Rimluğo 7
7
Ene k'anunaxun təə, Xrist'osaxunyan ğaç̌
1Ay xunçi-viçimux, isə və̌xun xavarez haq'sa, avazu ki, k'anunaxun bitot'ay bul c'enesa: k'anuni əş dirist' amdaraxune, ketər tene? 2İşq'ara bakala sa çuğo ext'en - heq'ədər ki şot'ay işq'ar dirist'e şo k'anunen izi işq'araxun ğaç̌e. Ketəre? Ama əşe, izi işq'ar biyayin, arane şot'o şuxunsa ğaç̌k'ala sa k'anunal tene manst'a. 3Şot'o görəl, izi işq'ar dirist' baksunen q'erəz sa işq'araxun bask'ala çuğo "k'anuni běš tadi əyiti loxol nu çurpi izi işq'ari bula k'os'p'i" çuuxt'un nex. Ama izi işq'ar p'uri sa çuux p'ə̌mci kərəm işq'ara tağat'an, şot'o "k'anuni běš tadi əyiti loxol nu çurpi işq'ari bulan k'os'p'i" nextet'un.
4Ay bezi xunçi-viçimux, həysə və̌nal haketər. Xrist'os xaçe loxol biyat'an və̌nal k'anuneynak' p'uri k'inək'nan baki, p'urnan ki, ene k'anunaxun təə, T'iyə̌mint'uxun, Buxačuğon p'uri ganuxun Běyinbit'uxun ğaç̌eğanan, metərluğenal Buxačuğo q'ulluğbi Şot'ay s'iya alabi bakanan. 5Běšaxun, yan günaxi kiyel sa ət't'əc bakala vədine, laxeśi k'anunen yax samalal tamaxane bast'ay, moval şo upsune ki, tamaxa baft'i beşi bədənen uk'alt'u bsunen günaxyan əşp'est'i baksay, metərluğenal bisunyan q'azayinşi baksay. #7:5 Rim. 5:12-14 6Ama həysə, k'anuneynak' p'uri k'inək'yan nexyansa, mo şo upsune ki, k'anunaxun ğaç̌ teyan ene, beşi elmoğo çark'esyandi şot'oxun. Çark'esyandi ki, Buxačuğo q'ulluğbsuna běšin k'inək' k'anuna śameśit'oğo əməlbsunen təə, Ǐvel Urufa beşi ük'e tarast'unen ak'est'ayan.
Bisuna eçeriyo k'anun təə, günaxe baki
7İsə metəre c'eysa ki, k'anun iç günax upsune? Təə! Ama sa tərəfəxunal, k'anun nu tadeśiyniy, zu günaxi k'ə baksunal tez avabakaliy. Za "tamaxmaba" əmir #7:7 C'eys. 20:17; K'an. 5:21 nu tadeśiyniy, sal tamaxbsuni k'ə baksuna tez avabakaliy. 8Me əmir iç günaxi kiyel sa ət't'əce baki, bureqi şot'o bezi loxol əşp'est'i za cürbəcür tamaxa bast'a. Ama k'anun nu bakit'uxun oşa günaxal p'uri k'inək'e. 9Bezi k'anunaxun xavar nu bakala vədəmuxe buy, manu ki, dirist'zuy t'e vədə, ama k'anun hari za p'ap'at'an bezi boş arśi günaxe diriləyinşaksa burqi, 10zuval bazki sa p'uri. Metərluğenal za yəşəyinş tast'eynak' laxeśi k'anunen za besp'ine baki. 11Şot'o görə ki, günaxen za tadeśi əmiri kiin za feret'edi, axırdal Buxačuğoxun ə̌xilbi za besp'ine baki. 12Ama k'anun iç ı̌vel k'anune, şot'ay boş śameśi əmirxoval ı̌vele, haq'q' gala əşeğala, şaat' əmirxone şo.
13İsə mo k'ə upsune baki? Sa tərəfəxun nexyan şaat'e, oşal nexyan bisune eşt'a. Bakes banekon metər şey? Sal sa vədə! Bisuna eçeriyo k'anun təə, günaxe baki. Mot'o şaat' bakala k'anuni kiin bsunenal izi heq'ədər pis sa şey baksunane ak'est'i. K'anuni boş bakala əmirxon isə günaxa ç̌oyel c'evk'i yax şot'ay pisluği dərəcinə ak'est'iyone baki.
Bezi ük'exun c'ovakalorox q'a günaxen za best'alorox sa tene
14Yan avayan ki, k'anun Urufaxun eğala sa k'anune. Zu k'əzu p'oy? P'uri tağala sa bədən, günaxi ǰomon tağala k'ul - q'erəz hik'k'al! 15K'əz bsa zuval tez ava. Bezi bsun çureğalorox manest'a t'ǒǒx, mani əşlə ki nifrətezbsa, taśi t'e əşləz biq'sa. 16Ama bezi biq'ala əş bezi nu çureğala əşesa, şo k'anunen za "ba" uk'ala əş tenesa, mo şo upsune ki, k'anunast'a taxsır tene bu, şo iç şaat'e. 17Axıri me əşlə biq'alo ene zu təə, bezi boş arśi günaxe. 18Zu avazu ki, bezi boş şaat' hik'k'al butene. Günax bakala gala k'ə şaat' şey bakale? Şaat' əş biq'sun çuralğayiz biq'es tez baksa. 19Bezi biq'ala əşəl bezi çureğala şaat' əş tene - taśi p'urumal bezi nu çureğala pis əşləz biq'ala baksa zu. 20Bezi boş arśi günaxe za mot'oğo bitova best'alo: şaat' əşez biq'sun çuresa, ama za taşeri p'urum pis əşure biq'est'a şot'in.
21Avanan k'əz fikir tade? Hevaxt' ki nexzu "həysə şaat' sa əş biq'oz" hari pisluğe c'eysa. 22Metər ext'at'an, bezi ük' Buxačuğoy laxi k'anuni tərəfe. 23Ama hari şot'o əməlbsuna p'ap'at'an bezi boş bakala günaxe ěqesa, ǰalpsa burqiyal za bezi nu çureğala əşurxone biq'est'a şot'in. Bezi bədənəl baneksa şot'ay kiyel sa ət't'əc: nə şot'ay k'iyexunez c'eft'es baksa, nəəl bezi ük'exun c'ovakalt'oğo bes. 24Bədbəxt sa amdarzu zu! Şinq'an hari çark'est'i za bisuna taşala me bədəni kiyexun? 25Ama Buxačuğo şükür! Çark'esedi za Şot'in beşi Q'ončux bakala İsus Xrist'osi kiin! Bezi upsun çureğalo isə şone baki ki, bezi ük'exun c'ovakalo Buxačuğoy laxi k'anunen taysun baalkayin, bezi boş arśi günaxen t'etəre bsa ki, zu şot'ay ǰomonez tağala baksa.
Currently Selected:
Rimluğo 7: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.