ᕈᒪᓇ 16
16
ᑈᓪ ᑲ ᐛᒋᔭᒪᑦ ᓂᓇᐧᑯᐤ ᐊᐛᔪᐛ
1ᒋ ᐎ ᒥᔪ ᐊᔨᒧᑎᒪᑎᓇᐛᐤ ᒋᐧᑲᓂᓯᓄᐤ ᐱᐱᔾ᙮ ᓇᔅᒡ ᑕᑈ ᒥᔪ ᐎᒋᐊᐤ ᐊᓂᔭᔪᐛ ᐅᒪᒧᐊᔭᒥᐊᐛ ᓴᓐᑯᕆᔭ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᐊ ᑕᔨᒋ᙮ 2ᒥᒄ ᒐ ᐃᓯ ᐱᑎᑲᐊᒄ ᓂᑐᐛᐱᒥᑕᒂ ᑭᔭ ᒐ ᐎ ᒥᔪ ᑭᓄᐛᔨᒪᒄ ᒧᔭᒻ ᒋᐸ ᐃᓯ ᒥᔪᑐᑐᐛᐛᐤ ᐊᐛᓐ ᐊ ᑕᑈᑕᐧᒃ᙮ ᒐ ᐎᒋᐊᒄ ᑕᓐ ᒐ ᐃᓯ ᓂᑐᐛᔨᑎᒧᒂ ᒐᒋ ᐃᓯ ᐎᒋᐊᒄ᙮ ᐛᔅ ᒥᒐᑦ ᐊᐛᔪᐛ ᒋ ᒥᔪ ᐎᒋᐊᐤ ᐎᔾ᙮ ᑭᔭ ᓂᔾ ᓂᒋ ᒥᔪ ᐎᒋᐃᒄ᙮
3ᓂ ᐛᒋᔭᒪᐅᒡ ᐳᕆᓯᓚ ᑭᔭ ᐊᑯᐎᓚ᙮ ᓂ ᐎᒋ ᐊᑐᔅᒐᒪᐅᒡ ᐅᒡ ᐊ ᐊᑐᔅᑯᐛᒡ ᒋᓴᔅ ᙭ᑕ᙮ 4ᒪᒂᒡ ᐊᓐᑕ ᓇᔅᒡ ᐊᒋ ᑯᔅᑕᑎᑯᓂᔨᒡ ᑲ ᑕᐅᒡ ᓇᒪ ᓇᔅᒡ ᐅᒋ ᒪᒥᓇᑕᔨᑎᒧᒡ ᑎᐱᔨᐛ ᐅᐱᒪᑎᓯᐅᓄᐛᐛ ᑲ ᐃᔅᐱᔅ ᒋ ᐎ ᐎᒋᐃᒡ᙮ ᓇᔅᒡ ᑕᑈ ᓂ ᓂᓇᔅᑯᒪᐅᒡ᙮ ᓇᒪ ᒥᒄ ᓂᔾ, ᒥᓯᐛ ᑭᔭ ᐊᓂᔭᔪᐛ ᐊᑲ ᒍᐤ ᐃᑎᔅᑲᓇᓯᔨᒋ ᐅᒪᒧᐊᔭᒥᐊᐛ ᓂᓇᔅᑯᒥᑯᐅᒡ᙮
5ᓂ ᐛᒋᔭᒪᔪᐛ ᑭᔭ ᐊᓂᔭ ᐅᒪᒧᐊᔭᒥᐊᐛ ᐎᒋᐛᔨᒡ ᒪᓐ ᑲᒋ ᒪᒧᔨᒋ ᒐᒋ ᐊᔭᒥᐊᔨᒋ᙮
ᐊᐸᓇᑕᔅ ᑭᔭ ᓂ ᐛᒋᔭᒪᐤ ᐊᐅᒄ ᓂᐎᒐᐛᑭᓐ ᑲ ᓴᒋᐊᒃ᙮ ᐎᔾ ᓇᔅᒡ ᓂᔅᑎᒻ ᒋ ᑕᑈᔭᔨᒪᐤ ᒋᓴᓴ ᐊᓐᑕ ᐊᐃᓴ ᑲ ᐃᓯᓂᐧᑲᑕᔨᒡ ᐊᔅᒋᔪᐤ᙮
6ᒪᕆ ᐊᓐ ᓇᔅᒡ ᑲ ᒥᔅᑎ ᐊᑐᔅᒐᑦ ᐊ ᐎᒋᐃᑕᒄ ᓂ ᐛᒋᔭᒪᐤ ᑭᔭ ᐎᔾ᙮
7ᑭᔭ ᐊᓐᒡ ᓂᐧᑲᓂᓯᒡ ᐊᓐᑎᕈᓂᑲᔅ ᑭᔭ ᒍᓂᔭᔅ ᓂ ᐛᒋᔭᒪᐅᒡ᙮ ᐊᑯᑕ ᑭᔭ ᐎᔨᐛᐤ ᑲ ᑕᒡ ᒪᒂᒡ ᑲᒪᑯᓄᐛᓯᐅᒋᐛᐱᒡ ᑲ ᑕᐅᒡ᙮ ᓇᔅᒡ ᒥᔪ ᒋᔅᑕᔨᒥᑯᐅᒡ ᑯᑎᑲ ᐊᑈᔅᑕᓇ᙮ ᐎᔨᐛᐤ ᓂᔅᑎᒻ ᒋ ᑕᑈᔭᔨᒪᐅᒡ ᒋᓴᓴ ᐊᔅᒄ ᐊᑲ ᓂᔾ ᐅᒋ ᑕᑈᔭᔨᒥᒋ᙮
8ᓂ ᐛᒋᔭᒪᐤ ᑭᔭ ᐊᒻᐱᓕᐊᑐᔅ, ᓂᐎᒐᐛᑭᓐ ᑲ ᓴᒋᐃᒃ ᑲ ᑕᑈᔭᔨᒪᑦ ᐅᑎᐸᔨᒋᒐᐛ᙮
9ᐅᕐᐸᓇᔅ ᐊᐅᒄ ᒥᓐ ᐎᔭᒋᔭᒥᒃ᙮ ᓂᒋ ᐎᒋᑐᔅᒐᒪᓇᓐ ᐊ ᐊᑐᔅᑯᒥᒋᒋ ᒋᓴᔅ ᙭ᑕ᙮ ᓂᐎᒐᐛᑭᓐ ᔅᑕᑭᔅ ᓇᔅᒡ ᑲ ᓴᒋᐃᒃ ᑭᔭ ᓂ ᐛᒋᔭᒪᐤ᙮
10ᓂ ᐛᒋᔭᒪᐤ ᐊᐸᓕᔅ᙮ ᑕᑈ ᓄᑯᓂᔪᐤ ᐊ ᑕᑈᔭᔨᒪᑦ ᒋᓴᓴ ᐊᓂᔭ ᑕᓐ ᐊ ᐃᓯ ᐱᒪᑎᓯᑦ᙮
ᓂ ᐛᒋᔭᒪᐅᒡ ᐊᓐᒡ ᐊᕆᔅᑕᐳᓚᔅ ᐎᒋᔨᒡ ᐊ ᑕᒡ᙮
11ᓂᐧᑲᓂᔅ ᐊᕈᑎᔭᓐ, ᐊᐅᒄ ᒥᓐ ᐎᔭᒋᔭᒥᒃ, ᑭᔭ ᐊᓐᒡ ᓇᕐᓯᓴᔅ ᐎᒋᔨᒡ ᐊ ᑕᒡ ᐊᓐᒡ ᑲ ᑕᑈᔭᔨᒪᒡ ᐅᑎᐸᔨᒋᒐᐛ᙮
12ᐊᓐᒡ ᐃᔎᐅᒡ ᑐᕋᐃᐱᓇ ᑭᔭ ᑐᕋᐃᐳᓴ ᐅᑎᐸᔨᒋᒐᐛ ᑲ ᐊᑐᔅᑯᐛᒡ, ᓂ ᐛᒋᔭᒪᐅᒡ ᑭᔭ᙮
ᓂᐎᒐᐛᑭᓐ ᐸᕐᓯᔅ, ᐊᐅᒄ ᒥᓐ ᐎᔭᒋᔭᒥᒃ, ᓇᔅᒡ ᑕᑈ ᓂ ᓴᒋᐊᐤ᙮ ᓇᔅᒡ ᑕᑈ ᒋ ᒥᔅᑎ ᐊᑐᔅᒐᐤ ᐅ ᐃᔎᐤ ᐅᑎᐸᔨᒋᒐᐛ ᐊ ᐊᑐᔅᑯᐛᑦ᙮
13ᓂ ᐛᒋᔭᒪᐤ ᕈᐸᔅ, ᓇᔅᒡ ᑕᑈ ᒋᔅᑕᒋᒪᑭᓄᐤ ᑕᓐ ᐊ ᐃᓯ ᒥᔪ ᐊᑐᔅᑯᐛᑦ ᐅᑎᐸᔨᒋᒐᐛ᙮ ᐅᑲᐎᔭ ᑭᔭ ᓂ ᐛᒋᔭᒪᔪᐛ᙮ ᒧᔭᒻ ᑎᐱᔨᐛ ᓂᑲᐎᔾ ᓂᑦ ᐃᑕᔨᒪᔪᐛ᙮
14ᐊᓯᓐᑭᕆᑕᔅ, ᐱᓚᑯᓐ, ᐊᕐᒪᐃᔅ, ᐸᑦᕈᐸᔅ, ᐊᕐᒪᔅ ᑭᔭ ᒥᓯᐛ ᐊᓂᔭᔪᐛ ᑯᑎᑲ ᐎᐧᑲᓂᓯᒪᐛ ᑲ ᐎᒐᐅᑯᒡ ᓂ ᐛᒋᔭᒪᐅᒡ᙮
15ᐊᑯ ᒪᒃ ᐱᓗᓗᑲᔅ, ᒍᓕᔭ, ᓇᕆᔭᔅ, ᑭᔭ ᓇᕆᔭᔅ ᐅᒥᓴ, ᐅᓕᒻᐸᔅ ᑭᔭ ᒥᓯᐛ ᐊᓂᔭ ᑲ ᑕᑈᑎᒥᔨᒋ ᑲ ᐎᒐᐛᑭᓂᒡ ᓂ ᐛᒋᔭᒪᐅᒡ᙮
16ᒋᔨᐛᐤ ᑲ ᐎᐧᑲᓂᓯᑐᐅᔭᒄ ᐅᒐᒥᑐᒄ ᐊ ᐛᒋᔭᒥᑐᔭᒄ᙮ ᒥᓯᐛ ᒪᒧᐤ ᑲ ᐊᔭᒥᐊᐛᑎᓯᒡ ᙭ᑕ ᑲ ᒋᔅᑕᔨᒪᒡ ᒋ ᐛᒋᔭᒥᑯᐛᐅᒡ᙮
ᒪᔅᑕᔾ ᐊ ᐃᑎᓱᐛᑦ ᑈᓪ
17ᓂᐧᑲᓂᓯᑐᒄ, ᒋ ᐎ ᐃᔭᒂᒥᑎᓇᐛᐤ᙮ ᐃᔭᒂᒥᔅᑐᐛᐧᑯᒡ ᐊᓐᒡ ᑲ ᐃᑐᑐᐛᒡ ᐊᐛᔪᐛ ᒐᒋ ᑕᑎᐸᓂᐱᔨᒋ ᑭᔭ ᐃᔭᒡ ᒐᒋ ᐃᑕᔨᒥᑐᔨᒋ ᑭᔭ ᑲ ᓂᓱᐅᓇᒋᑕᐛᒡ ᑕᓐ ᐊ ᐃᓯ ᑕᑈᑎᒥᔨᒋ᙮ ᐃᔭᒡ ᐃᓯ ᒋᔅᑯᑎᒪᒐᐅᒡ ᑕᓐ ᓴᔅ ᑲ ᐃᓯ ᒋᔅᑯᑎᒪᑯᐛᒄ᙮ ᐊᑲᐎᔾ ᐊᐱᑕᔨᒪᐧᑯᒡ ᐅᒡ᙮ 18ᓇᒪᐎᔾ ᒋᑎᐸᔨᒋᒐᓯᒥᓄᐛ ᙭ᑕ ᐊᑐᔅᑯᐛᐅᒡ ᐅᒡ ᐅᔭ ᐊ ᐃᑎᒡ, ᒥᒄ ᑕᓐ ᐊᓂᔭᔪᐛ ᒐᒂᔪᐛ ᒐᒋ ᒥᒋᒡ ᒪᒃ ᑕᓐ ᐊᓂᔭᔪᐛ ᒐ ᐊᑲ ᒋ ᒥᒋᒡ ᐊᐅᑯᓂ ᒪᑯᔅᑲᑕᔨᑎᒥᐃᑯᒡ᙮ ᓇᔅᒡ ᑕᑈ ᒥᔪᑕᑯᓱᐅᒡ ᑕᓐ ᐊ ᐃᓯ ᐃᔨᒥᒡ ᑭᔭ ᓂᑎᒥᒄ ᐃᑐᐅᒡ ᐊᓂᔭ ᐊ ᒥᔽᒋᒪᒡ ᐊᐛᔪᐛ᙮ ᐊᑯᑕ ᒪᒃ ᐛᒋ ᐎᔭᓯᒪᒡ ᐊᓂᔭᔪᐛ ᓇᔅᒡ ᑲ ᐛᒋᐱᔨᒡ ᒐᒋ ᐎᔭᓯᒪᑭᓄᔨᒋ᙮ 19ᒋᔨᐛᐤ ᒪᒃ ᐎ ᒥᓯᐛ ᐊᐛᓐ ᒋ ᐸᑎᒻ ᑕᓐ ᐊ ᐃᓯ ᓂᓇᐃᑐᐛᒄ ᐅᑎᐸᔨᒋᒐᐤ᙮ ᐊᑯᑕ ᒪᒃ ᐛᒋ ᓇᔅᒡ ᒥᔽᔨᑎᒪᓐ ᐊ ᒋᔅᒐᔨᒥᑎᑯᒡ ᐅ ᐊ ᐃᑎᔭᒄ᙮ ᒋ ᓂᑐᐛᔨᒥᑎᓇᐛᐤ ᒐᒋ ᒥᔪ ᒋᔅᒐᔨᑎᒪᒄ ᑕᓐ ᐊᓐ ᒪᔽᓯᒡ ᑭᔭ ᐊᑲ ᓇᔅᒡ ᒐᒋ ᐃᑐᑎᒪᒄ ᐊᓐ ᑕᓐ ᐊ ᐃᓯ ᒪᔭᑎᒡ᙮
20ᐊᑯ ᒪᒃ ᒋᓴᒪᓂᑐᐤ ᐊᓐ ᑲ ᒥᔨᑕᒄ ᒋᔭᒪᔨᑎᒧᐅᓂᔪᐤ ᓴᔅ ᐎᐱᒡ ᓇᔅᒡ ᒋᑭ ᐱᑯᔅᑯᐛᐤ ᒥᒋᒥᓂᑐᐛ ᑭᔭ ᒋᑭ ᐃᑐᑕᑯᐛᐤ ᒐᒋ ᓴᐧᑯᒋᐃᒪᑯᐤ᙮
ᓂ ᓂᑐᑎᒪᓐ ᒋᑎᐸᔨᒋᒐᓯᒥᓄᐤ ᒋᓴᔅ ᙭ ᒧᔅ ᒐᒋ ᒥᔪᑐᑎᒪᑕᒄ᙮
21ᑎᒧᑎ ᐊᓐ ᑲ ᐎᒋ ᐊᑐᔅᒐᒥᒃ ᒋ ᐛᒋᔭᒥᑯᐛᐤ᙮ ᑭᔭ ᐊᓐᒡ ᓂᐧᑲᓂᓯᒡ ᓗᓯᔭᔅ, ᒐᐃᓯᓐ, ᑭᔭ ᓱᓯᐸᑕᕐ ᒋ ᐛᒋᔭᒥᑯᐛᐅᒡ᙮
22ᓂᔾ ᑐᕐᓯᔭᔅ, ᑲ ᒥᓯᓇᐊᒪᓐ ᑕᓐ ᐊ ᐃᔅᒋᔄᑦ ᑈᓪ ᐅᔭ ᑲ ᒥᓯᓇᐃᒐᑦ ᒋ ᐛᒋᔭᒥᑎᓇᐛᐤ᙮ ᓂ ᑕᑈᔭᔨᒪᐤ ᑭᔭ ᓂᔾ ᐅᑎᐸᔨᒋᒐᐤ᙮
23ᑲᐃᔭᔅ ᐎᒋᒡ ᓂ ᑕᐛᓐ ᐊᓐᑕ ᒥᔭᐅᒋᐃᑐᒡ ᒪᓐ ᒪᒧᐤ ᑲ ᐊᔭᒥᐊᐛᑎᓯᒡ᙮ ᑭᔭ ᐎᔾ ᑲᐃᔭᔅ ᒋ ᐛᒋᔭᒧᑯᐛᐤ᙮
ᐊᕋᔅᑕᔅ, ᐊᓐ ᑲ ᓂᓇᑭᑐᐛᔨᑕᐧᒃ ᓱᓇᔭᔪᐤ ᐅᑕ ᐅᔭ ᐅᑕᓇᔪᐤ ᑭᔭ ᒋᐧᑲᓂᓴᓄᐤ ᑯᐛᕐᑕᔅ ᒋ ᐛᒋᔭᒥᑯᐛᐅᒡ ᑭᔭ ᐎᔨᐛᐤ᙮ 24ᓂ ᓂᑐᑎᒪᓐ ᒋᑎᐸᔨᒋᒐᓯᒥᓄᐤ ᒋᓴᔅ ᙭ ᒥᓯᐛ ᒐᒋ ᒋᓴᐛᑐᑕᑕᒄ᙮ ᐊᒥᓐ᙮
ᑈᓪ ᐊ ᐃᓯ ᒪᒥᒋᒪᑦ ᒋᓴᒪᓂᑐᐛ
Romans 16.25-27 (Advent-4 Year B)
25ᒪᒥᒋᒪᑕᐤ ᒋᓴᒪᓂᑐᐤ᙮ ᐛᔅ ᐎᔾ ᐊᐅᒄ ᑲᔅᒋᐅᑦ ᒐᒋ ᐊᔨᒋᑲᐳᐃᑕᒄ ᒋᐱᒪᑎᓯᐅᓄᐛᒡ ᐊᓐᑕ ᐅᒋ ᑕᓐ ᑲ ᐃᓯ ᐛᐎᑎᒪᑎᑯᒡ ᒥᔽᒋᒧᐅᓐ᙮ ᐊᑯᑕ ᐊ ᐊᔨᒧᒪᑭᓄᐅᑦ ᐅ ᒋᓴᔅ ᙭ ᑲ ᑎᐸᒋᒥᒃ᙮ ᐊᐅᒄ ᒪᒃ ᐅᔭ ᒥᔽᒋᒧᐅᓂᔪᐤ ᓇᒪ ᐅᒋ ᐱᔅᑎᓂᒻ ᒋᓴᒪᓂᑐᐤ ᒐᒋ ᒋᔅᒐᔨᑕᑭᓄᐎᒡ ᐊᓐᑕ ᐸᒋ ᐛᔅᑭᒡ᙮ 26ᐊᓄᒡ ᒪᒃ ᓴᔅ ᒋ ᒋᔅᒐᔨᑕᓇᓄᐤ ᐅ ᒥᔽᒋᒧᐅᓐ᙮ ᒋᓴᒪᓂᑐᐤ ᑲᒋᒡ ᐊ ᑕᑦ ᒋ ᐃᑎᓱᒪᐤ ᐊᓂᔭᐧᑲ ᐅᒋᔅᒋᐛᐃᒐᓯᒪ ᒐᒋ ᐊᔨᒧᑎᒥᔨᒋ ᐅᔭ ᒥᔽᒋᒧᐅᓂᔪᐤ ᐊᓐᑕ ᐅᑦ ᐃᔨᒧᐅᓂᒡ ᐊᑎ ᒥᓯᐛ ᐊ ᐃᑎᔅᑲᓇᓯᒡ ᐊᐛᓐᒋ ᐅᑕ ᐊᔅᒋᒡ ᒐᒋ ᒋᔅᒐᔨᑎᒥᐊᑭᓄᐎᒡ ᐊᓂᔭ ᒥᔽᒋᒧᐅᓂᔪᐤ ᑭᔭ ᒐᒋ ᑕᑈᔭᔨᒪᒡ ᑭᔭ ᒐᒋ ᓂᓇᐃᑐᐛᒡ ᒋᓴᒪᓂᑐᐛ᙮ 27ᒋᓴᒪᓂᑐᐤ ᒥᒄ ᐎᔾ ᑲ ᒋᓴᒪᓂᑐᐅᑦ ᑭᔭ ᓇᔅᒡ ᑲ ᑭᒐᑕᐛᔨᑕᐧᒃ, ᒋᑭ ᒪᒥᒋᒪᑭᓄᐤ ᐊᓂᔭ ᐅᒋ ᑕᓐ ᐊ ᐃᓯ ᐃᑐᑎᒥᔨᒋ ᒋᓴᔅ ᙭ᑕ᙮ ᐊᒥᓐ᙮
Currently Selected:
ᕈᒪᓇ 16: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
