Məsəloox 14
14
1Müdrik çuğon iz k'oja ost'aarebon,
Q'ammaz çuğon isə şot'o iz kiin śarek'on.
2Düz yaq'en tağalt'inQ'ončuğo çalexon,
K'ori yaq'a bakalt'in isə Şot'o t'ǒǒxebon.
3Q'ammazi bač'anen iz lovğa əyitmoğo görə t'ap'e ukon,
Müdrikt'oğoy muzen isə içoğo q'orişebon.
4Kəl nu bakala gala nə̌val ams'ine bakon,
Ama kəle zorene bol məhsul eçon.
5Düzgün şahiden əfçi tene uk'on,
Əfçi şahiden isə iz əfçinene nəfəs haq'on.
6Q'ammazen müdrikluğ qə̌və̌lğayin şot'o tene bə̌ğə̌bon,
Ama q'amişakala amdara usume p'ap'on.
7Axmağaxun ə̌xil baka,
Şot'oxun haq'ullu əyit ten ibakal.
8Ə̌xilak'alt'ay müdrikluğ - iz yaq'a q'amişaksunast'ane,
Q'ammazi səfeyluğ isə için-içu feretst'unast'a.
9Səfeyxon taxsıra os'kseynak' eçala paye loxol axšumt'unk'on,
Düzgünt'oğo isə Q'ončuğon xeyir-bərəkəte tadon.
10Amdaren iz dərdə saycə içine ava,
Şot'ay mǔqluğal iz hama şuk'k'alen tene hisbon.
11Şər amdarxoy k'oj śareğon,
Ük'təmizt'oğoy yurden isə varde qayk'on.
12T'etər yaq'o ki, amdari piyes düze ak'esa,
Ama şot'ay axır bisune.
13Axšumk'at'anal amdari ük' q'ač'ek'on,
Mǔqluği axırast'al dərde bakes bakon.
14Şər bakalt'u iz biq'i yaq'a görə tadeğale,
Şaat' amdara isə iz əşurxo şaat' baksuna görə.
15Nu q'amişakalo hər əyitə feret'ebaksa,
Ə̌xilak'ala amdaren isə iz hər lə̌ngəne fikir tast'a.
16Müdrik amdar eht'iyətlü baki pisluğaxun zap'eğon,
Axmağ isə usum içuxun c'eri içune güvəyinşakon.
17Usum posk'alt'in haq'ılsuz əşe biq'on,
Pisniyətlü amdaral nifrətt'unbsa.
18Q'ammaza mandalo iz səfeyluğe,
Ə̌xilak'alt'ay biin tacal iz avabaksun.
19Pis amdarxo şaat't'oğoy běš k'os't'unbakon,
Şər amdarxoval düzgünt'oğoy ç̌omone tağon.
20Kəsibə q'onşinenal nifrətebon,
Varluna isə gele amdarene çureğon.
21T'iyə̌mint'ay loxol alaxun oq'a běğalt'in günaxebsa,
Eht'iyəc bakalt'u köməybalo isə he bəxt'əvəre!
22Şər əş biq'alxo yaq'axun azmişakiyorox tene ki?
Xeyirxaxluğ balt'in isə şaat'luğ q'a çuresune bə̌ğə̌bon.
23Hər zəhməten q'azance eçon,
Ams'i əyitpsunen isə amdara eht'iyəci boşe efon.
24Var-dövlət müdrik amdarxoy biin tace,
Səfeyluğ isə axmağxoy.
25Düzgün şahiden bisunaxune çark'est'on,
Əfçi şahiden isə feret'edon.
26 Q'ončuğo çalxalt'aynak' q'ı̌ butene,
Q'ončux şot'ay əyloğoynak'al umudi gane.
27 Q'ončuğo çalxsun yəşəyinşest'ala orayine,
Amdara bisunaxune çark'est'on.
28Padçaği kalaluğ azuk'i geleluğaxune ak'esa,
İz azuk' mal bakala padçağ isə hik'k'ale.
29Usum içuxun nu c'eğalo haq'ullune,
Hövsələsuzo isə səfey.
30Arxayinluğen amdara yəşəyinşesedon,
Paxılluğen isə ǔq'ěnxone bašaybon.
31Kəsibə zülüm tadalt'in Buxačuğo tene çalxon,
Kəsibə kul biq'alt'in isə şot'o Yaratmişalt'u hörmətebon.
32Şər amdara iz pisluğen sanekon,
Düzgünt'ay düzgünluğen isə bisunast'al umude tadon.
33Müdrikluğen haq'ullu amdari ük'e mese biq'on.
Şo lap axmağxoy araneyal c'ək'eğon.
34Düzgünluğen azuk'a ěqevek'on,
Günaxen isə sanekon.
35Padçağ müdrik k'ulaxun irəzine mandon,
İçu biyaburbalt'ay loxol isə iz əcuğone biq'on.
Currently Selected:
Məsəloox 14: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
