C'eysun 20

Buxačuğoy vis' əmir

(K'an. 5:1-21)

1Oşa Buxačuğon me əyitmoğone pi:

2«Zu va Misiri oç̌alaxun, k'ul baki ganuxun c'evk'i vi Buxačux bakala Q'ončuxzu.

3Vi Zaxun q'erəz buxačuxxo nu bakalane!

4Vaynak' sal sa binik' buxačux ma düzba. Nə ala - göynul, nə oq'a - oç̌ali loxol, nəəl oç̌ali oq'a xene boş bakala hik'k'ali surata ma düzba. 5Metər şeyurxo bul ma k'os'ba. Şot'aynak' ki, vi Buxačux Q'ončux Zuzu, q'erəz buxačuxxo bul k'os'bsuna nu portbala Buxačuxzu. Günaxbi bavoğoy cazina içoğoy nəvə-nəticoğoz zapest'on. #20:4-5 C'eys. 34:17; Lev. 19:4; 26:1; K'an. 4:15-18; 27:15 6Za çureśi Bezi əmirxo əməlbalt'oğo isə içoğoxun oşa hələ hazar nəsilxoval Bezi nu badalbakala çuresunaz ak'est'on! #20:5-6 C'eys. 34:6-7; Ams'i oç̌. 14:18; K'an. 7:9-10

7Vi Buxačux bakala Q'ončuğoy s'iya ams'i gala muzel ma eça, şot'aynak' ki, Q'ončuğon İz s'iya ams'i gala muzel eçalt'u cazasuz tene bark'on. #20:7 Lev. 19:12

8 Şamat' ğine ı̌vel baksuna eyex efi şot'o t'iyə̌mi ğimxoxun üst'ün laxa. #20:8 C'eys. 16:23-30; 31:12-14 9Ǔq ği əşp'i bütüm vi əşurxo biq'a. 10Vǔğǔmci ği isə vi Buxačux bakala Q'ončuğo həsrbaki ı̌vel Şamat' ğine. Me ği nə hun, nə vi ğaren, nə vi xuyəren, nə vi işq'ar nəəl çuux nökəren, nə vi heyvanxon, nə vi t'ǒǒx bakala q'erəz ölkinəxun bakala q'əriben sal sa əş maq'an biq'i. #20:9-10 C'eys. 23:12; 31:15; 34:21; 35:2; Lev. 23:3 11Şot'aynak' ki, ǔq ğiin boş Q'ončuğon göyə, oç̌ala, dənizə saal t'et'iya bakala k'ə bunesa yaratmişebi, vǔğǔmci ğine isə dincəyinşebaki. Kot'aynak'al Q'ončuğon Şamat' ğina xeyir-bərəkət tadi şot'o t'iyə̌mi ğimxoxun üst'üne laxi. #20:11 Burq. 2:1-3; C'eys. 31:17

12Vi bava-nana hörmətba ki, Buxačux Q'ončuğon va tadi oç̌ala vi ömür boxoyq'an baki. #20:12 K'an. 27:16; Mat'. 15:4; 19:19; Mrk'. 7:10; 10:19; Luk'. 18:20; Rim. 13:9; İak'. 2:11; Ef. 6:3

13Besmaba. #20:13 Burq. 9:6; Lev. 24:17; Mat'. 5:21; 19:18; Mrk'. 10:19; Luk'. 18:20; Rim. 13:9; İak'. 2:11

14Əxlagsuzluğmaba. #20:14 Lev. 20:10; Mat'. 5:27; 19:18; Mrk'. 10:19; Luk'. 18:20; Rim. 13:9; İak'. 2:11

15Başmaq'a. #20:15 Lev. 19:11; Mat'. 19:18; Mrk'. 10:19; Luk'. 18:20; Rim. 13:9

16Şuk'k'ali əleyinə əfçidən şahidluğmaba. #20:16 C'eys. 23:1; Mat'. 19:18; Mrk'. 10:19; Luk'. 18:20

17Şuk'k'ali k'oja tamaxmaba. Şuk'k'ali çuğo, iz işq'ar nəəl çuux nökərə, öküzə, elema - şot'ay sal sa şeya tamaxmaba». #20:17 Rim. 7:7; 13:9

Azuk'i Buxačuğoy əyitpsunaxun q'ǐbsun

(K'an. 5:22-33)

18Azuk'en göye gürultina q'a şeyp'uri səsə ibaki, buruğoy k'üünəxbaksuna q'a s'ə̌q'ə ak'i q'ı̌bi ə̌xilebaki. 19Şot'oğon Moiseya pit'un: «Yaxun hun əyitp'a, va ibaken. Ama Buxačuğon yaxun maq'an exlətp'i, tene biyalyan». #20:18-19 Əbr. 12:18-19 20Moiseyen azuk'a pine: «Ma q'ı̌banan, Buxačux şot'o görəne hare ki, İz eysunen ef Şot'o hetər q'arşilayinşbsuna yoxlayinşane saal və̌n Şot'ay zora q'a kalaluğa ak'i ene günax nu banan».

21Azuk' ə̌xil çurpeney, Moisey isə Buxačux iz boş bakala mə̌p-mə̌yin asoyane ı̌šalayinşaki.

Q'urban eşt'uni q'aydoox

22 Q'ončuğon Moiseya pine: «İsrailluğo metər upa: "Və̌n anank'i ki, Zu və̌xun göynuxunez əyitpi. #20:22 Əbr. 12:25 23Və̌ynak' nə q'ızılaxun, nəəl gümüşəxun buxačuxxo ma düzbanan, şot'oğo Zaxun barabar biq'i bul ma k'os'banan! 24Za bul k'os'bseynak' k'ulen düzbaki q'urban eçala ga düzbanan, bok'ospsuni q'a serluği q'urbanxo #20:24 Bok'ospsuni q'a serluği q'urbanxo - bok'ospsuni q'urbaneynak' israilluğon t'olaxun başq'a heyvana bütümə q'urban eçala gala bok'ost'unbsay. Serluği q'urbaneynak' eçala heyvanxo isə tet'un bok'ospsay. Şot'ay yeq'a běyinšxoy q'a amdarxoy arane cöyt'unbsay. Me q'urbani məksəd serluğa q'a amdarxoy ara sun-sunaxun şaat' baksuna təzələyinşbsuney. eşt'eynak'al ef eğel-keçiğoxun q'a beliğoxun şot'ay loxol eçeri šampanan. Vi Za bul k'os'bseynak' mani ganu c'ək'k'ayiz, Zu t'iya hari va xeyir-bərəkət tadoz. 25Əgər Za bul k'os'bseynak' ǰěnaxun q'urban eçala ga düzbayin, şot'o kişeśi ǰěnaxun ma biq'a, şot'aynak' ki, ǰěne loxol ət't'əcen əşp'ayin, şot'o murdarlayinşenbon. #20:25 K'an. 27:5-7; Yeş. 8:31 26Zaynak' q'urban eçala gane loxol vi oq'axun maq'an qayeśi pi şot'ay loxol piləkənen ma laki".

Currently Selected:

C'eysun 20: udi

Highlight

Copy

Compare