ᑎᐱᑦ ᐅᓂᑭᒧᐅᓇ 38
38
1ᐅ ᑎᐸᔨᒋᒐᓱᐤ, ᐊᑲᐎᔾ ᒋᑐᓯ ᐊ ᐊᐧᑯᔪᐛᓯᔨᓐ;
ᐊᑲ ᑭᔭ ᐸᐱᓯᔅᑕᐎ ᐊ ᐊᐧᑯᐎᔭᔅᑕᔨᑎᒥᓐ᙮
2ᐛᔅ ᒋᑦ ᐊᑭᔎᒡ ᓂ ᒥᒋᒥᔅᑲᑯᒡ,
ᒋᑎᒋᔾ ᒪᒃ ᓂ ᐎᓴᒋᔅᑲᑯᓐ᙮
3ᓇᒪ ᑎᑯᓐ ᒋᓱᓯᐅᓐ ᓂ ᐎᔭᓯᒡ, ᐊ ᒋᔄᓯᔨᓐ;
ᓇᒪ ᑭᔭ ᒥᔪᐱᒪᑎᓯᐅᓐ ᓂᔅᑭᓂᒡ, ᐊᒋ ᒥᒋᑐᑎᒪᓐ᙮
4ᐛᔅ ᓂᒥᒐᑎᓯᐅᓇ ᐸᓯᒋᐱᔪᐛ ᓂᔅᑎᒂᓂᒡ:
ᒧᔭᒻ ᐊᑯᓯᒂᒡ ᐎᐅᓯᐅᓐ ᐅᓴᒻ ᓂ ᑯᓯᑯᒪᒋᑕᓐ᙮
5ᓂᒥᔄᑭᓂᑲᑎᑯᐅᓇ ᐎᒐᑭᓇ ᑭᔭ ᐃᔭᔪᐅᓇ,
ᓂᑭᒐᐸᑎᓯᐅᓐ ᐅᒡ᙮
6ᓂ ᒥᑯᔅᑲᑕᔨᑕᓐ;
ᓇᔅᒡ ᓂ ᒋᔅᑎᒪᒐᔨᒧᓐ;
ᓂ ᓇᓇᐧᑲᒋᒧᓐ ᐃᔅᑭᓐ ᒋᓯᑲᐛ᙮
7ᐛᔅ ᓂᔪᐤ ᓴᑭᔅᒋᓇᐤ ᐎᓴᑲᔅᐱᓇᐅᓐ;
ᓇᒪ ᑎᒂᓐ ᒪᒃ ᒋᓱᓯᐅᓐ ᓂ ᐎᔭᓯᒡ᙮
8ᓂ ᐃᔨᒥᓯᓐ ᑭᔭ ᓂᑦ ᐊᑯ ᐱᑯᓯᓂᓐ:
ᓂᒋ ᒪᑥᒪᓐ ᐊ ᐃᔅᐱᔅ ᒥᑯᔅᑲᒋᑕᐊᔭᓐ᙮
9ᑎᐸᔨᒋᒐᓱᐤ, ᒥᓯᐛ ᓂᐱᑯᓴᔨᒧᐅᓐ ᒋᑦ ᐅᑎᔅᑲᐎᔅᑲᑯᓐ;
ᓂᒪᑥᒪᐅᓐ ᑭᔭ ᓇᒪᐎᔾ ᒋ ᑲᑥᑯᐅᓐ᙮
10ᓂᑕᐃ ᔭᔭᓱᒪᑭᓐ, ᓂ ᒥᔅᑯᐅᓯᐅᓐ ᓂ ᓄᑕᐱᔨᓐ:
ᓂ ᐛᐳᐅᓐ ᒪᒃ ᓂᔅᒋᓯᑯᒡ, ᓂᒋ ᓂᑭᑎᑯᓐ᙮
11ᓂᓴᒋᐊᑭᓐᒡ ᑭᔭ ᓂᐎᒐᐛᑭᓐᒡ ᔭᐛᐸᑎᒧᒡ ᓂᐎᓴᒋᓯᐅᓂᔪᐤ;
ᑭᔭ ᓂᐛᐧᑯᒪᑭᓐᒡ ᐛᔪᐤ ᓂᐳᐎᒡ᙮
12ᐊᓐᒡ ᑭᔭ ᑲ ᓇᓂᑐᐛᔨᑕᒡ ᓂᐱᒪᑎᓯᐅᓂᔪᐤ ᓂ ᑕᐱᒂᑯᒡ;
ᐊᓐᒡ ᑭᔭ ᑲ ᐎᑯᒂᒡ ᐊᐧᑯᐃᒡ ᓂᑕᔨᒧᑎᒪᑯᒡ ᒪᔭᔨᒐᐤ ᒐᒂᓇ,
ᑭᔭ ᐃᑕᔨᑎᒧᒡ ᑭᑭᒋᔭᐅᓇ ᒥᓯᐛ ᐃᔅᑭᓐ ᒋᓯᑲᐛ᙮
13ᒪᒃ ᓂᔾ, ᒧᔭᒻ ᐊ ᐊᑲ ᐸᑕᐧᒃ ᐃᔪᐤ, ᓇᒪᐎᔾ ᓄᒋ ᐸᑕᓐ;
ᑭᔭ ᒧᔭᒻ ᐊᑲ ᓂᑕᐛᑦ ᐃᔪᐤ ᐊᑲ ᐃᔨᒥᑦ᙮
14ᐊᑯ ᑲ ᐃᓯ ᓇᔅᐱᑐᐅᒃ ᐃᔪᐤ ᐊ ᐊᑲ ᐸᑕᐧᒃ,
ᑭᔭ ᐅᑐᓂᒡ ᐊᑲ ᑎᑯᓂᔨᒋ ᒋᑐᓱᐛᐅᓇ᙮
15ᐛᔅ ᒋᔾ, ᐅ ᑎᐸᔨᒋᒐᓱᐤ ᒋᑦ ᐊᔅᐸᔨᒧᑐᑕᑎᓐ:
ᒋᑭ ᐸᑕᓐ, ᐅ ᑎᐸᔨᒋᒐᓱᐤ ᓂᒋᓴᒪᓂᑐᒻ᙮
16ᐛᔅ ᓂᒋ ᐃᔅᒋᔄᓐ, “ᓂᑐᑐᐎ, ᐊᑲ ᒐᒋ ᒧᒐᔨᑕᒡ ᓂᔾ ᐅᒋ:
ᐃᔅᐱ ᒋᐃᓯᓄᒐ, ᒋᑭ ᒋᔅᑕᔨᒥᓱᐅᒡ ᓂᔾ ᐅᒋ᙮”
17ᐛᔅ ᓂ ᐎ ᒋᐱᒋᓐ,
ᑭᔭ ᓂᒥᑕᒋᔨᐛᓯᐅᓐ ᒧᓯᓇᐤ ᓂᑦ ᐅᑎᔅᑲᐎᔅᑲᑯᓐ᙮
18ᐛᔅ ᓂᑭ ᐎᑕᓐ ᓂᒥᒐᑎᓯᐅᓐ;
ᓂᑭ ᒥᑕᒋᔨᐛᓯᓐ ᑲ ᐃᓯ ᒥᒋᑐᑎᒪᓐ᙮
19ᒪᒃ ᑲ ᐛᐧᑲᓯᒡ ᒋᓱᓯᐅᒡ ᑭᔭ ᒥᔅᑯᐅᓯᐅᒡ:
ᐊᓐᒡ ᒪᒃ ᓂᑐᐎ ᑲ ᐃᓯ ᐛᐧᑲᓯᒡ ᐊᑎ ᒥᒐᑎᒡ᙮
20ᐊᓐᒡ ᑭᔭ ᑲ ᒥᔨᐛᒡ ᑲ ᒪᔭᑎᓂᔨᒡ ᐃᔅᐱᔅ ᐎᔾ ᑲ ᒥᔽᓯᔨᒡ ᓂᐛᐧᑲᑎᑯᒡ;
ᐊ ᓄᔅᐱᓇᑎᒪᓐ ᒐᒂᓐ ᑲ ᒥᔽᓯᒡ᙮
21ᐊᑲᐎᔾ ᐛᐱᓂ, ᐅ ᑎᐸᔨᒋᒐᓱᐤ:
ᐅ ᓂᒋᓴᒪᓂᑐᒻ, ᐊᑲᐎᔾ ᔭᐛᐱᒥ᙮
22ᒋᐱᔾ ᒐᒋ ᐎᒋᐃᔨᓐ,
ᐅ ᑎᐸᔨᒋᒐᓱᐤ ᓂᐱᒪᒋᐃᑯᓯᐅᓐ᙮
Currently Selected:
ᑎᐱᑦ ᐅᓂᑭᒧᐅᓇ 38: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
