ᕈᒪᓇ 3
3
1ᑕᓐ ᒪᒃ ᐃᓯ ᐎᔭᐱᒡ ᒍᐤ ᐊ ᐃᑎᔅᑲᓇᓯᑦ ᐊᐛᓐ᙮ ᑕᓐ ᐃᓯ ᐎᔭᐱᒡ ᐊᑎ ᐊᒋ ᒋᔅᒋᓄᐛᒋᔄᑭᓄᐅᑦ ᐊᐛᓐ᙮ 2ᒥᔅᑎ ᑭᑈ ᒐᒂᓐ ᐃᑕᔨᑕᑯᓐ ᒍᐤ ᐊ ᐃᑎᔅᑲᓇᓯᑦ ᐊᐛᓐ᙮ ᒥᔅᑎ ᑕᑈ ᐃᑕᔨᑕᑯᓐ᙮ ᓂᔅᑎᒻ ᒐᒂᓐ᙮ ᐊᐅᑯᓐᒡ ᐅᒡ ᒍᐤ ᑲ ᐃᑎᔅᑲᓇᓯᒡ ᐃᔪᒡ ᑲ ᒥᔭᑭᓄᐎᒡ ᒐᒋ ᐊᑐᔅᒐᔅᑎᒺᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ᙮ 3ᐱᔅᒐ ᐊᓂᔭᔪᐛ ᒍᐤ ᑲ ᐃᑎᔅᑲᓇᓯᔨᒋ ᓇᒪ ᐅᒋ ᑕᑈᐅᒐᔨᑕᑯᓯᔪᐛ, ᐊᑯ ᐊ ᒪᒃ ᓇᒪ ᑕᑈᐅᒐᔨᑕᑯᓱᐤ ᑭᔭ ᐎᔾ ᒋᓴᒪᓂᑐᐤ ? 4ᓇᒪᐎᔾ ᑭᑈ, ᓇᒪ ᓇᔅᒡ ᒋᑭ ᒋ ᐃᓯᓇᑯᓂᔪᐤ ᐊᑲ ᒪᒧᔭᒻ ᒐᒋ ᐃᑎᑦ ᒋᓴᒪᓂᑐᐤ᙮ ᑕᑈᐤ ᐎᔾ ᒋᓴᒪᓂᑐᐤ ᐊᑎ ᒥᓯᐛ ᐊᐛᓐ ᐊ ᑭᑭᒋᔭᑦ᙮ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᐎᔾ ᒋᓴᒪᓂᑐᐤ ᐊ ᐊᔨᒧᒪᑭᓄᐅᑦ,
ᐃᔨᒥᓇ ᒥᓯᐛ ᐊᐛᓐ ᒋᑭ ᒋᔅᒐᔨᑎᒻ ᐊ ᑕᑈᔨᓐ᙮ ᐊᑯ ᒪᒃ ᒪᒥᓯᒥᑯᔨᓇ ᐊ ᐃᑎᑯᔨᓐ ᐊ ᒥᒋᑐᑎᒥᓐ ᒋᑭ ᓄᑯᓐ ᑕᑈ ᐊᑲ ᐅᒋ ᐃᑐᑎᒥᓐ ᑕᓐ ᐊ ᐃᓯ ᒪᒥᓯᒥᑯᔨᓐ᙮
5ᒪᒃ ᒋ ᐸᒋ ᐃᑕᐤ ᐊᐛᓐ, “ᐊ ᒥᒋᑐᑎᒪᐧᒄ ᐊᑯᑕ ᐊᑐᐎᔅ ᐛᒋ ᐱᔭᑭᔅᒡ ᐛᐸᑎᒺᒡ ᐊᐛᓐᒋ ᒋᓴᒪᓂᑐᐛ ᐅᑯᐃᔅᑯᑕᑎᓯᐅᓂᔪᐤ᙮ ᒐᒂᓐ ᒪᒃ ᐛᒋ ᐛᐛᓯᐃᑎᐧᒄ ᒋᓴᒪᓂᑐᐤ ᐊ ᒥᒋᑐᑎᒪᐧᒄ ?” ᓇᒪᐎᔾ ᑭᑈ ᒪᒧᔭᒻ ᐃᑐᐤ ᒋᓴᒪᓂᑐᐤ ᐅᔭ ᐊ ᐃᑐᑕᑕᐧᒄ᙮ ᐊᐅᒄ ᐅᔭ ᐊ ᐃᔅᒋᔄᒡ ᐱᔅᒐ ᐊᐛᓐᒋ᙮ 6ᓇᒪ ᒪᒃ ᐛᐛᒡ ᐅ ᒋᐸ ᐅᒋ ᐃᓯ ᐃᔨᒥᓇᓄᐤ᙮ ᐊᑲ ᐛᐛᓯᐊᒐ ᒋᓴᒪᓂᑐᐤ ᐊᐛᔪᐛ ᐊ ᒥᒋᑐᑎᒥᔨᒋ ᒋᑭ ᒋ ᐊ ᑎᐸᔅᑯᓂᒻ ᐅᔭ ᐊᔅᒋᔪᐤ ? 7ᒐᒂᓐ ᒪᒃ ᒐ ᐅᒋ ᑎᐸᔅᑯᓂᑯᐅᔭᓐ ᐊ ᓄᑯᓂᒂ ᒋᓴᒪᓂᑐᐤ ᑕᓐ ᐊᓐ ᐊ ᐃᓯ ᑯᐃᔅᒄ ᐃᑎᑦ ᐊᓐᑕ ᐅᒋ ᐊ ᒥᒋᑐᑎᒪᓐ ᑭᔭ ᐊᑐᐎᔅ ᐊ ᒋᔅᑕᔨᑕᑯᐊᑭᓄᐅᑦ ᐊᓂᔭ ᐅᒋ᙮ 8ᒐᒂᓐ ᒐ ᐅᒋ ᐊᑲ ᒋ ᐃᔅᒋᔄᔭᐧᒄ, “ᒥᒋᑐᑕᑕᐤ ᒐᒋ ᐅᒋ ᓄᑯᓂᔨᒡ ᒋᓴᒪᓂᑐᐤ ᒧᔅ ᑯᐃᔅᒄ ᐊ ᐃᑎᑦ᙮” ᓂᒋ ᒪᔭᔨᒥᑯᒡ ᑯᑎᑭᒡ ᐊᐛᓐᒋ ᓂᑎᒥᒄ ᐊᒋ ᐃᓯ ᒪᒥᓯᒥᒡ, ᐊᒋ ᐃᔅᒋᔄᒡ ᐅᔭ ᐊᒋ ᐃᔅᒋᔄᐅᒡ᙮ ᐃᓯᓇᑯᓂᔪᐤ ᒪᒃ ᑕᑈ ᒐᒋ ᑎᐸᔅᑯᓇᑭᓄᐎᒡ ᐅᒡ᙮
ᓇᒪ ᐊᐛᓐ ᑯᐃᔅᑯᑕᑎᓯᐤ
9ᐃᓯ ᑯᒂᒋᒐᔨᒧᑦ ᐊᓐ ᐊᐛᓐ, ᐅᔅᑕ ᐊ ᒋᔭᓄᐤ ᒍᐤ ᑲ ᐃᑎᔅᑲᓇᓯᔭᐧᒄ ᒋᑦ ᐃᑕᔨᒥᑯᓄᐤ ᒋᓴᒪᓂᑐᐤ ᐊ ᐃᑕᔨᒪᑦ ᐊᓂᔭᔪᐛ ᐊᑲ ᒍᐤ ᐃᑎᔅᑲᓇᓯᔨᒋ ? ᓇᒧᐛᒡ ᑭᑈ᙮ ᓴᔅ ᔅᒋ ᐎᑎᒪᑎᓇᐛᐤ, ᒥᓯᐛ ᐊᐛᓐ ᒍᐤ ᑲ ᐃᑎᔅᑲᓇᓯᑦ ᑭᔭ ᐊᑲ ᒍᐤ ᐃᑎᔅᑲᓇᓯᑦ ᑎᐸᔨᒥᑯᐤ ᒥᒋᑥᐅᓂᔪᐤ᙮ 10ᒧᔭᒻ ᐊᑎᔅᑕᒡ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ,
ᓇᒪ ᐊᐛᓐ ᑯᐃᔅᑯᑕᑎᓯᐤ᙮ ᓇᒪ ᐛᐛᒡ ᐸᐃᒄ ᐊᐛᓐ᙮
11ᓇᒪ ᐛᐛᒡ ᐸᐃᒄ ᐊᐛᓐ ᓂᔅᑐᑎᒻ ᑕᑈᐅᓂᔪᐤ᙮ ᓇᒪ ᐛᐛᒡ ᐸᐃᒄ ᐊᐛᓐ ᐎ ᒋᔅᒐᔨᒪᐤ ᒋᓴᒪᓂᑐᐛ, ᓇᒪ ᐛᐛᒡ ᐸᐃᒄ ᐊᐛᓐ ᐊᐱᑕᔨᑎᒺᐤ ᐅᑦ ᐃᑕᔨᑎᒧᐅᓂᔪᐤ᙮
12ᒥᓯᐛ ᐊᐛᓐ ᒋ ᐱᑎᔅᑎᓴᐸᒪᐤ ᒋᓴᒪᓂᑐᐛ᙮ ᒥᓯᐛ ᐊᐛᓐ ᓇᒪᐎᔾ ᒐᒂᓐ ᐃᑕᔨᑕᑯᓱᐤ᙮ ᓇᒪ ᑕᐤ ᐊᐛᓐ ᑯᐃᔅᒄ ᐊ ᐃᑎᑦ, ᐛᐛᒡ ᐸᐃᒄ ᐊᐛᓐ ᒐᒋ ᑕᑦ᙮
13ᓂᐸᐃᐛᒥᑭᓂᔪᐛ ᐅᑦ ᐃᑥᐅᓄᐛᐛ᙮ ᐱᓯᒄ ᐎᔭᓯᒧᐛᐅᒡ ᑕᓐ ᐊ ᐃᔅᒋᔄᒡ᙮ ᒧᔭᒻ ᒋᓇᐱᒄ ᑲ ᐃᑕᔨᑕᑯᓂᔨᒡ ᐅᐱᒋᐳᔪᐛ ᐊᐅᑯᓐ ᐊ ᐃᑕᔨᑕᑯᓂᔨᒋ ᐅᑦ ᐃᔨᒧᐅᓄᐛᐛ᙮
14ᐱᓯᒄ ᒋᓱᐤ ᐃᔨᒧᐅᒡ᙮ ᑭᔭ ᐱᓯᒄ ᐛᐧᑲᑕᐅᒡ ᐊᐛᔪᐛ᙮
15ᓇᔅᒡ ᑕᑈ ᒋᓯᐱᔪᐅᒡ ᒐᒋ ᓂᓇᐧᑲᒋᐊᒡ ᐊᐛᔪᐛ ᑭᔭ ᒐᒋ ᐊᑎ ᓂᐸᐊᒡ ᐎᐱᒡ ᒐ ᓱᐛᐃᑯᑥᐎ᙮
16ᑕᓐᑕ ᒥᒄ ᐊ ᐊᑎ ᑕᒡ ᒧᔅ ᐊᔭᐧᑯᐊᐅᒡ ᐊᐛᔪᐛ᙮ ᑭᔭ ᒧᔅ ᑕᔪᐛ ᐊᐛᔪᐛ ᐊ ᓂᓇᐧᑲᑕᔨᒧᐊᒡ᙮
17ᓇᒪ ᓇᔅᒡ ᐎ ᑯᒋᑕᐅᒡ ᒐᒋ ᒥᔪ ᐎᒐᐛᒡ ᐊᐛᔪᐛ᙮
18ᓇᒪ ᓇᔅᒡ ᓇᓂᒋᔅᑐᐛᐅᒡ ᒋᓴᒪᓂᑐᐛ᙮
ᐊᐅᑯᓐ ᐊᑎᔅᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ᙮
19ᒋ ᒋᔅᒐᔨᑕᓇᓄᐤ ᐊᓐᒡ ᑲ ᒥᔭᑭᓄᐎᒡ ᐅᔭ ᐎᓱᐛᐅᓂᔪᐤ ᒋᐸ ᓂᓇᐃᑕᒧᒡ ᒥᓯᐛ ᑕᓐ ᐊ ᐃᑎᓱᐛᒥᑭᓂᔨᒡ᙮ ᐊᐅᒄ ᒪᒃ ᐅ ᒐ ᐅᒋ ᐊᑲ ᓇᔅᒡ ᒋ ᐃᔅᒋᔄᑦ ᐊᐛᓐ ᐊᑲ ᐅᒋ ᒋᔅᒐᔨᑕᐧᒃ ᐊᒋ ᒥᒋᑐᑕᐧᒃ ᑭᔭ ᐊᐅᑯᓐ ᐛᒋ ᒥᓯᐛ ᐊᐛᓐ ᐅᑕ ᐊᔅᒋᒡ ᐃᓯᓇᑯᓂᔨᒡ ᒐᒋ ᑎᐸᔅᑯᓂᑯᑦ ᒋᓴᒪᓂᑐᐛ᙮ 20ᐛᔅ ᑕᐸ ᐊᐛᓐ ᒋ ᑯᐃᔅᑯᓇᑯᐃᓱᐤ ᒋᓴᒪᓂᑐᐛ ᐃᔅ ᐊ ᑕᔨᒋ ᒥᒄ ᐊᓂᔭ ᐊ ᓂᓇᐃᑕᐧᒃ ᐎᓱᐛᐅᓇ᙮ ᒋ ᒋᔅᒐᔨᑕᓐ ᐊ ᑕᓐ ᐊ ᐃᑕᐱᑎᒋ ᐅᔭ ᐎᓱᐛᐅᓇ᙮ ᒐᒋ ᒋᔅᒐᔨᑕᐧᒃ ᐊᐛᓐ ᐊ ᒥᒋᑐᑕᐧᒃ ᐊᐅᑯᓐ ᐊ ᐃᑕᐱᑎᒋ᙮
ᑕᓐᑕ ᐛᒋ ᑯᐃᔅᑯᑕᑎᓯᐊᑭᓄᐅᑦ ᐊᐛᓐ
21ᐊᓄᒡ ᒪᒃ ᐊᑯ ᐊ ᓄᑯᑕᑦ ᒋᓴᒪᓂᑐᐤ ᑕᓐᑕ ᐛᒋ ᑯᐃᔅᑯᓇᑯᐊᑦ ᐊᐛᔪᐛ ᐎᔾ ᐃᔅ ᐊ ᑕᑦ᙮ ᓇᒪᔭᔪᐤ ᒪᒃ ᐎ ᐊ ᓂᓇᐃᑕᐧᒃ ᐊᐛᓐ ᑭᔭ ᐊ ᐃᑐᑕᐧᒃ ᐎᓱᐛᐅᓂᔪᐤ ᐛᒋ ᑯᐃᔅᑯᓇᑯᓯᑦ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᐎᓱᐛᐅᓂᒡ ᐊᑯᑕ ᐛᑕᒂᒡ ᑕᓐ ᒐ ᐃᑎᑦ ᐊᐛᓐ ᒐᒋ ᑯᐃᔅᑯᓇᑯᓯᑦ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᐊᓂᔭᐧᑲ ᒪᒃ ᐅᒋᔅᒋᐛᐃᒐᓱᒡ ᐊᔪᐅᒄ ᐅᔭ ᑲ ᐃᓯ ᐎᑕᒡ ᑭᔭ ᐎᔨᐛᐤ᙮
Romans 1.16-17; 3.22-28 (Proper-4 Year A)
22ᐅᑯᐃᔅᑯᑕᑎᓯᐤ ᐃᓯ ᑭᓄᐛᐱᒪᐤ ᒋᓴᒪᓂᑐᐤ ᐊᓂᔭ ᐊᐛᔪᐛ ᑲ ᑕᑈᔭᔨᒪᔨᒋ ᒋᓴᔅ ᙭ᑕ᙮ ᒥᓯᐛ ᒪᒃ ᐊᐛᔪᐛ, ᐊᓂᔭᔪᐛ ᒍᐤ ᑲ ᐃᑎᔅᑲᓇᓯᔨᒋ ᑭᔭ ᐊᓂᔭᔪᐛ ᐊᑲ ᒍᐤ ᐃᑎᔅᑲᓇᓯᔨᒋ, ᑲ ᑕᑈᔭᔨᒪᔨᒋ ᒋᓴᓴ, ᐊᐅᑯᓐ ᐊ ᐃᓯ ᐃᑐᑎᒧᐛᑦ᙮ ᐛᔅ ᒥᓯᐛ ᐸᐃᑯᓄᒡ ᐃᓯ ᑭᓄᐛᐱᒪᐤ ᒥᓯᐛ ᐊᐛᔪᐛ ᒋᓴᒪᓂᑐᐤ᙮ 23ᒥᓯᐛ ᐊᐛᓐ ᒋ ᒥᒋᑐᑎᒻ᙮ ᐊᑯᑕ ᒪᒃ ᐛᒋ ᒥᓯᐛ ᐊᐛᓐ ᓄᑕᔅᑭᒺᑦ ᒋᓴᒪᓂᑐᐛ ᐅᒋᔅᑕᔨᑕᑯᓱᐅᓂᔪᐤ᙮ 24ᐊᓂᔭ ᓴᒐᔾ ᐊ ᐃᓯ ᒥᔭᑦ ᐊ ᒋᓴᐛᑐᑐᐛᑦ ᐊᐛᔪᐛ ᒋᓴᒪᓂᑐᐤ ᐅᑯᐃᔅᑯᑕᑎᓯᐤ ᐃᓯ ᑭᓄᐛᐱᒪᐤ ᐊᓂᔭ ᑲ ᑕᑈᔭᔨᒪᔨᒋ ᙭ ᒋᓴᓴ᙮ ᙭ ᒋᓴᔅ ᒋ ᐃᒐᓂᒧᐛᐤ ᐊᓂᔭᔪᐛ ᐊᐛᔪᐛ ᑲ ᑕᑈᔭᔨᒥᑯᑦ ᑕᓐ ᑲ ᐃᓯ ᐃᑕᔨᑕᑯᓂᔨᒡ ᒐᒋ ᑎᐸᔅᑯᓂᑯᔨᒋ ᒋᓴᒪᓂᑐᐛ᙮ 25ᐛᔅ ᒋᓴᒪᓂᑐᐤ ᒋ ᐱᔅᑎᓇᐤ ᒋᓴᓴ ᒐᒋ ᓂᐸᐊᑭᓄᔨᒋ ᒋᐱᔭᑎᑯᒡ ᒐᒋ ᐅᒋ ᐛᐸᔨᑎᒧᐛᑭᓄᔨᒋ ᐊᐛᔪᐛ ᐅᒥᒋᑥᐅᓂᔪᐛ᙮ ᐊ ᑕᑈᔭᔨᒪᑦ ᒪᒃ ᐊᐛᓐ ᒋᓴᓴ ᐊᑯᑕ ᐊ ᐅᒋ ᐛᐸᔨᑎᒧᐛᑭᓄᐅᑦ ᐅᒥᒋᑥᐅᓇ᙮ ᒋᓴᒪᓂᑐᐤ ᒋ ᐃᑐᑎᒻ ᐅᔭ ᒐᒋ ᐛᐸᑎᔨᐛᑦ ᒧᔅ ᑯᐃᔅᒄ ᐊ ᐃᑎᑦ᙮ ᐅᑕ ᐃᔅ ᐅᑕᒡ ᓇᔅᒡ ᑕᑈ ᒋ ᓯᐱᔪᐛᓯᔅᑕᒐᐤ ᒋᓴᒪᓂᑐᐤ ᑕᓐ ᑲ ᐃᓯ ᒥᒋᑐᑕᑭᓄᐎᒡ᙮ ᓇᒪ ᒧᔅ ᐊᓐ ᐊ ᐃᑕᔨᑕᑯᓂᔨᒡ ᒐᒋ ᐃᓯ ᑎᐸᔅᑯᓇᑭᓄᔨᒋ ᐊᐛᔪᐛ ᐅᒋ ᐃᓯ ᑎᐸᔅᑯᓇᐤ᙮ 26ᐊᓄᒡ ᒪᒃ ᐎ ᓇᒪ ᐊᑯ ᐊᑲ ᐱᔅᑲᑕᒧᐛᐤ ᐊᐛᔪᐛ ᐅᒥᒋᑐᑎᒧᐅᓂᔪᐛ ᒋᓴᒪᓂᑐᐤ, ᐛᐸᑎᔨᐛᐤ ᑕᓐ ᐊ ᐃᓯ ᑯᐃᔅᒄ ᐃᑎᑦ ᑭᔭ ᑕᑈ ᐅᑯᐃᔅᑯᑕᑎᓯᐤ ᐊ ᐃᓯ ᑭᓄᐛᐱᒪᑦ ᒥᓯᐛ ᐊᓂᔭᔪᐛ ᐊᐛᔪᐛ ᑲ ᑕᑈᔭᔨᒪᔨᒋ ᒋᓴᓴ᙮
27ᑕᓐ ᒪᒃ ᒐᒋ ᐃᓯ ᓂᓇᐸᐅᒧᑦ ᐊᑯ ᐊᐛᓐ᙮ ᓇᒪ ᓇᔅᒡ ᑎᑯᓂᔪᐤ ᑕᓐ ᒐᒋ ᐃᓯ ᓂᓇᐸᐅᒧᑦ᙮ ᓇᒪ ᐊᐛᓐ ᒋᑭ ᒋ ᑕᐤ ᐊ ᑯᐃᔅᑯᓇᑯᓯᑦ ᒥᒄ ᐊ ᓂᓇᐃᑕᐧᒃ ᐎᓱᐛᐅᓂᔪᐤ᙮ ᐛᔅ ᐊ ᑕᑈᔭᔨᒪᑦ ᐊᐛᓐ ᒋᓴᓴ ᐊᑯᑕ ᒥᒄ ᐅᑯᐃᔅᑯᑕᑎᓯᐤ ᒐᒋ ᐃᓯ ᑭᓄᐛᐱᒥᑯᑦ ᒋᓴᒪᓂᑐᐛ, ᓇᒪ ᐎ ᐊ ᓂᓇᐃᑎᒺᑦ ᐅᐎᓱᐛᐅᓂᔪᐤ᙮ 28ᐊᐅᒄ ᒪᒃ ᐅ ᐊ ᐃᓯ ᐎᑎᒪᐧᒄ᙮ ᐊ ᑕᑈᔭᔨᒪᑦ ᐊᐛᓐ ᒋᓴᓴ ᐊᑯᑕ ᒥᒄ ᐛᒋ ᐃᓯᓇᑯᓂᔨᒡ ᐅᑯᐃᔅᑯᑕᑎᓯᐤ ᒐᒋ ᐃᓯ ᑭᓄᐛᐱᒥᑯᑦ ᒋᓴᒪᓂᑐᐛ, ᓇᒪ ᐎ ᐊᓂᔭ ᐊ ᓂᓇᐃᑎᒺᑦ ᐅᐎᓱᐛᐅᓂᔪᐤ᙮ 29ᒪᒃ ᐊ ᐃᑕᔨᑎᒧᒂ ᐊᐛᓐ, ᐊᑯ ᐊ ᒪᒃ ᒥᒄ ᐊᓐᒡ ᒍᐤ ᑲ ᐃᑎᔅᑲᓇᓯᒡ ᐛᒋᓴᒪᓂᑐᒥᒡ ᒋᓴᒪᓂᑐᐛ᙮ ᓇᒪᐎᔾ ᐊ ᑭᔭ ᐎᔨᐛᐤ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᐅᒋᓴᒪᓂᑐᒧᐅᒡ ᒋᓴᒪᓂᑐᐛ ? ᑭᑈ ᑭᔭ ᐎᔨᐛᐤ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᐛᒋᓴᒪᓂᑐᒥᒡ ᒋᓴᒪᓂᑐᐛ, ᓇᒪ ᒥᒄ ᐎᔨᐛᐤ ᐊᓐᒡ ᒍᐤ ᑲ ᐃᑎᔅᑲᓇᓯᒡ᙮ 30ᐛᔅ ᐸᐃᑯᓱᐤ ᒥᒄ ᒋᓴᒪᓂᑐᐤ, ᑕᐱᔅᑯᓐ ᐊᓂᔭᔪᐛ ᒍᐤ ᑲ ᐃᑎᔅᑲᓇᓯᔨᒋ ᑭᔭ ᐊᓂᔭᔪᐛ ᐊᑲ ᒍᐤ ᐃᑎᔅᑲᓇᓯᔨᒋ ᑯᐃᔅᑯᑕᑎᓯᐅᓂᒡ ᒋᑭ ᐃᓯ ᑭᓄᐛᐱᒪᐤ ᑕᑈᔭᔨᒪᑥᐛᓐᒋ ᒋᓴᓴ᙮ 31ᐊᑯ ᐊ ᒪᒃ ᐎᔭᐱᓂᒪᐧᒄ ᐎᓱᐛᐅᓐ ᐊ ᐃᔅᒋᔄᔭᐧᒄ ᒥᒄ ᐊ ᑕᑈᔭᔨᒪᑦ ᐊᐛᓐ ᒋᓴᓴ ᐊ ᐅᒋ ᑯᐃᔅᑯᓇᑯᐊᑭᓄᐅᑦ ᒋᓴᒪᓂᑐᐛ ᐃᔅ ᐊ ᑕᔨᒋ ? ᓇᒪᐎᔾ ᑭᑈ᙮ ᐃᔭᐱᒡ ᒋ ᒋᐧᑲᔭᔨᑕᑯᑕᓇᓄᐤ ᑕᓐ ᒋᒋᐛ ᐊ ᐃᑕᐱᑎᒡ ᐊᓐ ᐎᓱᐛᐅᓐ᙮
Currently Selected:
ᕈᒪᓇ 3: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
