Ǐvel mə̌ğurxo 33
33
33-ci Ǐvel mə̌ğ
1Ay düzgün bakalorox, Q'ončuğoy s'iya alabanan!
Ük' təmizt'oğo Şot'o tərifləyinşbsune yarayinşbsa.
2Tər farpi Şot'ay s'iya alabanan,
Vis' simlə arfinaxun c'eğala səsen Şot'o tərifləyinşanan!
3Şot'aynak' me təzə mə̌ğə̌ mə̌ğpanan,
Mǔq səsurxo c'evksun,
Ef başarağa ak'est'un farpanan!
4Axıri Q'ončux İzi tadi əyiti loxol çurk'alone,
Hər əşlə axıral śirik' bex p'ap'esp'alone.
5Düzgün bakalo, həmişə düz q'ərar c'evk'alone Şo,
Dirist' dünyənə İz çuresunen buybalone.
6 Q'ončuğon İz sa əyiten göyurxone yaratmişi,
İz sa əmiren muč'uliğone t'ak'p'i Şot'in.
7Şot'in dənizi xeyurxone girbi,
Aruma ambara bapi iz ç̌omo ğaç̌k'ala k'inək'
Bə̌ğə̌loy xeyurxone sagala bapi iz běšinə̌mə biq'i.
8Barta dirist' dünyənen Q'ončuğoy şu baksuna q'amişakeq'an,
Barta me dünyəne yəşəyinşalt'oğon Şot'ay kalaluği běš bulq'at'un k'os'bi.
9Şot'o görə ki, bito Şot'ay ǰomoxun c'eğala sa əyitene baki,
Bito Şot'ay sa əmirene bex p'ap'i.
10 Q'ončuğon q'erəz azuk'xoy ük'exun c'ovakalt'oğo içoğoy boşe efon,
Buxačuğo nu çalxalt'oğon bsun çureğalt'oğo puçane c'evk'on.
11 Q'ončuğon İz ük'e biq'est'iyorox isə həmişəluğe,
Şot'ay həzirbiyorox nəsiləxun nəsilə c'ovakiyal tene əfçibakon.
12İz Buxačux Q'ončux bakala azuk',
Q'ončuğon İçeynak' c'ək'p'i azuk' he bəxt'əvəre!
13Göynulxun běğalone Q'ončux,
Sal sa insani balina İz piyexun nu aç̌esp'alone Şo.
14İz məsk'ən saki ganuxun běği
Me dünyəne məsk'ən sakit'oğone aksa Şot'in.
15İçoğoy beynəl śirik' İçin yaratmişit'oğo,
Lap içoğoy ük'exun c'ovakalt'oğoval avabakalt'oğo.
16Nə padçaği çark'esun izi q'oşuni geleluğaxun asulu tene,
Nəəl sa q'oççaği çark'esun izi zoraxun.
17Davina c'eğat'an ěka umudbakala şey tene,
Şot'ay zor tene amdara çark'est'alo.
18 Q'ončuğoy pul İçu çalxalt'oğoy loxole,
Hər şeyi Şot'ay nu badalbakala çuresunaxun eysuna věbakalt'oğoy loxol.
19Şone şot'oğo bisunaxun çark'est'alo,
Busaluğ eğat'an yəşəyinşest'alo.
20Yan Q'ončuğoyan umud,
Şone beş t'arnu p'ap'alo, yax q'orişalo.
21Beşi mǔqbakala ga Şone,
Şot'ay ı̌velluğayan bač'an tarast'a yan.
22Ay Q'ončux, beşi Va umudbakala k'inək',
Hunal yaxun Vi nu badalbakala çuresuna kammaba.
Currently Selected:
Ǐvel mə̌ğurxo 33: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
