Məsəloox 16
16
1Amdaren iz ük'e boş fikirebon,
Axırınci əyitə isə Q'ončuğone uk'on.
2Amdari bütüm yaq'mux iz piyes təmize ak'eğon,
Q'ončuğon isə ük'e boş bakalt'oğone yoxlayinşon.
3Vi biq'ala əşurxo Q'ončuğo tapşurba,
T'e vədə vi niyətxo bex p'ap'ale.
4 Q'ončuğon hər şeya İz məksədeynak'e yaratmişe,
Pis amdaral bələ ğineynak'.
5 Q'ončuğon içoğo ala efalt'oğoxun irit'ene,
Avabaka, şorox cazasuz tet'un mandal.
6Buxačuğo çuresunen q'a Şot'o ğaç̌ baksunen günaxxo os'ek'sa,
Q'ončuğo çalxsunenal pisluğaxun qayest'a.
7Amdari yəşəyinşaxunQ'ončux irəzi mandayin,
Düşmənxoval şot'oxun barişt'irişebsa.
8Düzgünluğen q'azayinşala mal şey
Haq'suz yaq'en topbi gele q'azancaxun şaat'e.
9Amdaren iz yaq'a c'ək'ek'on,
Ama Q'ončuğon tadi yaq'ene tağon.
10Padçağen iz ə̌xilaksunluğene əyitk'on,
Divanbsunast'al sərf tenebon.
11Düzgün tərəzik'en ayzapsun Q'ončuğoxune,
Torayin boş bakala hər ayzap'k'ala ǰěyal Şot'ay kiin əşe.
12Şər əşur biq'sunaxun padçağxon irit't'unk'on,
Şot'aynak' ki, düzgünluğene taxt'a möhk'əmbon.
13Padçağxo düzgün amdari əyitk'alt'uxunt'un irəzi mandon,
Şot'oğon düz əyitk'ala amdarat'un çureğon.
14Padçaği əcuğon bisuni xavare eçon,
Müdrik amdaren isə me əcuğa bask'esedon.
15Padçaği ç̌oyen axšumenesa, avabaka, yəşəyinş bune,
Şot'ay irəziluğ hər şeya göyünbala ǰoğulin ağalinane oşq'ar.
16Q'ızılaxunsa müdrikluğ q'azayinşbsun şaat'e,
Gümüş təə, avabaksun topbsun şaat'e.
17Ük'təmizorox pisluği yaq'axun t'it'unst'a,
İz yaq'a nu azdırişalt'inal iz elmoğone q'orişbsa.
18Əfçibaksuna tikbaşluğene eçon,
Bist'unal lovğaluğen.
19Fağırxoy arane vi sa k'ot'or šuma uksun,
Tikbaşxoxun talanbi mala cöybsunaxun şaat'e.
20Tərbiyinə ǔmǔxlaxalt'in xeyire bə̌ğə̌bon,
Q'ončuğo güvəyinşakala amdar he bəxt'əvəre!
21İz ük'e müdrik bakalo ə̌xilak'ale k'alesa,
Amdarxoval muč'a əyitə usume basksa.
22Q'amişaksun - yəşəyinşest'ala orayine,
Axmaği caza isə iz səfeyluğ.
23Müdrik əyitmux müdrik amdaraxune c'eğon,
T'e əyitmoğonal amdara vědesedon.
24Şaat' əyitmux - şame boş uč' k'inək'e,
Elmoğo q'olayebon, ǔq'ěnxo ost'aarebon.
25T'etər yaq'o ki, amdari piyes düze ak'esa,
Ama şot'ay axır bisune.
26Əşp'alen iz tapana boşevkseynak'e zəhmət zap'e,
Busaluğene şot'o məcburbsa.
27Yaramazen amdarxoynak' kure kaše,
İz əyitmoğonal arux k'inək' bok'osp'i-śinne.
28Əfçiduğalen davane galdon,
Əyit tarast'unen ı̌ša dost'urxoval cöyebon.
29Q'əddar amdaren iz ı̌šat'oğo feret'edon,
Şot'oğo şaat' nu bakala yaq'ane zap'k'on.
30Pis niyəten pul q'ic'k'alt'ay fikir şəre bakon,
J̌omo k'oribalt'ay əşuruxal şaat' tene bakon.
31Mas'i baki pop s'aldala tace,
Düzgünluği yaq'e q'azance.
32Q'oççağ baksunaxunsa səbürlu baksun şaat'e,
İçuxun usum nu c'eğalo şəhərə haq'alt'uxun zorbane.
33Çöpə amdarene bost'a,
Ama hər q'ərara Q'ončuğone tast'a.
Currently Selected:
Məsəloox 16: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
