ᐸᐃᓕᒪᓐ 1
1
ᐊ ᐛᒋᔭᒪᑭᓄᐅᑦ ᐸᐃᓕᒪᓐ
Philemon 1.1-21 (Proper-18 Year C)
1ᓂᔾ ᑈᓪ ᑲ ᒥᓯᓇᐃᒐᔭᓐ᙮ ᑭᔭ ᑎᒧᑎ ᒋᐧᑲᓂᓯᓄᐤ ᑕᐤ ᐅᑕ᙮ ᑲᒪᑯᓄᐛᓯᐅᒋᐛᐱᒡ ᓂ ᑕᓐ ᐊᓄᒡ ᐊᓐ ᐅᒋ ᐊ ᐊᑐᔅᑯᐅᒃ ᒋᓴᔅ ᙭᙮
ᒋᔾ ᓂᐎᒐᐛᑭᓇᓐ ᐸᐃᓕᒪᓐ ᑲ ᒥᓯᓇᐊᒪᑕᓐ ᑭᔭ ᒋᔾ ᑲ ᐊᑐᔅᑯᐅᑦ ᒋᓴᔅ ᒧᔭᒻ ᓂᔭᓐ ᐊ ᐃᓯ ᐊᑐᔅᑯᐅᒋᒡ᙮ 2ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ ᒋᒋᒡ ᑲ ᒪᒧᐤ ᐊᔭᒥᐊᒡ ᐊᐅᑯᓐᒡ ᑭᔭ ᒪᓯᓇᐊᒧᐅᒂᐤ᙮ ᒋᒥᓯᓄᐤ ᐊᐱᔭ ᑲ ᐃᓯᓂᐧᑲᓱᑦ ᑭᔭ ᐊᕐᑭᐸᔅ ᐊᐅᑯᓐᒡ ᑭᔭ ᒪᓯᓇᐊᒧᐅᒂᐤ᙮ ᑭᔭ ᐎᔾ ᐊᕐᑭᐸᔅ ᓱᒋᑲᐳᐤ ᐊ ᐊᑐᔅᑯᐛᑦ ᒋᓴᓴ ᒧᔭᒻ ᓂᔾ ᐊ ᐃᑐᐅᒡ᙮
3ᓂᑦ ᐊᔭᒥᐊᐤ ᒋᓴᒪᓂᑐᐤ ᒍᑕᐎᓄᐤ ᑭᔭ ᐅᑎᐸᔨᒋᒐᐤ ᒋᓴᔅ ᒐᒋ ᒥᔪᑐᑎᒪᑕᑯᒡ ᑭᔭ ᒐᒋ ᒥᔨᑕᑯᒡ ᒐᒋ ᒋᔭᒪᔨᑎᒺᒄ᙮
ᐸᐃᓕᒪᓐ ᐅᓴᒋᐃᐛᐅᓐ ᑭᔭ ᐅᑕᑈᑎᒧᐅᓐ
4ᓂᐧᑲᓂᔅ ᐸᐃᓕᒪᓐ ᒧᔅ ᒋ ᒋᔅᒋᓯᑐᑕᑎᓐ ᑕᑥᐤ ᐊ ᐊᔭᒥᐊᔭᓐ᙮ ᓂᓇᔅᑯᒪᐤ ᒪᒃ ᒋᓴᒪᓂᑐᐤ᙮ 5ᒧᔅ ᓂ ᐸᑕᓐ ᐊᔅᐱᔅ ᓴᒋᐃᑥᐤ ᑲ ᑕᑈᑕᒡ᙮ ᓂ ᐸᑕᓐ ᑭᔭ ᑕᓐ ᐊ ᐃᓯ ᑕᑈᔭᔨᒥᑦ ᒋᑎᐸᔨᒋᒐᓯᒥᓄᐤ ᒋᓴᔅ᙮ 6ᓂ ᓂᑐᑎᒪᓐ ᐊᓂᔭ ᐊ ᐊᑎ ᐊᔨᒧᑎᒧᒡ ᐊᐛᓐᒋ ᑕᓐ ᐊ ᐃᓯ ᑕᑈᑎᒥᓐ ᒐᒋ ᐎᒋᐃᐛᒥᑲᒡ ᐊᑐᐎᔅ ᒐᒋ ᐊᑎ ᒋᔅᒐᔨᑎᒥᓐ ᑕᓐ ᒐᒋ ᐃᓯ ᒥᔪᑐᑎᒪᑕᐧᒄ ᙭ ᒋᓴᔅ᙮ 7ᓇᔅᒡ ᑕᑈ ᓂ ᒥᔽᔨᑕᓐ ᑭᔭ ᓇᔅᒡ ᓂ ᒥᔽᔨᒧᐃᑯᓐ ᐊ ᒋᔅᒐᔨᑎᒪᓐ ᐊ ᐃᓯ ᐊᔭᔨᓐ ᓴᒋᐃᐛᐅᓐ, ᓂᐧᑲᓂᔅ, ᐛᔅ ᒥᒐᑦ ᑲ ᑕᑈᑕᒡ ᒋ ᒥᔽᔨᒧᐃᑯᐅᒡ ᑕᓐ ᐊ ᐃᓯ ᐊᔭᔨᓐ ᓴᒋᐃᐛᐅᓐ᙮
ᑈᓪ ᑲ ᐊᔨᒧᒪᑦ ᐅᓂᓯᒪᓴ
8ᐊᐅᒄ ᒪᒃ ᐛᒋ ᐎ ᑯᒂᒋᒥᑕᓐ ᒐᒂᓐ ᐊ ᒋᔅᒐᔨᒥᑕᓐ ᐊᔅᐱᔅ ᓴᒋᐃᑥᐤ ᐊᐛᓐᒋ᙮ ᐊᑈᔅᑕᓐ ᐊ ᑕᔭᓐ ᒋᐸ ᒋ ᐎᓱᐛᑎᑎᓐ ᑕᓐ ᒐ ᐃᑎᔨᓐ᙮ 9ᒥᒄ ᒪᒃ ᓴᒋᐃᐛᐅᓐ ᓂ ᐃᑐᑕᑯᓐ ᐃᔭᐱᒡ ᒐᒋ ᑯᒂᒋᒥᑕᓐ᙮ ᓇᒪ ᒋᑭ ᐅᒋ ᐊᔨᐧᑭᒥᐃᑎᓐ ᐊ ᐎᑎᒪᑕᓐ ᑕᓐ ᒋᐸ ᐃᑎᓐ ᐊᑎ ᐊ ᒋᓴᐃᔪᔭᓐ ᑭᔭ ᑲᒪᑯᓄᐛᓯᐅᒋᐛᐱᒡ ᐊ ᑕᔭᓐ ᐊᒋ ᐊᔨᒧᒥᒃ ᒋᓴᔅ᙮ 10ᒋ ᐎ ᑯᒂᒋᒥᑎᓐ ᒪᒃ ᒐᒋ ᐎᒋᐃᑦ ᐊᓐ ᐛᔅᑭᒡ ᒋᑦ ᐊᐱᒋᐊᑭᓐ ᐅᓂᓯᒪᔅ ᑲ ᐃᓯᓂᐧᑲᓱᑦ᙮ ᐛᔅ ᒧᔭᒻ ᑎᐱᔨᐛ ᓂᑯᔅ ᓂᑦ ᐃᑕᔨᒪᐤ ᓂᔾ ᐊᒋ ᐊᔨᒧᑎᒧᒃ ᒥᔽᒋᒧᐅᓂᔪᐤ ᐃᔅᐱ ᒐ ᑕᑈᔭᔨᒪᑦ ᒋᓴᓴ᙮ ᐅᑕ ᑲᒪᑯᓄᐛᓯᐅᒋᐛᐱᒡ ᐊ ᑕᔭᓐ ᐊᑯᑕ ᑲ ᐱᒪᒋᐅᑦ᙮ 11ᑕᑈ ᑭᑈ ᓇᒪ ᒐᒂᔪᐤ ᒋ ᐅᒋ ᐃᑕᐱᒋᐊᐤ ᐊᓐᑕ ᐅᑕᒡ᙮ ᐊᓄᒡ ᒪᒃ ᑕᐱᔅᑯᓐ ᑕᑈ ᒋᑭ ᒥᔪ ᐊᐱᒋᐊᓄᐤ᙮
12ᐊᑯ ᒪᒃ ᑲᐤ ᐊ ᐃᑎᓴᐅᒃ ᐊᓐᑕ ᐊ ᑕᐅᑦ᙮ ᒥᒄ ᒪᒃ ᐎ ᒋᔅᒐᔨᑕ ᓇᔅᒡ ᐊ ᒥᒐᔨᑎᒪᓐ ᐊ ᐱᔅᑎᓂᒃ᙮ 13ᓂᐸ ᒥᔽᔨᑕᓐ ᑭᑈ ᐅᑕ ᒋ ᑭᓄᐛᔨᒪᐅᒋᐱᓇ᙮ ᐊᑯ ᒪᒃ ᒧᔭᒻ ᒋᔾ ᐸᐃᓕᒪᓐ ᐊ ᐎᒋᐃᔨᓐ ᒋᐸ ᐃᓯᓇᑯᓐ ᐅᑕ ᒋ ᐃᑕᑯᐱᓇ ᐅᓂᓯᒪᔅ ᒪᒂᒡ ᑲᒪᑯᓄᐛᓯᐅᒋᐛᐱᒡ ᐊ ᑕᐅᒡ ᒥᔽᒋᒧᐅᓐ ᐅᒡ᙮ 14ᒥᒄ ᒪᒃ ᓇᒪ ᓂ ᐅᒋ ᐎ ᑭᓄᐛᔨᒪᐤ ᐊᑲ ᐊᔅᒄ ᐅᒋ ᓂᔅᑯᒧᔨᓐ᙮ ᓂᐸ ᒥᔽᔨᑕᓐ ᒋᔾ ᑎᐱᔨᐛ ᐛᑕᔨᑎᒥᓐ ᑕᓐ ᒐ ᐃᑎᓱᐛᑎᑦ ᐅᓂᓯᒪᔅ, ᓇᒪ ᒋ ᐎ ᐊᔨᐧᑭᒥᐃᑎᓐ᙮
15ᒂᔄᓐ ᐊᔪᐅᒄ ᐅᔭ ᐛᒋ ᐱᔅᑎᓂᑯᑦ ᐅᓂᓯᒪᔅ ᒋᓴᒪᓂᑐᐛ ᒐᒋ ᓂᑭᑎᔅᒃ ᐊᔅᒄ ᐊᓐᑕ ᐸᑎᒪ ᒧᔅ ᒐᒋ ᑕᑦ ᐊᓐᑕ ᐊ ᑕᐅᑦ᙮ 16ᑕᐸ ᐊᑯ ᐊᐱᒋᐊᑭᓐ ᒋᑭ ᐅᒋ ᐃᓯ ᑭᓄᐛᐱᒪᑭᓄᐤ᙮ ᐃᐛᒃ ᒋᔅᑕᔨᑕᑯᓱᐤ ᐃᔅᐱᔅ ᐊᐱᒋᐊᑭᓇ᙮ ᒧᔭᒻ ᑎᐱᔨᐛ ᒋᐧᑲᓂᓯᓄᐤ ᒋᑭ ᐃᓯ ᑭᓄᐛᐱᒪᓄᐤ᙮ ᐊᔪᐅᒄ ᐛᔅ ᑭᑈ ᓂᔾ ᐊ ᐃᓯ ᑭᓄᐛᐱᒥᒃ᙮ ᐊᐅᑯᓐ ᒪᒃ ᒧᔭᒻ ᑭᔭ ᒋᔾ ᒐ ᐃᓯ ᑭᓄᐛᐱᒥᑦ, ᒧᔭᒻ ᑎᐱᔨᐛ ᒋᐧᑲᓂᔅ ᑭᔭ ᐅᑎᐸᔨᒋᒐᐤ ᐅᑦ ᐊᐱᒋᐊᑭᓇ᙮
17ᑕᑈ ᓂᐎᒐᐛᑭᓐ ᐊ ᐃᑕᔨᒧᐅᓇ ᒥᒄ ᐃᓯ ᐱᑎᑲᐃ ᒧᔭᒻ ᓂᔾ ᒋᐸ ᐃᑐᑐᐅᓐ ᓂᑐᐛᐱᒥᑕᓐ᙮ 18ᒧᔭᒻ ᐊ ᑎᑯᓂᔨᒂ ᑕᓐ ᑲ ᐃᓯ ᒥᒋᐱᔨᐃᔅᒃ ᒪᒃ ᐊ ᑎᑯᓂᔨᒂ ᐊ ᐃᓯ ᒥᓯᓇᐊᒪᔅᒃ ᓂᔾ ᓂᑭ ᒥᔪᐱᔨᑕᓐ᙮ 19ᐊᑯ ᒪᒃ ᓂᔾ ᑎᐱᔨᐛ ᐊ ᐃᑎᓯᓇᐃᒐᔭᓐ, ᓂᔾ ᑈᓪ, ᒋᑭ ᐱᑯᒥᓯᓇᐊᒪᑎᓐ᙮ ᓇᒪ ᒋᐸ ᐅᒋ ᓂᑐᐛᔨᑕᑯᓐ ᒐᒋ ᒋᔅᒋᓱᒥᑕᓐ ᐊ ᒥᓯᓇᐊᒧᔨᓐ ᒋᔾ ᑎᐱᔨᐛ ᒋᐱᒪᑎᓯᐅᓐ᙮ 20ᐊᑯ ᒪᒃ ᐊ ᓴᒋᐃᑦ ᐅᑎᐸᔨᒋᒐᐤ, ᓂᐧᑲᓂᔅ, ᒋ ᐱᑯᓴᔨᒥᑎᓐ ᒐᒋ ᐃᑐᑎᒥᓐ ᐅ ᑲ ᐃᓯ ᑯᒂᒋᒥᑕᓐ ᒐᒋ ᐃᑎᔨᓐ᙮ ᓇᔅᒡ ᒋᑭ ᒥᔽᔨᑎᒥᐃᓐ ᐃᑐᑎᒥᓇ ᑕᓐ ᑲ ᐃᓯ ᑯᒂᒋᒥᑕᓐ᙮
21ᓂ ᒐᔅᑎᓇᐅᓐ ᒪᒃ ᑕᑈ ᒐ ᐃᑐᑎᒥᓐ ᒥᓯᐛ ᐅ ᑲ ᐃᓯ ᐊᔨᒧᑎᒪᑕᓐ ᒐᒋ ᐃᑎᔨᓐ᙮ ᓂ ᒐᔅᑎᓇᐅᓐ ᑭᔭ ᐊᔪᐛᒃ ᐃᔭᐱᒡ ᒐ ᐃᑐᑎᒥᓐ᙮
22ᒥᓐ ᑯᑎᒡ ᒐᒂᓐ ᑲ ᐎ ᑯᒂᒋᒥᑕᓐ ᒐᒋ ᐃᑐᑎᒧᔨᓐ᙮ ᒋᐸ ᒋ ᐊᔭᔅᑯᔅᑎᒧᐅᓐ ᐸᐃᒄ ᑲᐱᔅᒋᒐᔭᒡ ᐊᓐᑕ ᒋᒋᒡ᙮ ᐛᔅ ᓂ ᐱᑯᓴᔨᒪᐤ ᒋᓴᒪᓂᑐᐤ ᒐᒋ ᓇᐃᐱᔨᑐᐅᑦ ᐎᐱᒡ ᒐᒋ ᓂᑐᐛᐱᒥᑎᑯᒡ ᒧᔭᒻ ᐊ ᐃᓯ ᓂᑐᑎᒧᐛᒄ᙮
ᐛᒋᔭᒧᐛᐅᓐ
23ᒋ ᐎᒐᐛᑭᓄᐤ ᐊᐸᑉᕋᔅ ᑭᔭ ᐎᔾ ᑕᐤ ᐅᑕ ᑲᒪᑯᓄᐛᓯᐅᒋᐛᐱᒡ ᐊᓂᔭ ᐅᒋ ᐊᒋ ᐊᔨᒧᒪᑦ ᒋᓴᓴ᙮ ᒋ ᐛᒋᔭᒥᑯᐛᐤ ᑭᔭ ᐎᔾ᙮ 24ᒋ ᐛᒋᔭᒥᑯᐛᐅᒡ ᑭᔭ ᒪᕐᒃ, ᐊᕆᔅᑕᕐᑲᔅ, ᑎᒪᔅ ᑭᔭ ᓗᒃ᙮ ᑭᔭ ᐎᔨᐛᐤ ᐅᒡ ᐊᑐᔅᑯᐛᐅᒡ ᐅᑎᐸᔨᒋᒐᐛ᙮
25ᓂ ᓂᑐᑎᒪᓐ ᐅᑎᐸᔨᒋᒐᐤ ᒋᓴᔅ ᙭ ᒥᓯᐛ ᒐᒋ ᓱᐛᔨᒥᑕᒄ᙮ ᐊᒥᓐ᙮
Currently Selected:
ᐸᐃᓕᒪᓐ 1: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
