ᑎᐱᑦ ᐅᓂᑭᒧᐅᓇ 144
144
1ᒋᑭ ᐎ ᒪᒥᒋᒥᑯᓯᐤ ᑎᐸᔨᒋᒐᓱᐤ ᓂ ᒥᔅᑯᐅᓯᐅᓐ,
ᑲ ᒋᔅᒋᓄᑎᑕᑦ ᓂᑎᒋᔭ ᑲ ᐃᓯ ᓂᑐᐱᔨᒥᑭᓂᔨᒋ,
ᑭᔭ ᓄᑎᒋᑭᓇ ᒐᒋ ᒪᓯᒐᒥᑭᓂᔨᒋ;
2ᓂᒥᔽᑎᓯᐅᓐ, ᑭᔭ ᓂᓂᑐᐱᔪᐅᒋᐛᑉ;
ᓂᑦ ᐊᓱᐛᐳᐅᓐ ᑲ ᐃᔅᐸᒡ, ᑭᔭ ᓂ ᓇᑎᒪᑯᓯᐅᓐ;
ᓂᑦ ᐊᒂᓇᐅᓱᐛᑭᓐ, ᐊᓐ ᑭᔭ ᑲ ᒪᒥᓯᑐᑐᐅᒃ;
ᑲ ᑎᐸᔨᑎᒥᐃᑦ ᓂᑦ ᐃᔨᒪ᙮
3ᑎᐸᔨᒋᒐᓱᐤ, ᑕᓐ ᐊᑕᔨᑕᑯᓯᑦ ᐃᔪᐤ ᐊᐱᔅᒐᔨᒥᑦ ?
ᑭᔭ ᒪᒃ ᐃᔪᐤ ᐅᑯᓯᓴᓐ, ᐛᔭᔅ ᐊ ᐃᑕᒋᒥᑦ ?
4ᐃᔪᐤ ᓂᑐᐎ ᒐᒂᓐ ᐃᑕᔨᑕᑯᓱᐤ:
ᐅᒋᓯᑲᒪ ᒧᔭᒻ ᐊ ᑎᑲᔅᑕᑎᒡ ᑲ ᐊᑎ ᐃᒐᐱᔨᒡ᙮
5ᑕᐸᑎᓇ ᒋᒋᒋᓯᑯᒪ, ᐅ ᑎᐸᔨᒋᒐᓱᐤ,
ᐸᒋ ᔭᓯ ᒪᒃ ᑕᒋᓇ ᐱᔅᑯᑎᓇᐛ, ᐊᑯ ᒐ ᐱᐳᑕᒋ᙮
6ᐛᔅᑕᐱᑕ, ᐛᓴᔄᑎᓴᐅᒡ ᒪᒃ;
ᐱᒧᑎᒂ, ᓂᓱᐅᓇᒋᐃᒡ ᒪᒃ᙮
7ᔭᓯᓂᔅᒐᔨ ᐃᔅᐱᒥᒡ ᐅᒡ;
ᐎᐧᑯᒋᐃ, ᑭᔭ ᐎᐎᐱᓯ ᒋᒋ ᓂᐱᔭ ᐅᒡ,
ᐅᑎᒋᐛᒡ ᐅᒋ ᐊᔭᒡ ᐊᐛᓯᒡ᙮
8ᐅᑐᓄᐛᒡ ᓂᑐᐎ ᑲ ᐃᓯ ᐃᔨᒥᒡ,
ᑭᔭ ᐅᒥᔪᐅᓄᐛᒡ ᐊ ᑭᑭᒋᔭᐤ ᐎᔨᒡ᙮
9ᐅᔅᒋ ᓂᑭᒧᐅᓐ ᒋᑭ ᓂᑭᒧᔅᑕᑎᓐ, ᐅ ᒋᓴᒪᓂᑐᐤ;
ᓂᑭᒧᒋᑭᓂᒡ ᑭᔭ ᑲ ᒥᒐᑥᐸᑭᒧᒡ ᒋᔍᐛᐱᒋᑭᓂᒡ ᐊ ᓂᑭᒧᔭᓐ ᒋᑭ ᒪᒥᒋᒥᑎᓐ᙮
10ᐎᔾ ᐊᐅᒄ ᑲ ᒥᔭᑦ ᒋᓴᐅᒋᒪᐛ ᐱᒪᒋᐃᐛᐅᓂᔪᐤ:
ᑲ ᐱᒪᒋᐊᑦ ᐅᑦ ᐊᑐᔅᒐᔭᑭᓇ ᑎᐱᑕ ᐊᐧᑯᔪᐛᐤ ᒥᔅᑎ ᒧᐧᑯᒪᓂᔪᐤ ᐅᒡ᙮
11ᐎᐧᑯᒋᐃ, ᑭᔭ ᐱᒪᒋᐃ ᐅᑎᒋᐛᒡ ᐅᒋ ᐊᔭᒡ ᐊᐛᓯᓯᒡ,
ᐅᑐᓄᐛᒡ ᓂᔪᐎ ᑲ ᐃᓯ ᐃᔨᒥᒡ,
ᑭᔭ ᐅᒥᔪᐅᓄᐛᒡ ᐊ ᑭᑭᒋᔭᐤ ᐎᔨᒡ᙮
12ᓂᑯᓯᓇᓐᒡ ᒐᒋ ᐃᓯᓇᑯᓯᒡ ᒧᔭᒻ ᓂᑕᐅᒋᑕᑭᓇ ᐊ ᐅᔅᒋ ᓂᑕᐅᒋᒋ;
ᑭᔭ ᓂᑕᓂᓯᓇᓐᒡ ᒐᒋ ᐃᓯᓇᑯᓯᒡ ᒧᔭᒻ ᐊ ᒋᒐᔭᔨᒡ ᐊᓯᓂᒡ ᐊ ᐛᔅᑲᒪᐱᔅᒋᓯᒡ ᒋᒋᓴᐅᒋᒪᐅᒋᐛᐱᒡ ᐃᓯ;
13ᓂᑦ ᐊᔅᑕᓱᐅᒋᐛᐱᓇᓇ ᒐᒋ ᓴᑭᔅᒋᓇᔨᒋ, ᐊ ᐱᒋᑎᒋ ᒥᓯᐛ ᑕᑐ ᐊᔅᑕᓱᐅᓇ;
ᓂ ᒪᔭᑕᓂᓯᒥᓇᓐᒡ ᒐᒋ ᓂᑕᐅᒋᒡ ᒥᔅᑎ ᒐᓯᐱᔪᐤ ᑭᔭ ᐸᐃᑯᔪᐤ ᑕᑥᐤ ᒐᓯᐱᔪᐤ ᓂ ᐱᒧᑕᔅᑭᓇᓇᒡ;
14ᓂ ᒥᔅᑐᓱᒥᓇᓐᒡ ᒐᒋ ᒥᔅᑯᐅᓯᒡ ᒐᒋ ᐊᑐᔅᒐᒡ;
ᒐ ᐊᑲ ᒋ ᐸᐱᔨᔅᑯᐃᑲᓂᐅᒡ, ᐊᑲ ᑭᔭ ᐊ ᐎᐎᓇᓄᐅᒡ;
ᒐ ᐊᑲ ᒋ ᐊᓏᔨᒋᒐᓄᐅᒡ ᓂ ᐱᒧᑕᔅᑭᓇᓇᒡ᙮
15ᒥᔽᔨᒧᐅᒡ ᐊᓐᒡ ᐃᔪᒡ, ᐊᑯ ᐃᓯᓇᑯᓯᒡ;
ᓂᐦᐃ, ᒥᔽᔨᒧᐅᒡ ᐊᓐᒡ ᐃᔪᒡ, ᑲ ᐅᒋᓴᒪᓂᑐᒥᒡ ᑎᐸᔨᒋᒐᓱᐛ᙮
Currently Selected:
ᑎᐱᑦ ᐅᓂᑭᒧᐅᓇ 144: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
