Rimluğo 6
6
İsus Xrist'osaxun sagala p'uri Şot'oxun sagala běyinbakiyoroxyan yan
1İsə metəre c'eysa ki, yan günax əşp'est'unen Buxačuğoy xeyirxaxluğal avuzebaksasa, uk'en lap şaat', ekinan günax əşp'est'un çurk'en? 2Sal sa vədə! P'uri k'inək'yan həysə yan günaxeynak', izi kul p'atenepsa yax, hetəryan qaybaki běšaxun yəşəyinşi k'inək' yəşəyinşes bakon? 3Axıri yan k'unuk'bakseynak' xena bağat'an, İsus Xrist'osa Çark'est'al k'inək' q'abulbsuna ak'est'eynak' t'e xe beşi bədənə laft'at'an Şot'ay bisunaxunal yax laft'ine baksa. 4Beşi xena baśi c'eysun Şot'ay bisuna şərik baki oç̌alaxesun upsune, ama beşi göynul bakala Bavan İzi kalaluğa ak'est'i İsus Xrist'osa běyinbi k'inək' yanal Şot'ay běyinbaksunen tades bakala təzə yəşəyinşayan q'azayinşi baki. #6:4 K'olos. 2:12 5Yax Şot'ay bisunaxun q'ısmatbi Buxačuğon Şot'ay běyinbaksunaxunal q'ısmatp'ale. 6İsus xaçe loxol t'ə̌q'eğat'an yanal běšaxun baki "yaxun" hik'k'al maq'an mandi pi t'e xaçe loxol t'ə̌q'eśiyan baki, t'ə̌q'yanśi ki, beşi boş arśi günaxi kiyel sa ət't'əc baksunaxun beşi elmoğo çark'est'en. 7Axıri p'urit'in k'ə günax əşp'est'ale?
8İsə běğanan, Xrist'os biyat'an yanal Şot'oxun sagala p'ureyansa, Şo běyinbaki k'inək' yanal běyinbaki İçuxun sagala yəşəyinş q'azayinşit'oğoxun bakalyan. 9Yan avayan ki, İsusi p'uri ganuxun běyinbaksun şo upsune ki, Şo ene sal sa vədə biyala tene, bisun iç Şot'ay běš acıze mandi! 10İzi bisunen me dünyəne bakala günaxi arśi taxt'ane sakərəmluğ duği saki Şot'in, isəəl běyinbaki yəşəyinşbsunen Buxačuğoy s'iyane alabi baki.
11Və̌nal haketər, efi eyexun maq'an c'eri ki, günaxeynak' p'uri k'inək'nan və̌n ene, Buxačuğoy laxi yaq'en tağala sa yəşəyinşnan q'azayinşi və̌n İsus Xrist'osa q'abulbsunen. 12Şot'o görəl nexzu ki, ma bartanan günaxa efi loxol kalaluğbsa, efi p'uri tağala bədəni ǰomon taśi şot'o tamaxa bafst'a ma bartanan. 13Ma bartanan günaxen efi bədəni maninesa hissinə izi kiyel haq'i şot'o düzgün nu bakala əşur biq'seynak' sa ət't'əc k'inək' əşp'est'ane. Mot'oxunsa, p'uri ganuxun běyinbaki təzə yəşəyinş q'azayinşiyorox baksuna ak'est'anan - Buxačuğoy kiyel ət't'əc bakanan, bartanan Şot'in və̌x düzgün əşur biq'seynak'q'an əşp'est'i. 14Günaxi əyit ene nu c'ovakalane efi běš, şot'o görə ki, k'anuni təə, Buxačuğoy şaat'luği xojina tarak'alt'oğoxunnan və̌n.
Günaxi kiyel təə, Buxačuğoy kiyel ət't'əc bakanan
15İsə pesal banankon ki, p'oy k'anuni təə, Buxačuğoy şaat'luği xojina tarak'alt'oğoxunyansa, ene günax əşp'est'uni het'uxun q'ǐbalyan? Ama ketər tene axıri! 16Və̌nal avanan ki, şunesa efi loxol ağaluğbsa barnantisa, şot'ay uk'alt'unan bi baksa. Moval şo upsune ki, nə günaxi ǰomon taśi axırda bisun q'azayinşi bakalnan, nəəl Buxačuğoy əyiten taśi Şot'ay piyes düzgün ak'eśit'oğoxun bakalnan. 17Ama şükür Buxačuğo, běšaxun günaxa q'ulluğbi şot'in və̌x ak'est'ala yaq'ennan taysaysa, isə Buxačuğoy barada efi zombakit'oğon ak'est'ala yaq'ennan taysa, mot'oval ük'innan bsa! 18Ene çark'esnandi və̌n efi elmoğo günaxi kiin oq'a baksunaxun, həysə düzgünluği əyite c'ovaksa efi běš. 19Mot'o beşi bitot'ay q'amişakala muzinez nex ki, və̌ynak' hasandq'an baki. Běšaxun murdarluğ eçala günaxa q'ulluğbi şot'ay kiyel pis əşur biq'seynak' sa ət't'əc baki k'inək', isəəl düzgünluği kiyel ət't'əc bakanan, ak'est'anan ǐvel Buxačuğon və̌x İçu q'ulluğbseynak' c'ək'p'iyorox baksuna. 20Günaxen efi loxol ağaluğbala vədine düzgünluği əyit tene c'ovaksay efi běš. 21Mot'ay xeyir k'ə baki? Həysə və̌x ç̌omə̌yin bsunaxun q'erəz hik'k'al! Axırda k'ə q'azayinşi bakalnaniy? Bisun! 22İsə běğanan günaxi təə, Buxačuğoy kiyel ət't'əc baksunen və̌x k'ə tast'a - ı̌vel Buxačuğon İçu q'ulluğbseynak' c'ək'p'iyoroxnan baksa və̌n! Axırda k'ənan q'azayinşi baksa? Həmişəluğ yəşəyinş! 23Mone, sa tərəf günax əşp'est'uni caza bakala bisune bu, t'e soğo tərəf isə yax pay k'inək' tadeśi sa neymət - beşi Q'ončux bakala İsus Xrist'osaxun hari c'ovakala həmişəluğ yəşəyinşe bu!
Currently Selected:
Rimluğo 6: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.