Ǐvel mə̌ğurxo 38
38
38-ci Ǐvel mə̌ğ
Davidi Q'ončuğon içu eyex bast'eynak' bakala Ǐvel mə̌ğ.
1Ay Q'ončux, hirsləyinşəki za töhmətmaba,
Əcuğon biq'i za caza ma tada!
2Tə̌q'eśene za Vi tərbi oxurxo,
Vi kiin tadala cazinen za biq'ene.
3Vi əcuğaxun bez bədənə dirist' ga tene mande,
Bez günaxxo görə bez ǔq'enxoval azarine.
4Bez taxsırxon za haq'layinşene,
Me yükə xork'ala zor tezax bu.
5Bezi axmağluğaxun
Bezi yaroxal bašaybakene.
6Bez bač'an k'os'bakene, oç̌alane p'ap'sa,
Dirist' ği q'ubarbsunez tarane zu.
7Bez bədən q'ızdırmin boş boneksa,
Bez loxol dirist' ga tene mande.
8Halnuxun bitezu, mafarsuzzu.
Ük'e q'ač'axun ıhıldayinşezbsa.
9Ay Q'ončux, Hun avanu zu k'əz çuresa,
Bezi koruğxo Vaxun c'ap' tene.
10Bez ük'ene kape, ene zor tezax bu,
Bez pulmuxal bayinq'bakene.
11Bez azara görə bez dost'urxon, çalxalxon za bot'unsi,
Bez q'oomxo zaxun ə̌xilt'un baki.
12Za bespsun çureğalt'oğon zaynak' tələt'un laxsa,
Pisluğ bsun çureğalt'oğon za q'arğişt'unbsa,
Biyəbakamin bez loxol şərt'un bost'a.
13Ama za kare gala laxi itezbaksa,
Lale gala laxi bez ǰomo tez ə̌mbsa.
14Zu hik'k'ala nu ibaksun,
Şuk'k'ali coğabal tast'un nu çureğala sa amdar k'inək'zu.
15Ay Q'ončux, bez umud Vane mande, Vi yaq'az běğsa,
Ay Ala Arśi bez Buxačux, şot'oğoy coğaba Hun tadalnu!
16Xoyinšezbsa, ma barta bez hala ak'i mǔqbakat'un,
Bez lamanst'una görə içoğo zaxun ala biq'at'un.
17Zu ene bist'axzu,
Bez q'ač'urxo həmişə zaxune.
18Bez günaxxo bez ozane exest'a,
Bez taxsırxo görəz əzyət zap'e zu.
19Bez düşmənxo isə zorbat'un, hələ dirist't'un,
Nahaq' gala za nifrətbalxo gelebaket'un.
20Zu şaat'luğezbsa - içan pisluğt'unbsa,
Bezi şaat'luğ bsuna pisluğ bsunent'un coğab tast'a.
21Ay Q'ončux, za tək ma barta,
Ay bez Buxačux, zaxun ə̌xil ma baka!
22Ay Q'ončux, usum bez köməyə eki,
Bezi Çark'est'al Hunnu!
Currently Selected:
Ǐvel mə̌ğurxo 38: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
