ᒪᑎᔪᐤ 9
9
ᒋᓴᔅ ᑲ ᒥᓏᒋᐊᑦ ᐊᑲ ᐊᒋᔨᒋ ᓇᐸᐛ
ᒪᕐᒃ 2.1-12; ᓗᒃ 5.17-26
1ᐊᑯ ᒋᓴᔅ ᑈᓯᑦ ᐅᐤᑎᔪᐤ ᒂ ᐊᓱᐊᒡ ᐊᓂᔭ ᓴᑲᐃᑭᓂᔪᐤ, ᐊᓐᑕ ᐅᑕᓇᔪᐤ ᑲ ᐎᒋᑦ ᐊᑯᑕ ᑲ ᐃᔅᒋᒪᒡ᙮ 2ᐃᔪᒡ ᒪᒃ ᒋ ᐸᑐᐛᐅᒡ ᒋᓴᓴ ᐊᑲ ᐊᒋᔨᒋ ᓇᐸᐛ ᓂᐸᐅᓂᒡ ᐊ ᐱᒥᓯᓂᔨᒋ᙮ ᐃᔅᐱ ᒋᓴᔅ ᒐᔅᒐᔨᑎᒺᑦ ᐊᔅᐱᔅ ᒥᔅᑎ ᑕᑈᔭᔨᑎᒥᔨᒋ ᐃᔪᐛ ᒋ ᐃᑕᐤ ᐊᓂᔭ ᓇᐸᐛ, “ᒧᒋᒐᔨᑕ ᓂᑯᓴ, ᒋ ᐛᐸᔨᑎᒪᑯᐅᓐ ᒋᒥᒋᑥᐅᓇ᙮”
3ᐊᑯ ᐊᓐᒡ ᐊᓐᑕ ᑲ ᑕᒡ ᐎᓱᐛᐅᓂᔪᐤ ᑲ ᒋᔅᑯᑎᒪᒐᒡ ᒋ ᐃᑎᑎᓱᐅᒡ, “ᐸᔅᑕᒧᐤ ᐅ ᓇᐸᐤ᙮”
4ᒋᓴᔅ ᒪᒃ ᒋᔅᒐᔨᒪᐤ ᑕᓐ ᐊ ᐃᓯ ᒪᒥᑐᓇᔨᑎᒥᔨᒋ ᐊᑯ ᐊᑕᑦ, “ᑕᓇᒡ ᐛᒋ ᒥᒋ ᒪᒥᑐᓇᔨᑎᒪᒄ ᒋᑕᔪᐛᒡ ? 5ᑕᓐ ᐊᔪᐛᒃ ᐛᒋ ᐛᑎᒡ ᒐᒋ ᐃᔅᒋᔄᔭᓐ, ‘ᒋ ᐛᐸᔨᑎᒪᑯᐅᓐ ᒋᒥᒋᑥᐅᓇ,’ ᑭᔭ ᒪᒃ ᒐᒋ ᐃᓇᓄᐅᒡ, ‘ᐱᓯᑯ, ᐱᒧᑕ ᒪᒃ’ ? 6ᒥᒄ ᒋᑭ ᐛᐸᑎᔨᑎᓇᐛᐤ ᐃᔪᐤ ᐅᑯᓯᓴᓐ ᑕᑈ ᐎᔾ ᐊᔭᑦ ᑎᐸᔨᒋᒐᐅᓂᔪᐤ ᐅᑕ ᐊᔅᒋᒡ ᒐᒋ ᐛᐸᔨᑎᒪᒐᑦ ᒥᒋᑥᐅᓇ,” ᐊᑯ ᐊᑕᑦ ᐊᓂᔭ ᐊᑲ ᐊᒋᔨᒋ ᓇᐸᐛ, “ᐱᓯᑯ, ᐅᑎᓇ ᒋᑦ ᐊᔅᐱᓯᒧᓐ, ᒐ ᒋᐛᔨᓐ᙮”
7ᒋ ᐱᓯᑯᐤ ᒪᒃ ᐊᓐ ᓇᐸᐤ, ᑭᔭ ᒂ ᒋᐛᑦ᙮ 8ᐃᔅᐱ ᒪᒃ ᐊᓐᒡ ᐃᔪᒡ ᐊᓐᑕ ᑲ ᑕᒡ ᒋ ᒥᔅᑲᑕᔭᔨᑎᒧᒡ ᐎᔭᐸᑕᒡ ᑕᓐ ᑲ ᐃᔅᐱᔨᒡ ᑭᔭ ᒋ ᒪᒥᒋᒪᐅᒡ ᒋᓴᒪᓂᑐᐛ ᐊᒋ ᒥᔭᔨᒋ ᐃᔪᐛ ᐅᔭ ᐃᓯ ᑭᔅᒋᐅᓂᔪᐤ᙮
ᒋᓴᔅ ᑲ ᐎᓴᒪᑦ ᒪᑎᔪᐛ ᒐᒋ ᓇᓴᐅᑯᑦ
ᒪᕐᒃ 2.13-17; ᓗᒃ 5.27-32
Matthew 9.9-13; 18-26 (Proper-5 Year A)
9ᐊᑯ ᒋᓴᔅ ᒂ ᔅᑐᑕᑦ ᐊᓐᑕ ᐅᒋ, ᒪᒂᒡ ᒪᒃ ᐊ ᐊᑎ ᐱᒧᑕᑦ, ᒋ ᐛᐱᒪᐤ ᓇᐸᐛ ᐊᐱᔨᒋ ᒥᓯᓇᐃᒐᐅᒋᐛᐱᒡ ᒪᑎᔪᐤ ᐊ ᐃᓯᓂᐧᑲᓱᔨᒋ, ᒋᓴᐅᒋᒪᐤ ᓱᓇᔭᔪᐤ ᑲ ᒪᒧᓴᒋᓂᒥᔨᒋ ᐊᒋ ᐃᑕᐱᑎᓯᔨᒋ᙮ ᐊᑯ ᒋᓴᔅ ᐊᑕᑦ, “ᐸᒋ ᓇᓴᐎ᙮” ᐊᑯ ᒪᑎᔪᐤ ᒂ ᐱᓯᑯᑦ, ᒂ ᐊᑎ ᐎᒐᐛᑦ ᒋᓴᓴ᙮
10ᒪᒂᒡ ᒪᒃ ᒋᓴᔅ ᑲ ᒥᒋᓱᑦ ᐊᓐᑕ ᒪᑎᔪᐛ ᐎᒋᔨᒡ, ᒥᒐᑦ ᑯᑎᑭᒡ ᒋᓴᐅᒋᒪᐤ ᓱᓇᔭᔪᐤ ᑲ ᒪᒧᓴᒋᓇᒡ ᑲ ᐃᑕᐱᑎᓯᒡ ᑭᔭ ᑯᑎᑭᒡ ᐊᐛᓐᒋ ᑲ ᒥᒐᑎᓯᒡ ᒋᐸ ᒋ ᑎᑯᓯᓄᐅᒡ ᑭᔭ ᒂ ᐎᒋᒥᒋᓱᒪᒡ ᒋᓴᓴ ᑭᔭ ᐊᓂᔭ ᐅᒋᔅᒋᓄᐊᒧᐛᑭᓂᔪᐛ᙮ 11ᐱᔅᒐ ᒪᒃ ᐸᕆᓯᔨᒡ ᒋ ᐛᐱᒪᐅᒡ ᐅᔭ ᐊᑯ ᒂ ᐃᑕᒡ ᐊᓂᔭ ᒋᔅᒋᓄᐊᒧᐛᑭᓇ, “ᒐᒂᓂᔪᐤ ᐛᒋ ᐎᒋᒥᒋᓱᒪᑦ ᒋ ᑲᒋᔅᑯᑎᒪᒐᓯᒧᐛᐤ ᐊᓂᔭᔪᐛ ᒋᓴᐅᒋᒪᐤ ᓱᓇᔭᔪᐤ ᑲ ᒪᒧᓴᒋᓂᒥᔨᒋ ᑭᔭ ᐊᓂᔭᔪᐛ ᑲ ᒥᒐᑎᓯᔨᒋ ?”
12ᒋᓴᔅ ᒪᒃ ᒋ ᐸᑐᐛᐤ ᐅᔭ ᑲ ᐃᔅᒋᔄᔨᒋ ᐊᑯ ᐊᑕᑦ, “ᓇᒪ ᓂᑐᐛᔨᒪᐅᒡ ᓂᑐᐧᑯᐃᔨᓴ ᐊᓐᒡ ᐊᐛᓐᒋ ᐊᑲ ᐊᐧᑯᓯᒡ, ᒥᒄ ᐊᓐᒡ ᑲ ᐊᐧᑯᓯᒡ᙮ 13ᓇᓂᑐ ᒋᔅᒐᔨᑎᒧᒄ ᒪ ᑲ ᐃᑎᔅᑕᒡ ᒋᒋᒥᓯᓇᐃᒐᐅᓐ, ‘ᒋᓴᐛᑎᓯᐅᓐ ᐊᐅᒄ ᓇᑐᐛᔨᑎᒪᓐ, ᓇᒪᔭᐤ ᐊ ᒥᑐᔅᑕᐊᒪᓄᐅᒡ ᒐᒂᓐ᙮’ ᓇᒪᔭᐤ ᐅᒡ ᑲ ᑯᐃᔅᑯᑕᑎᓯᒡ ᐛᒋ ᑎᑯᓯᓂᔭᓐ᙮ ᓂᒋ ᑎᑯᓯᓐ ᒐᒋ ᐎᓴᒥᒂᐤ ᐅᒥᒋᑥᐅᒡ ᒐᒋ ᒂᔅᑲᑎᓯᒡ᙮”
ᐊᑲ ᐅᑎᓇᐧᒃ ᐊᐛᓐ ᒥᒋᒥᔪᐤ ᒥᒄ ᒐᒋ ᐊᔭᒥᐊᑦ
ᒪᕐᒃ 2.18-22; ᓗᒃ 5.33-39
14ᐊᑯ ᒠᓐ ᐅᓯᑲᐃᑕᒐᐤ ᐅᒋᔅᒋᓄᐊᒧᐛᑭᓇ ᑲ ᐸᒋ ᓂᑐᐛᐱᒪᒡ ᐊᓂᔭ ᒋᓴᓴ ᐊᑯ ᐊᑕᒡ, “ᐊᓯᑯᒻ ᐊᑯᓐ ᐊ ᑎᔭᒡ ᓂᔭᓐ ᑭᔭ ᐊᓐᒡ ᐸᕆᓯᔨᒡ ᐊᑲ ᒥᒋᓱᔭᒡ᙮ ᒐᒂᔪᐤ ᒪᒃ ᐛᒡ ᐊᑲ ᐃᑎᒡ ᐎᔨᐛᐤ ᒋᒋᔅᒋᓄᐊᒧᐛᑭᓐᒡ ᐊ ᐊᑲ ᒥᒋᓱᒡ ?”
15ᒋᓴᔅ ᒪᒃ ᒋ ᐃᑕᐤ, “ᒧᔭᒻ ᐊ ᓂᐳᐅᓇᓄᐅᒡ, ᓇᒪ ᒥᒐᔨᑎᒧᒡ ᐊᓐᒡ ᑲ ᐎᓴᒪᑭᓄᐎᒡ ᒪᒂᒡ ᐊᓐᑕ ᐊ ᑕᔨᒋ ᐊᓂᔭ ᑲ ᐅᔅᒋ ᓂᐳᔨᒋ᙮ ᐊᐅᑯᓐ ᒪᒃ ᐊᓯᓇᒂᒡ ᒪᒂᒡ ᐅᑕ ᐊ ᑕᔭᓐ ᐊᓐᒡ ᒋᔅᒋᓄᐊᒧᐛᑭᓐᒡ ᐊ ᑕᒡ ᒥᒄ ᒪᒃ ᐃᔅᐱ ᐅᑎᒋᐱᔨᒐ ᒐ ᐸᒋ ᐅᑎᓂᑯᔭᓐ ᐊᓐᑕ ᐊ ᑕᒡ ᐅᒋ, ᐊᑯ ᒪᒃ ᐃᔭᒄ ᒐ ᐃᑎᒡ ᐊᓯᑯᒻ ᐊ ᐊᑲ ᒥᒋᓱᒡ ᐊᓐᒡ ᒋᔅᒋᓄᐊᒧᐛᑭᓐᒡ᙮”
16“ᓇᒪ ᐊᐛᓐ ᒥᓴᐃᑲᒐᐤ ᐊ ᐅᔅᑲᔨᒡ ᐱᒍᐎᔭᓂᔪᐤ ᐊᓐᑕ ᒐᔭᔅ ᐊᐱᒋᑕᐅᓂᒡ, ᐊ ᐅᔅᑲᔨᒡ ᐱᒍᐎᔭᓂᔪᐤ ᐊᐱᒋᑕᒐ, ᒋᑭ ᐅᑕᐸᐛᔪᐤ ᑭᔭ ᐊᔭᔅᒃ ᒋᑭ ᐱᑯᐱᔪᐤ ᐊᓐ ᐊᐱᒋᑕᐅᓐ᙮ 17ᑭᔭ ᓇᒪ ᐊᐛᓐ ᐱᑕᐸᐅᑕᐤ ᐅᔅᒋ ᓱᒥᓇᐳᔪᐤ ᐊᓐᑕ ᒐᔭᔅ ᐎᒂᒡ ᐃᔅ᙮ ᐛᔅ ᐊᓐᑕ ᐃᓯ ᐱᑕᐸᐅᑕᒐ ᐊᓂᔭ ᐅᔅᒋ ᓱᒥᓇᐳᔪᐤ ᐃᔅᐱ ᒪᒃ ᐊᐛᔅᑲᔭᒍᐅᓂᔨᒐ, ᒋᑭ ᐸᐧᑲᐱᔪᐤ ᐊᓂᔭ ᐎᒂᔪᐤ᙮ ᐊᑯ ᒪᒃ ᓇᒪ ᒋᑭ ᐅᒋ ᐊᔭᐤ ᓱᒥᓇᐳᔪᐤ ᑭᔭ ᓇᒪ ᒋᑭ ᐅᒋ ᐃᓯᓇᑯᓂᔪᐤ ᒥᓐ ᒐᒋ ᐊᐱᒋᑕᑦ ᐊᓂᔭ ᐎᒂᔪᐤ᙮ ᐅᔅᒋ ᐎᒂᒡ ᐊᓐᑕ ᐱᑕᐸᐅᑕᑭᓄᐤ ᐅᔅᒋ ᓱᒥᓇᐳᔾ ᐊᑯ ᒪᒃ ᑕᐱᔅᑯᓐ ᑲᓄᐛᔨᑕᑭᓄᐅᒡ᙮”
ᐃᔎᔅ ᑲ ᐅᓂᔅᑲᓇᑭᓄᐅᑦ ᓂᐳᐅᓂᒡ ᐅᒡ ᑭᔭ ᐃᔎᐤ ᑲ ᑕᒋᓂᒺᑦ ᒋᓴᓴ ᐅᑦ ᐊᑯᐱᔪᐤ
ᒪᕐᒃ 5.21-43; ᓗᒃ 8.40-56
Matthew 9.9-13,18-26 (Proper-5 Year A)
18ᒪᒂᒡ ᒪᒃ ᐅᔭ ᒋᓴᔅ ᑲ ᐃᑕᑦ, ᒋ ᐸᒋ ᓇᑎᑯᐤ ᐸᐃᒄ ᐅᒋᒪᐛ, ᒋ ᐸᒋ ᐅᒋᒋᐧᑯᓂᐱᔨᔅᑕᑯᐤ ᒪᒃ ᐊ ᐃᑎᑯᑦ, “ᒋ ᐳᓂᐱᒪᑎᓯᐤ ᓂᑕᓂᔅ ᐊᓄᒡ, ᐸᒋ ᓴᒥᓐ, ᐊᑯ ᒪᒃ ᒐ ᐱᒪᑎᓯᑦ᙮”
19ᐊᑯ ᒋᓴᔅ ᒂ ᐱᓯᑯᑦ, ᒂ ᐎᒐᐛᑦ ᐊᓂᔭ ᐅᒋᒪᐛ, ᐅᒋᔅᒋᓄᐊᒧᐛᑭᓇ ᑭᔭ ᒋ ᐎᒐᐅᑯᐤ᙮
20ᒋ ᑕᔪᐛ ᒪᒃ ᐊᓐᑕ ᐃᔎᐛ ᐊᒋ ᓂᑭᑎᑯᔨᒋ ᐅᒥᐧᑯᔪᐤ ᐃᔅᐱᔅ ᓂᓱᓴᑉ ᐱᐳᓇ, ᐅᔅᐱᔅᑯᓂᒡ ᒋ ᐸᒋ ᓇᑎᑯᐤ ᒋᓴᔅ, ᒂ ᑕᒋᓂᒥᔨᒋ ᐊᓐᑕ ᐊ ᐅᓂᔎᑭᓂᔨᒡ ᐊᓂᔭ ᐅᑦ ᐊᑯᑉ᙮ 21ᐛᔅ ᒋ ᐃᑕᔨᑎᒻ ᐊᓐ ᐃᔎᐤ, “ᐊᑎ ᒥᒄ ᑕᒋᓂᒧᒐ ᐅᑦ ᐊᑯᑉ, ᓂᑭ ᒥᓏᒋᐃᑯᐅᓐ᙮” ᐊᑯ ᒂ ᑕᒋᓂᒺᑦ ᐊ ᐅᓂᔎᑭᓂᔨᒡ ᐅᑦ ᐊᑯᐱᔪᐤ᙮
22ᐊᑯ ᒋᓴᔅ ᑲ ᒂᔅᒋᑲᐳᐅᑦ, ᐃᔅᐱ ᒪᒃ ᐎᔭᐱᒪᑦ ᐊᓂᔭ ᐃᔎᐛ ᐊᑯ ᐊᑕᑦ, “ᒥᔽᔨᑕ ᓂᑕᓂᔅ, ᒋᑕᑈᔭᔨᑎᒧᐅᓐ ᒋ ᒥᓏᒋᐃᑯᓐ᙮” ᑎᐛᒡ ᒪᒃ ᒋ ᒥᓏᑎᓯᐤ ᐊᓐ ᐃᔎᐤ ᐊᓂᔭ ᑲ ᐃᑕᔅᐱᓇᑦ᙮
23ᐃᔅᐱ ᒋᓴᔅ ᑲ ᐱᒐᐛᑦ ᐅᒋᒪᐛ ᐎᒋᔨᒡ, ᒋ ᐛᐱᒪᐤ ᐊᓂᔭ ᒋᑐᒐᐎᔪᐛ ᑭᔭ ᐃᔪᐛ ᐊ ᓂᓇᐧᑲᑥᐅᑎᒥᔨᒋ᙮ 24ᒋ ᐃᑕᐤ, “ᒥᓯᐛ ᔅᑐᑕᒄ, ᑕᐸ ᓂᐳᐤ ᐅ ᐃᔎᔅ ᒥᒄ ᐛᔅ ᐊᓐ ᓂᐸᐤ᙮” ᐊᑯ ᐛᓯᓄᐛᒡ ᐊᓂᔭ ᐊ ᐃᔅᒋᔄᔨᒋ ᐊ ᒪᔭᔨᒪᒡ᙮ 25ᐃᔅᐱ ᒪᒃ ᒥᓯᐛ ᐃᔪᒡ ᑲᒋ ᐎᐎᑎᓴᐛᑭᓄᐎᒡ, ᐊᑯ ᒋᓴᔅ ᒂ ᐱᒐᐛᑦ ᐊᓂᔭ ᐃᔎᓴ ᐅᑲᐱᔅᒋᒐᔭᒥᔪᐤ, ᒂ ᐅᑎᓂᒺᑦ ᐅᑎᒋᔪᐤ ᐊᑯ ᒪᒃ ᐛᓂᑦ ᐊᓐ ᐃᔎᔅ᙮ 26ᒋ ᐊᔨᒧᑕᑭᓄᐤ ᐊᓐᑕ ᐊᔅᒋᒡ ᐅ ᑲ ᐃᔅᐱᔨᒡ᙮
ᒋᓴᔅ ᒥᓏᒋᐊᐤ ᓂᓱ ᓇᐸᐛ ᐊᑲ ᐛᐸᑎᒥᔨᒋ
27ᐃᔅᐱ ᒪᒃ ᒋᓴᔅ ᑲ ᔅᑐᑕᑦ ᐊᓐᑕ ᐅᒡ, ᓂᓱ ᓇᐸᐛ ᐊᑲ ᐛᐸᑎᒥᔨᒋ ᒋ ᓇᓴᐅᑯᐤ ᐊ ᑕᑈᔨᒋ ᐊ ᐃᔅᒋᔄᔨᒋ, “ᑎᐱᑦ ᐛᑯᓯᓯᒥᔅᒃ, ᐸᒋ ᒋᔅᑎᒪᒐᔨᒥᓇᓐ᙮”
28ᐃᔅᐱ ᒪᒃ ᒋᓴᔅ ᑲ ᐱᒐᑦ ᒥᒋᐛᐱᔪᐤ, ᒋ ᐸᒋ ᓇᑎᑯᐤ ᐊᓂᔭ ᐊᑲ ᐛᐸᑎᒥᔨᒋ ᓇᐸᐛ, ᐊᑯ ᒋᓴᔅ ᐊᑕᑦ, “ᒋ ᑕᑈᑕᓇᐛᐤ ᐊ ᐊ ᑭᔅᒋᑕᔭᓐ ᒐᒋ ᒥᓏᒋᐃᑎᑯᒡ ?” ᐊᑯ ᐊᑎᑯᑦ, “ᓂᐦᐃ, ᑎᐸᔨᒋᒐᓱᐤ᙮”
29ᐊᑯ ᒋᓴᔅ ᒂ ᑕᒋᓂᒺᑦ ᐊᓂᔭ ᐅᔅᒋᓯᑯᔪᐛ, ᐊ ᐃᑕᑦ, “ᑕᓐ ᐊᓐ ᐊ ᐃᓯ ᑕᑈᔭᔨᑎᒪᒄ ᐊᑯᓐ ᒐ ᐃᓯ ᐃᑐᑎᒪᑯᔭᒄ᙮” 30ᒋ ᒥᓏᒋᐊᑭᓄᐅᒡ ᒪᒃ ᐊᑯ ᒂ ᐛᐸᑕᒡ᙮ ᐊᑯ ᒋᓴᔅ ᐊᑎᓱᒪᑦ ᒐ ᐊᑲ ᐎᑎᒧᐛᔨᒋ ᐊᐛᔪᐛ᙮
31ᓇᒪ ᒪᒃ ᐅᒋ ᑕᑈᑐᐛᐅᒡ, ᐃᔭᐱᒡ ᒋᑎᐸᒋᒪᐅᒡ ᒋᓴᓴ ᒥᓯᐛ ᐊᓐᑕ ᐊᔅᒋᒡ᙮
ᒋᓴᔅ ᒥᓏᒋᐊᐤ ᓇᐸᐛ ᐊᑲ ᐃᔨᒥᔨᒋ
32ᐃᔅᐱ ᒪᒃ ᐊ ᐊᑎ ᔅᑐᑕᒡ ᐊᓐᒡ ᓇᐸᐅᒡ, ᐱᔅᒐ ᐊᐛᓐᒋ ᒋ ᐸᑐᐛᐅᒡ ᒋᓴᓴ ᓇᐸᐛ ᐊᑲ ᓂᑕᐛᔨᒋ ᐊ ᐱᒋᔅᑲᑯᔨᒋ ᒥᒋ ᐊᒐᒂ᙮ 33ᐃᔅᐱ ᒪᒃ ᒋᓴᔅ ᑲ ᐎᐎᑎᓴᐛᑦ ᐊᓂᔭ ᒥᒋ ᐊᒐᒂ, ᐊᑯ ᒂ ᐃᔨᒥᑦ ᐊᓐ ᓇᐸᐤ ᐊᑲ ᐅᒋ ᓂᑕᐛᑦ᙮ ᒥᓯᐛ ᒪᒃ ᐊᐛᓐᒋ ᒋ ᒥᔅᑲᑕᔨᑎᒧᒡ ᐅᔭ ᑲ ᐃᔅᐱᔨᒡ᙮ ᐊ ᐃᔅᒋᔄᒡ ᒪᒃ, “ᓇᒪ ᓂᑕ ᓂ ᐅᒋ ᐛᐸᑕᓇᓐ ᒪᒥᔅᑲᒡ ᒐᒂᓐ ᐊ ᐃᔅᐱᔨᒡ ᐅᑕ ᐃᔅᕋᐃᓕᒡ᙮”
34ᒥᒄ ᒪᒃ ᐊᓐᒡ ᐸᕆᓯᔨᒡ ᒋ ᐃᔅᒋᔄᐅᒡ, “ᐛᔅ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᒥᒋ ᐊᒐᒂ ᐊᔪᑯᓐ ᐊᓂᔭ ᒪᔨᑯᑦ ᓱᐧᑲᑎᓯᐅᓂᔪᐤ ᒐᒋ ᐎᐎᑎᓴᐛᑦ ᒥᒋ ᐊᒐᒂ᙮”
ᒋᓴᔅ ᑲ ᒋᔅᑎᒪᒐᔨᒪᑦ ᐃᔪᐛ᙮
Matthew 9.35-10.8 (Proper-6 Year A)
35ᒋᓴᔅ ᒪᒃ ᒥᓯᐛ ᐊᓐᑕ ᐅᑕᓇᒡ ᑭᔭ ᐃᑕᐅᓂᓯᒡ ᒋ ᐃᑐᑕᐤ, ᐊᔅᑯᑎᒪᒐᑦ ᒍᐤ ᐊᔭᒥᐊᐅᒋᐛᐱᒡ, ᑭᔭ ᐊ ᑭᒐᔅᒋᒧᑦ ᐊ ᐛᐎᑕᐧᒃ ᒥᔽᒋᒧᐅᓂᔪᐤ ᐊ ᐊᔨᒧᑕᐧᒃ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ, ᑭᔭ ᐊ ᒥᓏᒋᑕᑦ ᒥᓯᐛ ᐃᓯ ᐊᐧᑯᓱᐅᓇ ᑭᔭ ᓂᓇᐧᑯᐤ ᐊ ᐃᑕᔅᐱᓇᔨᒋ ᐃᔪᐛ᙮ 36ᐃᔅᐱ ᒪᒃ ᐎᔭᐱᒪᑦ ᐊᓂᔭ ᒥᒐᑦ ᐃᔪᐛ, ᓇᔅᒡ ᒋ ᒋᔅᑎᒪᒐᔨᒪᐤ ᐛᔅ ᓇᔅᒡ ᐊ ᒥᑯᔅᑲᑕᔨᑎᒥᐊᑭᓄᔨᒋ ᑭᔭ ᐊᑲ ᐊᔭᔨᒋ ᐊᔅᐸᔨᒧᐅᓂᔪᐤ, ᒧᔭᒻ ᒪᔭᑕᓂᓯᒡ ᐊ ᐃᓯᓇᑯᓯᒡ ᐊᑲ ᐊᔭᐛᒡ ᒪᔭᑕᓂᓯᐅ-ᐃᔪᐛ ᒐ ᑭᓄᐛᔨᒥᑯᒡ᙮ 37ᐊᑯ ᐊᑕᑦ ᐊᓂᔭ ᐅᒋᔅᒋᓄᐊᒧᐛᑭᓇ, “ᐛᔪᑎᓇ ᐊᒋ ᐃᓯ ᓂᑕᐅᒋᒋ ᓂᑕᐅᒋᑕᑭᓇ ᒥᒄ ᒪᒃ ᓇᒪ ᒥᒐᑐᐅᒡ ᐊᓐᒡ ᒐ ᒪᒧᓴᒋᓇᒡ᙮ 38ᐊᔭᒥᐊᒄ, ᓂᑐᑎᒧᐛᐧᒄ ᑲ ᑎᐸᔨᑕᐧᒃ ᐅᔭ ᑲᒋ ᐃᓯ ᓂᑕᐅᒋᓂᔨᒋ ᓂᑕᐅᒋᑕᑭᓇ ᒐᒋ ᐃᑎᓴᐛᑦ ᒥᒐᑦ ᐊᐛᔪᐛ ᐊᓐᑕ ᒐ ᐃᓯ ᒪᐅᒋᑕᑭᓄᐎᒋ᙮”
Currently Selected:
ᒪᑎᔪᐤ 9: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada