ᑎᐱᑦ ᐅᓂᑭᒧᐅᓇ 35
35
1ᓇᑎᒧᐎ, ᐅ ᑎᐸᔨᒋᒐᓱᐤ, ᐊᓐᒡ ᑲ ᑯᒂᒋ ᒥᒋᑐᑐᐅᒡ ᐅᒡ;
ᒪᓯᔨᒡ ᐊᓐᒡ ᑲ ᒪᓯᔨᒡ᙮
2ᐅᑎᓇ ᐊᒂᓇᐅᓱᐛᑭᓐ ᑭᔭ ᒥᔅᐱᑐᓇᐱᔅᒃ,
ᓂᐳᐎ ᒪᒃ ᒐᒋ ᐎᒋᐃᔭᓐ᙮
3ᒋᒂᐱᔅᒋᐱᑕ ᓯᒪᑭᓐ, ᒋᑕᐊᒧᐅᒡ ᒪᒃ ᐊᓐᒡ ᑲ ᓂᓇᐧᑲᒋᐃᒡ:
ᐃᓯ ᓂᑦ ᐊᒐᐧᒄ, “ᓂᔾ ᒋᐱᒪᒋᐃᐛᒻ᙮”
4ᐊᑯᔅ ᒋᑭ ᓴᒂᔨᒧᐅᒡ ᑭᔭ ᒋᑭ ᐛᐛᓇᔨᑎᒧᒡ ᑲ ᓇᓂᑐᐛᔨᒪᒡ ᓂᑦ ᐊᒐᒂ:
ᐊᑯᔅ ᒋᑭ ᒋᐛᑲᐳᐅᒡ ᑭᔭ ᒋᑭ ᓂᓇᐸᐎᐛᐛᒡ ᑲ ᐎᑯᒂᒡ ᒥᒋᑐᑐᐅᒡ᙮
5ᐊᑯᔅ ᒥᔅᑯᓱᒥᔅᑎᑯᓴ ᐊ ᐛᐸᔅᑎᔨᒋ ᒋᑭ ᐃᓯᓇᑯᓱᐛᐅᒡ;
ᐊᑯᔅ ᑭᔭ ᒋᑭ ᓄᓱᔅᑲᑯᔪᐛ ᐅᑦ ᐊᓐᒋᓂᒪ ᑎᐸᔨᒋᒐᓱᐤ᙮
6ᐊᑯᔅ ᐅᒪᔅᑭᓇᐛᐤ ᒋᑭ ᐅᓂᑎᐱᔅᑲᔪᐤ ᑭᔭ ᒋᑭ ᒋᔭᐃᔪᐤ;
ᐊᑯᔅ ᑭᔭ ᒋᑭ ᑯᒂᑕᒋᐃᑯᔪᐛ ᐅᑦ ᐊᓐᒋᓂᒪ ᑎᐸᔨᒋᒐᓱᐤ᙮
7ᐛᔅ ᓂᑐᐎ ᒋᒧᑦ ᓂᒋ ᐎᑯᑎᒪᑯᒡ ᐅᑦ ᐊᐃᐱᐛᐛ ᐛᑎᑯᓂᒡ,
ᓂᑐᐎ ᑲᒋ ᒧᓇᐊᒪᐛᒡ ᓂᑦ ᐊᒐᒂ᙮
8ᐊᑯᔅ ᓴᒐᔾ ᒋᑭ ᐅᑎᑎᑯᐤ ᓂᓱᐅᓇᑎᓯᐅᓂᔪᐤ;
ᐊᑯᔅ ᒪᒃ ᒋᑭ ᓇᒂᓱᐤ ᑎᐱᔽ ᐅᑦ ᐊᐃᐱᒡ ᑲᒋ ᑲᔭᑦ:
ᐊᔪᐅᒄ ᓂᓱᐅᓇᑎᓯᐅᓂᔪᐤ ᒐ ᐃᓯ ᐸᒋᓯᐧᒃ᙮
9ᓂᑦ ᐊᒐᐧᒄ ᒪᒃ ᒋᑭ ᒥᔽᑕᐤ ᑎᐸᔨᒋᒐᓱᐛ:
ᒋᑭ ᒥᔽᔨᑎᒻ ᐅᐱᒪᒋᐃᐛᐅᓂᔨᒡ᙮
10ᒥᓯᐛ ᓂᔅᑭᓇ ᒋᑭ ᐃᔅᒋᔄᒪᑭᓇ, “ᑎᐸᔨᒋᒐᓱᐤ, ᐊᐛᓐ ᓇᔅᐱᑕᔅᒃ,
ᑲ ᐎᒂᒋᐊᑦ ᐅᒋᔅᑎᒪᓱᐤ ᐊᓂᔭ ᐅᒋ ᐊᔪᐛᒃ ᑲ ᒥᔅᑯᐅᓯᔨᒋ,
ᓂᐦᐃ, ᐅᒋᔅᑎᒪᓱᐤ ᑭᔭ ᐅᒥᓇᓯᐤ ᐊᓂᔭ ᐅᒋ ᑲᒋ ᒥᔅᑭᒥᑯᑦ ?”
11ᐅᑭᒋᔭᑕᒋᒧᐅᒡ ᒋ ᐱᓯᑯᐅᒡ;
ᓂᒋ ᒪᒥᓯᒥᑯᒡ ᒐᒂᓇ ᐊᑲ ᑲᒋ ᒋᔅᒐᔨᑎᒧᒡ᙮
12ᑲ ᒪᔭᑎᓂᔨᒡ ᓂᑭ ᒥᔨᑯᒡ ᒥᔅᑯᒡ ᐊᒋ ᒥᔪᑐᑐᐅᒡ,
ᐊ ᐎ ᐊᔨᒥᐊᒡ ᓂᑦ ᐊᒐᒂ᙮
13ᓂᔾ ᒪᒃ, ᐃᔅᐱ ᑲ ᐊᐧᑯᓯᒡ ᓂᒋ ᒋᔅᑲᒺᓐ ᐱᒍᐎᔭᓂᔅᒋᓴ:
ᓂᒋ ᑕᐸᑕᐃᒧᐊᐤ ᓂᑦ ᐊᒐᐧᒄ ᐊ ᓂᐧᑲᓱᔭᓐ;
ᑭᔭ ᓂᑦ ᐊᔭᒥᐊᐅᓐ ᑎᐱᔽ ᓂᒥᔪᐳᐅᓂᒡ ᒋ ᐃᓯ ᒋ ᐛᐱᔪᐤ᙮
14ᓂᒋ ᐃᑎᓐ ᒪᓐ ᒥᒄ ᐊᒋ ᐅᑐᑕᒥᔭᓐ ᑭᔭ ᒪᒃ ᐊᒋ ᐎᐧᑲᓂᓯᔭᓐ:
ᓂᒋ ᑯᓯᑯᐤ ᐅᑎᑕᐱᓐ, ᒧᔭᒻ ᐊᐛᓐ ᐊ ᒧᔎᑕᑦ ᐅᑲᐎᔭ᙮
15ᒪᒃ ᒪᒂᒡ ᑲ ᐊᔨᒥᓯᐛᐱᓇ ᒋ ᒥᔽᔨᑎᒧᒡ, ᐊ ᒪᒧᐤ ᒪᐅᒋᐃᑐᒡ:
ᓂᐦᐃ, ᐅᒪᒐᔨᑕᑯᓯᐅᒡ, ᓂᒋ ᒪᒧᐤ ᒧᐛᓴᑯᔅᑕᑯᒡ, ᓇᒪ ᒪᒃ ᓂ ᐅᒋ ᒋᔅᒐᔨᑕᓐ;
ᓂᒋ ᑕᑐᐱᑎᑯᒡ, ᐊᑲ ᐳᓂᒡ;
16ᐊᓯᒡ ᐊᔭᒥᐊᐧᑲᓱᐤ ᒪᔭᔨᒐᐅᒡ ᐊ ᒥᑯᓴᒡ, ᓂᒋ ᒪᑥᔭᐱᑕᓯᓄᔅᑕᑯᒡ᙮
17ᑎᐸᔨᒋᒐᓱᐤ, ᑕᓐ ᒐ ᐃᔅᐱᔅ ᒐ ᐃᑕᐱᔨᓐ ?
ᐎᐧᑯᒋᔾ ᓂᑦ ᐊᒐᐧᒄ ᐅᓂᓱᐅᓇᒋᐃᐛᐅᓄᐛᒡ ᐅᒡ,
ᑭᔭ ᓂᓴᒋᐊᑭᓐ ᒥᓯᐱᓱᐅᒡ ᐅᒡ᙮
18ᒋᑭ ᓂᓇᔅᑯᒥᑎᓐ ᒋᒋᒪᐛᒋᐃᑐᐅᓂᒡ:
ᒋᑭ ᒪᒥᒋᒥᑎᓐ ᐊᓐᑕ ᐊ ᐃᑕᒡ ᒥᒐᑦ ᐃᔪᒡ᙮
19ᐊᑲᐎᔾ ᓇᐊᔨᒥᒡ ᐊᓐᒡ ᑲ ᐛᐧᑲᓯᒡ ᓂᑐᐎ ᒐᒋ ᒥᔽᓯᒡ;
ᐊᑲ ᑭᔭ ᒐᒋ ᓯᔪᐧᑲᐱᒡ ᐊᓐᒡ ᓂᑐᐎ ᑲ ᐃᓯ ᐛᐧᑲᓯᒡ᙮
20ᐛᔅ ᓇᒪᐎᔾ ᒋᔭᒪᐤ ᐃᔨᒧᐅᒡ:
ᒪᒃ ᐊᔭᑯᔅᑕᒧᐛᐅᒡ ᑭᑭᒋᔭᐤ ᒐᒂᓇ ᐊᓂᔭ ᑲ ᒋᔭᒪᐎᓯᔨᒋ ᐊᔅᒋᒡ᙮
21ᓂᐦᐃ, ᓂᒋ ᑕᐛᑎᔅᑕᑯᒡ;
ᒋ ᐃᔅᒋᔄᐅᒡ ᒪᒃ, “ᐊᐦᐊ, ᐊᐦᐊ, ᓂᔅᒋᓯᑯᓇᒡ ᓂᒋ ᐅᒋ ᐛᐸᑕᓇᓐ᙮”
22ᐅᔭ ᔅᒋ ᐛᐸᑕᓐ, ᐅ ᑎᐸᔨᒋᒐᓱᐤ:
ᐊᑲᐎᔾ ᒋᐱᑐᐛ ᐅ ᑎᐸᔨᒋᒐᓱᐤ, ᐊᑲᐎᔭ ᔭᐛᐱᒥ᙮
23ᑯᔅᑯᓂᑎᓱᐤ, ᑯᔅᑯᓯ ᒪᒃ ᒐᒋ ᑎᐸᔅᑯᓂᒐᔨᓐ,
ᓂᔾ ᐅᒡ, ᓂᒋᓴᒪᓂᑐᒻ ᑭᔭ ᓂᑎᐸᔨᒋᒐᓯᒻ᙮
24ᑎᐸᔅᑯᓂ, ᐅ ᑎᐸᔨᒋᒐᓱᐤ ᓂᒋᓴᒪᓂᑐᒻ, ᐊ ᐃᓯ ᑯᐃᔅᑯᑕᑎᓯᔨᓐ;
ᐊᑲᐎᔾ ᒪᒃ ᓇᐊᔨᒥᒡ ᒐᒋ ᒥᔽᓯᒡ᙮
25ᐊᑯᔅ ᐊᑲᐎᔭ ᒋᑭ ᐃᔅᒋᔄᐛᒡ ᐅᑕᐃᐛᒡ, “ᐊ, ᐊᔪᐅᒄ ᑲ ᐃᓯ ᓂᑐᐛᔨᒥᒋᒡ:”
ᐊᑲᐎᔾ ᒋᑭ ᐃᔅᒋᔄᐅᒡ, “ᓂᒋ ᒥᓱᐛᐸᔪᐛᓇᓐ᙮”
26ᐊᑯᔅ ᒋᑭ ᓯᓴᒂᔨᒧᐅᒡ ᑭᔭ ᒪᒧᐎ ᒋᑭ ᐛᓇᔨᑎᒪᑭᓄᐅᒡ,
ᑲ ᒥᔽᔨᑕᒡ ᓂ ᒪᒂᔨᑎᒧᐅᓂᔪᐤ:
ᐊᑯᔅ ᒋᑭ ᒋᔅᑭᒧᒡ ᐛᐛᓇᔨᑎᒧᐅᓂᔪᐤ ᑭᔭ ᒪᒐᔨᑕᑯᓱᐅᓂᔪᐤ ᐊᑎᑐᐤ ᑲ ᒋᔅᑕᒋᒥᓱᒡ ᐃᔅᐱᔅ ᐎ ᓂᔾ᙮
27ᐊᑯᔅ ᒪᒃ ᒋᓇᒋᔄᐛᑕᑈᐛᒡ ᐊ ᐃᔅᐱᔅ ᒥᔽᔨᑕᒡ ᑭᔭ ᐊᓯᒋᔭᓯᒡ, ᑲ ᒥᔽᔨᑕᒡ ᓂᑯᐃᔅᑯᑐᓂᔪᐤ,
ᐊᑯᔅ ᒧᔅ ᒋᑭ ᐃᔅᒋᔄᐛᒡ, “ᐊᑯᔅ ᑎᐸᔨᒋᒐᓱᐤ ᒋᑭ ᒋᔅᑕᒋᒪᑭᓄᐤ,
ᑲ ᒥᔽᔨᑎᒺᑦ ᐅᒥᔽᐱᒪᑎᓯᐅᓂᔪᐤ ᐅᑦ ᐊᑐᔅᒐᔭᑭᓇ᙮”
28ᓂᑕᔨᔨᒡ ᒪᒃ ᓂᑭ ᐅᒋ ᐊᔨᒧᑕᓐ ᒋᑯᐃᔅᑯᑕᑎᓯᐅᓐ
ᑭᔭ ᒋᒪᒥᒋᒥᑯᓯᐅᓐ ᒧᔅ ᐃᔅᑭᓐ ᒋᓯᑲᐛ᙮
Currently Selected:
ᑎᐱᑦ ᐅᓂᑭᒧᐅᓇ 35: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
