Ams'i oç̌ala 9
9
C'ovaksuni axsibayi q'aydoox
(C'eys. 12:1-27)
1İsrailluğoy Misirəxun c'eysun p'ə̌mci usena bağat'an, t'e usenin samci xaşe Q'ončuğon Moiseya Sinay ams'i oç̌ala pine: 2«Barta israilluğon C'ovaksuni axsibaya #9:2 - Me axsibayast'a Q'ončuğon Misirluğoy bito süft'in nanaxun baki ğarmoğo k'as'k'at'an israilluğoy k'oya nu baśi şot'oğoy ç̌omoy t'ǒğǒlxun c'ovaki taysunat'un eyex bast'a. Şot'o görəl me axsibayi s'i C'ovaksuni axsibaye. C'eys. 12:1-27 Bez pi vədineq'at'un c'ovakest'i. 3Şot'o Bez pi ğine - me xaşe bip'es's'emci ğine, běğ batk'at'an c'ovakest'a burqanan. Axsibaya c'ovakest'at'an Bez laxi bito q'aydoğo q'a k'anunxo əməlbanan».
4Metərluğen, Moiseyen israilluğo C'ovaksuni axsibayi barada bitova pine, 5şot'oğonal samci xaşe bip'es's'emci ğine běğ batk'at'an Sinay ams'i oç̌ala me axsibaya c'ovakest'undi. İsrailluğon bitova Q'ončuğon Moiseya pi k'inək't'un bi.
6Ama bəzi amdarxo me ği içoğoy kul p'uri amdara lafst'una görə pak tet'un hesabbaksay, şot'o görəl me axsibaya c'ovakest'es tet'un baki. Şorox hat'e ği Moiseyi q'a Aaroni t'ǒğǒl hari 7pit'un: «Beşi kul meyidə lafst'una görə yan pak teyan hesabbaksa. İsə yan Q'ončuğon laxi ğine bito israilluğoxun sagala Şot'aynak' q'urban eçes teyan bakal?» 8Moiseyen şot'oğo pine: «Bartanan běğen, Q'ončuğon me barada k'ə nex».
9 Q'ončuğonal Moiseya pine: 10«Əgər axsibayi ğine efi nəəl və̌xun oşa bakalt'oğoy boşt'an şinesa iz kula meyidə duğsunen içu murdar bine baksasa, nəəl ki, me ğine yaq'a bakalane baksasa, şot'in hələ me axsibaya c'ovakest'es banekon. 11Barta t'e amdaren me axsibaya p'ə̌mci xaşe bip'es's'emci ğine běğ batk'at'anq'an c'ovakest'i. Q'urbanluğ q'uzin yeq'a ə̌yinsuz šumen q'a ağu oyurxon kəyi 12savaxt'ineynak' şot'oxun hik'k'al maq'an efi. T'e q'urbanluğ heyvani ǔq'ěnxoxunal sayco nu xoxbakalane. #9:12 C'eys. 12:46; Ǐvel mə̌ğ. 34:20; İoan. 19:36 T'e amdaren C'ovaksuni axsibayi bito q'aydoğo əməlbalane. 13Ama əgər sunt'in pak baksun nəəl yaq'a təə, iz azuk'i arane baksun me axsibaya nu c'ovakest'ayin, t'e amdari tura azuk'i aranexun bot'anan. Şot'in Q'ončuğon laxi ğine Şot'aynak' q'urban nu eşt'una görə iz cazina zap'k'ale.
14Əgər ef arane yəşəyinşala sa q'əribenal me axsibaya c'ovakest'un çuresasa, barta şot'in me C'ovaksuni axsibayi bito q'aydoğo q'a k'anunxo əməlbeq'an. Və̌ynak'al, ef arane yəşəyinşala q'əribxoynak'al q'aydoox sane».
Ǐvel çadıri loxol bakala asoy
(C'eys. 40:34-38)
15Ǐvel, yəni irəziluği çadıra laxit'uxun oşa, şot'ay loxol biyəsinəxun savaxt'inal śirik' bok'ala aruğo oşq'ardala sa asoye śiri. 16Mot'oxun oşal hametərey: ğenaxun çadıra bəc'ürk'ala asoy biyəsin arux k'inək'e baksay. 17Hər dəfəl asoy çadıri loxolxun ěqeğat'an israilluyox yaq'at'un bafst'ay. Eğala çurk'ala ganu isə asoy çurk'ala galat'un düzbsay. #9:17 C'eys. 40:36 18Şot'oğoy yaq'a bafst'unal, eğala çurk'ala ganu düzbsunal Q'ončuğon metəre ak'est'ay. Heq'ədər ki asoy çadıri loxole baksay, şorox içoğoy ganuxun tet'un galey. 19Asoy çadıri loxol boxoyal mandayin, israilluyox Q'ončuğoy əyitəxun nu c'eri içoğoy çurk'ala ganu tet'un badalbsay. 20Asoyi çadıri loxol sa hema ği çurk'ala vədəl baneksay. İsrailluyox isə Q'ončuğoy əyiten çurpi, Q'ončuğoy əyitenal yaq'at'un bafst'ay. 21Bəzi vədəmoğo asoy çadıri loxol saycə biyəsəxun savaxal śirik'e çurey, savaxt'an asoy ěqeğat'anal israilluyox yaq'at'un bafst'ay. Çuresa üşe, çuresa ğenaxun - asoy ěqeğat'an israilluyox yaq'at'un bafst'ay. 22P'ə̌ ği, sa xaş nəəl lap sa usenq'an baki - heq'ədər ki asoy çadıri loxoleysa, israilluyox içoğoy çurk'ala ganuxun galtet'unney. T'e asoy ěqeğala k'inək' isə şorox yaq'at'un bafst'ay. 23Şot'oğo içoğoy çurk'ala ganu maya düzbsunal, hevaxt' yaq'a bafst'unal Q'ončuğon metəre ak'est'ay. Hametərəl, israilluğon Q'ončuğoy Moiseya pit'oğo bitova əməlt'unbsay.
Currently Selected:
Ams'i oç̌ala 9: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
