2 MAKKABIN 13
13
Kapitlu 13
Ir-rebħa fuq Lisja u l-mewt ta’ Menelaw (163 QK)
1Fis-sena 149#13,1: Fis-sena 149: 163 QK. waslet l-aħbar għand in-nies ta’ Ġuda li Antijoku Ewpator kien ġej b’kotra kbira ta’ nies lejn il-Lhudija. 2Miegħu kien hemm ukoll Lisja u t-tutur u l-amministratur tiegħu, kull wieħed b’eżerċtu Grieg ta’ mija u għaxart elef fanterija, ħamest elef u tliet mija kavallerija, tnejn u għoxrin iljunfant, u tliet mitt karru bl-imnieġel kull wieħed.#1 Mak 6,30.
3Magħhom kien hemm ukoll Menelaw, li kien qiegħed iqarraq b’Antijoku u jsus fuqu, mhux għall-ġid ta’ pajjiżu imma biex iżomm il-poter f’idejh. 4Iżda s-Sultan tas-slaten xegħel il-korla ta’ Antijoku kontra dan il-misħut, u meta Lisja wrieh li dan kien il-ħtija ta’ din il-ħsara kollha, is-sultan ordna li jeħduh f’Berija#13,4: Berija: illum Aleppo fis-Sirja., u joqtluh skont id-drawwa ta’ dak il-post.#1 Tim 6,15; Apk 17,14; 19,16. 5Kien hemm f’dan il-post torri ħamsin driegħ għoli u mimli rmied#13,5: Torri ħamsin driegħ għoli u mimli rmied: din ix-xorta ta’ torri kienet użata mill-Persjani. L-irmied aktarx kien sħun bil-ġamar fih, biex l-ikkundannat imut fgat.. Kellu magna ddur fuqu li minn kull naħa kienet iżżerżaq kollox minn fuqha fl-irmied. 6Hawn kienu jieħdu lil kull min kien ħati ta’ xi sagrileġġ jew li jkun għamel xi delitt ieħor kbir, u jwaddbuh għall-qerda. 7B’dan il-mod kellu jmut dan il-midgħi ta’ Menelaw bla ma kellu difna fl-art. 8U hekk kien jixraqlu! Kien hu li għamel ħafna delitti kontra l-artal, li n-nar u l-irmied tiegħu huma ħwejjeġ qaddisa. U fl-irmied kellu jsib mewtu!
9Is-sultan, mela, ġie b’rasu mimlija b’fehmiet selvaġġi bil-ħsieb li juri lil-Lhud ħwejjeġ agħar minn dawk li ġraw fi żmien missieru. 10Malli Ġuda sar jaf b’dan, ordna lill-kotra biex jitolbu, binhar u billejl, lill-Mulej, ħalli, bħal drabi oħra, hekk issa jgħin lil dawk li kienu se jkunu mċaħħdin mil-Liġi, minn art twelidhom u mit-tempju mqaddes;#1 Mak 4,36-37. 11li ma jħallix li l-poplu, li kien għadu kif beda jieħu r-ruħ, jaqa’ f’idejn il-ġnus midgħajja. 12Hekk għamlu lkoll flimkien u għal tlitt ijiem sħaħ talbu bla waqfien lill-Mulej ħanin, mixħutin wiċċhom fl-art, jibku u jsumu. Imbagħad Ġuda għamlilhom il-qalb u ordnalhom iħejju ruħhom.#Ġoel 2,12.
13Wara laqgħa li kellu mal-anzjani ddeċieda li joħroġ u jaqtagħha bl-għajnuna ta’ Alla qabel mal-eżerċtu tas-sultan jilħaq jidħol fil-Lhudija u jaħtaf il-belt f’idejh. 14Għalhekk telaq xortih f’idejn il-Ħallieq tad-dinja, ħeġġeġ lin-nies tiegħu biex jitqabdu qalbiena sal-mewt għal-liġijiet, it-tempju, il-belt, art twelidhom, u l-istituzzjonijiet tagħhom. Waqqaf il-kamp ħdejn Modin. 15Imbagħad lin-nies tiegħu tahom il-kelma tal-qaddis: “Ir-rebħa ta’ Alla!” Għażel xi żgħażagħ mill-aktar qalbiena, u nxteħet billejl fuq it-tinda tas-sultan u qered mal-elfejn raġel fil-kamp u nifdu wkoll l-aqwa wieħed fost l-iljunfanti bis-sewwieq tiegħu b’kollox li kien fuq it-torri.#1 Mak 6,43-46; 8,23. 16U fl-aħħar imbagħad waqa’ biża’ kbir fuq il-kamp u taħwida sħiħa, u l-Lhud reġgħu lura rebbieħa. 17Dan kollu ġara ma’ sbiħ il-jum bl-għajnuna u l-ħarsien tal-Mulej li kien miegħu.
18Is-sultan, wara li daq il-ħila tal-Lhud, beda jara jaħtafx bil-qerq il-postijiet iffortifikati.#1 Mak 6,48-53. 19Għalhekk resaq lejn Betsur, fortizza mħarsa tajjeb mil-Lhud, imma tefgħuh lura; raġa’ attakka, u raġa’ ġarrab it-telf.#1 Mak 4,29. 20Lil dawk li kienu ġewwa, Ġuda kien jibagħtilhom kulma kien jenħtieġ. 21Rodoku, wieħed mill-eżerċtu Lhudi, kixef xi sigrieti militari lill-għedewwa, imma fittxewh, qabduh, u tefgħuh il-ħabs.
22Għat-tieni darba s-sultan beda t-taħditiet man-nies ta’ Betsur, newlilhom idu, ftiehmu u telaq. Imbagħad ħabat għan-nies ta’ Ġuda, u mar minn taħt.
23Iżda malli sar jaf li Filippu, li kien ħalla f’Antjokja bħala amministratur, irvella kontrih, is-sultan inkwieta. Tkellem mal-Lhud, qagħad għal li talbuh, u ħalef li jirrispetta l-pattijiet ġusti kollha. Irranġa magħhom u offra sagrifiċċju, mar iqim it-tempju u wera r-rispett tiegħu lejn il-post. 24Għamel laqgħa sabiħa lill-Makkabi, u ħalla lil Ħegemonidi gvernatur tad-distrett minn Tolemajs sa art il-Gerrenin. 25Imbagħad mar Tolemajs; in-nies ta’ Tolemajs urewh li xejn ma għoġbuhom il-pattijiet, inkurlaw u riedu li jitħassru. 26Għalhekk Lisja tala’ fuq palk u ddefenda kemm felaħ kulma kien miftiehem, ipperswadiehom u ġiebhom f’sensihom. Imbagħad telaq għal Antjokja. Dan hu li ġara meta s-sultan ħabat għall-pajjiż u raġa’ lura.
Currently Selected:
2 MAKKABIN 13: MB20
Highlight
Copy
Compare
Share
Want to have your highlights saved across all your devices? Sign up or sign in
Maltese DC Bible © Malta Bible Foundation, 2020.