ᒪᑎᔪᐤ 8
8
ᒋᓴᔅ ᑲ ᒥᓏᒋᐊᑦ ᓇᐸᐛ ᑲ ᐅᒥᒋᐛᔅᐱᓇᔨᒋ
ᒪᕐᒃ 1.40-45; ᓗᒃ 5.12-16
1ᐃᔅᐱ ᒪᒃ ᒋᓴᔅ ᐱᔭᒋ ᓂᑕᒥᒋᐛᑦ ᐱᔅᑯᑎᓇᔪᐤ, ᒥᒐᑦ ᐊᐛᔪᐛ ᒋ ᓇᓴᐅᑯᐤ᙮ 2ᒋ ᐸᒋ ᓇᑎᑯᐤ ᓇᐸᐛ ᑲ ᒪᔭᑎᓂᔨᒡ ᐅᒥᒋᐛᔅᐱᓇᐅᓂᔪᐤ ᐊᔭᔨᒋ, ᒂ ᐅᒋᒋᐧᑯᓂᐱᔪᐅᔨᒋ ᐊᓐᑕ ᐅᑎᔅᑯᐤ ᐊ ᑕᑦ, ᐊᑯ ᐊᑎᑯᑦ, “ᐅᑎᐸᔨᒋᒐᐤ, ᐎ ᐸᒋ ᐎᒋᐃᔨᓇ, ᒋᑭ ᒋ ᐃᑐᑕᓐ ᒐᒋ ᐸᔭᒋᓯᔭᓐ᙮”
3ᒋᓴᔅ ᒪᒃ ᒋ ᓱᐅᓂᔅᒐᔪᐤ, ᒋ ᑕᒋᓇᐤ ᐊ ᐃᑕᑦ, “ᒋ ᐎ ᐎᒋᐃᑎᓐ᙮ ᐸᔭᒋᓯ ᒪᒃ᙮” ᑎᐛᒡ ᒪᒃ ᒋ ᒥᓏᑎᓯᐤ ᐊᓐ ᓇᐸᐤ ᐊᓂᔭ ᑲ ᐃᑕᐧᑯᓯᑦ᙮ 4ᐊᑯ ᒋᓴᔅ ᐊᑕᑦ, “ᐊᑲᐎᔾ ᐊᐛᓐ ᒋᑭ ᐅᒋ ᐎᑎᒧᐛᐤ ᑕᓐ ᑲ ᐃᔅᐱᔨᓐ, ᔅᑐᑕ ᒪᒃ, ᑎᐛᒡ ᓂᑐᐛᐱᒻ ᐊᔭᒥᐊᐅᒋᒪᐤ ᓇᔅᒡ ᒐ ᓇᓂᑐ ᒋᔅᒐᔨᒥᔅᒃ᙮ ᐊᑯ ᒐ ᐱᔅᑎᓂᒥᓐ ᐊᓐ ᒥᔨᐛᐅᓐ ᒋᐸ ᐱᔅᑎᓇᓐ ᐊᓂᔭ ᒧᓱᔅ ᑲ ᐃᑎᓱᐛᑦ ᒋᐸ ᐱᔅᑎᓇᑭᓄᐅᔪᐤ᙮ ᐊᑯᑕ ᒐ ᐅᒋ ᐛᐸᑎᔨᐛᔨᓐ ᑕᑈ ᐊᑯ ᐊ ᒥᓏᑎᓯᔨᓐ᙮”
ᒋᓴᔅ ᑲ ᒥᓏᒋᐃᒪᑦ ᐊᓯᒪᑭᓂᓴ ᑲ ᓂᑲᓂᔅᑯᐛᔨᒋ ᐅᑦ ᐊᐱᒋᐊᑭᓂᔪᐛ
ᓗᒃ 7.1-10
5ᐃᔅᐱ ᒋᓴᔅ ᑕᑯᓯᐧᒃ ᐊᓐᑕ ᑲᐳᕐᓇᐊᒥᒡ, ᒋ ᓇᑎᑯᐤ ᓇᐸᐛ ᑲ ᓂᑲᓂᔅᑯᐛᔨᒋ ᐊᓯᒪᑭᓂᓴ ᐊ ᐱᑯᓴᔨᒥᑯᑦ ᒐᒋ ᐎᒋᐊᑦ᙮ 6ᐊ ᐃᑎᑯᑦ, “ᐅᑎᐸᔨᒋᒐᐤ, ᓂᑦ ᐊᐱᒋᐊᑭᓐ ᐱᒥᓯᓐ ᓂᒋᒡ ᐊᐧᑯᓯᑦ ᐊᑲ ᒋ ᐊᑎᓂᓱᑦ ᑭᔭ ᓇᔅᒡ ᐊ ᐛᐎᓯᒐᔨᑎᒥᐃᑯᑦ᙮”
7ᐊᑯ ᒋᓴᔅ ᐊᑕᑦ, “ᓂᑭ ᐸᒋ ᒥᓏᒋᐊᐤ᙮”
8ᐊᑯ ᐊᓯᒪᑭᓂᓯᐤ ᐅᒋᒪᐤ ᐊᑕᑦ ᐊᓂᔭ ᒋᓴᓴ, “ᐅᑎᐸᔨᒋᒐᐤ, ᓇᒪ ᓂ ᒋᔅᑕᔨᑕᑯᓯᓐ ᒐᒋ ᐸᒋ ᐱᒐᔨᓐ ᓂᒋᒡ᙮ ᒥᒄ ᒪᒃ ᐃᔅᒋᔄ ᒐᒋ ᒥᓏᑎᓯᑦ, ᐊᑯ ᑭᔭ ᒐ ᒥᓏᑎᓯᑦ ᓂᑦ ᐊᐱᒋᐊᑭᓐ᙮ 9ᓂᔾ ᑭᔭ ᑕᐅᒡ ᓄᒋᒪᒥᒡ ᐊ ᐱᓯᒋᐃᒂᐤ᙮ ᑭᔭ ᑕᐅᒡ ᐊᓯᒪᑭᓂᓯᒡ ᓂᔾ ᐊ ᐛᐎᓱᒥᒂᐤ᙮ ᐊ ᐃᑎᒃ ᒪᒃ ᐸᐃᒄ ᐊᓯᒪᑭᓂᔅ ‘ᓇᑕ ᐃᑐᑕ,’ ᑎᐛᒡ ᐊᑯᑕ ᐊ ᐃᑐᑕᑦ ᑭᔭ ᑯᑎᒃ ᒪᒃ ᐊ ᐃᑎᒃ, ‘ᐊᔅᑎᒻ,’ ᑎᐛᒡ ᑎᑯᓯᓄᐤ᙮ ᐊᑯ ᑭᔭ ᐊ ᐃᑎᒃ ᓂᑦ ᐊᐱᒋᐊᑭᓐ ‘ᐅ ᒪ ᐃᑐᑕ,’ ᐊᔪᐅᒄ ᐊᓂᔭ ᐊ ᐃᑐᑕᐧᒃ᙮”
10ᐃᔅᐱ ᒪᒃ ᒋᓴᔅ ᐱᔭᑐᐛᑦ ᐅᔭ ᐊ ᐃᔅᒋᔄᔨᒋ ᓇᔅᒡ ᑕᑈ ᒋ ᒥᔅᑲᑕᔨᑎᒥᐃᑯᐤ ᐅᑕᑈᑎᒧᐅᓂᔪᐤ᙮ ᐊᑯ ᐊᑕᑦ ᐊᓂᔭ ᐊᐛᔪᐛ ᑲ ᐎᒐᐅᑯᑦ, “ᑕᑈ ᒋᑦ ᐃᑎᓇᐛᐤ, ᓇᒪᐎᔾ ᐛᐛᒡ ᐅᑕ ᐃᔅᕋᐃᓕᒡ ᓂ ᐅᒋ ᐛᐱᒪᐤ ᐊᐛᓐ ᐊᔅᐱᔅ ᓱᒋᑕᑈᑕᐧᒃ᙮ 11ᒋ ᐎᑎᒪᑎᓇᐛᐤ ᒪᒃ, ᒥᒐᑦ ᐊᐛᓐᒋ ᐊᓐᒡ ᑲ ᑕᑈᔭᔨᒪᒡ ᒋᓴᒪᓂᑐᐛ ᒧᔭᒻ ᐊᑎᑦ ᐅ ᓇᐸᐤ, ᐛᐱᓄᑕᒡ ᑭᔭ ᐊᑎᒪᐱᓯᒧᒡ ᒋᑭ ᐅᑐᑕᐅᒡ ᒐ ᐎᑎᐱᒪᒡ ᐊᑉᕋᐊᒪ, ᐊᐃᓯᑲ ᑭᔭ ᒐᑭᐸ ᒥᒋᓱᓇᓄᔨᒐ ᒋᒋᒋᓯᒄ ᒋᓴᐅᒋᒪᐅᓂᒡ᙮ 12ᒥᒄ ᒪᒃ ᐊᓐᒡ ᑲ ᒥᓯᓇᓱᒡ ᒋᓴᐅᒋᒪᐅᓂᒡ ᒋᐸ ᐃᓯ ᐎᒋᐃᐛᐱᓐᒡ ᓇᒪ ᒋᑭ ᐅᒋ ᐱᑎᑲᐊᑭᓄᐅᒡ ᐊᓐᑕ᙮ ᐅᓂᑎᐱᔅᒋᓯᐅᓂᒡ ᒋᑭ ᐃᓯ ᐛᐱᓇᑭᓄᐎᒡ, ᐊᑯᑕ ᐊᓐᑕ ᒐ ᒪᒡ ᑭᔭ ᒐ ᒪᒥᑕᔭᐱᑕᓯᓂᒡ᙮”
13ᐊᑯ ᒋᓴᔅ ᐊᑕᑦ ᐊᓂᔭ ᐊᓯᒪᑭᓂᓯᐤ ᐅᒋᒪᐛ, “ᒋᐛ, ᐛᔅ ᑕᓐ ᑲ ᐃᓯ ᑕᑈᑎᒥᓐ ᐊᑯᓐ ᒐ ᐃᓯ ᐃᑐᑎᒪᑯᔨᓐ᙮” ᒪᒂᒡ ᒪᒃ ᐊᓂᔭ ᑲ ᐃᑕᑦ ᐊᓯᒪᑭᓂᓴ, ᐊᑯᑕ ᒧᔭᒻ ᐊᓂᔭ ᑎᐸᐃᑭᓂᔪᐤ ᑲ ᒥᓏᑎᓯᔨᒋ ᐊᓂᔭ ᐅᑦ ᐊᐱᒋᐊᑭᓇ ᐊᓐ ᐊᓯᒪᑭᓂᓯᐤ ᐅᒋᒪᐤ᙮
ᒋᓴᔅ ᒥᓏᒋᐊᐤ ᒥᒐᑦ ᐊᐛᔪᐛ
ᒪᕐᒃ 1.29-34; ᓗᒃ 4.38-41
14ᐊᑯ ᒋᓴᔅ ᒂ ᐃᑐᑕᑦ ᐊᓐᑕ ᐱᑕᕋ ᐎᒋᔨᒡ, ᒋ ᐛᐱᒥᒪᐤ ᐊᓂᔭ ᐱᑕᕋ ᐅᓯᑯᓯᔪᐛ ᓂᐸᐅᓂᒡ ᐊ ᐱᒥᓯᓂᔨᒋ ᐊ ᒋᓯᑕᐅᐱᔨᒋ᙮ 15ᐊᑯ ᒋᓴᔅ ᐛᑎᓂᒺᑦ ᐊᓂᔭ ᐃᔎᐛ ᐅᑎᒋᔪᐤ, ᑎᐛᒡ ᒋ ᓂᑯᑎᑯᔪᐛ ᐊᓂᔭ ᑲ ᒋᓯᑕᐅᐱᔨᒋ, ᒂ ᐊᑎ ᐅᓂᔨᒋ ᑭᔭ ᒂ ᐊᑎ ᐃᑐᑕᑯᑦ ᒋᓴᔅ᙮
16ᐃᔅᐱ ᒪᒃ ᐊ ᐊᑎ ᐅᑕᑯᓯᔨᒡ, ᐊᑯ ᐃᔪᒡ ᐱᔭᑐᐛᒡ ᒋᓴᓴ ᒥᒐᑦ ᐊᐛᔪᐛ ᑲ ᐱᒋᔅᑲᑯᔨᒋ ᒥᒋ ᐊᒐᒂ᙮ ᒋᓴᔅ ᒪᒃ ᒋ ᐎᐎᑎᓴᐛᐤ ᒥᒋ ᐊᒐᒂ ᑲ ᐱᒋᔅᑲᑯᔨᒋ ᐃᔪᐛ ᐅᑦ ᐃᔨᒧᐅᓐ ᐅᒡ ᑭᔭ ᒥᓯᐛ ᒋ ᒥᓏᒋᐊᐤ ᐊᓂᔭ ᑲ ᐊᐧᑯᓯᔨᒋ᙮ 17ᒋ ᐃᑐᑎᒧᐛᐤ ᐃᔪᐛ ᐅᔭ ᒐᒂᓇ ᐊᑯ ᒪᒃ ᒐᒋ ᐃᔅᐱᔨᒡ ᐊᓂᔭ ᐅᒋᔅᒋᐛᐃᒐᓱᐤ ᐊᐃᓴᔭ ᓂᑲᓐ ᑕᓐ ᑲ ᐃᓯ ᐎᑎᒧᒂ ᒐ ᐃᔅᐱᔨᒡ ᑲ ᐃᔅᒋᔄᑦ,
ᔅᒋ ᒥᓏᒋᐃᑯᓄᐤ ᑭᔭ ᒋ ᐃᒐᓂᒻ ᒥᓯᐛ ᓂᓇᐧᑯᐤ ᒋᑦ ᐊᐧᑯᓱᐅᓄᐛ᙮
ᒋᓴᔅ ᑲ ᐎᑕᐧᒃ ᑕᓐ ᐊ ᐃᑕᔨᑕᑯᓂᔨᒡ ᐊ ᓇᓴᐛᑭᓄᐅᑦ
ᓗᒃ 9.57-62
18ᐃᔅᐱ ᒪᒃ ᒋᓴᔅ ᐎᔭᐱᒪᑦ ᒥᒐᑦ ᐊᐛᔪᐛ ᐊ ᐛᔅᑲᑲᐳᔅᑕᑯᑦ, ᐊᑯ ᐊ ᑕᑦ ᐊᓂᔭ ᐅᒋᔅᒋᓄᐊᒧᐛᑭᓇ ᓇᑕ ᒂᔅᑕᒐᑲᒻ ᓴᑲᐃᑭᓂᔪᐤ ᒐᒋ ᐃᑕᐅᔨᑯᑦ᙮ 19ᐊᔅᒄ ᒪᒃ ᐊᑲ ᐅᒋ ᒧᓴᐛᐊᒡ ᐸᐃᒄ ᒪᒃ ᑲ ᒋᔅᑯᑎᒪᒐᔨᒋ ᐎᓱᐛᐅᓂᔪᐤ ᒋ ᐸᒋ ᓇᑎᑯᐤ ᒋᓴᔅ ᑭᔭ ᐊᑎᑯᑦ “ᒋᔅᑯᑎᒪᒐᓱᐤ, ᒋᑭ ᓇᓴᐅᑎᓐ ᒥᒄ ᐊᓐᑕ ᒐ ᐃᑐᑕᐅᓇ᙮”
20ᐊᑯ ᒋᓴᔅ ᐊᑕᑦ, “ᒪᒐᓱᐅᒡ ᑎᑯᓂᔪᐛ ᐅᐛᑎᑯᐛᐛ, ᐱᔭᓯᓯᒡ ᑭᔭ ᑎᑯᓂᔪᐛ ᐅᔅᑎᓄᐛᐛ, ᒥᒄ ᒪᒃ ᐃᔪᐤ ᐅᑯᓯᓴᓐ ᓇᒪ ᐊᔭᐤ ᐊᓐᑕ ᒐᒋ ᐛᐛᔨᓯᓐᑦ ᒐᒋ ᐊᔅᑕᔭᔅᑯᓯᑦ᙮”
21ᑯᑎᒃ ᒪᒃ ᓇᐸᐤ ᐊ ᓇᓴᐛᑦ ᒋᓴᓴ ᒋ ᐃᑕᐤ, “ᐅᑎᐸᔨᒋᒐᐤ, ᓇᐊᔨᒥ ᓂᔅᑎᒻ ᒐᒋ ᓇᐃᐧᑯᐅᒃ ᓄᑕᐎᔾ ᑲ ᐳᓂᐱᒪᑎᓯᑦ ᐊᑯ ᒪᒃ ᐃᔭᒄ ᒐ ᐎᒐᐅᑕᓐ᙮”
22ᐊᑯ ᒋᓴᔅ ᐊᑕᑦ, “ᐸᒋ ᓇᓴᐎ᙮ ᐊᑯᔅ ᐊᓐᒡ ᒧᔭᒻ ᐊ ᓂᐱᒡ ᑲ ᐃᑕᔨᑕᑯᓯᒡ ᐊᐛᓐᒋ ᒋᑭ ᓇᐃᐧᑯᐛᐅᒡ ᐊᓂᔭ ᑲ ᓂᐱᔨᒋ ᐅᑦ ᐃᔨᒧᐛᐛ᙮”
ᒋᓴᔅ ᑲ ᐎᓱᐛᑕᐧᒃ ᐊ ᔪᑎᓂᔨᒡ ᑭᔭ ᑭᔅᑭᓇ
ᒪᕐᒃ 4.35-41; ᓗᒃ 8.22-25
23ᐃᔅᐱ ᒋᓴᔅ ᑲ ᐳᓯᑦ ᐅᐤᑎᔪᐤ, ᐅᒋᔅᒋᓄᐊᒧᐛᑭᓇ ᒋ ᐎᒐᐅᑯᐤ᙮ 24ᒐᒃ ᓯᔅᒋᑯᒡ ᑲ ᒥᔅᑎ ᔪᑎᓂᔨᒡ ᐊᓐᑕ ᓴᑲᐃᑭᓂᒡ, ᒋ ᑯᔅᑎᑯᓂᔪᐤ ᒪᒃ ᒐᒋ ᑯᓴᐸᔭᐊᓂᔨᒡ ᐊᓂᔭ ᐅᑦ ᐅᐤᑐᐛᐤ᙮ ᒋ ᓂᐸᐤ ᒪᒃ ᐎᔾ ᒋᓴᔅ᙮ 25ᒐᒃ ᐊᓐᒡ ᒋᔅᒋᓄᐊᒧᐛᑭᓐᒡ ᑲ ᐸᑯᓇᒡ ᒋᓴᓴ ᐊ ᐃᑕᒡ, “ᐅᑎᐸᔨᒋᒐᐤ, ᐸᒋ ᐎᒋᐃᓇᓐ, ᓴᔅ ᓂᑭ ᓂᓱᐅᓇᑎᓯᓇᓐ᙮”
26ᐊᑯ ᒋᓴᔅ ᐊᑕᑦ, “ᒐᒂᓐ ᐛᒋ ᓇᔅᒡ ᑯᔅᑕᒋᔭᒄ, ᐅ ᒋᔨᐛᐤ ᑕᑈ ᐊᐱᓴᓯᒡ ᒋᑕᑈᑎᒧᐅᓄᐛᐤ ?” ᐊᑯ ᐛᓂᑦ ᒂ ᐃᑎᓱᐛᑕᐧᒃ ᐊᓂᔭ ᐊ ᔪᑎᓂᔨᒡ ᒐᒋ ᐳᓂᐱᔨᒡ ᑭᔭ ᐊᓂᔭ ᑭᔅᑭᓇ ᐊ ᐃᑕᑦ, “ᒋᔭᒥᓯᒄ᙮” ᑎᐛᒡ ᒪᒃ ᒋ ᐅᒋ ᐃᔽᔅᑎᓂᔪᐤ᙮
27ᒥᓯᐛ ᒪᒃ ᐊᓐᒡ ᓇᐸᐅᒡ ᒋ ᒪᒥᔅᑲᑕᔨᑎᒧᒡ ᐊ ᐃᔅᒋᔄᒡ, “ᐊᐛᓐ ᐅ ᐛᐛᒡ ᐊ ᔪᑎᓂᔨᒡ ᑭᔭ ᑭᔅᑭᓇ ᐊ ᐱᓯᒋᐃᑯᑦ ?”
ᒋᓴᔅ ᒥᓏᒋᐊᐤ ᓂᓱ ᓇᐸᐛ ᑲ ᐱᒋᔅᑲᑯᔨᒋ ᒥᒋ ᐊᒐᒂ
ᒪᕐᒃ 5.1-20; ᓗᒃ 8.26-39
28ᐃᔅᐱ ᒪᒃ ᒋᓴᔅ ᒪᓯᑲᒡ ᒂᔅᑕᒐᑲᒻ ᐊᓂᔭ ᓴᑲᐃᑭᓂᔪᐤ ᐊᓐᑕ ᑲᕋᓯᓐ ᐊᔅᒋᒡ, ᒋ ᓂᒋᔅᑲᑯᐤ ᓂᓱ ᓇᐸᐛ ᐊ ᐱᒋᔅᑲᑯᔨᒋ ᒥᒋ ᐊᒐᒂ ᐊᓐᑕ ᓂᒂᔅᑲᓂᒋᐛᐱᒡ ᐊ ᐅᑐᑕᔨᒋ᙮ ᓇᒪ ᐛᐛᒡ ᐊᐛᔪᐛ ᐅᒋ ᐱᒧᑕᔪᐛ ᐊᓐᑕ ᐊᓂᔭ ᒪᔅᑭᓇᔪᐤ ᑲ ᐃᔅᐱᔅ ᐊᒂᑎᓯᒡ ᐅᒡ ᓇᐸᐅᒡ᙮ 29ᐃᔅᐱ ᒪᒃ ᐎᔭᐱᒥᑯᑦ ᒋᓴᔅ ᐊᓂᔭᔪᐛ ᓇᐸᐛ ᑎᐛᒡ ᒋ ᐅᒋ ᐊᓯᒂᔪᐛ ᐊ ᐃᔅᒋᔄᔨᒋ, “ᒋᓴᔅ, ᑕᓐ ᐛᑐᑐᐅᔭᒡ, ᒋᔾ ᒋᓴᒪᓂᑐᐤ ᐅᑯᓴ, ᓴᔅ ᐊ ᒋ ᐎ ᐸᒋ ᐛᐎᓯᒐᔨᑎᒥᐃᓇᓐ ᐊᔅᒄ ᐊᑲ ᒪᒃ ᐅᑎᒋᐱᔨᒡ ᒐ ᐛᐎᓯᒐᔨᑎᒧᐛᐅᒋᐱᓇ ?”
30ᐊᓐᑕ ᒪᒃ ᐊᓂᔭ ᑲ ᑕᒡ ᓇᒪ ᐛᔪᐤ ᐊᓐᑕ ᒋ ᑕᐅᒡ ᐊ ᒥᒐᑎᒡ ᑯᐧᑯᓯᒡ ᐊ ᒥᒋᓱᒡ᙮ 31ᐊᑯ ᐊᓐᒡ ᒥᒋ ᐊᒐᐧᑯᒡ ᓇᔅᒡ ᓱᒃ ᒋ ᓂᑐᑎᒧᐛᐅᒡ ᒋᓴᓴ ᐊ ᐃᑕᒡ, “ᐃᔅᐱ ᐛ ᐎᐎᑎᓴᐛᐅᒐ, ᓇᑕ ᐃᑎᓴᐅᓇᓐ ᑯᐧᑯᓯᒡ ᒐᒋ ᐱᒋᔅᑯᐅᒋᒡ᙮”
32ᐊᑯ ᒋᓴᔅ ᐊᑕᑦ, “ᒪᒋᒄ᙮” ᐃᔅᐱ ᒪᒃ ᑲ ᐎᐎᒡ ᐊᓐᒡ ᒥᒋ ᐊᒐᐧᑯᒡ ᐊᓐᑕ ᐊᓂᔭ ᐅᒋ ᓂᓱ ᓇᐸᐛ ᐊ ᑕᔨᒋ ᐊᑯ ᒂ ᐊᓱᐱᒋᔅᑯᐛᒡ ᐊᓂᔭ ᑯᐧᑯᓴ᙮ ᐊᑯ ᐊᓐᒡ ᑯᐧᑯᓯᒡ ᒂ ᔭᒥᑕᐅᒋᐸᔨᑐᒡ ᐊᓐᑕ ᓴᑲᐃᑭᓂᒡ ᐃᔅ ᑭᔭ ᒂ ᓂᔅᑕᐸᐛᒡ᙮
33ᐃᔅᐱ ᒪᒃ ᐊᓐᒡ ᑲ ᑭᓄᐛᔨᒪᒡ ᐊᓂᔭ ᑯᐧᑯᓴ ᑲ ᐛᐸᑕᒡ ᑕᓐ ᑲ ᐃᔅᐱᔨᒡ ᒋ ᒋᑎᓯᒧᐅᒡ, ᐅᑕᓇᒡ ᐃᔅ ᒪᒃ ᒋ ᐃᑐᑕᐅᒡ ᒋ ᐎᑎᒧᒡ ᒥᓯᐛ ᑕᓐ ᑲ ᐃᔅᐱᔨᒋ ᐊᓂᔭ ᓂᓱ ᓇᐸᐛ ᑲ ᐱᒋᔅᑲᑯᔨᒋ ᒥᒋ ᐊᒐᒂ᙮ 34ᓇᓇᒐᓯᔅ ᒪᒃ ᒥᓯᐛ ᐊᐛᓐᒋ ᐊᓐᑕ ᐅᑕᓇᒡ ᑲ ᑕᒡ ᒋ ᓂᑐᐛᐱᒪᐅᒡ ᒋᓴᓴ᙮ ᐃᔅᐱ ᒪᒃ ᐎᔭᐱᒪᒡ ᒋ ᓯᒋᒪᐅᒡ ᒐᒋ ᓂᑭᑎᒥᔨᒋ ᐅᑦ ᐊᔅᒋᐛᐤ᙮
Currently Selected:
ᒪᑎᔪᐤ 8: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada