ᑎᐱᑦ ᐅᓂᑭᒧᐅᓇ 37
37
1ᐊᑲᐎᔾ ᒥᑯᔅᑲᒋᐃᑎᓱᐤ ᐅᒥᒋᔨᑐᐅᒡ ᐅᒡ,
ᐊᑲ ᑭᔭ ᐅᑕᔨᒥᒡ ᐊᓐᒡ ᑲ ᒥᒐᑎᓯᐤ ᐃᑎᒡ᙮
2ᐛᔅ ᐎᐱᒡ ᒋᑭ ᒥᓂᔄᑭᓄᐅᒡ ᒧᔭᒻ ᒥᔅᑯᓱᐛ,
ᑭᔭ ᒋᑭ ᓂᐳᓇᑯᓯᐅᒡ ᒧᔭᒻ ᑲ ᐎᔄᐛᔨᒡ ᓂᑕᐅᒋᑕᑭᓂᓯᔪᐤ᙮
3ᒪᒥᓯᑐᑐᐤ ᑎᐸᔨᒋᒐᓱᐤ, ᑭᔭ ᒥᔪᑐᑕ:
ᐊᑯ ᒐ ᑕᔨᓐ ᐊᔅᒋᒡ, ᑕᑈ ᑭᔭ ᒋᑭ ᐊᓴᒥᑯᐅᓐ᙮
4ᐊᓯᒡ ᑭᔭ ᒋᑭ ᒥᔽᔨᑎᒪᐊᐤ ᑎᐸᔨᒋᒐᓱᐤ;
ᒋᑭ ᒥᔨᒄ ᑲ ᐃᓯ ᐱᑯᓴᔨᒧᔨᓐ ᒋᑕᐃᒡ᙮
5ᐸᒋᑎᓂᒧᐤ ᒋᑦ ᐃᓯᑥᐅᓂᔪᐤ ᑎᐸᔨᒋᒐᓱᐤ;
ᒪᒥᓯᑐᑐᐤ ᑭᔭ, ᒋᑭ ᑎᐱᐸᔨᑕᐤ ᒪᒃ᙮
6ᒋᑭ ᓄᑯᑕᐤ ᒪᒃ ᒋᑯᐃᔅᑯᑕᑎᓯᐅᓂᔪᐤ ᒧᔭᒻ ᐛᓴᔭᓯᐅᓂᔪᐤ,
ᑭᔭ ᒋᑎᐸᔅᑯᓂᒐᐅᓂᔪᐤ ᒧᔭᒻ ᐊ ᐊᐱᑕᒋᓯᑲᔨᒡ᙮
7ᐊᔽᐱᔅᑐᐤ ᑎᐸᔨᒋᒐᓱᐤ, ᓯᐱᔪᐛᓯᐅᓂᒡ ᐊᓯᓄᐛᔾ:
ᐊᑲᐎᔾ ᒥᑯᔅᑲᒋᐃᑎᓱᐤ ᐊᓐ ᐅᒋ ᑲ ᒥᔽᐱᒪᐅᓯᑦ ᐅᑦ ᐃᓯᑥᐅᓂᒡ,
ᐊᓐ ᐃᔪᐤ ᐅᒋ ᑲ ᑎᐱᐸᔨᑕᑦ ᐅᒥᒋ ᐃᑕᔨᑎᒧᐅᓇ᙮
8ᐳᓂ ᒋᓯᐛᓯ, ᐛᐱᓇ ᒪᒃ ᐊᐧᑯᔪᐛᓱᐅᓐ:
ᐊᑲᐎᔾ ᒥᑯᔅᑲᒋᐃᑎᓱᐤ ᓇᔅᑎᔅ ᒐᒋ ᐎ ᒥᒋᑐᑎᒥᓐ᙮
9ᐛᔅ ᑲ ᒥᒋᐃᑎᒡ ᒋᑭ ᒥᔄᑭᓄᐛᒡ:
ᐊᓐᒡ ᒪᒃ ᑲᓯᓄᐛᐊᒡ ᑎᐸᔨᒋᒐᓱᐛ, ᒋᑭ ᑎᐸᔨᑎᒧᒡ ᐊᔅᒋᔪᐤ᙮
10ᐛᔅ ᓇᒐᓯᔅ, ᐊᑯ ᒐ ᐳᓂ ᑕᒡ ᐅᒥᒋᑥᐅᒡ:
ᓂᐦᐃ, ᐃᔭᒂ ᒋᑭ ᒪᒥᑐᓇᔨᑎᒺᓐ ᐅᑦ ᐃᑐᐅᓐ, ᒪᒃ ᓇᒪᐎᔾ ᒋᑭ ᑎᒂᓂᔪᐤ᙮
11ᒪᒃ ᐅᔪᔅᑲᑎᓯᒡ ᒋᑭ ᑎᐸᔨᑎᒧᒡ ᐊᔅᒋᔪᐤ;
ᒋᑭ ᒥᔽᑕᒥᐃᑐᐛᒡ ᒪᒃ ᐊ ᐃᔅᐱᔅ ᒥᒐᓂᔨᒡ ᒋᔭᒪᔨᑎᒧᐅᓂᔪᐤ᙮
12ᐅᒥᒋᑥᐤ ᒋᒧᑦ ᓇᔭᑕᐎᑐᑕᐛᐤ ᑲ ᑯᐃᔅᑯᑎᔨᒋ, ᒪᑥᔭᐱᑕᓯᓂᑐᐛᐤ ᒪᒃ᙮
13ᑎᐸᔨᒋᒐᓱᐤ ᒋᑭ ᐅᓯᓄᐛᐤ;
ᐛᔅ ᐛᐸᑎᒺᐤ ᐅᒋᓯᑲᒥᔪᐤ ᐊ ᐸᐱᔨᒡ᙮
14ᐅᒥᒋᑥᐅᒡ ᒋ ᔭᔨᔅᒋᐱᑕᒧᒡ ᓂᑐᐱᔪᐅ-ᒧᐧᑯᒪᓂᔪᐤ, ᑭᔭ ᒋ ᓯᑕᒐᐸᐅᒡ,
ᒐᒋ ᓂᒋᐛᐱᓇᒡ ᐅᒋᔅᑎᒪᑎᓯᐛ ᑭᔭ ᐅᓇᐧᑲᑎᓯᐛ,
ᑭᔭ ᒐᒋ ᓂᐸᐊᒡ ᐊᓂᔭ ᑯᐃᔅᒄ ᑲ ᐃᑕᑎᓯᔨᒋ᙮
15ᐅᓯᒪᑭᓄᐛᐤ ᒋᑭ ᐱᒋᐱᔪᐤ ᑎᐱᔽ ᐅᑕᐃᐛᒡ,
ᑭᔭ ᐅᑦ ᐊᒐᐱᐛᐛ ᒋᑭ ᓇᑥᐱᔪᐛ᙮
16ᐊᐱᓯᔅ ᑲ ᐊᔭᑦ ᑲ ᑯᐃᔅᑯᑕᑎᓯᑦ ᐃᔪᐤ
ᐊᐛᔅᑕ ᒥᔽᓯᔪᐤ ᐃᔅᐱᔅ ᐅᒥᒐᑎᓯᐅᓄᐛᐛ ᒥᒐᑦ ᐅᒥᒋᑥᐅᒡ᙮
17ᐛᔅ ᐅᔅᐱᑐᓄᐛᐛ ᐅᒥᒋᑥᐅᒡ ᒋᑭ ᓇᑥᐱᔪᐛ:
ᒪᒃ ᑎᐸᔨᒋᒐᓱᐤ ᓯᑐᓇᐤ ᐅᑯᐃᔅᑯᑕᑎᓯᐛ᙮
18ᑎᐸᔨᒋᒐᓱᐤ ᒋᔅᒐᔨᑎᒺᐤ ᐅᒋᓯᑲᒥᔪᐛ ᐅᑯᐃᔅᑯᑎᐛ;
ᐅᑎᐱᔨᐛᐅᓯᐅᓄᐛᐤ ᒪᒃ ᑲᒋᒡ ᒋᑭ ᑎᑯᓂᔪᐤ᙮
19ᓇᒪᐎᔾ ᒋᑭ ᓯᓴᒂᔨᒧᐅᒡ ᒪᒡ ᒋᓯᑲᔨᒐ:
ᒪᒂᒡ ᒪᒃ ᓄᑕᐧᑭᑕᐅᓐ ᒋᓯᑲᒐ ᒋᑭ ᒋᔅᐳᐅᒡ᙮
20ᒪᒃ ᐅᒥᒋᑥᐅᒡ ᒋᑭ ᓂᓱᐅᓇᑎᓯᐅᒡ,
ᑲ ᐛᐧᑲᑕᒡ ᑎᐸᔨᒋᒐᓱᐛ ᒪᒃ ᑕᐱᔅᑯᓐ ᐅᐎᔨᔪᐅᓄᐛᐤ ᒪᔭᑕᓂᓯᔨᒡ ᒋᑭ ᐃᓯᓇᑯᓯᐅᒡ:
ᒋᑭ ᓂᓱᐅᓇᑎᓯᐅᒡ;
ᐱᐳᑕᒡ ᒋᑭ ᐃᓯ ᐛᐱᐱᔪᐅᒡ᙮
21ᐅᒥᒋᑥᐅᒡ ᐅᐛᐊᓱᐅᒡ, ᓇᒪ ᒪᒃ ᒋᐛ ᑎᐸᒪᒐᐅᒡ:
ᒪᒃ ᐅᑯᐃᔅᑯᑕᑎᓯᐅᒡ ᐛᐸᑎᔨᐛᐅᒡ ᓱᐛᔨᒋᒐᐅᓂᔪᐤ ᑭᔭ ᒥᔨᐛᐅᒡ᙮
22ᐛᔅ ᐊᓐᒡ ᑲ ᒥᔽᒋᒥᑯᒡ ᒋᑭ ᑎᐸᔨᑎᒧᒡ ᐊᔅᒋᔪᐤ;
ᐊᓐᒡ ᑭᔭ ᑲ ᒪᒐᒋᒥᑯᒡ ᒋᑭ ᒋᒥᔄᑭᓄᐅᒡ᙮
23ᐊ ᐃᓯ ᑕᑯᔅᒐᔨᒋ ᒥᔪ ᐃᔪᐛ ᐅᔭᔨᑎᒻ ᑎᐸᔨᒋᒐᓱᐤ:
ᒥᔽᔨᑎᒺᐤ ᒪᒃ ᐅᑦ ᐃᓯᑥᐅᓂᔪᐤ᙮
24ᐊᑎ ᐊ ᐸᒋᓯᒄ, ᓇᒪᐎᔾ ᒋᒋᐛ ᒋᑭ ᓂᒋᐛᐱᓇᑭᓄᐤ:
ᐛᔅ ᓯᑐᓂᑯᐤ ᑎᐸᔨᒋᒐᓱᐛ ᐅᑎᒋᔨᒡ ᐅᒡ᙮
25ᓂᒋ ᐸᒋ ᐅᔅᒋᓂᒋᓱᐅᓐ, ᐊᓄᒡ ᒪᒃ ᓂ ᒋᓴᐃᔪᐅᓐ;
ᐊᔅᑯ ᒪᒃ ᓇᒪᐎᔾ ᓄᒋ ᐛᐱᒪᐤ ᐅᑯᐃᔅᑯᑕᑎᓯᐤ ᐊ ᐛᐱᓇᑭᓄᐅᑦ,
ᑭᔭ ᒪᒃ ᐅᑦ ᐊᐛᓯᒥᓴ ᐊ ᐸᑯᓯᑕᔨᒋ ᐸᒂᓯᑭᓇ᙮
26ᒧᔅ ᓱᐛᔨᒋᒐᐤ, ᑭᔭ ᐊᐎᐃᐛᐤ;
ᐅᑦ ᐊᐛᓯᒥᓴ ᒪᒃ ᓱᐛᔨᑕᑯᓯᔪᐛ᙮
27ᓂᑭᑕ ᑲ ᒪᔭᑎᒡ, ᐃᑐᑕ ᑭᔭ ᑲ ᒥᔽᓯᒡ:
ᑕ ᒪᒃ ᑲᒋᒡ᙮
28ᐛᔅ ᑎᐸᔨᒋᒐᓱᐤ ᓴᒋᑕᐤ ᑎᐸᔅᑯᓂᒐᐅᓂᔪᐤ,
ᓇᒪ ᑭᔭ ᐛᐱᓇᐤ ᐅᐸᔭᒋᓯᒪ;
ᑲᒋᒡ ᑭᓄᐛᔨᒪᐅᒡ:
ᒪᒃ ᐅᑦ ᐊᐛᓯᒥᓱᐛᐛ ᐅᒥᒋᑥᐅᒡ ᒋᑭ ᒋᒥᓱᐛᑭᓄᔪᐛ᙮
29ᐅᑯᐃᔅᑯᑕᑎᓯᐅᒡ ᒋᑭ ᑎᐸᔨᑎᒧᒡ ᐊᔅᒋᔪᐤ,
ᐊᑯᑕ ᒪᒃ ᑲᒋᒡ ᒐ ᐎᒋᒡ᙮
30ᐅᑐᓐ ᐅᑯᐃᔅᑯᑕᑎᓯᐤ ᐊᔭᒥᒪᑭᓂᔪᐤ ᑭᒐᑕᐛᔨᑎᒧᐅᓂᔪᐤ,
ᐅᑕᔨᔾ ᒪᒃ ᐊᔨᒧᑎᒧᒪᑭᓂᔪᐤ ᑎᐸᔅᑯᓂᒐᐅᓂᔪᐤ᙮
31ᐅᑦ ᐃᑎᓱᐛᐅᓐ ᐅᒋᓴᒪᓂᑐᒪ ᑎᒂᓂᔪᐤ ᐅᑕᐃᒡ;
ᓇᒪ ᒋᒋᐛ ᒪᒃ ᒋᑭ ᒋᐃᓯᓐ᙮
32ᐅᒥᒋᑥᐤ ᒋᒧᓴᐱᒪᐤ ᐅᑯᐃᔅᑯᑕᑎᓯᐛ,
ᑭᔭ ᑯᒋᑕᐤ ᒐᒋ ᓂᐸᐊᑦ᙮
33ᑎᐸᔨᒋᒐᓱᐤ ᓇᒪᐎᔾ ᒋᑭ ᓇᑭᑕᐤ ᐅᑎᒋᒡ,
ᓇᒪ ᑭᔭ ᒋᑭ ᓂᓱᐅᓇᒋᒪᐤ ᐊ ᑎᐸᔅᑯᓇᑭᓄᔨᒋ᙮
34ᐊᓯᓄᐛᔨ ᑎᐸᔨᒋᒐᓱᐤ, ᑭᓄᐛᔨᑎᒻ ᒪᒃ ᐅᑦ ᐃᓯᑥᐅᓐ,
ᒋᑭ ᐃᔅᐸᐃᑕᑯᐎᒄ ᒪᒃ ᒐᒋ ᑎᐸᔨᑎᒥᓐ ᐊᔅᒋᔾ:
ᐃᔅᐱ ᒋᒥᔄᑭᓄᑥᐛ ᐅᒥᒋᑥᐅᒡ, ᒋᑭ ᐛᐸᑕᓐ᙮
35ᓂᒋ ᐛᐱᒪᐤ ᐅᒥᒋᑥᐤ ᒋᒋ ᓱᐧᑲᑎᓯᐅᓂᒡ, ᑭᔭ ᐊ ᒋᑲᓇᑯᐃᓱᑦ ᒧᔭᒻ ᒥᔅᒋᔎᑎᒃ᙮
36ᐃᔭᐱᒡ ᒪᒃ ᒋ ᐛᐱᔪᐤ, ᐛᐸᑎᒧᒄ ᒪᒃ, ᓇᒪ ᒋ ᐃᑕᐤ:
ᓂᐦᐃ, ᓂᒋ ᓇᓂᑐᐛᐱᒪᐤ, ᒪᒃ ᓇᒪ ᓄᒋ ᒥᔅᑯᐛᐤ᙮
37ᐱᓯᔅᒐᔨᒥᐧᒄ ᐅᒥᔽᑎᓯᐤ, ᑭᓄᐛᐱᒥᐧᒄ ᒪᒃ ᐅᑯᐃᔅᑯᑐᐤ,
ᐛᔅ ᐊ ᐳᓂ ᐃᑕᑦ ᐊᓐ ᐃᔪᐤ ᒋᔭᒪᔨᑎᒻ᙮
38ᒪᒃ ᐅᓂᑐᑎᒧᒡ ᒋᑭ ᒪᒧᐎ ᓂᓱᐅᓇᑎᓯᐅᒡ;
ᐳᓂ ᐃᑕᑥᐛ ᒪᒃ ᐅᒥᒋᑥᐅᒡ ᒋᑭ ᒋ ᒥᔄᑭᓄᐛᒡ᙮
39ᒪᒃ ᐅᐱᒪᒋᐃᑯᓯᐅᓄᐛᐤ ᐅᑯᐃᔅᑯᑕᑎᓯᐅᒡ ᑎᐸᔨᒋᒐᓯᓇᒡ ᐅᒋᐱᔪᐤ,
ᐊᔪᐅᒄ ᐅᔭ ᐅᒥᔅᑯᐅᓯᐅᓄᐛᐤ ᒪᒂᒡ ᐊ ᒋᓯᑲᔨᒡ ᑲ ᐊᔨᒥᓂᔨᒡ᙮
40ᑎᐸᔨᒋᒐᓱᐤ ᒪᒃ ᒋᑭ ᐎᒋᐊᐤ, ᑭᔭ ᒋᑭ ᐱᒪᒋᐊᐤ;
ᒋᑭ ᐎᒂᒋᐊᐤ ᐅᒥᒋᑥᐛ ᐅᒡ, ᑭᔭ ᒋᑭ ᐱᒪᒋᐊᐤ, ᐊ ᒪᒥᓯᑐᑕᑯᑦ᙮
Currently Selected:
ᑎᐱᑦ ᐅᓂᑭᒧᐅᓇ 37: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
