ᑎᐱᑦ ᐅᓂᑭᒧᐅᓇ 7
7
1ᐅ ᑎᐸᔨᒋᒐᓱᐤ, ᓂᒋᓴᒪᓂᑐᒻ, ᒋᔾ ᒋ ᒪᒥᓯᑐᑕᑎᓐ:
ᐱᒪᒋᐃ ᒥᓯᐛ ᐊᓐᒡ ᑲ ᓂᓇᐧᑲᒋᐃᒡ ᐅᒡ, ᐎᒂᒋᐃ ᒪᒃ:
2ᒐ ᐊᑲ ᒋ ᐱᑯᐱᑕᑦ ᓂᑦ ᐊᒐᒂ ᒧᔭᒻ ᒥᓯᐱᓱᐤ, ᐊ ᐱᓯᐱᑕᑦ,
ᒪᒂᒡ ᐊᑲ ᐊᐛᓐ ᐊ ᑕᑦ ᒐᒋ ᐎᐧᑯᒋᐃᐛᑦ᙮
3ᐅ ᑎᐸᔨᒋᒐᓱᐤ ᓂᒋᓴᒪᓂᑐᒻ, ᐃᔅᐱ ᐅ ᑲ ᐃᑐᑎᒧᐛᓇ;
ᐃᔅᐱ ᐊᑎᑯᓄᒂ ᒥᒐᑎᓯᐅᓐ ᓂᑎᒋᒡ;
4ᐃᔅᐱ ᑲ ᒥᒋ ᑎᐸᐊᒧᐛᐛᒐ ᐊᓐ ᑲ ᐅᑐᑕᒥᒥᑯᐱᓇ;
(ᓂᐦᐃ, ᓂᒋ ᐱᒪᒋᐊᐤ ᐊᓐ ᓯᔅᒋᑯᒡ ᑲ ᐛᐧᑲᓯᑦ:)
5ᐊᑯᔅ ᑲ ᐛᐧᑲᓯᑦ ᒋᑭ ᓇᓇᐧᑲᒋᐊᐤ ᓂᑦ ᐊᒐᒂ, ᑭᔭ ᒋᑭ ᐅᑎᓇᐤ;
ᓂᐦᐃ, ᒋᑭ ᑕᑯᔅᑲᑎᒻ ᓂᐱᒪᑎᓯᐅᓂᔪᐤ ᒧᔅᑎᔅᑲᒥᒡ,
ᑭᔭ ᒋᑭ ᐱᔅᑎᓂᒻ ᓂᒋᔅᑕᔨᑕᑯᓱᐅᓂᔪᐤ ᐊᓯᔅᒋᒡ᙮
6ᐱᓯᑯᐤ, ᐅ ᑎᐸᔨᒋᒐᓱᐤ, ᒋ ᒋᔄᓯᐅᓂᒡ, ᐅᐱᓂᑎᓱᐤ ᐊ ᐊᐧᑯᔪᐛᓯᒡ ᐊᓐᒡ ᑲ ᐛᐧᑲᓯᒡ:
ᑯᔅᑯᐸᔨᐃ ᒪᒃ ᑎᐸᔅᑯᓂᒐᐅᓐ ᑲᒋ ᐃᑎᓱᐛᔨᓐ᙮
7ᐊᑯ ᑲ ᒪᒧᐎᔨᑐᒡ ᐃᔪᒡ ᒐ ᐛᔅᑲᔅᑲᔅᒡ:
ᐎᔨᐛᐤ ᐅᒋ ᒪᒃ ᐃᔅᐱᒥᒡ ᐃᓯ ᒋᐛ᙮
8ᑎᐸᔨᒋᒐᓱᐤ ᒋᑭ ᑎᐸᔅᑯᓇᐤ ᐃᔪᐛ:
ᑎᐸᔅᑯᓂ ᐅ ᑎᐸᔨᒋᒐᓱᐤ, ᐊ ᐃᓯ ᑯᐃᔅᑯᑕᑎᓯᔭᓐ,
ᑭᔭ ᐊ ᐃᑎᔅᑕᒡ ᑯᐃᔅᑯᑐᐅᓐ ᑲ ᐱᒋᔅᑲᑯᔭᓐ᙮
9ᐅ, ᐊᑯᔅ ᐅᒥᒋᑥᐅᓄᐛᐤ ᑲᒥᒋᑥᒡ ᒋᑭ ᐳᓂᐱᔪᐤ;
ᒪᒃ ᐊᔨᒋᐃᒡ ᑲ ᑯᐃᔅᑯᑎᒡ:
ᐛᔅ ᑲ ᑯᐃᔅᑯᑕᑎᓯᑦ ᒋᓴᒪᓂᑐᐤ ᑯᒋᑕᐤ ᒥᑕᐃᔭ ᑭᔭ ᐱᒋᔪᐛ᙮
10ᒋᓴᒪᓂᑐᐤ ᓂ ᓇᑎᒪᒄ,
ᑲ ᐱᒪᒋᐊᑦ ᑲ ᑯᐃᔅᑯᑕᔨᒋ᙮
11ᒋᓴᒪᓂᑐᐤ ᑎᐸᔅᑯᓇᐤ ᐅᑯᐃᔅᑯᑕᑎᓯᐛ,
ᒋᓴᒪᓂᑐᐤ ᒪᒃ ᒋᔄᓯᔅᑐᐛᐤ ᐅᒥᒋᑥᐛ ᑕᑥᐤ ᐊ ᒋᓯᑲᔨᒡ᙮
12ᒧᔭᒻ ᐊᑲ ᒂᔅᒋᒐ, ᒋᑭ ᒋᓂᑕᐤ ᐅᓯᒪᑭᓐ;
ᒋ ᐛᒋᓇᐤ ᐅᑦ ᐊᒐᐱᔭ, ᑭᔭ ᒋ ᐛᐛᓯᐊᐤ᙮
13ᐊᓯᒡ ᑭᔭ ᒋ ᐛᐛᓯᑕᒪᓱᐤ ᓂᐸᔪᐛᐤ ᐊᐱᒋᑕᑭᓇ;
ᒋ ᐊᔭᑯᔅᑎᒧᐛᐤ ᐅᑭᔎ ᐅᓂᓇᐧᑲᒋᐃᐛᐛ᙮
14ᐛᐸᑎᒧᒄ, ᐱᒋᔅᑲᑯᐤ ᒪᒐᑎᓯᐅᓂᔪᐤ,
ᒋ ᒋᒥᔅᑯᐛᔭᔨᑎᒻ ᒪᒃ ᒥᒋᐃᑐᐅᓂᔪᐤ,
ᑭᔭ ᒋ ᓂᑕᐅᒋᑕᐤ ᑭᑭᒋᔭᐅᓂᔪᐤ᙮
15ᒋ ᐛᑎᑯᓂᒐᐤ, ᐊ ᒧᓇᐊᐧᒃ,
ᒋ ᐸᒋᓯᓐ ᒪᒃ ᐛᑎᑯᓂᒡ ᑲᒋ ᐅᓯᑕᑦ᙮
16ᐅᒥᒋᐃᑐᐅᓐ ᒋᑭ ᒋᐛᐸᑲᒥᔅᑲᑯᐤ ᑎᐱᔨᐛ ᐅᔅᑎᒂᓂᒡ,
ᑭᔭ ᐅᑦ ᐊᒂᑎᓯᐅ-ᐃᑐᐅᓇ ᒋᑭ ᔭᓯᐱᔪᐛ ᑎᐱᔨᐛ ᐅᔅᑎᒂᓂᒡ᙮
17ᓂᑭ ᒪᒥᒋᒪᐤ ᑎᐸᔨᒋᒐᓱᐤ ᐊ ᐃᓯ ᑯᐃᔅᑯᑕᑎᓯᑦ:
ᑭᔭ ᐊ ᓂᑭᒧᔭᓐ ᓂᑭ ᒪᒥᒋᑕᒺᓐ ᐅᑦ ᐃᓯᓂᐧᑲᓱᐅᓐ ᑎᐸᔨᒋᒐᓱᐤ ᒪᐅᒡ ᒐᔅᑎᓯᑦ᙮
Currently Selected:
ᑎᐱᑦ ᐅᓂᑭᒧᐅᓇ 7: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
