ᑎᐱᑦ ᐅᓂᑭᒧᐅᓇ 145
145
Psalm 145:1-5 (Proper-27 Year C)
1ᒋᑭ ᒋᔅᑕᒋᒥᑎᓐ, ᓂᒋᓴᒪᓂᑐᒻ, ᐅ ᒋᓴᐅᒋᒪᐤ;
ᑭᔭ ᓂᑭ ᒥᔽᒋᑕᓐ ᒋᑦ ᐃᓯᓂᐧᑲᓱᐅᓐ ᒧᔅ ᑲᒋᒡ᙮
2ᐊᓯᑯᒻ ᑕᑥᐤ ᒐᓯᑲᒡ ᒋᑭ ᒪᒥᒋᒥᑎᓐ,
ᑭᔭ ᓂᑭ ᒪᒥᒋᑕᓐ ᒋᑦ ᐃᓯᓂᐧᑲᓱᐅᓐ ᒧᔅ ᑲᒋᒡ᙮
3ᒋᔅᑎᓯᐤ ᑎᐸᔨᒋᒐᓱᐤ, ᑭᔭ ᐃᑕᔨᑕᑯᓱᐤ ᓇᔅᒡ ᒐᒋ ᒪᒥᒋᒪᑭᓄᐅᑦ;
ᑭᔭ ᐅᒋᔅᑎᓯᐅᓐ ᓇᒪ ᑕᐱ ᒋᔅᒐᔨᑕᑯᓂᔪᐤ᙮
4ᐸᐃᒂᐤ ᐅᑦ ᐊᔭᓂᔅᒐ ᐱᒪᑎᓯᐅᒡ ᒋᑭ ᐊᔭᓂᔅᒐ ᒪᒥᒋᑎᒧᒡ ᒋᑦ ᐊᑐᔅᒐᐅᓇ,
ᑭᔭ ᒋᑭ ᐛᐎᑎᒧᒡ ᒋᓱᐧᑲᑎᓯᐅ-ᐃᑐᐅᓇ᙮
5ᓂᑭ ᐊᔨᒧᑕᓐ ᐊᔅᐱᔅ ᒋᔅᑕᔨᑕᒂᒡ ᒋᒋᓴᐅᒋᒪᐛᔨᑕᑯᓱᐅᓐ,
ᑭᔭ ᒋᒪᒥᔅᑲᒡ-ᐃᑐᐅᓇ᙮
6ᐃᔪᒡ ᒪᒃ ᒋᑭ ᐊᔨᒧᑎᒧᒡ ᐊᔅᐱᔅ ᓱᐧᑲᑎᓯᒥᑭᒋ ᒋᑯᔅᑕᑎᑯᐅ-ᐃᑐᐅᓇ:
ᓂᑭ ᐎᑕᓐ ᒪᒃ ᒋᒋᔅᑎᓯᐅᓐ᙮
7ᒥᔅᑎ ᒋᑭ ᐛᐎᑎᒧᒡ ᐊ ᐃᓯ ᒋᔅᒋᑐᑕᑭᓄᐎᔨᒡ ᒋᒥᔅᑎ ᒥᔽᑎᓯᐅᓂᔪᐤ,
ᑭᔭ ᐊ ᓂᑭᒧᒡ ᒋᑭ ᐊᔨᒧᑎᒧᒡ ᒋᑯᐃᔅᑯᑕᑎᓯᐅᓂᔪᐤ᙮
8ᑎᐸᔨᒋᒐᓱᐤ ᒋᓴᐛᑎᓯᐤ, ᑭᔭ ᓴᑭᔅᒋᓇᔅᑲᑯᐤ ᒋᔅᑎᒪᒐᔨᒋᒐᐅᓂᔪᐤ;
ᓇᒪ ᑎᐛᒡ ᒋᔄᓯᑦ, ᑭᔭ ᓇᔅᒡ ᐊ ᓱᐛᔨᒋᒐᑦ᙮
9ᑎᐸᔨᒋᒐᓱᐤ ᒥᓯᐛ ᒥᔪᑐᑐᐛᐤ;
ᑭᔭ ᐅᔪᔅᐱ ᓱᐛᔨᒋᒐᐅᓇ ᐅᑎᑕᒧᒪᑭᓂᔪᐛ ᒥᓯᐛ ᐅᑦ ᐊᑐᔅᒐᐅᓇ᙮
Psalm 145:10-18 (Proper-12 Year B)
10ᒥᓯᐛ ᒋᑦ ᐊᑐᔅᒐᐅᓇ ᒋᑭ ᒪᒥᒋᒥᑯᓐ, ᐅ ᑕᐸᔨᒋᒐᔨᓐ;
ᑭᔭ ᒋᐸᔭᒋᓯᒥᒡ ᒋᑭ ᒥᔽᒋᒥᑯᒡ᙮
11ᒋᑭ ᐊᔨᒧᑎᒧᒡ ᐊᔅᐱᔅ ᒋᔅᑕᔨᑕᑯᓂᔨᒡ ᒋᒋᓴᒋᒪᐅᓂᔪᐤ,
ᑭᔭ ᒋᑭ ᐎᑕᒧᒡ ᒋᑭᔅᒋᐅᓂᔪᐤ;
12ᒐᒋ ᒋᔅᒐᔨᑎᒥᐊᒡ ᒥᓯᐛ ᐃᔪᐤ ᐅᑯᓯᓴᓇ ᐅᓱᐧᑲᑎᓯᐅ-ᐃᑐᐅᓇ,
ᑭᔭ ᐊᔅᐱᔅ ᒋᓴᐅᒋᒪᐛᔨᑕᑯᓂᔨᒡ ᐅᑦ ᐅᒋᒪᐅᓐ᙮
13ᒋᒋᓴᒋᒪᐅᓐ ᑲᒋᒡ ᐅᒋᒪᐅᓄᐤ,
ᑭᔭ ᒋᑎᐸᔨᒋᒐᐅᓐ ᐱᒥᐱᔪᐤ ᒥᓯᐛ ᒐ ᐊᑎ ᐊᓂᔅᒐ ᐱᒪᑎᓯᓇᓄᐅᒡ᙮
14ᑎᐸᔨᒋᒐᓱᐤ ᓯᑐᓇᐤ ᒥᓯᐛ ᑲ ᐸᒋᓯᓂᔨᒋ,
ᑭᔭ ᐱᓯᑯᓇᐤ ᒥᓯᐛ ᐊᓂᔭᔪᐛ ᑲ ᒪᒥᓴᒪᔨᑎᒥᔨᒋ᙮
15ᒥᓯᐛ ᐅᔅᒋᓯᑯᐛᐛ ᒋᑦ ᐊᓯᓄᐛᐃᑯᐛᓐ;
ᒋᑦ ᐊᓯᒪᐅᒡ ᒪᒃ ᑯᐃᔅᒄ ᐛᑎᒋᐱᔨᒋ᙮
16ᒋ ᓴᑐᐱᔨᑕᓐ ᒋᑎᒋᔾ,
ᑭᔭ ᒋ ᑕᐱ ᒥᔭᐤ ᐊ ᐃᓯ ᓂᑐᐛᔨᑕᐧᒃ ᒥᓯᐛ ᑕᑐᐤ ᐊᐛᓐ ᑲ ᐱᒪᑎᓯᑦ᙮
17ᑎᐸᔨᒋᒐᓱᐤ ᑯᐃᔅᑯᑕᑎᓯᐤ ᒥᓯᐛ ᐅᑦ ᐃᓯᑥᐅᓂᒡ,
ᑭᔭ ᐸᔭᒋᓯᐤ ᒥᓯᐛ ᐅᑦ ᐊᑐᔅᒐᐅᓂᒡ᙮
18ᑎᐸᔨᒋᒐᓱᐤ ᐸᓱᐛᐱᒪᐤ ᒥᓯᐛ ᑲ ᓂᑐᐛᔨᒥᑯᑦ,
ᒥᓯᐛ ᑲ ᓂᑐᐛᔨᒥᑯᑦ ᑕᑈᐅᓂᒡ᙮
19ᒋᑭ ᑎᐱᐸᔨᑕᐤ ᐊ ᐃᓯ ᓂᑐᐛᔨᑎᒥᔨᒋ ᐊᓂᔭᔪᐛ ᑲ ᓇᓂᒋᔅᑕᑯᑦ:
ᒋᑭ ᓂᑐᑐᐛᐤ ᒪᒃ ᐊ ᒪᑕᑯᑦ, ᑭᔭ ᒋᑭ ᐱᒪᒋᐊᐤ:
20ᑎᐸᔨᒋᒐᓱᐤ ᑭᓄᐛᔨᒪᐤ ᒥᓯᐛ ᐊᓂᔭᔪᐛ ᑲ ᓴᒋᐃᑯᑦ;
ᒪᒃ ᒥᓯᐛ ᐅᒥᒋᑥᐛ ᒋᑭ ᓂᓱᐅᓇᒋᐊᐤ᙮
21ᓂᑐᓂᒡ ᓂᑭ ᐅᒋ ᐊᔨᒧᑎᒺᓐ ᐅᒪᒥᒋᒥᑯᓯᐅᓐ ᑎᐸᔨᒋᒐᓱᐤ:
ᐊᑯᔅ ᒪᒃ ᒥᓯᐛ ᑲ ᐎᔭᓯᒡ ᒋᑭ ᒥᔽᒋᑎᒺᐅᒡ ᐅᐸᔭᒋ-ᐃᓯᓂᐧᑲᓱᐅᓂᔪᐤ ᑲᒋᒡ ᑭᔭ ᑲᒋᒡ᙮
Currently Selected:
ᑎᐱᑦ ᐅᓂᑭᒧᐅᓇ 145: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
