Ǐvel mə̌ğurxo 10
10
10-ci Ǐvel mə̌ğ #10:1 - Me mə̌ğ "ak'rost'ix" uk'ala yönene śameśe, yəni hər cörgin süft'in t'arurxo alfavit'i boş bakala k'inək' sunay bač'anexune eysa.
1Ay Q'ončux, het'aynak'nu ə̌xil?
Het'aynak' t'ar ğine Va ten ak'est'a?
2Mone, pis amdar şuk'k'alaxun zaptenesa,
Fağıra pul tadi işiğ tene tast'a.
Barta iz laxi təloğo içq'an baft'i!
3Pis amdar iz ük'exun c'ovakalt'oğoxun fərəxləyinşebaksa,
Q'ončuğo tene çalxsa, saycə iz q'azancaxune fikirbsa.
4İçu ala biq'i Buxačuğoxun ə̌xile bist'a,
"Butene Şo" pi sal iz fikire eteneşt'a!
5Metərt'oğoy əşurxo həmişə şaat'e taysa,
Vi cazinen içoğo biq'sunaxun q'ı̌tet'unbsa,
İçoğoy düşmənxoval hik'k'ali galat'un laxsa.
6İz ük'e boş "zaynak' q'ı̌ butene,
Bələ zaxun ə̌xile tarak'on" nexe.
7İz ǰomoxun saycə q'arğiş, əfçi saal bic'luğe baron,
İz muzexun şər q'a bələ eçala əyitmuxe c'eğon.
8Ayizmoğo, q'alasuz məəlnoğo tələne laxsa,
Taxsırsuzt'u busmişi
Şot'o c'əp'k'in gala besebsa.
9Şot'in sa şir k'inək' pusq'una çurpi yaq'eběğsa,
Zəyift'ay loxol cupseynak'e həzirləyinşaksa.
Biq'it'uxun oşal ext'i taneşt'a.
10Axıri zəyift'ay zor aytenesa,
Pist'ay turin oq'a ç̌axç̌uxeśi tanesa!
11İz ük' şəren buy bakalt'inal metəre nex:
"Buxačuğon İz ç̌oya taradene, ateneksa,
İsə damaxune İz eyexun c'evk'e".
12Hayza, ay Q'ončux, Vi şu baksuna ak'est'a, ay Buxačux!
Fağırxo eyexun ma c'evk'a!
13Het'aynak'q'an pist'in Buxačuğo ǰamdi?
Het'aynak'q'an İz ük'e boş "za k'ə bese bakon" pi?
14Ama Hun me zülümə q'a əzyətə anksa,
Şuk'k'al Vi kiyexun tene çark'al.
Fağırxoy umudi ganu Hun!
Yetimxoy kiyexun biq'alonu Hun!
15Barta pis amdar biti xoreśeq'an.
Şər bakalt'u tet'ər ğina bada ki,
İz bi pisluğxoy sayco cazasuz maq'an mandi!
16 Q'ončux həmişəluğ bakala Padçağe!
Buxačuğo nu çalxalt'oğoynak' Şot'ay oç̌ala ga butene,
Əfçibakalt'un şorox!
17Ay Q'ončux, Hun fağırxoy xoyinša p'anpsa,
Şot'oğo ük'en tast'a, Vi pul şot'oğoy loxole.
18Fağırxoy q'a yetimxoy bač'ane çurpa,
Barta me dünyənexun bakalt'oğon şot'oğo zülüm tades maq'at'un baki!
Currently Selected:
Ǐvel mə̌ğurxo 10: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
