Mateo 27
27
Jesús ti' tojlel Pilato
(Mc 15.1; Lc 23.1-2; Jn 18.28-32)
1Ti sʌc'ajel, pejtelel ñuc bʌ motomajob yic'ot xñoxob año' bʌ i ye'tel ti tejclum tsi' pejcayob i bʌ ti' contra Jesús, cha'añ mi' yʌc'ob ti chʌmel. 2Cʌchbil tsi' pʌyʌyob majlel, tsi' yʌc'ʌyob ti' c'ʌb jiñi gobernador i c'aba' Poncio Pilato.#27.2 Poncio Pilato Jiñʌch gobernador romano, tsa' bʌ i cha'le yumʌntel ti Judea che' ti ja'bil 26-36 che' tilemix Cristo.
Tsi' tsʌnsa i bʌ Judas
(Hch 1.17-19)
3Jiñi cha'añ Judas, jiñi tsa' bʌ i yʌc'ʌ Jesús ti' c'ʌb i contra, che' bʌ tsi' q'uele cha'añ tsa'ix i yʌc'ʌ ti wocol Jesús, tsi' mele i pusic'al, tsa' cha' majli i sutq'uin jiñi lujump'ejl i cha'c'al sʌsʌc taq'uiñ ba'añ jiñi ñuc bʌ motomajob yic'ot xñoxob año' bʌ i ye'tel. 4Tsi' yʌlʌ:
—Tsa'ix c cha'le mulil che' bʌ tsa' cʌc'ʌ ti la' c'ʌb jiñi mach bʌ añic i mul.
Tsi' su'beyob:
—Mach c wentajic lojon, bajñel q'uele a bʌ ajñel.
5Jiñi cha'añ Judas tsi' choco jiñi taq'uiñ ti Templo, tsa' loq'ui majlel, tsa' majli i jich' i bʌ. 6Jiñi ñuc bʌ motomajob tsi' lotoyob jiñi taq'uiñ, tsi' yʌlʌyob:
—Tic'bil ti mandar mi la cotsan ti' yajñib ofrenda, come jiñʌch i tojol i ch'ich'el wiñic.
7Che' bʌ tsa' ujti i ña'tañob bajche' mi caj i c'ʌñob jiñi taq'uiñ, tsi' mʌñʌyob jamil i cha'añ xmel p'ejtob, cha'añ ya'i mi' mujquelob jiñi ch'oyolo' bʌ ti yan tac bʌ lum. 8Jiñi cha'añ, añ i c'aba' jiñi jamil c'ʌlʌl wʌle: Jamil mʌmbil bʌ ti' tojol i ch'ich'el wiñic. 9Che'ʌch tsa' ts'ʌctiyi i t'añ jiñi x'alt'añ Jeremías, che' bʌ tsi' yʌlʌ: “Tsi' ch'ʌmʌyob jiñi lujump'ejl i cha'c'al sʌsʌc taq'uiñ, jiñʌch i tojol c'uxbibil bʌ wiñic, come che'ʌch i tojol tsi' yʌlʌyob i yalobilob Israel; 10tsi' yʌc'ʌyob cha'añ i tojol i jamil jiñi xmel p'ejtob, che' bajche' tsi' su'beyon lac Yum.”#Zac 11.12-13; Jer 18.1-7; 32.6-15; Mt 1.22
Pilato tsi' pejca Jesús
(Mc 15.2-5; Lc 23.3-5; Jn 18.33-38)
11Che' bʌ ya' wa'al Jesús ti' tojel i wut jiñi gobernador, tsi' c'ajtibe:
—¿Jatet ba i Reyet judíojob?
Jesús tsi' jac'ʌ:
—Joñon cu.
12Che' bʌ woli i jop'beñob i mul Jesús jiñi ñuc bʌ motomajob yic'ot xñoxob, Jesús ma'añic chuqui tsi' yʌlʌ. 13Jiñi cha'añ Pilato tsi' su'be:
—¿Mach ba añic woli a wu'bin jaychajp chuqui woli' yʌlob ti a contra?
14Pero Jesús ma'añic tsi' jac'ʌ mi jump'ejlic t'añ#Is 53.7; Mt 26.63; Lc 23.9; Jn 19.9 cha'añ pejtelel chuqui woli i yʌlob ti' contra; jiñi cha'añ jiñi gobernador tsa' toj sajti i pusic'al.
Jesús tsa' ajq'ui ti chʌmel
(Mc 15.6-20; Lc 23.13-25; Jn 18.38—19.16)
15I tilelʌch che' ti' yorajlel q'uiñijel, jiñi gobernador mi' yʌc' ti colel juntiquil xñujp'el, mu' bʌ i c'ajtiñob jiñi wiñicob cha'añ mi' colel. 16Ti jim bʌ ora ya' ñup'ul juntiquil wiñic wen cʌmbil bʌ jiñʌch i c'aba' Barrabás. 17Che' bʌ tempʌbilobix jiñi wiñicob, Pilato tsi' c'ajtibeyob:
—¿Majqui la' wom mi cʌc' ti colel? ¿Jim ba Barrabás, o jim ba Jesús jiñi mu' bʌ i pejcʌntel ti Cristo? 18Come yujil Pilato cha'añ ti' tsʌytsʌyñʌyelob jach i pusic'al tsi' yʌc'ʌyob Cristo ti' c'ʌb. 19Che' buchul Pilato ti melobʌjʌl, i yijñam tsi' chocbe tilel t'añ tsi' yʌlʌ:
—Ma'añic chuqui yom ma' tumben jiñi toj bʌ wiñic, come sajmʌl wen ca'bʌl tsa' cu'bi wocol tic ñajal cha'añ jiñi wiñic.
20Pero jiñi ñuc bʌ motomajob yic'ot xñoxob año' bʌ i ye'tel tsi' wersa xic'beyob jiñi wiñicob cha'añ mi' c'ajtibeñob Pilato cha'añ mi yʌc' ti colel Barrabás, pero la' tsʌnsʌntic Jesús. 21Jiñi gobernador, tsi' c'ajtibeyob:
—¿Majqui la' wom mi cʌc' ti colel?
Tsi' jac'ʌyob:
—Barrabás.
22Pilato tsi' su'beyob:
—¿Chuqui la' wom mic tumben, jiñi Jesús mu' bʌ i pejcʌntel ti Cristo?
Ti' pejtelelob tsi' yʌlʌyob:
—La' ch'ijlec ti cruz.
23Jiñi gobernador tsi' su'beyob:
—¿Chucoch? ¿Chuqui ti jontolil tsi' cha'le?
Pero tsa' utsi cajiyob ti c'am bʌ t'añ, tsi' yʌlʌyob:
—La' ch'ijlec ti cruz.
24Che' bʌ tsi' q'uele Pilato ma'añic chuqui tsa' mejli i cha'añ, tsa' jach ñumen tejchiyob ti ca'bʌl leto; jiñi cha'añ tsi' c'ajti ja' cha'añ mi' poc i c'ʌb#27.24 Mi' poc i c'ʌb: I yejtal cha'añ ma'añic i mul woli i lon u'bin, Dt 21.1-9; Sal 26.6. ti' tojelob i wut, tsi' yʌlʌ:
—Joñon ma'añic c mul cha'añ i ch'ich'el ili [toj bʌ]#27.24 Ti yan tac bʌ Biblia ma'añic ili t'añ: Toj bʌ. wiñic; añix ti la' bajñel wenta.
25Pejtelel wiñicob x'ixicob tsi' jac'ʌyob:
—I ch'ich'el ili wiñic la' c toj lojon quic'ot lojon calobilob.
26Che' jiñi tsi' colbeyob Barrabás; che' bʌ tsa' ujti i yʌc' ti jats'ol Jesús ti asiyal, tsi' yʌc'ʌ ti' c'ʌb soldadojob cha'añ mi' ch'ijob ti cruz. 27Jiñi soldadojob i cha'añ jiñi gobernador tsi' pʌyʌyob majlel Jesús ti colem bʌ i mal otot, tsi' tempayob tilel soldadojob ti' joytʌlel Jesús. 28Tsi' jochbeyob i pislel, tsi' mosoyob ti chʌcts'eran bʌ pʌl bʌ bujcʌl i cha'añ soldadojob, 29tsi' xot jalʌyob ch'ix, tsi' yʌq'ueyob ti' jol Jesús, tsi' yʌq'ueyob te' jam ti ñoj bʌ i c'ʌb; tsi' ñocchocoyob i bʌ ti' tojlel, tsi' wajleyob, tsi' yʌlʌyob:
—¡Cotañet i Reyet bʌ judíojob!
30Tsi' tujbayob, tsi' cha' ch'ʌmbeyob jiñi te' jam, tsi' jats'beyob i jol. 31Che' bʌ tsa' ujti i wajleñob, tsi' cha' jochbeyob jiñi pʌl bʌ bujcʌl, tsi' cha' lʌpbeyob jiñi i bujc, che' jiñi tsi' pʌyʌyob majlel cha'añ mi' ch'ijob ti cruz.
Tsi' ch'ijiyob ti cruz Jesús
(Mc 15.21-41; Lc 23.26-49; Jn 19.17-30)
32Che' bʌ tsa' loq'uiyob majlel, tsi' tajayob juntiquil wiñic ch'oyol bʌ ti Cirene i c'aba' Simón; tsi' xic'beyob i q'uechben majlel i cruz Jesús. 33Tsa' c'otiyob ti jump'ejl bujtʌl i c'aba' Gólgota, am bʌ isujmlel ti lac t'añ: i yajñib bʌquel jolʌl, 34tsi' yʌq'ueyob i jap vinagre#27.34 Vinagre: Wen paj bʌ. Mi' c'ʌñob cha'añ i ts'ʌcal we'elʌl yic'ot cha'añ mi' lʌmben i c'uxel lojwel. xʌbʌl yic'ot ch'aj bʌ pimel. Che' bʌ tsi' mits'ti'a, ma'añic tsi' japʌ.
35Che' bʌ tsa'ix i ch'ijiyob ti cruz, tsa' caji i pucbeñob i bʌ i pislel Jesús, tsi' cha'leyob yajcaya ti alas cha'añ mi' ña'tañob majqui mi caj i ch'ʌm, [cha'añ mi' ts'ʌctiyel tsa' bʌ i yʌlʌ x'alt'añ: “Tsi' pucbeyob i bʌ c pislel yic'ot tsi' cha'leyob alas cha'añ mi' tsictiyel majqui mi' ch'ʌm c bujc”]#27.35 Woli' taj ti t'añ Sal 22.18. Ti yan tac bʌ Biblia ma'añic ili t'añ: Cha'añ mi' ts'ʌctiyel tsa' bʌ i yʌlʌ x'alt'añ: “Tsi' pucbeyob i bʌ c pislel yic'ot tsi' cha'leyob alas cha'añ mi' tsictiyel majqui mi' ch'ʌm c bujc.” 36Tsa' buchleyob i cʌntan. 37Tsi' ch'ijiyob te' ti' chañelal i jol Jesús ba' ts'ijbubil t'añ ti' contra: ILI WIÑIC JIÑɅCH JESÚS, I REY JUDÍOJOB.
38Tsi' ch'ijiyob cha'tiquil xujch' yic'ot Jesús, juntiquil ti' ñoj, yam bʌ ti' ts'ej. 39Jiñi woliyo' bʌ ti ñumel tsi' p'ajayob Jesús, tsi' ñijcayob i jol. 40Tsi' yʌlʌyob: Jatet, mu' bʌ a jisan Templo, mu' bʌ a cha' wa'chocon ti uxp'ejl q'uiñ, coltañ a bʌ, mi i Yalobilet Dios, juben ti cruz.#Mt 4.3,6; 26.61; Jn 2.19; Hch 6.14
41Che' ja'el jiñi ñuc bʌ motomajob tsi' wajleyob Jesús temel yic'ot xts'ijbayajob, yic'ot fariseojob yic'ot xñoxob año' bʌ i ye'tel, tsi' yʌlʌyob: 42Tsi' colta yaño' bʌ, pero mach mejlic i bajñel coltañ i bʌ; mi jiñʌch i Rey Israel mi' yʌl, la' cu ju'bic ya' ti cruz wʌle, che' jiñi mi caj lac ñop. 43Tsi' ñopo Dios; la' cu i coltañ wʌle mi che' yom, come tsi' yʌlʌ: “Joñon i Yalobilon Dios.”#Sal 22.8; Jn 5.18; 10.36; 19.7
44Jiñi xujch'ob, tsa' bʌ ch'ijleyob ti cruz yic'ot Jesús, tsi' wajleyob ja'el.
Tsa' chʌmi Jesús
(Mc 15.33-41; Lc 23.44-49; Jn 19.28-30)
45Ti xinq'uiñil tsa' ic'a pañimil c'ʌlʌl ti och'ajel q'uiñ. 46Che' yom i taj och'ajel q'uiñ,#27.46 Och'ajel q'uiñ: Jiñʌch che' uxp'ejlix hora i ñumel ti xinq'uiñil. Jesús tsi' cha'le c'am bʌ t'añ, tsi' yʌlʌ: Elí, Elí, ¿lama sabactani? (Mu' bʌ i yʌl ti lac t'añ: C Dios, C Dios, ¿chucoch tsa' cʌyʌyon?).#27.46 Sal 22.1. Jiñi t'añ: Elí, Elí, añ ti hebreo; jiñi i c'ajtibal: ¿lama sabactani?, añ ti' t'añ arameo.
47Che' bʌ tsi' yu'biyob jiñi lʌc'ʌl bʌ wa'alob, lamital tsi' yʌlʌyob:
—Woli' pʌy tilel Elías.#27.47 Jiñi judíojob tsi' pijtayob cha'añ mi caj i cha' tilel Elías cha'añ mi' coltañ jiñi año' bʌ ti wocol, v. 49, Mal 4.5-6; Mt 16.14.
48Juntiquil tsa' bʌc' majli ti ajñel tsi' ch'ʌmʌ chʌyo'ja'. Tsi' yʌq'ue i chʌy vinagre, tsi' yʌc'ʌ ti' ñi' te', tsi' yʌq'ue Jesús cha'añ mi' ts'ub.
49Yaño' bʌ tsi' yʌlʌyob:
—Cʌyʌla, la' laj q'uel mi tal Elías i coltañ.
50Jesús tsi' cha' cha'le c'am bʌ t'añ, tsi' yʌc'ʌ majlel i ch'ujlel.
51Awilan, jiñi pisil joc'ol bʌ ti Templo tsa' tsijli ti ojlil, ti' jol c'ʌlʌl ti' yoc, tsa' tili i yujquel lum tsa' tojp'i xajlel tac.#Ex 26.31-33; 2 Cr 3.14; Heb 6.19; 9.3-12; 10.19-20 52Tsa' jajmi mucoñibʌl tac, tsa' tejchiyob ch'ojyel ca'bʌl i cha'año' bʌ Dios tsa'ix bʌ chʌmiyob. 53Che' bʌ tsa' loq'uiyob ti mucoñibʌl, che' bʌ ch'ojyemix Jesús, tsa' majliyob ti jiñi ch'ujul bʌ tejclum. Tsa' tsictiyi ti' wut ca'bʌl wiñicob x'ixicob. 54Jiñi i yaj capitán jo'c'al soldadojob yic'ot jiñi soldadojob woli bʌ i cʌntañob Jesús, tsi' cha'leyob bʌq'uen che' bʌ tsi' q'ueleyob i yujquel lum yic'ot pejtelel tsa' bʌ ujti, tsi' yʌlʌyob: Isujmʌch ili wiñic i Yalobilʌch Dios.
55Ya' añob ca'bʌl x'ixicob ja'el woli jach bʌ i ñajti q'uelob, jiñobʌch tsa' bʌ i we'sayob Jesús c'ʌlʌl che' bʌ tsa' loq'ui majlel ti Galilea, 56ya'añ María ch'oyol bʌ ti Magdala, yic'ot María i ña' Jacobo yic'ot José, yic'ot i ña' i yalobilob Zebedeo.
Tsa' mujqui Jesús
(Mc 15.42-47; Lc 23.50-56; Jn 19.38-42)
57Che' wolix i yic'an, tsa' tili juntiquil wen chumul bʌ wiñic i c'aba' José, ch'oyol bʌ ti Arimatea, jiñʌch xcʌnt'añ i cha'añ Jesús ja'el. 58Tsa' majli ba'añ Pilato, tsi' c'ajtibe i bʌc'tal Jesús, jiñi cha'añ Pilato tsi' yʌc'ʌ mandar cha'añ mi' yʌq'uentel. 59José tsi' ch'ʌmbe i bʌc'tal Jesús, tsi' bʌc'ʌ ti sʌc bʌ pisil, 60tsi' ñolchoco ti tsiji' bʌ i yotlel ch'ujlelʌl, tsa' bʌ i tocoj ti' mal colem bʌ xajlel, che' bʌ tsa'ix i selc'uyob majlel jiñi colem xajlel ti ti' i yotlel ch'ujlelʌl, tsa' sujti. 61Ya'añob María ch'oyol bʌ ti Magdala yic'ot yam bʌ María, buchulob ti' tojel i yotlel ch'ujlelʌl.
Jiñi xcʌnta mucoñibʌl
62Ti yijc'ʌlal che' bʌ tsa' ñumi i q'uiñilel chajpaya cha'añ Pascua, tsi' tempayob i bʌ jiñi ñuc bʌ motomajob yic'ot fariseojob tsa' majliyob ba'añ Pilato. 63Tsi' yʌlʌyob:
—C yum, wolic ña'tan lojon chuqui tsi' yʌlʌ jiñi xlot che' cuxul to, tsi' yʌlʌ: “Ti' yuxp'ejlel q'uiñ mic cha' ch'ojyel.” 64Cha'len mandar, che' jiñi, cha'añ mi' wen q'uejlel jiñi mucoñibʌl c'ʌlʌl ti yuxp'ejlel q'uiñ, ame majlicob jiñi xcʌnt'añob i cha'añ ti ac'ʌlel cha'añ mi' i xujch'ibeñob majlel i bʌc'tal, che' jiñi mi caj i su'beñob wiñicob x'ixicob: “Tsa'ix cha' ch'ojyi ba'añ chʌmeño' bʌ”, che' jiñi ñumen leco mi' majlel jiñi lot bajche' ti ñaxan.
65Pilato tsi' su'beyob:
—Ya'añ jiñi xcʌntayajob, cucula, wen ñup'ula che' bajche' la' wujil i melol.
66Che' jiñi tsa' majliyob, tsi' wen ñup'beyob i ti' jiñi mucoñibʌl yic'ot xajlel, ti wi'il tsi' yotsʌbeyob i sellojlel, tsi' su'be jiñi xcʌntayajob cha'añ mi' wen q'uelob.
I T'AÑ JESÚS CHE' YA'AÑ TI CRUZ
| Jiñi t'añ | Ba' mi lac taj ti Biblia |
|---|---|
| C Dios, c Dios ¿chucoch tsa' cʌyʌyon? | Mt 27.46 |
| C Tat, ñusʌbeñob i mul come mach yujilobic chuqui woli i melob. | Lc 23.34 |
| Mic su'beñet wʌle jach ya'añet quic'ot ti panchan | Lc 23.43 |
| X'ixic q'uele ya'añ a walobil (ti wi'il tsi' su'be jiñi xcʌnt'añ) q'uele ya'añ a ña' | Jn 19.26,27 |
| Tiquiñix c ti' | Jn 19.28 |
| Tsa'ix ts'ʌctiyi ti' pejtelel | Jn 19.30 |
| C Tat, ti a c'ʌb mi cʌc' c ch'ujlel | Lc 23.46 |
Biblia de Estudio en Ch´ol de Tumbalá, Chiapas, México © Sociedad Bíblica de México A.C. Active Translation in Process