Rimluğo 2
2
Buxačux haq'q' gala divanbala Buxačuxe
1Ay t'iyə̌mit'ay günaxa ak'i mot'o vi muzel eçala insan, hunal va təmizə c'evk'es ten bakal, şot'o görə ki, metər bi hunal günax əşp'est'in baksa, t'iyə̌mit'ust'a ak'i q'inəyinşi əşlə hunal biq'in baksa. #2:1 Mat'. 7:1-5; Luk'. 6:37 2Metər əş biq'alt'oğo Buxačuğon cazasuz nu efsuna avayan, axıri haq'q' gala divanbala Buxačuxe Şo! 3P'oy isə k'ə pin t'iyə̌mit'u q'inəyinşpsa, ay p'uri tağala insan? Yəni həgigiyal fikirenbsa ki, Buxačuğon mot'o nu aksuna laxi va cazasuz efale? 4Bərkə fikirenbsa ki, Buxačuğost'a meq'ədər şaat'luğ, me ç̌ocügüluğ bunesa, bezi memaçağ biq'i əşurxo portp'enesa, mot'oval portp'ale? Ama ten q'amişaksa ki, hun günax əşp'est'unaxun kul haq'i düz yaq'en taki pine va İzi me şaat'luğa ak'est'a Şot'in! 5Vi ǰomoy tüşen taśi, günax əşp'est'unaxun kul nu haq'sunen Buxačuğoy əcuğo samalal biq'est'i vi cazinan bǐhipsa hun, q'erəz hik'k'al! Divanbakala ğine, haq'q' gala divanbala Buxačuğon beşi əşlə běğala ğine 6hərt'in izi biq'i əşlin əvəzə haq'ale. #2:6 Ǐvel mə̌ğ. 62:12; Məs. 24:12 7Buxačuğoy piyes şaat' ak'eśi hörməti q'ončux baksun çureğalt'u, izi yəşəyinşi axır maq'an baki pi dim şaat' əşur biq'alt'u Buxačuğon həmişəluğ yəşəyinş tadale. 8Saycə izi xeyirə fikirbalt'in, serina t'ǒǒxbi pis əşurxoy bač'anexun tağalt'in isə Buxačuğoy tərs ç̌oya q'a Şot'ay əcuğo ak'i bakale! 9Pis əşlin qoşt'an tağalo əzyəti q'a koruği boş bakale - mo süft'ə iudey bakalt'oğone lafst'a, oşal q'erəz azuk'xoxun bakalt'oğo. 10Şaat' əşur biq'alo isə Buxačuğoy piyesal şaat' ak'eğale, hörməti q'ončux bakale şo, iz bul dinc yəşəyinşale. Mo süft'ə iudey bakalt'oğone lafst'a, oşal q'erəz azuk'xoxun bakalt'oğo, 11şot'o görə ki, Buxačuğon bitot'ay loxol sa piine běğsa. #2:11 K'an. 10:17
12Buxačuğoy laxi k'anunaxun izi xavar nu baki günax əşp'est'aloval p'uri tağale, k'anunaxun izi xavar baksun günax əşp'est'alt'inal izi cazina zap'k'ale. Fərg saycə t'iya bakale ki, sunt'ay cazina bost'eynak' k'anun əşeğale, t'e sunt'aynak' isə təə. 13Şot'o görə ki, Buxačuğoy piyes düzgün ak'eğalo k'anuna ibakalo təə, k'anuna əməlbalone. 14Avayan ki, iudey nu bakalt'oğoy Buxačuğoy k'anunaxun xavar butene, ama şot'oğon p'urumal mani əşlin şaat', mani əşlin pis baksuna avat'unsa, mo şo upsune ki, Moiseyen śampi k'anuni ç̌oya nu qaypit'inal t'e k'anunen uk'alt'oğo avane. 15Metərt'oğoy k'anun içoğoxune, sa amdaren ki, əş biq'at'an "mo hetəre bakon", "běyn düz əşez biq'sa, sərf əşez biq'sa" pi fikirebsasa, şo k'anunsuz tene. 16Buxačuğon İsus Xrist'osi kiin divanbala t'e ğineyal metər bakale, bezi car sakala Mǔq Xavaren uk'ala k'inək': amdarxoy c'əp'k'in biq'i pis əşurxo q'a içoğoy beynexun c'ovaki pis fikirxo görə divanbale Şot'in.
İudey baksun k'ə upsune
17Ay vi s'iya iudey laxi k'anuna bač'an taradalo, ay "Buxačuğoy c'ək'p'i azuk'axunzu" pi forsp'alo! 18İsə güvə k'anunen ak'est'ala k'inək'en Şot'ay laxi yaq'en taysa hun, t'e k'anuna görə het'ay şaat', het'ay pis baksunal avanu. 19Fikirenbsa ki, düz yaq'axun c'erit'oğoy kiyexun biq'i düz yaq'a c'evk'alo, içoğoy yaq'a aç̌esp'i bayinq'una tarak'alt'oğoynak' işiğnu, 20"nu avat'u zu tez zombal şin zombale?", "izi haq'ılen nu bot'alt'u zu tez q'andırişal şin q'andırişale?" nexnu. Axıri k'anunan ava hun, izi boş hər şey śameśi k'anuna, mani əşlin düz, mani əşlin k'ori baksuna ç̌oyel c'evk'i serin k'ə baksuna ak'est'ala k'anuna! 21Ketər bitova zombalonusa, p'oy va het'u görə ten zombsa? Amdarxo nexnu "oğriluğmabanan", ama hun oğriluğenbsa. 22"Nə çuux, nə işq'ar q'ert'uxun nu bask'alane" pi vi çuğo barti taśi q'ert'uxunen basksa, "binik' buxačuxxo nifrətezbsa" pi şot'oğoynak' biq'eśi xramurxoy boş bakalt'oğon tamaxp'i fǔq'e. #2:22 K'an. 7:25-26 23"Buxačuğon za k'anune tade" pi forsp'aloval hunnu, t'e k'anuna nu əməlbi Buxačuğo hik'k'albaloval. 24Ǐvel Śame boş śameśi k'inək': "Efi biq'ala əşurxo görə Buxačuğo bǐhi tağala əyitmuxe c'eysa Buxačuğo nu çalxalt'oğoy ǰomoxun". #2:24 İsa. 52:5; Yez. 36:20,22
25K'əq'an baki ki, sünnətbakenu? Moiseyen tadi k'anuna əməlbayvaxe kot'ay xeyir bu, nu əməlbit'uxun oşa ko hik'k'al tene. 26Sünnətnubaki sunt'in Buxačuğoy laxi k'anuna əməlebsasa, şo Buxačuğoy piyes ene sünnətbaki k'inək'e. 27Şot'o görəl, sünnətbaki, ama izi kiyel bakala śameśi k'anuna ç̌axç̌uxp'it'ay əşp'est'i günaxxo sünnətnubaki, ama Buxačuğoy laxi k'anunen tağalt'in ç̌oyel c'evk'i bakale. 28İsə anksa ki, nə vi ç̌oyexun iudeya oşq'arst'unen, nəəl sünnətbaksunen tene ak'est'a vi iudey baksuna. 29Amdari içust'a bakalane iudeyluğ, Urufen izi ük'e laft'i t'iya iriz efit'ut'un sünnətbakiyo nex, izi bədəni loxol bakala avuzin yeq'a me laft'it'u təə. Moval k'anuna vi kiyel biq'i çurpsunen tadeğala şey tene. Metərt'ay hörmətəl amdarxoy boş təə, Buxačuğoy piyes bakale. #2:29 K'an. 30:6
Currently Selected:
Rimluğo 2: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.