ᑕᐃᑕᔅ 3
3
ᑕᓐ ᒋᐸ ᐃᓯ ᐱᒪᑎᓯᐅᒡ ᐊᓐᒡ ᑲ ᑕᑈᔭᔨᒪᒡ ᒋᓴᒪᓂᑐᐛ
1ᒋᔅᒋᓱᒥᒡ ᒋᑦ ᐃᔨᒥᒡ ᒐᒋ ᓂᑐᑐᐛᒡ ᐊᓂᔭ ᑲ ᐅᒋᒪᒥᒡ ᑭᔭ ᒐᒋ ᓂᓇᐃᑐᐛᒡ ᐊᓂᔭ ᑲ ᒋᓴᐅᒋᒪᐤ ᐊᑐᔅᒐᔨᒋ ᑭᔭ ᒧᔅ ᒐᒋ ᐊᔭᔅᑯᐎᒡ ᒐᒋ ᐊᑐᔅᒐᔅᑕᒡ ᑯᐃᔅᒄ ᐊ ᐃᓯᓇᑯᓂᔨᒡ ᐊᑐᔅᒐᐅᓂᔪᐤ᙮ 2ᐎᑎᒧᐅᒡ ᒐ ᐊᑲ ᒋ ᒥᒋ ᐊᔨᒧᒪᒡ ᐊᐛᔪᐛ, ᒐᒋ ᒋᔭᒪᐛᔨᑕᑯᓯᒡ ᑭᔭ ᒐᒋ ᒥᔽᔨᑕᑯᓯᒡ᙮ ᒧᔅ ᒋᐸ ᔪᔅᐸᑎᓯᔅᑐᐛᐅᒡ ᒥᓯᐛ ᐊᐛᔪᐛ᙮ 3ᐛᔅ ᑭᔭ ᒋᔭᓄᐤ ᐸᐃᒂᐤ ᔅᒋ ᒋᔎᐱᒪᑎᓯᓇᓄᐤ, ᓇᒪ ᒋ ᐅᒋ ᓂᓇᐃᑐᐛᓄᐤ ᒋᓴᒪᓂᑐᐤ, ᔅᒋ ᐎᔭᓯᐃᑯᓇᓄᐤ ᑭᔭ ᔅᒋ ᓴᐧᑯᒋᐃᑯᓇᓄᐤ ᓂᓇᐧᑯᐤ ᒥᒋ ᓂᑐᐛᔨᑎᒧᐅᓇ ᑭᔭ ᒥᒋ ᒥᔽᔨᑎᒧᐅᓇ᙮ ᐱᓯᒄ ᔅᒋ ᒥᒐᑎᓯᓇᓄᐤ ᑭᔭ ᔅᒋ ᐅᑕᔨᒪᓄᐅᒡ ᐊᐛᓐᒋ᙮ ᔅᒋ ᐛᐧᑲᑕᓄᐅᒡ ᐊᐛᓐᒋ ᑭᔭ ᐎᔨᐛᐤ ᒪᒃ ᔅᒋ ᐛᐧᑲᑎᑯᓄᐅᒡ᙮
Titus 3.4-7 (Christmas Year B)
4ᒥᒄ ᒪᒃ ᐃᔅᐱ ᑲ ᐛᐸᑎᔨᑕᐧᒄ ᒋᓴᒪᓂᑐᐤ ᒋᐱᒪᒋᐃᐛᒥᓄᐤ ᐊ ᐃᔅᐱᔅ ᒋᓴᐛᑐᑕᑕᐧᒄ ᑭᔭ ᐊ ᐃᔅᐱᔅ ᓴᒋᐃᑕᐧᒄ 5ᔅᒋ ᐱᒪᒋᐃᑯᓄᐤ᙮ ᓇᒪ ᐎ ᑕᓐ ᑲ ᐃᓯ ᒋᒥᔪᑐᑎᒪᐧᒄ ᒋ ᐅᒋ ᐱᒪᒋᐃᑯᓄᐤ ᒥᒄ ᐊᓂᔭ ᒋᓴᒪᓂᑐᐤ ᐊᒋ ᒋᔅᑎᒪᒐᔨᒥᑕᐧᒄ ᐊᑯᑕ ᑲ ᐅᒋ ᐱᒪᒋᐃᑕᐧᒄ᙮ ᑲ ᐸᔭᒋᓯᑦ ᐊᒐᐧᒄ ᔅᒋ ᐸᔭᒋᐃᑯᓄᐤ ᑭᔭ ᒥᓐ ᔅᒋ ᐅᔅᒋᐃᑯᓄᐤ᙮ 6ᒋᓴᒪᓂᑐᐤ ᒋ ᐛᔪᒋᐱᔪᐤ ᐊ ᓯᒋᓂᒪᑕᐧᒄ ᑲ ᐸᔭᒋᓯᔨᒋ ᐊᒐᒂ ᐊᓐᑕ ᐊ ᑕᐛᐧᒄ ᐊᓂᔭ ᐅᒋ ᑕᓐ ᑲ ᐃᓯ ᐃᑐᑎᒪᑕᐧᒄ ᒋᐱᒪᒋᐃᐛᒥᓄᐤ ᒋᓴᔅ ᙭᙮ 7ᐊᑯ ᒪᒃ ᐊᓂᔭ ᐊᒋ ᒋᓴᐛᑐᑕᑕᐧᒄ ᒋᓴᒪᓂᑐᐤ ᔅᒋ ᐃᑐᑕᑭᓄᐤ ᒐᒋ ᑯᐃᔅᑯᓇᑯᓯᔭᐧᒄ ᑭᔭ ᒋᔭᔅᑎᓇᑕᔨᑎᒪᐧᒄ ᒐ ᐊᔭᔭᐧᒄ ᑲᒋᒡ ᐱᒪᑎᓯᐅᓐ᙮ 8ᑕᑈᒥᑭᓐ ᐅ ᑲ ᐃᔅᒋᔄᔭᓐ᙮
ᒋ ᓂᑐᐛᔨᒥᑎᓐ ᒐᒋ ᓯᒋᒥᑥᐤ ᐊᓐᒡ ᑲ ᑕᑈᔭᔨᒪᒡ ᒋᓴᒪᓂᑐᐛ ᒐ ᐎ ᒥᔪᑐᑎᒧᐛᒡ ᑯᑎᑲ ᐊᐛᔪᐛ᙮ ᐛᔅ ᒥᔽᔪᐤ ᑭᔭ ᒋᑭ ᒥᔪ ᐎᒋᐃᑯᐅᒡ ᐅᔭ ᐃᑐᑕᒂᐛ᙮
9ᑕᐅᒡ ᐊᐛᓐᒋ ᐊ ᒥᒋᐱᔨᒡ ᐊ ᐊᔨᒧᑕᒡ ᒍᐤ ᐃᔪᐤ ᐎᓱᐛᐅᓇ ᑕᓐ ᐊᓂᔭᔪᐛ ᒋᐸ ᑭᓄᐛᔨᑕᑭᓄᐅᔪᐛ ᑭᔭ ᐊ ᐊᔨᒧᑕᒡ ᑕᓐ ᐊ ᐃᑎᔅᑲᑐᔨᒋ ᐅᑦ ᐊᓂᔅᒐ ᐛᐧᑯᒪᑭᓄᐛᐛ᙮ ᐊᑲᐎᔾ ᐊᐱᑕᔨᑎᒧᒄ ᒐᒋ ᐊᔨᒧᑎᒪᒄ ᐅᔭ ᒐᒂᔪᐛ ᐛᔅ ᑕᐸ ᐎᔭᔅ ᐃᑕᐱᑎᓇ ᑭᔭ ᓇᒪ ᓇᔅᒡ ᐎᒋᐃᑯᐅᒡ ᐊᐛᓐᒋ᙮ 10ᑕᒐ ᐊᐛᓐ ᒧᔅ ᐊ ᐃᑐᑐᐛᑦ ᒐᒋ ᒥᒋᐱᔨᒋ ᐅᒪᒧᐊᔭᒥᐊᐛ ᑭᔭ ᒐᒋ ᐃᑐᑐᐛᑦ ᒐᒋ ᑎᐸᓂᐱᔨᒋ, ᐎᑎᒧᐤ ᐸᐃᒂᐤ ᑭᔭ ᒪᒃ ᓂᔄᐤ ᒐᒋ ᐳᓂᑦ ᐊᓂᔭ ᐊ ᐃᑎᑦ᙮ ᐊᑲ ᒪᒃ ᓂᑐᑕᔅᒐ ᐊᑯᔅ ᐊᑲ ᐱᒪᐃᒻ᙮ 11ᒋ ᒋᔅᒐᔨᒪᐤ ᐊ ᒥᒋᑐᑕᐧᒃ ᐊᐛᓐ ᐅᔭ ᐊ ᐃᑎᑦ᙮ ᐊ ᒥᒋᑐᑕᐧᒃ ᒪᒃ ᐊᑯᑕ ᐊ ᓄᑯᓂᔨᒡ ᐊ ᐅᓂᐱᔨᑦ᙮
ᒪᔅᑕᔾ ᑲ ᐃᑎᓱᒪᑦ ᑈᓪ ᐊᓂᔭ ᑕᐃᑕᓴ
12ᓂᑦ ᐃᑕᔨᑕᓐ ᒐᒋ ᐃᑎᓴᐅᒃ ᐊᕐᑎᒪᔅ ᑭᔭ ᒪᒃ ᑕᐃᑭᑲᔅ ᐊᓐᑕ ᐊ ᑕᔨᓐ᙮ ᐃᔅᐱ ᒪᒃ ᑎᑯᓯᓂᒐ ᐅ ᓇᐸᐤ ᐊᓐᑕ ᐊ ᑕᔨᓐ, ᒐ ᑯᒋᑕᔨᓐ ᑎᐛᒡ ᒐᒋ ᐸᒋ ᓂᒋᔅᑯᔨᓐ ᐊᓐᑕ ᓂᑲᐳᓕᔅ ᐊ ᐃᓯᓂᐧᑲᑕᒡ ᐅᑕᓇᐤ ᐛᔅ ᐊᑯᑕ ᑲ ᐎ ᑕᔭᓐ ᐃᔅᑭᓐ ᐱᐳᓇ᙮ 13ᒋᑭ ᔅᑐᑕᐅᒡ ᐊᓐᒡ ᑎᐸᔅᑯᓂᒐᓱᐤ ᓯᓇᔅ ᑭᔭ ᐊᐳᓚᔅ᙮ ᓱᒃ ᒐ ᑯᒋᑕᔨᓐ ᒐᒋ ᐎᒋᐃᑥᐤ ᐊ ᐊᔭᔅᑯᐎᒡ, ᒐ ᓂᑐ ᒋᔅᒐᔨᒥᑥᐤ ᒥᓯᐛ ᒐᒂᔪᐤ ᒐᒋ ᐊᔭᒡ ᑕᓐ ᒐ ᐃᓯ ᓂᑐᐛᔨᑕᒡ᙮ 14ᐊᓐᒡ ᒪᒃ ᒋᔭᓄᐤ ᒋᑦ ᐃᔨᒥᓄᐅᒡ ᒋᐸ ᐎ ᒋᔅᒐᔨᑎᒧᒡ ᑕᓐ ᒋᐸ ᒋ ᐃᓯ ᒥᔪ ᐊᑐᔅᒐᐅᒡ, ᐊ ᐎᒋᐊᒡ ᐊᐛᔪᐛ ᓇᔅᒡ ᐊ ᓂᑐᐛᔨᑎᒥᔨᒋ ᒐᒋ ᐎᒋᐊᑭᓄᔨᒋ᙮ ᓇᒪ ᒋᐸ ᐅᒋ ᐃᓯᓇᑯᓱᐅᒡ ᒐ ᐊᑲ ᒋ ᐎᔭᔅ ᐃᑕᐱᑎᓯᒡ᙮
15ᒥᓯᐛ ᒪᒃ ᐊᐛᓐᒋ ᐅᑕ ᐊ ᑕᒡ ᐊ ᑕᔭᓐ ᒋ ᐛᒋᔭᒥᑯᒡ᙮ ᐛᒋᔭᒥᒡ ᒋᐎᒐᐛᑭᓄᐅᒡ ᐊᓐᒡ ᑲ ᑕᑈᑕᒡ᙮
ᒋᑦ ᐊᔭᒥᐊᔅᑎᒪᑎᓇᓐ ᒋᓴᒪᓂᑐᐤ ᒐᒋ ᒋᓴᐛᑐᑕᑕᒄ ᒥᓯᐛ ᐊ ᑎᓯᔭᒄ᙮
Currently Selected:
ᑕᐃᑕᔅ 3: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
