ᑎᐱᑦ ᐅᓂᑭᒧᐅᓇ 94

1ᐅ ᑎᐸᔨᒋᒐᓱᐤ ᒋᓴᒪᓂᑐᐤ, ᑲ ᑎᐱᔨᐛᐅᓯᔨᓐ ᒋᐛ ᑎᐸᐊᒪᒐᐅᓐ;

ᐅ ᒋᓴᒪᓂᑐᐤ, ᑲ ᑎᐱᔨᐛᐅᓯᔨᓐ ᒋᐛ ᑎᐸᐊᒪᒐᐅᓐ, ᓄᑯᐃᓱᐤ᙮

2ᐅᐱᓂᓱᐤ, ᒋᔾ ᑲ ᑎᐸᔅᑯᓇᒥᓐ ᐊᔅᒋᔾ,

ᑎᐸᐊᒧᐅᒡ ᐅᒋᔅᑕᔨᒧᐅᒡ᙮

3ᑎᐸᔨᒋᒐᓱᐤ, ᑕᓐ ᒐ ᐃᔅᐱᔅ ᐊᔅᒄ ᐅᒥᒋᑥᐅᒡ,

ᑕᓐ ᒐ ᐃᔅᐱᔅ ᐊᔅᒄ ᐅᒥᒋᑕᐛᒡ ᒐ ᐱᔅᒋᔭᒐᒡ ?

4ᑕᓐ ᒐ ᐃᔅᐱᔅ ᐊᔅᒄ ᐎᑕᒡ ᑭᔭ ᐊᔨᒧᑕᒡ ᑲ ᐊᔨᒥᓂᔨᒋ ᒐᒂᔪᐛ ?

ᑭᔭ ᒐ ᐎᒪᒥᒋᒧᒡ ᒥᓯᐛ ᑲ ᒥᒐᑎᓱᐤ ᐃᑎᒡ ?

5ᐱᓯᓯᒪᐅᒡ ᒋᑦ ᐃᔨᒪ, ᐅ ᑎᐸᔨᒋᒐᓱᐤ,

ᑭᔭ ᑯᒂᑕᒋᐊᐅᒡ ᑲ ᑎᐸᔨᒥᑎ᙮

6ᓂᐸᐊᐅᒡ ᐃᔎᐛ ᑲ ᓂᐱᔨᒋ ᐅᓇᐸᒥᔪᐛ ᑭᔭ ᒪᓐᑕᐛ,

ᑭᔭ ᓂᓱᐅᓇᒋᐊᐅᒡ ᐊᑲ ᐅᑕᐎᔨᒋ᙮

7ᐃᔭᐱᒡ ᒪᒃ ᐃᔅᒋᔄᐅᒡ, “ᑎᐸᔨᒋᒐᓱᐤ ᓇᒪᐎᔾ ᐛᐸᑎᒻ,

ᑭᔭ ᐅᒋᓴᒪᓂᑐᒪ ᒐᑭᑉ ᓇᒪᐎᔾ ᒋᑭ ᐃᔭᐱᑕᔨᑎᒻ᙮”

8ᓂᔅᑐᑎᒧᒄ, ᒋᔨᐛᐤ ᐛᐧᑲᑎᓯᐤ ᐃᔨᔨᑎᒄ;

ᑭᔭ ᒋᔨᐛᐤ ᒋᔎᐧᑲᓂᑐᒄ, ᑕᐃᔅᐱ ᒐ ᑭᒐᑕᐛᔨᑎᒪᒄ ?

9ᓇᒪ ᐊ ᒋᑭ ᐸᑎᒻ ᐊᓐ ᑲ ᒥᑐᐛᑲᒐᑦ ?

ᓇᒪ ᐊ ᒋᑭ ᐛᐸᑎᒻ ᐊᓐ ᑲ ᒥᔅᒋᓯᑯᒐᑦ ?

10ᓇᒪ ᐊ ᒋᑭ ᒥᔪᑥᐃᐛᐤ ᐊᓐ ᑲ ᐸᐱᓯᔅᑕᐛᑦ ᐊᑲ ᐊᔭᒥᐊᔨᒋ ?

ᓇᒪ ᐊ ᒋᑭ ᒋᔅᒐᔨᑎᒻ ᐊᓐ ᑲ ᒋᔅᑯᑎᒧᐛᑦ ᐃᔪᐛ ᒋᔅᒐᔨᑎᒧᐅᓂᔪᐤ ?

11ᑎᐸᔨᒋᒐᓱᐤ ᒋᔅᒐᔨᑎᒺᐤ ᐅᒪᒥᑐᓇᔨᒋᒐᐅᓂᔪᐤ ᐃᔪᐛ,

ᓂᑐᐎ ᐊ ᐃᑕᔨᑕᒂᓂᔨᒋ᙮

12ᓱᐛᔨᑕᑯᓱᐤ ᐊᓐ ᐃᔪᐤ ᑲ ᐸᐱᓯᔅᑕᐅᑦ, ᐅ ᑎᐸᔨᒋᒐᓱᐤ,

ᑭᔭ ᑲ ᒋᔅᑯᑎᒧᐅᑦ ᒋᐎᓱᐛᐅᓂᒡ ᐅᒡ;

13ᒐᒋ ᒥᔨᑦ ᒐᒋ ᐊᔽᐱᑦ ᐃᔅᐱ ᐊ ᐊᔨᒥᓯᐤ ᒋᓯᑲᔨᒐ,

ᐸᑎᒪ ᒋ ᒧᓇᐊᒥᒐ ᐊᒂᐃᑕᐛᔅᑲᔨᒡ ᐅᒥᒋᑥᐛ᙮

14ᐛᔅ ᑎᐸᔨᒋᒐᓱᐤ ᓇᒪᐎᔾ ᒋᑭ ᐛᐱᓇᐤ ᐅᑦ ᐃᔨᒪ,

ᓇᒪ ᑭᔭ ᒋᑭ ᓂᑭᑕᐤ ᐅᑎᐸᔨᒪᑭᓇ᙮

15ᒪᒃ ᑎᐸᔅᑯᓂᒐᐅᓐ ᒋᑭ ᒋᐛ ᓇᑕᒧᒪᑭᓐ ᑯᐃᔅᑯᑕᑎᓯᐅᓐ,

ᒥᓯᐛ ᑭᔭ ᑲ ᑯᐃᔅᑯᑕᐊᒡ ᒋᑭ ᓇᓴᐊᒧᒡ᙮

16ᐊᐛᓐ ᒐ ᐱᓯᑯᔅᑎᒧᐅᑦ ᐊ ᓂᔅᑯᔅᑐᐅᒂᐤ ᑲ ᒥᒋᐃᑎᒡ ?

ᐊᐛᓐ ᒐ ᐱᓯᑯᔅᑎᒧᐅᑦ ᐊ ᓂᔅᑯᔅᑐᐅᒂᐤ ᑲ ᒥᒐᑎᓯᐤ ᐃᑎᒡ ?

17ᒧᔭᒻ ᑎᐸᔨᒋᒐᓱᐤ ᐊᑲ ᒋ ᐎᒋᐃᑯᐱᓇ,

ᓂᑦ ᐊᒐᐧᒄ ᓴᔅ ᒐᑲᑦ ᒋᑭ ᒋ ᒋᐱᑐᐛᐱᓐ᙮

18ᐃᔅᐱ ᐊᒋ ᐃᔅᒋᔄᔭᓐ “ᓂᒋ ᐃᓯᓯᑕᓯᓐ !”

ᒋᓱᐛᔨᒋᒐᐅᓐ, ᐅ ᑎᐸᔨᒋᒐᓱᐤ, ᓂᒋ ᓯᑐᓂᑯᓐ᙮

19ᐊᔅᐱᔅ ᒥᒐᒡ ᓂ ᒥᑐᓇᔨᒋᒐᐅᓇ ᑲ ᐱᒋᔅᑲᑯᔭᓐ,

ᒋ ᒋᒥᔽᔨᒧᐃᐛᐅᓐ ᓂ ᒥᔽᔨᒥᐃᑯᓐ ᓂᑦ ᐊᒐᐧᑯᒡ᙮

20ᒋᑭ ᐎᒐᐛᑭᓂᑕᑯᓐ ᐊ ᒥᒐᑎᓱᐤ ᐅᒋᒪᐤ ᑕᑎᐳᐛᑭᓐ,

ᑲ ᒪᔭᔨᒋᒐᒥᑲᒡ ᐃᑎᓱᐛᐅᓐ ᐅᒡ᙮

21ᒪᒧᐤ ᒪᐛᐅᒋᐃᑐᔅᑕᒪᐅᒡ ᐅᑦ ᐊᒐᐧᑯᔪᐛ ᐅᑯᐃᔅᑯᑕᑎᓯᐛ,

ᑭᔭ ᓂᓱᐅᓇᒋᑕᐅᒡ ᐸᔭᒋ-ᒥᐧᑯᔪᐤ᙮

22ᒪᒃ ᑎᐸᔨᒋᒐᓱᐤ ᓂ ᒋᔅᐸᐛᑎᒄ;

ᑭᔭ ᓂᒋᓴᒪᓂᑐᒻ ᐊᐅᒄ ᒋᔅᑕᐱᔅᒄ ᑲ ᐅᓇᑕᓯᒧᐅᓂᔭᓐ᙮

23ᒋᑭ ᓇᐃᐱᑐᐛᐤ ᑎᐱᔽ ᐅᒥᒐᑎᓯᐅᓂᔨᐛ,

ᒋᑭ ᒋᔅᑲᑕᐛᐤ ᒪᒃ ᐅᒥᒋᑥᐅᓄᐛᒡ;

ᓂᐦᐃ, ᑎᐸᔨᒋᒐᓱᐤ ᒋ ᒋᓴᒪᓂᑐᒥᓇᐤ ᒋᑭ ᒋᒥᔄᐤ᙮

Currently Selected:

ᑎᐱᑦ ᐅᓂᑭᒧᐅᓇ 94: ᓇᔅᑲᐱ

Highlight

Copy

Want to have your highlights saved across all your devices? Sign up or sign in

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ

Naskapi Development Corporation

Kawawachikamach, Québec G0G 2Z0 Canada

Canadian Bible Society

10 Carnforth Road, Toronto Ontario M4A 2S4 Canada

Learn More About ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ