EFESIN 5
5
Kapitlu 5
1Kunu, mela, tixbhu lil Alla, bħala wlied maħbuba,#Mt 5,48. 2u imxu fl-imħabba, bħalma Kristu wkoll ħabb lilna#5,2: Bħalma Kristu wkoll ħabb lilna: Mss oħra ħabb lilkom. u ta lilu nnifsu għalina, offerta u sagrifiċċju jfuħu quddiem Alla.#Eż 29,18; S 40,6; Eżek 20,14; Rum 14,15; Gal 2,20; Lhud 10,10. 3Żina u kull xorta ta’ faħx jew regħba, ebda waħda minnhom ma għandha biss tissemma fostkom, kif jixraq lill-qaddisin.#Kol 3,5. 4U anqas kliem baxx u kliem iblah, jew ċajt mhux sewwa, kollha ħwejjeġ li ma jixirqux; imma aktar għandu jkun hemm fostkom radd il-ħajr.#Ef 4,20; Kol 3,8. 5Għax dan kunu afu: li ebda żieni jew faħxi jew rgħib - li hu idolatra - ma jkollu wirt fis-Saltna ta’ Kristu u ta’ Alla.#1 Kor 6,9-10; Kol 3,5.
Imxu ta’ wlied id-dawl
6Tħallu lil ħadd iqarraq bikom bi kliem fieragħ, għaliex minħabba f’hekk tinżel il-korla ta’ Alla fuq dawk li ma jisimgħux.#Rum 1,18; Kol 2,4-8; 3,6. 7Mela tissieħbu qatt magħhom! 8Intom kontu darba dlam, imma issa intom dawl fil-Mulej; għixu ta’ wlied id-dawl li intom;#Lq 16,8; Ġw 12,36; Ef 2,11-13; Kol 1,13; 1 Pt 2,9. 9frott id-dawl jinsab f’kulma hu tjieba, f’kulma hu ġustizzja, f’kulma hu verità. 10Fittxu li tagħrfu dak li jogħġob lill-Mulej,#Rum 12,2. 11u tisseħbux fl-għemejjel tad-dlam bla frott, imma ikxfuhom fil-beraħ.#Rum 16,17; 2 Tess 3,6; 2 Ġw 10-11. 12Għax dak li qegħdin jagħmlu huma fil-moħbi, tistħi mqar jekk issemmih; 13imma meta wieħed joħroġhom fil-beraħ, id-dawl juri kollox,#Ġw 3,20-21. 14għax kulma jidher hu dawl; għalhekk jingħad:
“Stenbaħ int, li int rieqed,
u qum mill-imwiet,
ħa jiddi fuqek Kristu#5,14: Ħa jiddi fuqek Kristu: dan il-vers hu meħud minn xi innu liturġiku tal-Knisja primittiva..”#Is 26,19; 51,17; 52,1; Rum 13,11.
15Qisu sewwa kif iġġibu ruħkom, mhux bħal nies bla dehen, iżda bħal nies għorrief, 16li jgħożżu ż-żmien, għaliex ħżiena huma l-jiem.#Għam 5,13; Kol 4,5. 17Għalhekk tkunux bla għaqal, imma fittxu x’inhi r-rieda tal-Mulej.#Rum 12,2; Kol 1,9. 18U tiskrux bl-inbid, li fih hemm ħajja bla rażan, iżda mtlew bl-Ispirtu. 19Kantaw flimkien salmi, innijiet u għana spiritwali; kantaw u għannu minn qalbkom lill-Mulej.#S 32,2-3; Kol 3,16. 20Roddu dejjem ħajr għal kollox lil Alla u l-Missier, f’isem Sidna Ġesù Kristu.#Kol 3,17.
Kristu u l-Knisja mudell għall-miżżewġin
21Oqogħdu għal xulxin fil-biża’ ta’ Kristu.#1 Pt 5,5. 22Intom in-nisa oqogħdu għal żwieġkom bħallikieku għall-Mulej,#Ġen 3,16; Kol 3,18; 1 Pt 3,1. 23għax ir-raġel hu ras il-mara, bħalma Kristu hu ras il-Knisja, is-salvatur tal-Ġisem tiegħu.#1 Kor 11,3. 24Għalhekk, bħalma l-Knisja toqgħod għal Kristu, hekk ukoll in-nisa għandhom joqogħdu għal żwieġhom f’kollox.#Kol 3,19; 1 Pt 3,7.
25Intom, l-irġiel, ħobbu n-nisa tagħkom, kif Kristu ħabb il-Knisja u ta ħajtu għaliha.#Ef 1,22; Kol 1,18. #Lhud 10,10-14; 13,12. 26U dan għamlu biex iqaddisha u jnaddafha bil-ħasil tal-ilma u l-kelma#5,26: Inaddafha bil-ħasil tal-ilma: allużjoni għall-użanza orjentali tal-banju ritwali tal-għarusa qabel iż-żwieġ. L-Appostlu għandu f’rasu l-ilma - il-banju - tal-magħmudija u l-kelma li tmur magħha; biha tinħoloq il-komunità nisranija mal-għarus tagħha Ġesù Kristu.#Tit 3,5. 27u biex iressaqha quddiemu, din il-Knisja, sabiħa, bla tebgħa, bla tikmix, bla għajb, u b’xejn minn dan, imma qaddisa u bla tmaqdir minn ħadd.#2 Kor 11,2; Kol 1,22.
28Hekk għandhom ukoll l-irġiel iħobbu n-nisa tagħhom bħallikieku ġisimhom stess. Min iħobb ’il martu jkun iħobb lilu nnifsu. 29Qatt ħadd ma bagħad ’il ġismu stess, iżda jmantnih u jieħu ħsiebu, bħalma jagħmel Kristu mal-Knisja, 30għax aħna lkoll membri tal-Ġisem tiegħu.#Rum 12,5; 1 Kor 6,15; 12,27; Ef 1,22-23; Kol 1,18. 31Għalhekk ir-raġel iħalli lil missieru u ’l ommu u jingħaqad ma’ martu, u jsiru t-tnejn ġisem wieħed.#Ġen 2,24; Mt 19,5. 32Dan il-misteru - qiegħed ngħid għal Kristu u għall-Knisja - huwa kbir!#Apk 19,7. 33Għalhekk intom ukoll, kull wieħed minnkom, għandu jħobb lil martu bħalu nnifsu, u l-mara għandha ġġib rispett lil żewġha.
Currently Selected:
EFESIN 5: MB20
Highlight
Share
Copy
Want to have your highlights saved across all your devices? Sign up or sign in
Maltese DC Bible © Malta Bible Society, 2020.