ᒪᑎᔪᐤ 15
15
ᑕᓐ ᑲ ᐃᓯ ᑎᐸᒋᒪᑭᓄᐎᒡ ᐊᓂᔭᐧᑲ ᒋᑦ ᐊᓂᔅᒐ ᐛᐧᑯᒪᑭᓄᐎᒡ
ᒪᕐᒃ 7.1-13
1ᐊᑯ ᐱᔅᒐ ᐸᕆᓯᔨᒡ ᑭᔭ ᐊᓐᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᐊᓐᑕ ᒋᕈᓯᓕᒥᒡ ᒋ ᐅᑐᑕᐅᒡ ᑲ ᐸᒋ ᓂᑐᐛᐱᒪᒡ ᒋᓴᓴ, ᒂ ᐃᑕᒡ, 2“ᑕᓐ ᐊ ᐃᑎᒡ ᐊᓐᒡ ᒋᒋᔅᒋᓄᐊᒧᐛᑭᓐᒡ ᐛᒋ ᐊᑲ ᓂᓇᐃᑕᒡ ᐊᓂᔭ ᐃᑐᐅᓂᔪᐤ ᐊᓂᔭᐧᑲ ᒍᑕᐎᓄᐅᒡ ᑲ ᐊᓱᐤ ᒥᔨᑕᐧᑯᒡ ? ᐛᔅ ᓇᒪ ᐃᑐᑎᒧᒡ ᐎᔨᐛᐤ ᒐᒋ ᒋᔅᑕᐸᐅᑕᒡ ᐅᑎᒋᐛᐛ ᐊᔅᒄ ᐊ ᐊᑲ ᒥᒋᓱᒡ᙮”
3ᐊᑯ ᒋᓴᔅ ᐊ ᐎᑎᒧᐛᑦ ᒂ ᐃᑕᑦ, “ᑕᓐ ᐊ ᐃᑎᔭᒄ ᒪᒃ ᐎ ᒋᔨᐛᐤ ᐛᒋ ᐊᑲ ᓂᓇᐃᑎᒪᒄ ᒋᓴᒪᓂᑐᐤ ᐅᑭᒐᔅᒋᒧᐅᓐ ᐃᔭᐱᒡ ᐊᓂᔭ ᐃᑐᐅᓇ ᑲ ᒋᔅᑯᑎᒪᑯᔭᒄ ᐊ ᓂᓇᐃᑎᒪᒄ ? 4ᐛᔅ ᒋ ᐃᔅᒋᔄᐤ ᒋᓴᒪᓂᑐᐤ, ‘ᒋᔅᑕᔨᒻ ᒍᑕᐎᔾ ᑭᔭ ᒋᑲᐎᔾ,’ ᑭᔭ ᒋ ᐃᔅᒋᔄᐤ, ‘ᐊᐛᓐ ᒪᔭᔨᒪᒐ ᐅᑕᐎᔭ ᑭᔭ ᐅᑲᐎᔭ ᐊᑯᔅ ᒋᑭ ᓂᐳᐤ᙮’ 5ᒥᒄ ᒪᒃ ᒋᔨᐛᐤ ᐃᔭᒡ ᐊ ᐃᓯ ᒋᔅᑯᑎᒪᒐᔭᒄ, ᐊ ᐃᔅᒋᔄᔭᒄ, ‘ᐊᐛᓐ ᐊ ᒋᔅᒐᔨᑕᐧᒃ ᐅᓂᒋᐃᒂ ᐊ ᓄᑕᐱᔨᒋ ᒐᒂᔪᐤ ᐊᑲ ᒪᒃ ᓇᔅᒡ ᑯᒋᑕᑦ ᒐᒋ ᐎᒋᐊᑦ ᐃᔭᐱᒡ ᒋᓴᒪᓂᑐᐛ ᐊ ᑕᔨᒋ ᐊ ᐃᓯ ᐱᔅᑎᓇᐧᒃ ᐊᓂᔭ ᒐᒂᔪᐤ,’ ᒋᑦ ᐃᑕᐛᐤ ᐊᑲ ᐅᓂᐱᔨᑦ ᐊᓂᔭ ᐊ ᐃᑎᑦ᙮ 6ᐊᓂᔭ ᒪᒃ ᐊ ᐃᑎᑦ ᓇᒪ ᒋᔅᑕᔨᒪᐤ ᐅᑕᐎᔭ᙮ ᐅ ᒪᒃ ᐊ ᐃᓯ ᒋᔅᑯᑎᒪᒐᔭᒄ ᒋ ᐃᑐᑐᐛᐛᐅᒡ ᒐᒋ ᓂᓇᐃᑕᒡ ᐊᓂᔭ ᐃᑐᐅᓇ ᑲ ᒋᔅᑯᑎᒧᐛᑯᒡ ᐃᔅᐱᔅ ᐎ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᒐᒋ ᓂᓇᐃᑎᒺᒡ᙮ 7ᒋᔨᐛᐤ ᑲ ᐊᔭᒥᐊᐧᑲᓱᔭᒄ ᐊᐅᒄ ᒋᔨᐛᐤ ᑕᑈ ᐊᓂᔭ ᐅᒋᔅᒋᐛᐃᒐᓱᐤ ᐊᐃᓴᔭ ᑲ ᐊᔨᒧᒥᑕᒄ᙮ 8ᒋ ᐃᔅᒋᔄᐤ,
ᐅᒡ ᐃᔪᒡ ᐅᑐᓂᐛᒡ ᓂ ᐅᒋ ᒋᔅᑕᒋᒥᑯᒡ, ᒥᒄ ᒪᒃ ᓇᒪ ᓇᔅᒡ ᓂᑦ ᐊᐱᑕᔨᒥᑯᒡ ᐅᑕᐃᐛᒡ᙮
9ᓇᒪ ᐊᐱᑎᓂᔪᐤ ᐊᓂᔭ ᐊ ᐸᒋ ᐊᔭᒥᐊᔅᑐᐅᒡ ᐛᔅ ᐃᔭᐱᒡ ᐎᔨᐛᐤ ᐅᐎᓱᐛᐅᓄᐛᐛ ᒋᔅᑯᑎᒪᒐᐅᒡ, ᓇᒪ ᐎ ᐊᓂᔭᔪᐛ ᒋᓴᒪᓂᑐᐛ ᑕᓐ ᑲ ᐃᓯ ᐸᒋ ᐱᔅᑎᓂᒥᔨᒋ᙮”
ᐊᓂᔭᔪᐛ ᒐᒂᔪᐛ ᐛᓇᑯᐃᑯᑦ ᐊᐛᓐ
ᒪᕐᒃ 7.14-23
Matthew 15.10-20,21-28 (Proper-15 Year A)
10ᐊᑯ ᒋᓴᔅ ᒂ ᐎᓴᒪᑦ ᐊᓂᔭ ᐃᔪᐛ ᐊᑯ ᐊᑕᑦ, “ᓂᑐᑎᒧᒄ ᑕᓐ ᒐ ᐃᓯ ᐎᑎᒪᑎᑯᒡ ᑭᔭ ᐎ ᓂᔅᑐᑎᒧᒄ᙮ 11ᑕᐸ ᓇᒪᔭᔪᐤ ᐊᓂᔭ ᑕᓐ ᐊ ᐃᓯ ᐱᑕᐊᐧᒃ ᐊᐛᓐ ᐅᑐᓂᒡ ᐊ ᐃᑐᑕᑯᑦ ᒐᒋ ᒥᒋᑐᑕᐧᒃ ᒥᒄ ᐊᓂᔭ ᑕᓐ ᐊ ᐃᓯ ᐸᒋ ᐎᐎᐱᔨᒡ ᐊ ᐃᔨᒥᑦ, ᐊᔪᐅᒄ ᐊᓂᔭ ᐊ ᐃᑐᑕᑯᑦ ᒐᒋ ᒥᒋᑐᑕᐧᒃ᙮”
12ᐊᑯ ᐊᓂᔭ ᐅᒋᔅᒋᓄᐊᒧᐛᑭᓇ ᐱᔭᒋ ᓂᑐᐛᐱᒥᑯᑦ, ᑭᔭ ᐊ ᑎᑯᑦ, “ᒋ ᒋᔅᒐᔨᑕᓐ ᐊ ᐊᒋ ᒋᔄᑥᐤ ᐊᓐᒡ ᐸᕆᓯᔨᒡ ᐊᓂᔭ ᑲ ᐃᔅᒋᔄᐅᑦ ?”
13ᐊᑯ ᒋᓴᔅ ᐊᑕᑦ, “ᑕᑐᐤ ᐊ ᐃᑕᑎᓂᔨᒋ ᓂᑕᐅᒋᑕᑭᓇ ᓄᑕᐎᔾ ᒋᒋᒋᓯᑯᒡ ᐊ ᑕᑦ ᐊᑲ ᐎᔾ ᐅᒋ ᓂᑕᐅᒋᑕᑦ ᒋᑭ ᐱᐧᑯᒋᐱᑕᑭᓄᐅᔪᐛ᙮ 14ᐊᑯᔅ ᐊᑲ ᐊᔨᒪᔨᒪᐧᑯᒡ ᐊᓐᒡ ᐸᕆᓯᔨᒡ᙮ ᐛᔅ ᒧᔭᒻ ᐊᐛᓐᒋ ᐊᑲ ᐛᐸᑕᒡ ᐃᔭᐱᒡ ᒪᒃ ᑲ ᐎ ᒋᔅᒋᓄᑕᐊᒡ ᐊᐛᔪᐛ ᐊᑲ ᐛᐸᑎᒥᔨᒋ ᐊᑯᓐ ᐊ ᐃᑕᔨᑕᑯᓯᒡ᙮ ᑕᐱᔅᑯᓐ ᒪᒃ ᐊᑲ ᐛᐸᑕᒡ ᐛᑎᓂᔪᐤ ᒐᒋ ᐳᑎᓱᐛᐱᔨᒡ ᐊᓐᑕ ᐊ ᐱᑯᓇᔭᔨᒡ᙮”
15ᐊᑯ ᐱᑕᕐ ᐊᑕᑦ, “ᐸᒋ ᐎᑎᒧᐅᓇᓐ ᒪ ᑕᓐ ᐊ ᐃᓯ ᐎᑎᒪᒐᒥᑲᒡ ᐅ ᒋᔅᑯᑎᒪᒐᐤ ᑎᐸᒋᒧᐅᓐ᙮”
16ᐊᑯ ᒋᓴᔅ ᐊᑕᑦ, “ᑕᑈ ᓇᒪ ᔅᒋ ᓂᔅᑐᑕᓇᐛᐤ ᑭᔭ ᒋᔨᐛᐤ᙮ 17ᓇᒪ ᒋ ᓂᔅᑐᑕᓇᐛᐤ ᐊ, ᒥᓯᐛ ᐊᐛᓐ ᑕᓐ ᐊ ᐃᓯ ᐱᑕᐊᐧᒃ ᐅᑐᓂᒡ, ᒥᔅᑭᑕᒡ ᐃᔅᐱᔪᐤ, ᑭᔭ ᐊ ᐊᑎ ᐎᐎᐱᔨᑕᑦ ? 18ᒥᒄ ᒪᒃ ᐊᓂᔭ ᐊ ᐃᓯ ᐸᒋ ᐎᐎᐱᔨᒡ ᐊᐛᓐ ᐅᑐᓂᒡ ᐊ ᐃᔨᒥᑦ, ᐅᑕᐃᒡ ᐊᓂᔭ ᐅᒋᐱᔪᐤ, ᐊᔪᐅᒄ ᒪᒃ ᐅᔭ ᑲ ᐃᑐᑕᑯᑦ ᐊᐛᓐ ᒐᒋ ᒥᒐᑎᓯᑦ᙮ 19ᐛᔅ ᒥᑕᐃᒡ ᐅᒋᐱᔪᐤ ᒥᒋ ᒪᒥᑐᓇᔨᑎᒧᐅᓐ, ᓂᐸᐃᐛᐅᓐ, ᐱᓯᒂᑎᓯᐅᓐ, ᓂᑎᒥᒄ ᐃᑐᐅᓐ, ᑭᒐᒧᑐᐅᓐ, ᑭᑭᒋᔪᐅᓐ, ᑭᔭ ᐸᔅᑕᒧᐅᓐ᙮ 20ᐊᐅᑯᔪᐤ ᒪᒃ ᐅᔭ ᒐᒂᔪᐛ ᐊ ᐃᑐᑕᑯᑦ ᐊᐛᓐ ᒐᒋ ᒥᒋᑐᑕᐧᒃ᙮ ᐊᑯ ᒪᒃ ᐎ ᐊ ᒥᒋᓱᔭᒄ ᐊᑲ ᒋᔅᑕᐸᐅᑕᔭᒄ ᔅᑎᒋᐛᐛ ᓇᒪ ᐎ ᐊᓂᔭ ᐃᑐᑕᑯᐤ ᐊᐛᓐ ᒐᒋ ᒥᒋᑐᑕᐧᒃ᙮”
ᐃᔎᐤ ᐊᑲ ᒍᐤ ᐃᑎᔅᑲᓇᓯᑦ ᐅᑕᑈᑎᒧᐅᓐ
ᒪᕐᒃ 7.24-30
Matthew 15.10-20,21-28 (Proper-14 Year A)
21ᐊᑯ ᒋᓴᔅ ᒂ ᔅᑐᑕᑦ ᐊᓐᑕ ᐅᒋ, ᐊᓐᑕ ᐃᑕᒐ ᒂ ᐃᑐᑕᑦ ᐊᓂᔭ ᐊᔅᒋᔪᐤ ᐛᔅᑲ ᑲ ᑎᑯᓂᔨᒋ ᐊᓂᔭ ᐅᑕᓇᐛ ᑕᐃᕋ ᑭᔭ ᓴᐃᑐᓐ ᑲ ᐃᓯᓂᐧᑲᑕᔨᒋ᙮ 22ᐃᔎᐤ ᒪᒃ ᒋ ᐎᒍᐤ ᐊᓐᑕ ᑲᐃᓇᓐ ᐊᒋ ᐅᒋᑦ, ᐊᔪᑯᓂ ᐅᔭ ᑲ ᐸᒋ ᓂᑐᐛᐱᒥᑯᑦ ᒋᓴᔅ, ᐊ ᑕᑈᔨᒋ ᐊ ᐃᑎᑯᑦ, “ᐅᑎᐸᔨᒋᒐᐤ, ᐊᓂᔭ ᒋᓴᐅᒋᒪᐤ ᑎᐱᑦ ᐅᑯᓴ, ᐸᒋ ᒋᔅᑎᒪᒐᔨᒥ ᒪ᙮ ᓂᑕᓂᔅ ᓇᔅᒡ ᑕᑈ ᐛᐎᓯᒐᔨᑎᒥᐃᑯᐤ ᒥᒋ ᐊᒐᒂ ᐊ ᐱᒋᔅᑲᑯᑦ᙮” 23ᒥᒄ ᒪᒃ ᓇᒪ ᓇᔅᒡ ᐅᒋ ᔅᑐᑕᐤ ᒋᓴᔅ ᐊᓂᔭ ᐃᔎᐛ᙮ ᐊᑯ ᐅᒋᔅᒋᓄᐊᒧᐛᑭᓇ ᑲ ᐸᒋ ᓂᑐᐛᐱᒥᑯᑦ, ᑲ ᐊᔨᐧᑭᒥᐃᑯᑦ ᐊ ᐃᑎᑯᑦ, “ᐃᒐᑎᓴᐅᐤ ᒪ ᐊᓐ ᐃᔎᐤ, ᒺᔅᑕᓯᑕᑯᓱᐤ ᐊᓂᔭ ᐊ ᐃᓯ ᐃᔨᒥᑦ ᐊ ᓇᓴᐅᑕᐧᒄ᙮”
24ᐊᑯ ᒋᓴᔅ ᐊᑕᑦ ᐊᓂᔭ ᐃᔎᐛ, “ᓂᒋ ᐸᒋ ᐃᑎᓴᐅᑯᐅᓐ ᒐᒋ ᐸᒋ ᓂᑐᐛᐱᒥᒂᐤ ᒥᒄ ᐊᓐᒡ ᐃᔅᕋᐃᓪ ᐃᔪᒡ ᒧᔭᒻ ᑲ ᐃᓯᓇᑯᓯᒡ ᐊ ᐅᓂᓯᓂᒡ ᒪᔭᑕᓂᓯᒡ᙮”
25ᐃᔅᐱ ᒪᒃ ᐊᓐ ᐃᔎᐤ ᐱᔭᑐᐛᑦ ᐅᔭ ᐊ ᐃᔅᒋᔄᔨᒋ ᒋᓴᓴ, ᒋ ᐸᒋ ᓂᐱᔅᑯᐱᔪᐤ ᐊᓐᑕ ᒋᓴᓴ ᐊ ᑕᔨᒋ ᐊ ᐃᑕᑦ, “ᐅᑎᐸᔨᒋᒐᐤ, ᐸᒋ ᐎᒋᐃ !”
26ᐊᑯ ᒋᓴᔅ ᐊᑕᑦ ᐊᓂᔭ ᐃᔎᐛ, “ᓇᒪ ᑯᐃᔅᒄ ᐃᓯᓇᑯᓐ ᐊᑎᒧᒡ ᒐᒋ ᐛᐱᓂᒧᐛᑭᓄᐎᒡ ᐊᐛᓴ ᐅᒥᒋᒥᔪᐤ᙮”
27ᐊᑯ ᐊᓐ ᐃᔎᐤ ᐊᑕᑦ, “ᒋ ᑕᑈᓐ ᐅᑎᐸᔨᒋᒐᐤ, ᒥᒄ ᒪᒃ ᐃᔭᐱᒡ ᒥᒍᐛᐅᒡ ᐊᑎᒧᒡ ᐅᒋᒪᒧᐛᐛ ᐅᐱᓂᑐᐛᓂᔪᐤ ᐊ ᐸᒋᑎᓂᔨᒡ ᐊᓐᑕ ᓯᐸ ᐅᒥᒋᓱᐛᑭᓇᑎᑯᔨᒡ᙮”
28ᐊᑯ ᒋᓴᔅ ᐊᑕᑦ, “ᐃᔎᐤ, ᑕᑈ ᓱᒋᓯᒥᑭᓐ ᒋᑕᑈᑎᒧᐅᓐ᙮ ᒋᑭ ᐃᓯ ᐃᑐᑎᒪᑯᐅᓐ ᒪᒃ ᑕᓐ ᐊ ᐃᓯ ᐱᑯᓴᔨᑎᒥᓐ᙮” ᑎᐛᒡ ᒪᒃ ᒋ ᒥᓏᑎᓯᔪᐛ ᐊᓂᔭ ᐅᑕᓂᓴ ᐊᓐ ᐃᔎᐤ᙮
ᒋᓴᔅ ᒥᒐᑦ ᐊᐛᔪᐛ ᑲ ᒥᓏᒋᐊᑦ
29ᒋᓴᔅ ᒂ ᔅᑐᑕᑦ ᐊᓐᑕ ᐅᒋ, ᐊᑯ ᐊᓐᑕ ᐊᓂᔭ ᑲᓕᓕ ᓴᑲᐃᑭᓂᔪᐤ ᒂ ᐊᑎ ᓯᓱᑕᐛᑦ᙮ ᐊᑯ ᒂ ᓴᑭᒋᐛᑦ ᐱᔅᑯᑎᓇᔪᐤ, ᐊᑯᑕ ᐊᓐᑕ ᒂ ᐊᑎ ᐛᐛᔨᐱᑦ᙮ 30ᒥᒐᑦ ᒪᒃ ᐊᐛᔪᐛ ᒋ ᐸᒋ ᓂᑐᐛᐱᒥᑯᐤ, ᐊ ᐸᓱᐛᔨᒋ ᐊᓂᔭ ᐊᐛᔪᐛ ᐊᑲ ᒋ ᐊᑎᓂᓱᔨᒋ, ᑭᔭ ᐊᑲ ᐛᐸᑎᒥᔨᒋ ᑭᔭ ᐊᓂᔭ ᑲ ᒪᔅᒋᓯᔨᒋ, ᑭᔭ ᐊᑲ ᓂᑕᐛᔨᒋ, ᑭᔭ ᒥᒐᑦ ᓂᓇᐧᑯᐤ ᑲ ᐃᑕᔅᐱᓇᔨᒋ᙮ ᒋ ᐊᔭᐅᒡ ᒪᒃ ᒥᓯᐛ ᐊᓂᔭ ᐊᓐᑕ ᒋᓴᓴ ᐅᓯᑎᔨᒡ᙮ ᐊᑯ ᒋᓴᔅ ᒂ ᒥᓏᒋᐊᑦ᙮
31ᒋ ᒥᔅᑲᑕᔨᑎᒧᒡ ᒪᒃ ᐊᓐᒡ ᐃᔪᒡ ᐊ ᐛᐱᒪᒡ ᐊᓂᔭ ᐊᑲ ᓂᑕᐛᔨᒋ ᐊ ᐃᔨᒥᔨᒋ ᑭᔭ ᐊᓂᔭ ᑲ ᒪᔅᒋᓯᔨᒋ ᐊ ᒥᔪᓇᑯᓯᔨᒋ, ᑭᔭ ᐊᓂᔭ ᐊᑲ ᓂᑕᐅᑕᔨᒋ ᐊ ᐱᒧᑕᔨᒋ, ᑭᔭ ᐊᓂᔭ ᐊᑲ ᐛᐸᑎᒥᔨᒋ ᐊ ᐛᐸᑎᒥᔨᒋ᙮ ᐊᑯ ᒪᒃ ᑲ ᒪᒥᒋᒪᒡ ᒋᓴᒪᓂᑐᐛ ᐊᓂᔭ ᒍᐤ ᐃᔪᐛ ᒂ ᒪᒥᒋᒪᔨᒋ᙮
ᒋᓴᔅ ᑲ ᐊᓯᒪᑦ ᓇᐛᐤ ᒐᓯᐱᔪᐤ ᓇᐸᐛ
ᒪᕐᒃ 8.1-10
32ᐊᑯ ᒋᓴᔅ ᒂ ᐎᓴᒪᑦ ᐅᒋᔅᒋᓄᐊᒧᐛᑭᓇ, ᒂ ᐃᑕᑦ, “ᓇᔅᒡ ᐊ ᒋᔅᑎᒪᒐᔨᒥᒂᐤ ᐅᒡ ᐃᔪᒡ, ᓴᔅ ᓂᔅᑐ ᒋᓯᑲᐛ ᑕᐅᒡ ᐅᑕ ᐊ ᑕᐅᒡ, ᓇᒪ ᒪᒃ ᓴᔅ ᑎᑯᓂᔪᐤ ᒐᒂᔪᐤ ᒐ ᒥᒋᒡ᙮ ᓇᒪ ᑭᔭ ᓂ ᐎ ᒋᑎᓴᐛᐅᒡ ᐊ ᓯᐛᔨᒡ, ᒂᔄᓐ ᒋᑭ ᐊᑎ ᓄᑕᐧᑭᑕᐅᒡ ᒪᒂᒡ ᐊ ᐱᒧᑕᒡ᙮”
33ᐊᑯ ᐊᓂᔭ ᐅᒋᔅᒋᓄᐊᒧᐛᑭᓇ ᒂ ᐃᑎᑯᑦ, “ᑕᓐᑕ ᒐ ᐅᑎᓂᒪᐧᒄ ᒥᒋᒻ ᒐᒋ ᐊᓯᒥᐧᑯᒡ ᐅᒡ ᒥᓯᐛ ᐃᔪᒡ, ᐅᑕ ᒪᒃ ᐸᐧᑯᑎᔅᑭᒥᑲᒡ ᐊ ᑕᔭᐧᒄ ?”
34ᐊᑯ ᒋᓴᔅ ᐊᑕᑦ, “ᑕᓐ ᑕᑐᐤ ᐸᒂᓯᑭᓐᒡ ᐊ ᐊᔭᐛᑯᒡ ?” ᐊᑯ ᒋ ᐃᑕᐅᒡ, “ᓂᔄᐅᑕᒡ ᐃᑕᑎᓯᒡ ᑭᔭ ᐊᐱᓯᔅ ᓂᒪᓯᒡ ᐊ ᐊᔭᐱᓯᓯᒡ᙮”
35ᐊᑯ ᒋᓴᔅ ᒂ ᐃᑎᓱᐛᑕᑦ ᐊᓂᔭᔪᐛ ᐃᔪᐛ ᒐᒋ ᐛᐛᔨᐱᐃᓱᔨᒋ ᐊᓐᑕ ᒧᔅᑎᔅᑭᒥᒡ᙮ 36ᒂ ᐅᑎᓇᑦ ᐊᓂᔭ ᓂᔄᐅᑕᒡ ᐸᒂᓯᑭᓇ ᑭᔭ ᐊᓂᔭ ᓂᒪᓴ, ᒂ ᓂᓇᔅᑯᒪᑦ ᒋᓴᒪᓂᑐᐛ, ᒂ ᐸᒂᓇᑦ ᐊᓂᔭ ᐸᒂᓯᑭᓇ ᑭᔭ ᐊᓂᔭ ᓂᒪᓴ ᐊᑯ ᒂ ᒥᔭᑦ ᐊᓂᔭ ᐅᒋᔅᒋᓄᐊᒧᐛᑭᓇ ᒐᒋ ᒪᑎᓂᒧᐛᔨᒋ ᐊᓂᔭ ᐃᔪᐛ᙮ 37ᒥᓯᐛ ᑲ ᐃᑕᑎᓯᒡ ᒋ ᒥᒋᓱᐅᒡ ᑭᔭ ᒋ ᑕᐱᔅᑯᔪᒡ᙮ ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᑲ ᒪᒧᓴᒋᓇᒡ ᐊᓂᔭ ᐃᔅᑯᔅᑐᐛᓂᔪᐤ᙮ ᓂᔄᐅᑕᒡ ᒪᒃ ᐅᑎᐱᐅᑕ ᒋ ᓴᑭᔅᒋᓂᑕᐅᒡ᙮ 38ᐊᓐᒡ ᒪᒃ ᑲ ᐊᓯᒪᑭᓄᐎᒡ ᓴᓯᑲᓐ ᓇᐛᐤ ᒐᓯᐱᔪᐤ ᒋ ᑕᑎᓯᒐᓂᒋ ᓇᐸᐅᒡ᙮ ᐊᐛᓯᒡ ᑭᔭ ᐃᔎᐅᒡ ᓇᒪ ᐅᒋ ᐊᔅᑎᒋᒪᑭᓄᐎᒡ᙮
39ᐊᑯ ᒋᓴᔅ ᒂ ᒋᑎᓴᐛᑦ ᐊᓂᔭ ᐃᔪᐛ, ᒂ ᐳᓯᑦ ᐊᓂᔭ ᐅᐤᑎᔪᐤ ᐊᑯ ᐊᓐᑕ ᒪᑲᑕᓐ ᑲ ᐃᓯᓂᐧᑲᑕᔨᒡ ᐊᔅᒋᔪᐤ ᒐᒃ ᑲ ᒥᓯᑲᑦ᙮
Currently Selected:
ᒪᑎᔪᐤ 15: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
