ᕈᒪᓇ 2
2
ᒋᓴᒪᓂᑐᐤ ᒥᒄ ᒋᑭ ᒋ ᑎᐸᔅᑯᓇᐤ ᐊᐛᔪᐛ
1ᐊᐅᒄ ᒪᒃ ᐅ ᐛᒋ ᐊᑲ ᓇᔅᒡ ᐃᓯᓇᒂᒡ ᒐᒋ ᑎᐸᔅᑯᓂᑦ ᐊᐛᓐ᙮ ᐛᔅ ᒧᔭᒻ ᐊ ᑎᐸᔅᑯᓂᑥᐤ ᐊᐛᓐᒋ, ᒋᔾ ᒪᒃ ᐊ ᐃᑐᑎᒧᐅᓇ ᐊᓂᔭ ᑲ ᐃᓯ ᑎᐸᔅᑯᓂᑥᐤ, ᒋᔾ ᑎᐱᔨᐛ ᒋ ᓂᓱᐅᓇᒋᒥᓱᓐ᙮ 2ᐛᔅ ᒥᓯᐛ ᒋ ᒐᔅᑎᓇᐅᓇᓄᐤ ᑕᑈ ᑯᐃᔅᒄ ᐊ ᐃᑎᑦ ᒋᓴᒪᓂᑐᐤ ᑕᐸᔅᑯᓇᔨᒋ ᐊᓂᔭᔪᐛ ᐊᐛᔪᐛ ᑲ ᐃᑐᑎᒥᔨᒋ ᐅᔭ ᒐᒂᔪᐛ᙮ 3ᒋᔾ ᒪᒃ ᐎ, ᓂᐎᒐᐛᑭᓐ, ᒋ ᐃᑐᑕᓐ ᐅᔭ ᒐᒂᔪᐛ ᑕᓐ ᐊᓂᔭᔪᐛ ᐊ ᐃᓯ ᑎᐸᔅᑯᓂᑥᐤ ᑯᑎᑭᒡ ᐊ ᐃᑐᑕᒡ᙮ ᒋᑦ ᐃᑕᔨᑕᓐ ᐊ ᒐ ᒥᔭᔅᑭᒧᑦ ᒋᓴᒪᓂᑐᐤ ᐅᑎᐸᔅᑯᓂᒐᐅᓐ ᐅ ᐊ ᐃᑎᔨᓐ ? 4ᓇᔅᒡ ᑕᑈ ᒋᓴᐛᑎᓯᐤ ᒋᓴᒪᓂᑐᐤ᙮ ᓇᑲᐎᐤ ᒐᒋ ᑎᐸᔅᑯᓂᔅᒃ ᑭᔭ ᓇᔅᒡ ᑕᑈ ᒋ ᓯᐱᔪᐛᓯᔅᑕᒄ᙮ ᒐᒂᔪᐤ ᐛᒋ ᒪᔭᔨᒥᑦ, ᐊᓂᔭ ᒪᒃ ᐊ ᐃᔅᐱᔅ ᒥᔽᔨᑕᑯᓯᑦ᙮ ᓇᒪᐎᔾ ᐊ ᒋ ᒋᔅᒐᔨᑕᓐ ᒐᒂᔪᐤ ᐛᒋ ᒋᓴᐛᑐᑕᔅᒃ ? ᒋ ᓂᑐᐛᔨᒧᒄ ᒐᒋ ᒥᑕᒋᔨᐛᔨᑎᒧᑦ ᑕᓐ ᐊ ᐃᓯ ᒥᒐᑎᓯᔪᐅᑦ ᑭᔭ ᒐᒋ ᒂᔅᑲᑎᓯᔪᐅᑦ᙮
5ᐊᓐ ᒪᒃ ᐊ ᐃᔅᐱᔅ ᓱᒐᔨᒧᐎᓐ ᒥᒄ ᒋ ᐃᑐᑕᓐ ᐊᑐᐎᔅ ᐊᒂᒡ ᒐᒋ ᐃᓯ ᑎᐸᔅᑯᓂᔅᒃ ᒋᓴᒪᓂᑐᐤ ᐊᓂᔭ ᐊ ᒋᓯᑲᔨᒡ ᑕᓐᑕ ᒐᔅᑎᓇᔅ ᑯᐃᔅᒄ ᒐ ᐃᓯ ᑎᐸᔅᑯᓇᑦ ᐊᓂᔭᔪᐛ ᑲ ᒥᒋᑐᑎᒥᔨᒋ᙮ 6ᐛᔅ ᒥᓯᐛ ᐊᐛᔪᐛ ᐊᓂᔭ ᑕᓐ ᑲ ᐊᐃᑎᔨᒋ ᒋᑭ ᑎᑯᓂᔪᐤ ᑕᓐ ᒐ ᐃᓯ ᑎᐸᔅᑯᓇᑦ᙮ 7ᐊᓂᔭᔪᐛ ᐊᐛᔪᐛ ᒧᔅ ᑲ ᒥᔪᑐᑎᒥᔨᒋ ᐊ ᐱᑯᓴᔨᒧᔨᒋ ᒐᒋ ᒥᔪ ᑭᓄᐛᐱᒥᑯᔨᒋ ᒋᓴᒪᓂᑐᐛ ᑭᔭ ᒐᒋ ᒥᔽᒋᒥᑯᔨᒋ ᑭᔭ ᒐᒋ ᒥᔨᑯᔨᒋ ᑲᒋᒡ ᒐᒋ ᐱᒪᑎᓯᔨᒋ, ᒋᑭ ᒥᔭᐤ ᑲᒋᒡ ᒐᒋ ᐱᒪᑎᓯᔨᒋ᙮ 8ᐊᑯ ᐊᓂᔭ ᑯᑎᑲ ᐊᐛᔪᐛ ᒥᒄ ᐎᔨᐛᐤ ᑲ ᒪᒥᑐᓇᔨᒥᓱᔨᒋ ᐊᑲ ᓇᔅᒡ ᐊᐱᑕᔨᑎᒥᔨᒋ ᐊᓂᔭ ᑕᓐ ᐊ ᐃᓯ ᑯᐃᔅᑯᓇᑯᓂᔨᒡ ᒐᒋ ᐃᑐᑎᒥᔨᒋ, ᐱᓯᒄ ᑲ ᒥᒋᑐᑎᒥᔨᒋ, ᐊᐅᑯᓐ ᐅᔭ ᒪᐅᒡ ᐃᔭᒂᒡ ᒐ ᐃᓯ ᑎᐸᔅᑯᓇᑦ ᒋᓴᒪᓂᑐᐤ᙮ 9ᒥᓯᐛ ᐊᓐᒡ ᑲ ᒥᒐᑎᓯᒡ ᒥᔅᑎ ᒋᑭ ᐅᑎᑕᐅᑯᐅᒡ ᓂᓇᐧᑲᑕᔨᒧᐅᓂᔪᐤ ᑭᔭ ᒋᑭ ᒪᑎᑯᔅᑲᑯᐅᒡ ᐊᔨᒪᔨᑎᒧᐅᓂᔪᐤ᙮ ᐊᓐᒡ ᒍᐤ ᑲ ᐃᑎᔅᑲᓇᓯᒡ ᓂᔅᑎᒻ ᒋᑭ ᑎᐸᔅᑯᓇᑭᓄᐎᒡ ᐊᑯ ᒥᓐ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ᙮ 10ᐊᓂᔭᔪᐛ ᒪᒃ ᒧᔅ ᑲ ᒥᔪᑐᑎᒥᔨᒋ ᐊᐅᑯᓐ ᐊᓂᔭᔪᐛ ᒐ ᒥᔪ ᑭᓄᐛᐱᒪᑦ ᒋᓴᒪᓂᑐᐤ᙮ ᒋᑭ ᒋᔅᑕᒋᒪᐤ ᑭᔭ ᒋᑭ ᒥᔭᐤ ᒋᔭᒪᔨᑎᒧᐅᓂᔪᐤ᙮ ᐊᓂᔭᔪᐛ ᓂᔅᑎᒻ ᒍᐤ ᑲ ᐃᑎᔅᑲᓇᓯᔨᒋ ᒋᑭ ᐃᑐᑐᐛᐤ ᐅᔭ ᐊᑯ ᒥᓐ ᐊᓂᔭᔪᐛ ᐊᑲ ᒍᐤ ᐃᑎᔅᑲᓇᓯᔨᒋ᙮ 11ᐛᔅ ᒥᓯᐛ ᐊ ᐃᑎᔅᑲᓇᓯᔨᒋ ᐊᐛᔪᐛ ᐸᐃᑯᓄᒡ ᐃᓯ ᑭᓄᐛᐱᒪᐤ ᒋᓴᒪᓂᑐᐤ᙮
12ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᓇᒪ ᒋᔅᒐᔨᑎᒧᒡ ᐊᓂᔭ ᐎᓱᐛᐅᓂᔪᐤ ᒋᓴᒪᓂᑐᐛ ᑲ ᒥᔭᔨᒋ ᐊᓂᔭᔪᐛ ᒍᐤ ᑲ ᐃᑎᔅᑲᓇᓯᔨᒋ᙮ ᒋᑭ ᐅᓂᓯᓄᐅᒡ ᒪᒃ ᐊᓂᔭ ᐊ ᒥᒋᑐᑕᒡ ᒥᒄ ᒪᒃ ᓇᒪ ᐊᓂᔭ ᐎᓱᐛᐅᓂᔪᐤ ᒋᑭ ᐅᒋ ᐊᐱᑎᓂᔪᐤ ᑎᐸᔅᑯᓇᑭᓄᑥᐛ᙮ ᐊᓐᒡ ᒪᒃ ᐎ ᒍᐤ ᑲ ᐃᑎᔅᑲᓇᓯᒡ ᒋᔅᒐᔨᑎᒧᒡ ᐅᔭ ᐎᓱᐛᐅᓂᔪᐤ᙮ ᒥᒋᑐᑎᒧᒡ ᒪᒃ ᑭᔭ ᐎᔨᐛᐤ᙮ ᐊᐅᒄ ᒪᒃ ᐅᔭᔪᐤ ᐎᓱᐛᐅᓂᔪᐤ ᒐ ᐊᐱᑎᓂᔨᒡ ᑎᐸᔅᑯᓇᑯᑥᐛ ᒋᓴᒪᓂᑐᐛ᙮ 13ᐛᔅ ᑕᐸ ᐊᓐᑕ ᐊ ᐸᑕᐧᒃ ᐊᐛᓐ ᒧᓱᓴ ᐅᐎᓱᐛᐅᓂᔪᐤ ᒋᑭ ᐅᒋ ᑯᐃᔅᑯᓇᑯᓱᐤ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᐃᑐᑕᒐ ᑕᓐ ᐊ ᐃᑎᔅᑕᔨᒡ ᐊᓐᑕ ᐊᑯᑕ ᒐ ᐅᒋ ᑯᐃᔅᑯᓇᑯᓯᑦ ᒋᓴᒪᓂᑐᐛ ᐃᔅ ᐊ ᑕᔨᒋ᙮ 14ᐊᓐᒡ ᒪᒃ ᐎ ᐊᑲ ᒍᐤ ᐃᑎᔅᑲᓇᓯᒡ ᓇᒪ ᐊᔭᐅᒡ ᐅᔭ ᐎᓱᐛᐅᓂᔪᐤ᙮ ᒥᒄ ᒪᒃ ᑎᐱᔨᐛ ᐊᓐᑕ ᐊ ᑕᒡ ᐊ ᐅᒋᐱᔨᒡ ᒐᒋ ᐃᑐᑕᒡ ᑕᓐ ᐊ ᐃᑎᓱᐛᔨᒡ ᐊᓂᔭ ᐎᓱᐛᐅᓂᔪᐤ ᐊᑯᑕ ᐛᒋ ᓄᑯᓂᔨᒡ ᐊ ᒋᔅᒐᔨᑕᒡ ᑕᓐ ᒋᐸ ᐃᑐᐅᒡ ᑭᔭ ᑕᓐ ᐊᓂᔭᔪᐛ ᐊᑲ ᒋᐸ ᐅᒋ ᐃᑐᐅᒡ ᐊᑎ ᐊᑲ ᐊᔭᒡ ᒧᓱᓴ ᐅᐎᓱᐛᐅᓂᔪᐤ᙮ 15ᐊᑯᑕ ᒪᒃ ᐛᒋ ᓄᑯᓂᔨᒡ ᐊ ᑎᑯᓂᔨᒡ ᐎᓱᐛᐅᓂᔪᐤ ᐅᑕᐃᐛᒡ ᐊᓂᔭ ᐊ ᐎᓱᒥᑯᒡ ᑕᓐ ᒋᐸ ᐃᓯ ᐱᒪᑎᓯᐅᒡ ᑭᔭ ᑎᑯᓂᔪᐤ ᐊᓐᑕ ᐛᒋ ᒋᔅᒐᔨᑕᒡ ᑕᓐ ᒋᐸ ᐃᓯ ᐱᒪᑎᓯᐅᒡ᙮ ᒋᔅᒐᔨᑎᒧᒡ ᒪᔪᑐᑎᒥᒂᓂᒋ ᒪᒃ ᒪᒋᑐᑎᒥᒂᓂᒋ᙮ 16ᐊᑯ ᒪᒃ ᐃᔅᐱ ᒋᓴᒪᓂᑐᐤ ᑎᐸᔅᑯᓇᒐ ᒥᓯᐛ ᐊᐛᔪᐛ, ᒋᓴᔅ ᙭ᑕ ᐅᒋ, ᑕᓐ ᑲ ᐃᓯ ᒋᒧᑦ ᒥᒋᑐᑎᒥᔨᒋ ᐊᑯᑕ ᒐ ᓄᑯᓂᔨᒡ ᐊᓐ ᐊᐛᓐ ᑕᑈ ᑲ ᐃᑐᑎᒧᒂ ᑕᓐ ᐊ ᐃᑎᓱᐛᔨᒡ ᐎᓱᐛᐅᓂᔪᐤ᙮ ᐊᐅᑯᓐ ᐊ ᐃᓯ ᐎᑎᒪᒐᒥᑲᒡ ᐅ ᒥᔽᒋᒧᐅᓐ ᒋᓴᔅ ᙭ ᑲ ᒥᔨᑦ ᒐᒋ ᐛᐎᑎᒧᒡ᙮
ᒍᐤ ᐃᔪᒡ ᑭᔭ ᐊᓂᔭ ᐅᐎᓱᐛᐅᓄᐛᐛ
17ᒋᔾ ᒪᒃ ᐎ, ᒍᐤ ᑲ ᐃᑎᔅᑲᓇᓯᔨᓐ ᒥᔅᑯᒡ ᒋᑦ ᐃᑕᔨᑕᓐ ᐊ ᒥᔪ ᑭᓄᐛᐱᒥᔅᒃ ᒋᓴᒪᓂᑐᐤ ᒥᒄ ᐊᓂᔭ ᐊ ᒋᔅᒐᔨᑎᒧᑦ ᒧᓱᔅ ᐅᐎᓱᐛᐅᓐ᙮ ᑭᔭ ᒋ ᒪᒥᒋᒧᓐ ᒋᓴᒪᓂᑐᐤ ᐊ ᐅᑦ ᐃᔨᒥᑐᑕᔅᒃ᙮ 18ᒋ ᒋᔅᒐᔨᒪᐤ ᑕᓐ ᐊ ᐃᓯ ᓂᑐᐛᔨᒥᔅᒃ ᒐᒋ ᐃᓯ ᐱᒪᑎᓯᔪᐅᑦ ᒋᓴᒪᓂᑐᐤ᙮ ᐅᐎᓱᐛᐅᓂᒡ ᐊᑯᑕ ᑲ ᐅᒋ ᒋᔅᒐᔨᑎᒥᓐ ᑕᓐ ᒋᐸ ᐃᓯ ᐱᒪᑎᓯᓐ ᑭᔭ ᑕᓐ ᐊᑲ ᒋᐸ ᐅᒋ ᐃᓯ ᐱᒪᑎᓯᓐ᙮ 19ᒋ ᒐᔅᑎᓇᐅᓐ ᑭᔭ ᒐᒋ ᒥᔪ ᒋᔅᒋᓄᑕᐃᑥᐤ ᐊᓐᒡ ᐊᑲ ᐛᐸᑕᒡ᙮ ᒋ ᒐᔅᑎᓇᐅᓐ ᑭᔭ ᐛᔅᑕᐅᓐ ᒐᒋ ᐃᓯ ᓇᑯᓯᔅᑐᐅᑥᐤ ᐊᓐᒡ ᐅᓂᑎᐱᔅᒋᓯᐅᓂᒡ ᑲ ᑕᒡ᙮ 20ᒋ ᒐᔅᑎᓇᐅᓐ ᒋᐸ ᑯᐃᔅᑯᓇᐅᒡ ᐊᓐᒡ ᓇᔅᒡ ᐊᑲ ᐃᑕᔨᑕᒡ, ᑭᔭ ᒋ ᒐᔅᑎᓇᐅᓐ ᐊᐛᓯᒡ ᒋᐸ ᒋᔅᒋᓄᐊᒧᐛᐅᒡ᙮ ᐊ ᐊᔭᔨᓐ ᐅ ᐎᓱᐛᐅᓐ ᒋᑦ ᐃᑕᔨᑕᓐ ᒥᓯᐛ ᒐᒂᓐ ᐊ ᒋᔅᒐᔨᑎᒥᓐ ᑭᔭ ᐊ ᒋᔅᒐᔨᑎᒥᓐ ᑕᑈᐅᓐ᙮ 21ᒋ ᒋᔅᑯᑎᒧᐛᐅᒡ ᐊᐛᓐᒋ᙮ ᓇᒪᐎᔾ ᐊ ᒋᔾ ᑭᔭ ᒋᑭ ᒋᔅᑯᑎᒪᓱᓐ ? ᒋ ᑭᒐᔅᒋᒧᐛᓐ ᒐ ᐊᑲ ᒋ ᑭᒐᒧᑎᑦ ᐊᐛᓐ᙮ ᒋᔾ ᒪᒃ ᐎ, ᒐᔅᑎᓇᔅ ᐊ ᓇᒪ ᒋ ᑭᒐᒧᑎᓐ ? 22ᒋᑦ ᐃᔅᒋᔄᓐ ᑭᔭ ᒐ ᐊᑲ ᒋ ᐱᓯᒂᑎᓯᑦ ᐊᐛᓐ᙮ ᒋᔾ ᒪᒃ ᐎ, ᒐᔅᑎᓇᔅ ᐊ ᓇᒪ ᒋ ᐱᓯᒂᑎᓯᓐ ? ᒍᐧᑲᑕᐅᒡ ᒥᓂᑐᐧᑲᓐᒡ᙮ ᒥᒄ ᒪᒃ ᓇᒪᐎᔾ ᐊ ᒋ ᑭᒐᒧᑎᓐ ᐊᓐᑕ ᐊᔭᒥᐊᐅᒋᐛᐱᒡ ᑕᓐᑕ ᓇᐎᒋᔅᑐᐛᑭᓄᐎᒡ ᒥᓂᑐᐧᑲᓐᒡ ? 23ᒥᓐ ᑯᑎᒡ ᒐᒂᓐ᙮ ᓇᔅᒡ ᒋ ᓂᓇᐸᐅᒧᓐ ᐊ ᐊᔭᐅᑦ ᒋᓴᒪᓂᑐᐤ ᐅᐎᓱᐛᐅᓐ᙮ ᒥᒄ ᒪᒃ ᓄᐛᒡ ᒋ ᒪᔭᔨᒪᐤ ᒋᓴᒪᓂᑐᐤ ᐊᑲ ᓂᓇᐃᑎᒧᑦ ᐅᐎᓱᐛᐅᓐ᙮ 24ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᐃᑎᔅᑕᐤ,
ᒋᔨᐛᐤ ᒍᐤ ᑲ ᐃᑎᔅᑲᓇᓯᔭᒄ, ᒋᔨᐛᐤ ᒋ ᐃᑐᑐᐛᐛᐅᒡ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᒐᒋ ᒥᒋ ᐊᔨᒧᒪᒡ ᒋᓴᒪᓂᑐᐛ᙮
25ᒍᐤ ᐊ ᐃᑎᔅᑲᓇᓯᔨᓐ ᔅᒋ ᒋᔅᒋᓄᐛᒋᔄᑯᐅᓐ ᒐᒋ ᒋᔅᒐᔨᒥᑯᔨᓐ ᒋᓴᒪᓂᑐᐤ ᐊ ᐅᑦ ᐃᔨᒥᑐᑕᔅᒃ᙮ ᓂᓇᐃᑎᒧᑕ ᒋᓴᒪᓂᑐᐤ ᐅᐎᓱᐛᐅᓐ ᒋᑭ ᐎᒋᐃᑯᓐ ᑕᑈ ᒋᔅᒋᓄᐛᒋᔄᐅᓐ᙮ ᐊᑲ ᒪᒃ ᓂᓇᐃᑎᒧᑕ ᐅᐎᓱᐛᐅᓐ ᓇᒪ ᐊᐱᑎᓐ ᐊᒋ ᒋᔅᒋᓄᐛᒋᔄᑯᔨᓐ᙮ 26ᐊᓐ ᐊᐛᓐ ᐊᑲ ᒍᐤ ᐃᑎᔅᑲᓇᓯᑦ ᑭᔭ ᐊᑲ ᐅᒋ ᒋᔅᒋᓄᐛᒋᔄᑭᓄᐅᑦ ᓂᓇᐃᑕᒐ ᐎᓱᐛᐅᓂᔪᐤ ᒋᑭ ᒥᔪ ᑭᓄᐛᐱᒥᑯᐤ ᒋᓴᒪᓂᑐᐛ, ᒧᔭᒻ ᑕᑈ ᐊᒋ ᒋᔅᒋᓄᐛᒋᔄᑭᓄᐅᑦ ᐊᐅᑯᓐ ᒐ ᐃᓯ ᑭᓄᐛᐱᒥᑯᑦ᙮ 27ᐊᑯ ᒪᒃ ᒋᔨᐛᐤ ᒍᐤ ᑲ ᐃᑎᔅᑲᓇᓯᔭᒄ ᒐ ᓂᓱᐅᓇᒋᒥᑕᑯᒡ ᐅᒡ ᐊᑲ ᒍᐤ ᐃᑎᔅᑲᓇᓯᒡ ᐛᔅ ᑕᐸ ᒋ ᓂᓇᐃᑎᒺᓇᐛᐤ ᒋᔨᐛᐤ ᒋᓴᒪᓂᑐᐤ ᐅᐎᓱᐛᐅᓐ ᐊᑎ ᒋᔨᐛᐤ ᐊ ᐊᔭᐛᒄ ᐊᒋ ᒥᓯᓇᐃᑭᓄᐎᒡ ᑭᔭ ᐊᑎ ᐊᒋ ᒋᔅᒋᓄᐛᒋᔄᑯᔭᒄ᙮ ᐎᔨᐛᐤ ᒪᒃ ᐅᒡ ᐊᑲ ᒍᐤ ᐃᑎᔅᑲᓇᓯᒡ ᓂᓇᐃᑕᒧᒡ ᐎᓱᐛᐅᓂᔪᐤ ᐊᑎ ᐊᑲ ᐅᒋ ᒋᔅᒋᓄᐛᒋᔄᑭᓄᐎᒡ ᐎᔨᐛᐤ᙮
28ᓇᒪᔭᔪᐤ ᒥᒄ ᒍᐤ ᐊ ᐃᑎᔅᑲᓇᓯᑦ ᐊᐛᓐ ᑭᔭ ᐊᒋ ᒋᔅᒋᓄᐛᒋᔄᑭᓄᐅᑦ ᐎᔭᒡ ᐛᒋ ᐅᑦ ᐃᔨᒥᑐᑕᑯᑦ ᒋᓴᒪᓂᑐᐛ᙮ 29ᐊᓐ ᐊᐛᓐ ᒋᒋᐛ ᒍᐤ ᑲ ᑕᑦ ᓄᑯᓂᔪᐤ ᐊᓐᑕ ᐱᒡ ᐅᐱᒪᑎᓯᐅᓂᒡ ᑕᑈ ᒍᐤ ᐊ ᑕᑦ᙮ ᐛᔅ ᑲ ᐸᔭᒋᓯᑦ ᐊᒐᐧᒄ ᐊᐅᒄ ᐊ ᒋᔅᒋᓄᐛᒋᔄᑯᐅᔭᐧᒄ ᒋᑕᐃᓇᒡ, ᐊᐅᒄ ᒪᒃ ᐅ ᒋᒋᐛ ᒋᔅᒋᓄᐛᒋᔄᐅᓐ, ᓇᒪᔭᐤ ᐎ ᐎᓱᐛᐅᓐ ᐊ ᓂᓇᐃᑎᒪᐧᒄ ᒋᑭ ᒋ ᒋᔅᒋᓄᐛᒋᔄᑯᓇᓄᐤ ᒋᑕᐃᓇᒡ᙮ ᐊᐅᒄ ᒪᒃ ᐅ ᐊᐛᓐ ᒋᒋᐛ ᒍᐤ ᑲ ᑕᑦ ᒋᓴᒪᓂᑐᐛ ᐊᐅᒄ ᒐ ᓂᑐᐛᔨᒪᑦ ᒐᒋ ᒪᒥᔽᒋᒥᑯᑦ ᓇᒪ ᐎ ᓇᐸᐛ᙮
Currently Selected:
ᕈᒪᓇ 2: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
