John 17

1Ánniai áániiwa Jesus. Óóki. Sotámitapsspsspapiwa isspóóhsi. Sotámaniiwa, “Áyo nínna. Ákaoʼtsstsiiwa annihka nitsítakanisttotsiihpi nitáyaakanisttsiihpi. Niistóakaoʼka kohkówa. Noohkáístamatstoktoota nanístsspsspi. Ki ánnihkayi nitákitohkottaistamatstohkatoʼpa kanístsspsspi. 2Takaa kikáóhkokki nááhkitohkaninawaʼsi matápiiwa, omííksi kómohtsspiohkokkihpiksi ótapiʼssini nááhkitohkanaohkotahsaawa áísksipaitapiiʼssini. 3Omííksi niitáʼpssksinookiksi, ánniksaoʼki ákaissksipaitapiiyaawa. Omííksi kíniitaʼpsskinookiiksi kiistóahkaoʼka niʼtsitápiiwahka nitáʼpanistapssiwahka Áʼpistotooki, omííksi níniitapsskinookiksi niistóahkaoʼk annaahk Jesus Christ, annaahka kitoʼtsskoaawahka, ánniksaoʼki ákaisskipaitapiiyaawa. 4Niistówa ánnohka nitsítaʼpaitapiiʼssi annóo ksááhkommi nitsítohkanawanisttotsiihpiaawa kítohkokkihpistsi nááhkaʼpoʼtsissaawa. Ki ánniayi nanistáístamaatstohkatoʼpa kanístsspsspi. 5Áyo nínna. Anniihka kanístohpoksspssiimohpi itsáómaʼpaistotsiihpi ksááhkommi noohkanístsspipoʼtookit ánnohka kááhkanistohpoksspssiimohsi. 6Omííksi kitsítohkokkihpiksi annóo istsitapííksi ksááhkommi nitáístamatsaayaawa kiistówa kanistápitapiiyihpi. Kiistówa kitsináánatayaawa, kii niistówa kitohkokkiaawa, ki sotámanistsiʼtsimiaawa kitsííʼpoahsini. 7Ki ánnohka iihkóíssksinimiaawa kítohkanohkokkihpistsi nááhkanistoohsi ómohtoʼtsstsissaawa kiistói. 8Kítohkokkihpi issksksímoʼtaani, nitsíístapohkotayaawayi, ki sotámoʼtsimiaawa. Sotámitsiitaʼpssksinimiaawa nómohtoʼtoohsi kiistói. Ki sotámomaiʼtsimiaawa kitóʼtsskookssi.

9Ánnikskaoʼkiaawa nitáwaatsímoihkaahtamoayaawa. Kátaʼyaomaiʼtakiiksi nimátawaatsimoihkaahtamoayaawa. Táwaatsimoihkaahtamoayi áámokska kítohkokkihpiksi. Kitsináániaawa. 10Ki nitohkanáínaanistsi kitsináániaawa. Ki kitsináánistsi ninóóhkattsinaaniaawa. Ki iihtóʼtaistamatstohkaʼsi nanístsspsspi. 11Nitaitamaaksistapáatoohpa ksááhkommi. Niistówa tákitapoo kiistówa. Ostóaawai ákitsaakiitaʼpaissiiyaawa ksááhkomm. Áyo nínnai. Kitsikátoaʼpssi. Amóksi áómaiʼtakiiksi isskskámmisaawa. Kanistápitapiiyihpi kanístsskonataʼpsspi, ánniayi noohkanístsskskammisaawa. Kítohkokki nááhkaistamatstohkssi kanistápitapiiyihpi. Isskskammisaawa maahkohkanawanistapssaawa anni niʼtsitápiiyi, nííʼtoi ánni kiistówa ki niistówa niitsíʼtokskaaoʼpi. 12Nitsítsakiohpokaʼpaissiimahpiaawa nómohtsitotoitsikatayaawa kitsskonátaʼpssini, kítohkokkihpi. Kítohkokki nááhkaistamatstohkatoohsi kitsskonátaʼpssini. Nómohtsitotoitsikatayaawa, ki itsáyitaisstsiihpa nááhkaatsaai; nikákaatsaawa omáa áyaakaatsaawa, omáa Judas. Naatóísinaakiaʼtsisi itsíkayissiinaapsskohkatoohpa áakaatsaawa, ki ánnihkayii iihtáátsaawa.

13Ki ánnohka nitákitapoo kiistówa. Áámostska nitsítanistoohpiaawa annóo ksááhkommi ostóaawa mááhkohpistapiiʼtaamssaawa nitsíʼtaamssini. 14Nitáánistayaawa kitáániihpi ki otsíkaimmokoaawa kátaʼyaomaiʼtakiiksi. Mátsitaoʼtssiwaiksi kátaʼyaomaiʼtakiiksi, niʼtóí niistówa nanístsayitoʼtsspi kátaʼyaomaiʼtakiiksi. Ki ánnihkayii ómohtsíkaimmokoaawaiksi. 15Ánnohka kimátawaanistohpa kááhkohtsistapoʼtoahsaawa annóo ksááhkomm. Nikákawaanii kááhkitotoitsikatahsaawa mááhksayikiihtóyissaawa omíi saómmitaʼpssi, omíi Makáʼpatoʼsiyi. 16Nanístsayitoʼtsspi kátaʼyaomiaʼtakiiksi, niiʼtóí amóksi, mátsitoʼtssiiwaiksi. 17Ákaisopoátsistotoosaawa kááhksopokitapíímatahsaawa. Noohkohtánisttotsita mookámoʼtaʼpii. Ámohka nitaníssi mokámoʼtaʼpii nanistápawaanii kitsípoahsiistsi. Kitsíʼpoahsiistsi, ánnihkaoʼka mokámoʼtaʼpii. 18Kansitsípoohsapsskookihpi annóo ksááhkommi, niiʼtóí nanistsítsspisskoaayaawa ksááhkommi.

19Tsííkaisopoatsistotoohsi kiistówa kááhkohtohkoikissi. Áámohka nómohtanisttsi amoksi ááhkoohkattsítsíkaisopoatsistotoahsaawa kááhkitsopokitapiimatahsaawa.

20Mátsiʼtsitapiiwa amóksi nitáwaatsímoihkaahtamoaiksi. Ninóóhkattohkanawaatsímoihkaahtamoayi omííksi otákoinaiʼtakiáttsaawaawaiksi, annííksi otákoohtookoaawaiksi. Nitákohtsitomaiʼtookiaawa. 21Áyo nínna. Nítohkanawaatsímoihkaahtamoayaawa mááhkohkanawanistapssaawa ánni niʼtsitápiiyi, niʼtói nanístohpipaitapiiyihpi kiistówa, kanístohpipaitapiiyihpi niistówa mááhkoohkattohpipaitapiiʼssaawa kiistónnooni. Ki ánnihkayii kátaʼyaomaiʼtakiiksi ákohtsitomaiʼtsimiaawa kiisto ánnayii kitóʼtsskookssi. 22Kiistówa kítohkokki nááhkitsspssi. Nitsíʼtoomanistohkotayaawa mááhksspssaawa. Ki ánnihkayii ákohkottohkanawanistapssaawa ánni niʼtsitápiiyi. Ánni niʼtói kiistówa ki niistówa niitsíʼtokskaaoʼpi. 23Niistówa nómohpipaitapiiyi amóksi, kiistówa kómohpipaitapiiyi niistówa. Táwaatsímoihkaahtamoayaawa mááhkikkiaʼyaohkanaanistapssaawa ánni niʼtsitápii. Ki ánnihkayii kátaʼyaomaiʼtakiiksi ákohtsitssksinimiaawa kiisto ánnayi kitóʼtsskookssi. Ki ákitssksinimiaawa niʼtói kanistákomimmahsi amoksi kanistákomimmokihpi.

24Nínnai, nitsikóóhkstatayi amóksi kítohkokkihpiksi nááhkitohpokaʼpaissiimíyissaawa omiim nitáyaakitapoohpi, mááhkitsinissaawa omiihka nanístsspssi. Kiistówa kítohkokki ánni nááhkanistsspsspi. Áámohka kómohtohkokki takaa kitsítakomimmokssi anniihka itsáomaʼpaistotsiihpi annóo ksááhkomm.

25Áyo nínna. Kiistówa kitsikókamoʼtaʼpssi. Kátaʼyaomaiʼtakiiksi kimátssksinookiaawa. Niistówa kitsínaoʼkssksinoo ki amóksi kítssksinookiaawa kiisto ánnayii kitóʼtsskookssi. 26Nitáístamaatsaayaawa kiistóyi kanistápitapiiyihpi, ki nitákattsistaiʼstamátsaayaawayi. Ki ánnihkayi ákohtsitotoisapakomimmotsiiyaawa kanistákomimmokihpi. Ki ákohpipaitapiiyaawa niistóí.”

Ánniayii áánistsiiwa Jesus ónni.

Currently Selected:

John 17: BLA

Highlight

Copy

Compare