Números 2
2
Jiñi yumʌlob ti jujunmojt i p'olbal israelob #2.0 Jiñi lajchʌnmojt i p'olbal Israel tsa' t'oxleyob ti chʌnmojt: Jiñi junmojt año' bʌ ti' wenta Judá tsa' chumleyob ti' junwejl tabernáculo ti' tojel i pasibal q'uiñ (v. 3-9); jiñi junmojt año' bʌ ti' wenta Rubén, tsa' chumleyob ti sur (v. 10-16); jiñi junmojt año' bʌ ti' wenta Efraín, tsa' chumleyob ti' tojel i bʌjlibal q'uiñ (v. 18-24); jiñi junmojt año' bʌ ti' wenta Dan, tsa' chumleyob ti norte (v. 25-31).
1Lac Yum tsi' pejca Moisés yic'ot Aarón, tsi' su'beyob: 2“Pejtelel jiñi israelob la' chumlecob ti' joytʌlel jiñi Tabernáculo ba' mi la' tempan la' bʌ ti' mojt ti' mojt ti' t'ejl i bandera, yom mi' wa'chocoñob pisil bʌ i yotot ti' joytʌlel jiñi Tabernáculo ba' mi la' tempan la' bʌ.”#2.2 Jiñi israelob tsa' jijliyob che' bajche' mi yajñelob soldadojob, xotolob i cha'añ jiñi Tabernáculo ba' mi la' tempan la' bʌ. U'uxmojt tsa' ajñiyob ti jujunwejl jiñi Tabernáculo ti' chʌnwejlel; jiñi levijob tsa' chumleyob ya' ti yojlil ti' joytʌlel jiñi Tabernáculo (v. 17). Isujmlel che' añ ti ojlil jiñi Tabernáculo i yejtalʌch cha'añ ya'añ lac Yum ti yojlil i tejclum (Ex 25.8).
3“Mi caj i chumtʌlob ti' tojel i pasibal q'uiñ, ya' ba'añ i bandera Judá, che' bajche' t'oxbilob ti' mojt ti' mojt jiñi soldadojob. Jiñi am bʌ i ye'tel ti' tojlel i yalobilob Judá jiñʌch Naasón i yalobil Aminadab. 4Jiñi soldadojob tsa' bʌ tsijquiyob: jiñʌch 74,600 wiñicob. 5Lʌc'ʌl jach mi' chumtʌl i p'olbalob Isacar ti' t'ejl Judá. Jiñi yumʌl ti' p'olbal Isacar jiñʌch Natanael i yalobil Zuar. 6Ti pejtelel i soldadojob tsa' bʌ tsijquiyob, jiñʌch 54,400. 7Che' ja'el mi caj i chumtʌlob i p'olbal Zabulón. Jiñi yumʌl ti' p'olbal Zabulón jiñʌch Eliab i yalobil Helón. 8Ti' pejtelel jiñi soldadojob tsa' bʌ tsijquiyob, jiñʌch 57,400. 9Pejtelel ts'ijbubilo' bʌ i c'aba' ya' bʌ añob ba' chumul Judá, añob 186,400 jiñobʌch mu' bʌ caj i majlelob ti guerra che' bajche' t'oxbilob ti' mojt ti' mojt jiñi soldadojob.”
10“Jiñi bandera ba' chumul Rubén ya' mi' caj i yajñel ti sur, che' bajche' t'oxbilob ti' mojt ti' mojt jiñi soldadojob. Jiñi yumʌl ti' p'olbal Rubén jiñʌch Elisur i yalobil Sedeur. 11Ti' pejtelel jiñi soldadojob tsa' bʌ tsijquiyob, jiñʌch 46,500. 12Mi caj i chumtʌlob lʌc'ʌl ti t'ejl i p'olbal Simeón. Jiñi yumʌl ti' p'olbal Simeón jiñʌch Selumiel i yalobil Zurisadai. 13Ti' pejtelel jiñi soldadojob tsa' bʌ tsijquiyob, jiñʌch 59,300. 14Che' ja'el ya' mi caj i chumtʌlob i p'olbal Gad. Jiñi yumʌl ti' p'olbal Gad jiñʌch Eliasaf i yalobil Reuel. 15Ti' pejtelel jiñi soldadojob añob 45,650 tsa' bʌ tsijquiyob. 16Ti' pejtelel jiñi ts'ijbubilo' bʌ i c'aba' ya' ba' chumul Rubén añob 151,450 jiñʌch i cha'mojtlel jiñi mu' bʌ caj i majlelob ti guerra che' bajche' añ ti' mojt ti' mojt jiñi soldadojob.”
17“Wi'ilix mi' cajelob ti majlel levijob woli bʌ i ch'ʌmob majlel jiñi Tabernáculo. Che'ʌch mi' cajelob ti xʌmbal ti' mojt ti' mojt che' bajche' añob ya' ba' tsa' jijliyob. Ti jujunmojt añob i bandera.”
18“Ya' ti' tojel i bʌjlibal q'uiñ ba' chumul Efraín ya'añ i bandera, che' bajche' añob ti' mojt ti' mojt jiñi soldadojob. Jiñi yumʌl ti' p'olbal Efraín jiñʌch Elisama i yalobil Amiud. 19Ti' pejtelel jiñi soldadojob tsa' bʌ tsijquiyob, jiñʌch 40,500. 20Ya' mi caj i tem ajñelob yic'ot i p'olbal Manasés. Jiñi yumʌl ti' p'olbal Manasés jiñʌch Gamaliel i yalobil Pedasur. 21Ti' pejtelel jiñi soldadojob tsa' bʌ tsijquiyob, jiñʌch 32,200. 22Che' ja'el ya' mi caj i chumtʌlob yic'ot i p'olbal Benjamín. Jiñi yumʌl ti' p'olbal Benjamín jiñʌch Abidán i yalobil Gedeoni. 23Ti' pejtelel jiñi soldadojob tsa' bʌ tsijquiyob, jiñʌch 35,400. 24Ti' pejtelel jiñi ts'ijbubilo' bʌ i c'aba' ya' ba' chumul Efraín jiñobʌch 108,100 wiñicob. Jiñʌch i yuxmojtlel bʌ mi' loq'uelob majlel che' bajche' añob ti' mojt ti' mojt jiñi soldadojob.”
25“I bandera Dan ya' mi caj i yajñel ti norte, che' bajche' t'oxbil ti' mojt ti' mojt jiñi soldadojob. Jiñi yumʌl ti' p'olbal Dan jiñʌch Ahiezer i yalobil Amisadai. 26Ti' pejtelel jiñi soldadojob tsa' bʌ tsijquiyob, jiñʌch 62,700. 27Mi caj i chumtʌlob i p'olbal Aser ti' t'ejl Dan. Jiñi yumʌl ti' p'olbal Aser jiñʌch Pagiel i yalobil Ocrán. 28Ti' pejtelel jiñi soldadojob tsa' bʌ tsijquiyob, jiñʌch 41,500. 29Che' ja'el i p'olbal Neftalí, mi caj i chumtʌlob ti yam bʌ junwejl i t'ejl Dan. Jiñi yumʌl ti' p'olbal Neftalí jiñʌch Ahira i yalobil Enán. 30Ti' pejtelel jiñi soldadojob tsa' bʌ tsijquiyob, jiñʌch 53,400. 31Ti' pejtelel jiñi tsicbilo' bʌ tsa' bʌ tem chumleyob yic'ot Dan jiñʌch 157,600, wi'il patix tsa' majliyob yic'ot jiñi israelob.”
32Jiñobʌch pejtelel i yalobilob Israel tsa' bʌ tsijquiyob ti' mojt ti' mojt. Ti' pejtelelob añob 603,550 soldadojob. 33Pero jiñi levijob ma'añic tsa' ch'ʌjmiyob ti tsic yic'ot jiñi israelob, che' bajche' lac Yum tsi' su'be Moisés.
34Che'ʌch tsi' meleyob jiñi israelob che' bajche' tsi' yʌlʌ lac Yum ti' tojlel Moisés. Che'ʌch tsa' chumleyob ti' t'ejl tacob i bandera; che'ʌch ja'el tsi' cha'leyob xʌmbal majlel jujuntiquil yic'ot i pi'ʌlob ti' mojt ti' mojt.
Biblia de Estudio en Ch´ol de Tumbalá, Chiapas, México © Sociedad Bíblica de México A.C. Active Translation in Process