed;
14l-anzjan u n-nobbli huma r-ras,
u l-profeta, mgħallem il-gideb, id-denb!
15Il-mexxejja ta’ dan il-poplu mexxewh ħażin,
u ntilfu l-immexxijin.#Is 28,7; Ġer 2,7; 5,31; 20,6; 23,13-14; 29,30-32; Eżek 13,1-7; 22,28; Mik 3,11.
16Għalhekk Sidi ma jħennx għaż-żgħażagħ tagħhom;
ma jitħassarx l-iltiema u r-romol tagħhom.
Għax ilkoll midgħajja u ħżiena;
kull fomm jitkellem il-bluha.
Minkejja dan għadbu ma reġax lura,
u idu għadha merfugħa.
17Għax il-ħażen bħal ħuġġieġa nar,
jibla’ x-xewk u l-ħurrieq,
u jqabbad il-ħatab tal-masġar,
u jinbarmu ’l fuq f’kolonna duħħan.
18Bl-għadab tal-Mulej tal-eżerċti maħruqa l-art,
u l-poplu bħal ikel in-nar,
u ma jaħmilx wieħed lil ieħor.
19Jaħtaf min-naħa tal-lemin, u jibqa’ bil-ġuħ,
jiekol min-naħa tax-xellug, u ma jixbax,
kull wieħed jiekol laħam għajru.
20Manassi kontra Efrajm#9,20: Manassi-Efrajm: iż-żewġ tribujiet ewlenin tas-saltna ta’ Iżrael.,
Efrajm kontra Manassi,
it-tnejn flimkien kontra Ġuda.
Minkejja dan għadbu ma reġax lura,
u idu għadha merfugħa.
Currently Selected:
ISAIJA 9: MB20
Highlight
Share
Copy
Want to have your highlights saved across all your devices? Sign up or sign in
Maltese DC Bible © Malta Bible Society, 2020.