Ams'i oç̌ala 10
10
Gümüşi şeyp'urxo
1 Q'ončuğon Moiseya pine: 2«Çəküçen əşeśi gümüşəxun p'ə̌ dənə şeyp'ur düzba. Azuk'axun əyitk'at'an saal azuk'a xavarbi yaq'a baft'at'an şot'oğo farpi amdarxo girbalnu. 3P'ə̌ şeyp'uri səs sunaxun eğat'an, barta dirist' azuk'q'an vi t'ǒğǒl ı̌vel çadıri běš gireśi. 4Şeyp'urxoy soğo fareğat'an isə vi t'ǒğǒl saycə israilluğoy tayfoğo görə c'ək'eśi kaloroxq'an gireśi. 5Şeyp'uri səs lap alloyaxun samci kərəm eğat'an, barta běğ c'eğalaç tərəf bakala dəst'ooxq'an yaq'a baft'i. 6Alloyaxun eğala şeyp'uri səsə p'ə̌mci kərəm ibakat'an, barta güney tərəf bakala dəst'ooxq'an yaq'a baft'i. Hametər, dəst'oox alloyaxun eğala şeyp'uri səsə ibakat'an yaq'a baft'alt'un. 7Camaataxun əyitpseynak' şot'oğo girbsun lazım bakat'anal şeyp'ura farpanan, ama yaq'a baft'at'an fareğala k'inək' ost'aar təə.
8Şeyp'urxo Aaroni nəsiləxun bakala běyinšxon fark'alat'un. Barta mo və̌ynak' nəsiləxun nəsilə c'ovakala həmişəluğ sa q'aydaq'an baki. 9Və̌n ef oç̌ala ef loxol eğala düşmənxoxun davina c'eğat'anal şeyp'ura farpanan. T'e vədə Q'ončuğon və̌x ibaki efi düşmənxoxun çark'est'ale. 10Efi mǔq ğimxo - axsibayxost'al, təzə xaşe c'eysuna c'ovakest'ala mərəkəyxost'al bok'ospsuni q'a serluği q'urbanxo eçat'an şeyp'ura farpanan. Barta mo Buxačuğon və̌x eyex efseynak'q'an baki. Ef Buxačux bakala Q'ončux Zuzu».
İsrailluğoy Sinay ams'i oç̌alaxun c'eysun
11İsrailluğoy Misirəxun c'eysun p'ə̌mci usena bağat'an, t'e useni p'ə̌mci xaşe q'amci ğine asoy irəziluği çadıri loxolxun ěqeśi. 12İsrailluyoxal Sinay ams'i oç̌alaxun c'eri yaq'at'un baft'i. Asoy hari P'aran uk'ala ams'i oç̌ala çurk'aminal şorox yaq't'un taśi. 13İsrailluğoy Q'ončuğon Moiseya pi q'aydinen me yaq'a bafst'un samciney.
14Süft'ə İuday dəst'əne içoğo c'ək'p'est'ala nišana laxi yaq'a baft'i. Me dəst'in kalo Amminadavi ğar Naxşoney. 15İssak'ari tayfin kalo Śuari ğar Net'aneleney. 16Zevuluni tayfin kalo isə Xeloni ğar Eliavey. 17Ǐvel çadıral tat'at'unpi. Gerşoni q'a Merarin nəsiləxun bakalt'oğonal t'e çadıra ext'it'un yaq'a baft'i.
18Ruveni dəst'əl içoğo c'ək'p'est'ala nišana laxi yaq'at'un baft'i. Me dəst'in kalo Şedeuri ğar Eliśurey. 19Simeoni tayfin kalo Śurişaddayi ğar Şelumieley. 20Gade tayfin kalo isə Deueli ğar Elyasafey. 21K'ohat'i nəsiləxun bakalt'oğonal ı̌vel şeymoğo ext'it'un yaq'a baft'i; şorox hari çurk'ala gala p'ap'amin ı̌vel çadır laxeğalaney.
22Efraimi dəst'əl içoğo c'ək'p'est'ala nišana laxi yaq'at'un baft'i. Me dəst'in kalo Ammihudi ğar Elişamaney. 23Menaşşeni tayfin kalo P'edahśuri ğar Gamlieley. 24Binyamini tayfin kalo isə Gideoni ğar Avidaney.
25Ən axırda Dane dəst'əne içoğo c'ək'p'est'ala nišana laxi yaq'a baft'i. Me dəst'in kalo Ammişaddayi ğar Axiezerey. 26Aşeri tayfin kalo Ok'rani ğar P'agieley, 27Naft'alin tayfin kalo isə Enani ğar Axiraney.
28Metərluğen, israilluğoy dəst'oox me q'aydinent'un yaq'a bafst'ay.
29Moiseyen Xovava, iz q'ayinba midyanlu Reueli ğara pine: «Yan Q'ončuğon "və̌x tadoz" pi galayan yaq'a bafst'a. Eki yaxun tağen! Beş t'ǒğǒl hik'k'alaxun koruğ ten ak'al, axıri Q'ončuğon İsraila şaat'luğbsunane əyit tade». 30Ama Xovaven şot'o pine: «Təə, tez tağal. Zu bez yurdnu, bez q'oom-ağrabin t'ǒğǒl tağoz». 31Moiseyen pine: «Xaişezbsa, yaxun eki. Ams'i oç̌ala çurk'ala ganu maya düzbsunaxun vi bul c'enesa, yaynak' yaq' ak'est'al baka. 32Yaxun tağayin, Q'ončuğon yaynak' bala şaat'luğa vaxunal kamteyanbon».
33İsrailluyox Q'ončuğoy buruğoxun c'eri xib ği yaq't'un taśi. Q'ončuğoy irəziluği sanduğa taşala leviyox běšt'un taysay, Q'ončuğonal şot'oğo üşe azuk'i çurk'ala ganune ak'est'ay. 34Ğenaxun yaq'a baft'at'an isə Q'ončuğoy asoyal ěqeśi içoğoxune baksay.
35Şot'oğon sanduğa ext'i tağat'an Moiseyen nexey:
«Ay Q'ončux, ěqeki!
Barta Vi düşmənxo śareśeq'at'un,
Va nifrətbalxo Vi běšt'an t'it'ereq'at'un!» #10:35 Ǐvel mə̌ğ. 68:1
36Sanduğa taşalorox çurk'at'an isə metəre nexey:
«Ay hazarxon bakala israilluğoy Q'ončux, qaybaka!»
Currently Selected:
Ams'i oç̌ala 10: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
