ᐊᑈᔅᑕᓇᒡ 24
24
ᒍᐤ ᐃᔪᒡ ᑲ ᓂᑐᐛᔨᒪᒡ ᒋᓴᐅᒋᒪᐛ ᐱᓕᑭᔅ ᒐᒋ ᑎᐸᔅᑯᓇᔨᒋ ᑈᓚ
1ᐱᑕᑕᒡ ᒋᓯᑲᐤ ᒪᒃ ᐃᔅᐱᔅ ᐊᑯ ᐊᓐ ᒋᓴᐊᔭᒥᐊᐅᒋᒪᐤ ᐊᓇᓇᔭᔅ ᑲ ᐃᓯᓂᐧᑲᓱᑦ ᒋ ᑎᑯᓯᓄᐤ ᐊᓐᑕ ᓯᓴᕆᔭᒡ᙮ ᒋ ᐎᒐᐅᑯᐤ ᐱᔅᒐ ᐊᓂᔭ ᑲ ᓂᑲᓂᔅᑯᐛᔨᒋ ᒍᐤ ᐃᔪᐛ ᑭᔭ ᐊᓂᔭ ᑲᐃᔨᒥᑦ ᑐᕐᑐᓚᔅ ᑲ ᐃᓯᓂᐧᑲᓱᔨᒋ᙮ ᐊᑯ ᒂ ᓂᑐᐛᐱᒪᒡ ᐊᓂᔭ ᒋᓴᐅᒋᒪᐛ ᐱᓕᑭᓴ ᐊ ᐛᐎᑎᒧᐛᒡ ᑕᓐ ᑲ ᐃᑕᔨᒪᒡ ᑈᓚ ᐊ ᐃᓯ ᐅᓂᑐᑎᒥᔨᒋ᙮ 2ᐊᑯ ᑈᓪ ᒂ ᐎᓴᒪᑭᓄᐅᑦ ᒐᒋ ᐱᒐᑦ᙮ ᐃᔅᐱ ᒪᒃ ᑲ ᐱᒐᑦ ᐊᑯ ᑐᕐᑐᓚᔅ ᑲ ᒋᒋ ᐛᐎᑕᐧᒃ ᑕᓐ ᑲ ᐃᓯ ᐊᑕᒪᔨᒪᑭᓄᔨᒋ ᐊᓂᔭ ᑈᓚ᙮
ᒋ ᐃᑕᐤ ᐊᓂᔭ ᒋᓴᐅᒋᒪᐤ ᐱᓕᑭᓴ, “ᒋᔾ, ᒋᓴᐅᒋᒪᐤ, ᓇᔅᒡ ᑲ ᑭᔅᒋᐅᔨᓐ ᐊ ᓂᑲᓂᔅᑲᒐᔨᓐ, ᓇᐅᔅ ᓇᒪ ᐅᒋ ᑎᑯᓐ ᒐᒋ ᒪᒥᒋᐱᔨᓇᓄᐅᒡ ᐅᑕ ᒋᔭᓄᐤ ᐃᑕᒐ ᐊ ᑕᔭᐧᒄ, ᒧᔅ ᒋ ᒋᔭᒪᔨᑕᑯᓐ, ᑭᔭ ᓂᓇᐧᑯᐤ ᒐᒂᔪᐤ ᔅᒋ ᐊᒋᑕᓐ ᒐᒋ ᐅᒋ ᒥᔪᐱᔨᓇᓄᐅᒡ᙮ 3ᒥᓯᐛ ᒪᒃ ᐊᓐᑕ ᐊ ᐊᑎ ᑕᔭᒡ ᑕᑈ ᒋ ᓂᔅᑯᒥᑎᓇᓐ ᑕᓐ ᑲ ᐃᓯ ᐃᑐᑎᒥᓐ ᑲ ᐃᔅᐱᔅ ᐅᒋᒪᐎᔨᓐ ᐅᑕ ᐊ ᑕᔭᒡ᙮ 4ᐊᑯ ᒪᒃ ᐊᑲ ᓇᔅᒡ ᒐᒋ ᐅᑎᒥᐃᑕᒡ, ᔅᒋ ᐎ ᐃᓯ ᑯᒂᒋᒥᑎᓐ ᐊᓐ ᑭᑈ ᐊ ᐃᓯ ᒥᔪᑥᔨᓐ ᒐᒋ ᓂᑐᑎᐎᔨᓐ ᑕᓐ ᒐ ᐃᔅᒋᔄᔭᓐ᙮ ᓇᒪ ᓇᐅᔅ ᒋᑭ ᐅᒋ ᐃᔨᒥᐃᑎᓐ᙮”
5“ᓂ ᒋᔅᒐᔨᒪᓇᓐ ᐅ ᓇᐸᐤ, ᑈᓪ ᐊ ᒥᒋᐱᔨᑕᑦ᙮ ᑎᑯᓂᔪᐤ ᑕᓐ ᐊ ᐃᑎᑦ ᐊᑎ ᐛᒋ ᐃᑐᑐᐛᑦ ᐅᔭ ᒍᐤ ᑲ ᐃᑎᔅᑲᓇᓯᔨᒋ ᐃᔪᐛ ᒥᓯᐛ ᐅᑕ ᐊᔅᒋᒡ ᑲ ᑕᔨᒋ ᒐᒋ ᒪᒥᒋᐱᔨᑕᔨᒋ᙮ ᐎᒋᐃᐛᐤ ᑭᔭ ᐊ ᓂᑲᓂᔅᑯᐛᑭᓄᔨᒋ ᐊᓂᔭ ᓇᓴᕆᓐ ᑲ ᐃᓯᓂᐧᑲᑕᑭᓄᔨᒋ ᓇᔅᒡ ᓂᑎᒥᒄ ᑲ ᐃᓯ ᑕᑕᑈᑎᒥᔨᒋ᙮ 6ᐛᐛᒡ ᒋ ᐎ ᒪᔭᔨᑎᒻ ᒍᐤ ᒋᓴᐊᔭᒥᐊᐅᒋᐛᐱᔪᐤ, ᐊᑯ ᒥᒄ ᐊᑯᑕ ᑲ ᒪᑯᓂᒋᒡ᙮ ᐊᓐᑕ ᒪᒃ ᓂᔭᓐ ᓄᐅᔭᔅᑯᓂᒐᐅᓇᒡ ᐊᑯᑕ ᑲ ᐎ ᐃᓯ ᑎᐸᔅᑯᓂᒋᒡ᙮ 7ᒥᒄ ᒪᒃ ᐊᓐ ᓂᑐᐱᔪᐅ-ᐅᒋᒪᐤ ᓚᐃᓯᔭᔅ ᑲ ᐃᓯᓂᐧᑲᓱᑦ ᒂ ᑎᑯᓯᐧᒃ, ᓇᒪ ᓇᔅᒡ ᐅᒋ ᒪᒥᓇᑎᓯᐤ ᐊ ᒥᔅᑭᒧᑯᐎᔭᒡ ᐅᔭ ᓇᐸᐛ᙮ 8ᐊᑯ ᒂ ᐃᔅᒋᒥᒡ ᐎ ᒪᒥᓯᒪᒂ ᑈᓪ, ᐊᑯᑕ ᐅᑕ ᓂᐸ ᑎᑯᓯᓇᓐ ᒋᔾ ᐊ ᑕᐅᑦ, ᒋᔾ ᒐᒋ ᑎᐸᔅᑯᓂᑦ᙮ ᐊᑯ ᒪᒃ ᒋᔾ ᐛᒋᒡ ᒐᒋ ᓂᑐ ᒋᔅᒐᔨᒥᑦ ᑕᓐ ᐊ ᐃᑎᑦ᙮ ᑯᒂᒋᒥᑕ ᒪᒃ ᑈᓪ, ᒋᔾ ᓇᓂᑎᒻ ᒋᑭ ᒋ ᓂᑐ ᒋᔅᒐᔨᑎᒺᓐ ᐅᔭ ᑕᓐ ᐊ ᐃᓯ ᒪᒥᓯᒪᑭᓄᐅᑦ᙮”
9ᐊᑯ ᐊᓐᒡ ᒍᐤ ᐃᔪᒡ ᐊᓐᒡ ᐊᓂᔭ ᑐᕐᑐᓚᓴ ᑲ ᐎᒐᐛᒡ ᑭᔭ ᐎᔨᐛᐤ ᐊᑯᓐ ᑲ ᐃᔅᒋᔄᒡ ᑕᑈ ᑈᓚ ᐊᒋ ᐅᓂᑐᑎᒥᔨᒋ᙮
ᑈᓪ ᑲ ᐎᑎᒧᐛᑦ ᐊᓂᔭ ᒋᓴᐅᒋᒪᐛ ᐱᓕᑭᓴ ᐊᑲ ᐅᒋ ᐅᓂᑐᑕᐧᒃ
10ᐊᑯ ᐊᓐ ᒋᓴᐅᒋᒪᐤ ᑲ ᒥᔭᑦ ᐊᓂᔭ ᑈᓚ ᒐᒋ ᐃᔨᒥᔨᒋ, ᐊᑯ ᑈᓪ ᑲ ᐃᔅᒋᔄᑦ, “ᒋ ᒋᔅᒐᔨᒥᑎᓇᓐ ᓴᔅ ᒥᒐᑐᐤ ᐱᐳᓇ ᑎᐸᔅᑯᓂᒐᓱᐤ ᐊᒋ ᐃᑎᐱᔨᓐ ᐅᑕ ᐃᑕᒐ ᐅᒡ ᒍᐤ ᐃᔪᒡ ᐊ ᑕᒡ᙮ ᓂ ᒥᔽᔨᑕᓐ ᒪᒃ ᐊ ᓇᐃᐱᔨᒡ ᑯᐃᔅᒄ ᒐᒋ ᐃᓯ ᐊᔨᒧᑎᒪᑕᓐ ᑭᔭ ᓂᔾ ᐅ ᑕᓐ ᐛ ᐃᓯ ᑎᐸᔅᑯᓂᑯᔭᓐ᙮ 11ᓇᒪ ᐅᔅᑕ ᓂᓱᓴᑉ ᒋᓯᑲᐛ ᑲ ᑕᔭᓐ ᐊᓐᑕ ᒋᕈᓯᓕᒥᒡ ᐊᒋ ᐊᔭᒥᐊᔭᓐ᙮ ᒋᔾ ᓇᓂᑎᒻ ᒋᑭ ᒋ ᓂᑐ ᒋᔅᒐᔨᑕᓐ ᐊ ᑕᑈᔭᓐ ᐅ ᑲ ᐃᑎᑕᓐ᙮ 12ᐅᒡ ᒪᒃ ᑲ ᑎᑯᓂᔨᒡ ᑕᓐ ᐛ ᐃᓯ ᐸᒋ ᒪᒥᒋᐃᓯᒡ ᓇᒪ ᓂ ᐅᒋ ᐛᐱᒥᑯᐅᒡ ᒐᒋ ᒥᒋᐱᔨᐃᒥᒋ ᐊᐛᔪᐛ ᐊᓐᑕ ᒍᐤ ᒋᓴᐊᔭᒥᐊᐅᒋᐛᐱᒡ᙮ ᓇᒪ ᑭᔭ ᓂ ᐅᒋ ᐛᐱᒥᑯᐅᒡ ᒐᒋ ᐃᑐᑎᒥᒡ ᐊᐛᔪᐛ ᒐᒋ ᒪᒥᒋᐱᔨᑕᔨᒋ ᐊᓐᑕ ᓂᓇᐧᑯᐤ ᒍᐤ ᐊᔭᒥᐊᐅᒋᐛᐱᒡ ᒪᒃ ᐃᔭᒡ ᐊᓐᑕ ᒋᕈᓯᓕᒥᒡ᙮ 13ᑭᔭ ᒪᒃ ᓇᒪ ᐊᓐ ᒋᑭ ᒋ ᐛᐸᑎᔨᑯᒡ ᑕᑈ ᐊ ᑕᑈᒡ ᐊᓂᔭ ᑕᓐ ᐊ ᐃᓯ ᐸᒋ ᐊᑕᒪᔨᒥᒡ᙮ 14ᒪᐅ ᒥᒄ ᒐᔅᑎᓇᔅ ᑯᐃᔅᒄ ᒐᒋ ᐃᓯ ᐎᑎᒪᑕᓐ᙮ ᐊᑯᑕ ᐊ ᐃᓯ ᐎᒋᐃᐛᔭᓐ ᑭᔭ ᓂᔾ ᐊᓐᒡ ᑲ ᐱᒧᑕᒡ ᐊᓂᔭ ᒪᔅᑭᓇᔪᐤ ᒋᓴᒪᓂᑐᐛ ᑲ ᐃᔅᒋᔄᔨᒋ ᒐ ᐃᓯ ᐱᒧᑕᓄᐎᒡ ᒐᒋ ᐅᒋ ᐱᒪᒋᐅᓇᓄᐎᒡ᙮ ᐊᐅᒄ ᐅᔭ ᓂᑎᒥᒄ ᐊ ᐃᓯ ᑕᑕᑈᑕᑭᓄᐅᒡ ᑲ ᐃᓯᓂᐧᑲᑕᒡ ᐎᔨᐛᐤ ᐅᒡ ᒍᐤ ᐃᔪᒡ᙮ ᐊᓐ ᒋᓴᒪᓂᑐᐤ ᐊᓂᔭᐧᑲ ᐊᓂᔅᒐ ᓂᐧᑲᓂᓯᓇᓂᒡ ᑲ ᐊᔭᒥᐊᔅᑐᐛᒡ ᐊᐅᑯᓐ ᐊᓐ ᐊ ᐊᔭᒥᐊᔅᑐᒃ ᑭᔭ ᓂᔾ᙮ ᓂᔾ ᒪᒃ ᐎ ᓂ ᑕᑈᑕᓐ ᒥᓯᐛ ᒐᒂᓐ ᑕᓐ ᐊ ᐃᓯ ᐎᑕᒂᒡ ᐊᓐᑕ ᒧᓱᔅ ᐅᐎᓱᐛᐅᓂᒡ ᑭᔭ ᒥᓯᐛ ᑕᓐ ᐊᑎᔅᑕᒡ ᐊᓐᑕ ᐊᓐᒡ ᐅᒋᔅᒋᐛᐃᒐᓱᒡ ᐅᒥᓯᓇᐃᑭᓂᐛᒡ᙮ 15ᓂ ᑕᑈᑕᓐ ᑭᔭ ᓂᔾ ᑲᐤ ᒐ ᐅᓂᔅᑲᒡ ᒥᓯᐛ ᑲ ᓂᐱᒡ, ᐊᓐᒡ ᑲ ᒥᒋᑐᑕᒡ ᑭᔭ ᐊᓐᒡ ᑲ ᒥᔪᑐᑕᒡ᙮ ᐊᐅᒄ ᒪᒃ ᐅᔭ ᐊ ᐃᓯ ᑕᑈᔭᔨᒥᒃ ᒋᓴᒪᓂᑐᐤ ᒐ ᐃᑐᑕᐧᒃ ᒧᔭᒻ ᑭᔭ ᐎᔨᐛᐤ ᐅᒡ ᒍᐤ ᐃᔪᒡ ᐊ ᐃᓯ ᑕᑈᑕᒡ᙮ 16ᓱᒃ ᒪᒃ ᓂᓇᑭᑐᐛᔨᒥᓱᓐ ᒐ ᐊᑲ ᒋ ᒪᔭᔨᒥᒃ ᒋᓴᒪᓂᑐᐤ ᑭᔭ ᐃᔪᒡ ᒐᒋ ᐅᒋ ᒐᔅᑎᓇᐅᔭᓐ ᑯᐃᔅᒄ ᐊ ᐃᑎᔭᓐ᙮”
17“ᒥᒐᑐᐤ ᐱᐳᓇ ᓇᒪ ᓂ ᐅᒋ ᑕᓐ ᐊᓐᑕ ᒋᕈᓯᓕᒥᒡ᙮ ᐃᔅᐱ ᒪᒃ ᑲᐤ ᑲ ᑎᑯᓯᓂᔭᓐ ᐊᓐᑕ, ᓂᒋ ᐸᑕᐛᐅᒡ ᓂᑦ ᐃᔨᒥᒡ ᐱᔅᑎᓂᒐᐅᓂᔪᐤ ᐊᒋ ᒥᔭᑭᓄᔨᒋ ᐊᓂᔭ ᑲ ᒋᔅᑎᒪᑎᓯᔨᒋ, ᑭᔭ ᐊᔪᐤ ᓂᒋ ᓇᒋ ᐊᔭᒥᐊᓐ ᒐᒋ ᒥᑐᔅᑕᐊᒧᐅᒃ ᒋᓴᒪᓂᑐᐤ᙮ 18ᐊᑯᑕ ᒪᒃ ᐊᓐᑕ ᒪᒂᒡ ᑲ ᑕᐅᒡ ᑲ ᐛᐱᒥᒡ ᐊᓐᒡ ᒍᐤ ᐃᔪᒡ ᐊᓐᑕ ᐊᐃᓴ ᐊᔅᒋᒡ ᑲ ᐅᒋᒡ᙮ ᓴᔅ ᓂᒋ ᐃᑐᑎᒺᓐ ᑕᓐ ᑲᒋ ᐃᑎᓇᓄᐅᒡ ᒐᒋ ᐸᔭᒋᐃᓱᓇᓄᐅᒡ᙮ ᐊᓐ ᒪᒃ ᒪᒂᒡ ᓇᒪ ᐅᒋ ᒥᒐᑐᐅᒡ ᐊᐛᓐᒋ ᐊᓐᑕ ᑭᔭ ᓇᒪ ᒐᒂᓐ ᐅᒋ ᐃᓯ ᒥᒋᐱᔪᐤ᙮ 19ᒥᒄ ᐊᓐᒡ ᒍᐤ ᐃᔪᒡ ᐊᓐᑕ ᐊᐃᓴ ᐊᔅᒋᒡ ᐊ ᐅᒋᒡ ᒋ ᑕᐅᒡ ᐊᓐᑕ᙮ ᐊᐅᑯᓐᒡ ᒪᒃ ᐊᓐᒡ ᒋᐸ ᑕᐅᒡ ᐅᑕ ᐊ ᑕᐅᑦ ᒐᒋ ᐎᑕᒡ ᑕᓐ ᑲ ᐃᓯ ᐅᓂᑐᑎᒧᐛᓇ᙮ 20ᐅᒡ ᒪᒃ ᐅᑕ ᑲ ᑕᒡ ᑯᒂᒋᒪᐧᑯᒡ ᑲ ᒥᔅᑭᒺᒂ ᐊᒋ ᐅᓂᑐᑎᒧᒡ ᒪᒂᒡ ᑲ ᑎᐸᔅᑯᓂᒡ ᐊᓐᑕ ᒍᐤ ᑲ ᒪᒧᐱᔅᑎᒥᔨᒋ ᑎᐸᔅᑯᓂᒐᐅᓂᔪᐤ ᐊ ᑕᔨᒋ᙮ 21ᐸᐃᒄ ᑭᑈ ᒐᒂᔪᐤ ᓂᒋ ᐃᔅᒋᔄᐛᓐ ᐊᓐᑕ ᑲ ᐅᑎᔅᑯᑲᐳᔅᑐᒂᐤ, ᒪᒃ ᐊᐅᒄ ᐅᔭ ᐛ ᐅᒋ ᑎᐸᔅᑯᓂᐛᒂ᙮ ᓂᒋ ᒋᔄᐛᐛᓐ ᐊ ᐃᔅᒋᔄᐅᒡ, ᐊ ᑕᑈᑎᒪᓐ ᐊᓐᒡ ᑲ ᓂᐱᒡ ᑲᐤ ᒐ ᐅᓂᔅᑲᒡ᙮ ᐊᑯᓐ ᐛᒋ ᑎᐸᔅᑯᓂᑯᔭᓐ ᐅᑕ ᐊ ᑕᔭᒄ ᐊᓄᒡ ᐅ ᑲ ᒋᓯᑲᒡ᙮”
22ᒋᓴᐅᒋᒪᐤ ᐱᓕᑭᔅ ᒪᒃ ᑭᔭ ᐎᔾ ᒋ ᒥᔪ ᒋᔅᒐᔨᑎᒻ ᐊᓂᔭ ᒪᔅᑭᓇᔪᐤ ᒋᓴᒪᓂᑐᐛ ᑲ ᐃᔅᒋᔄᔨᒋ ᒐᒋ ᐃᓯ ᐱᒧᑕᓄᐎᒡ ᒐᒋ ᐅᒋ ᐱᒪᒋᐅᓇᓄᐎᒡ᙮ ᐊᑯ ᒂ ᒋᐸᐊᒃ ᐊᓂᔭ ᐊ ᐃᓯ ᑎᐸᔅᑯᓂᑲᓄᔨᒋ ᐊᑯ ᒂ ᐃᑕᑦ ᐊᓂᔭ ᑈᓚ, “ᐃᔅᐱ ᒋ ᑎᑯᓯᒐ ᐊᓐ ᐊᓯᒪᑭᓂᓴ ᑲ ᐎᓱᐛᑕᑦ ᓚᐃᓯᔭᔅ ᑲ ᐃᓯᓂᐧᑲᓱᑦ ᐊᑯ ᒋᒋᐛ ᒐ ᐎᔭᔨᑎᒪᓐ ᑕᓐ ᒐ ᐃᑎᓱᐛᑎᑕᓐ᙮” 23ᐊᑯ ᒂ ᐃᑕᑦ ᐊᓂᔭ ᓂᑐᐱᔪᐅ-ᐅᒋᒪᐛ ᐊᓂᔭ ᑲ ᓂᓇᑭᑐᐛᔨᒪᔨᒋ ᑈᓚ ᐃᔭᒂ ᐃᔭᐱᒡ ᒐᒋ ᓂᓇᑭᑐᐛᔨᒪᑭᓄᔨᒋ ᐊᓂᔭ ᑈᓚ ᒥᒄ ᐊᑲ ᓇᔅᒡ ᒐᒋ ᒥᒪᒋᒥᓇᑭᓄᔨᒋ᙮ ᒋ ᐃᑎᓱᐛᐤ ᑭᔭ ᒐᒋ ᐱᔅᑎᓇᑭᓄᔨᒋ ᐅᐎᒐᐛᑭᓂᔪᐛ ᒐᒋ ᐎᒋᐃᑯᔨᒋ ᑕᓐ ᒐ ᐃᓯ ᓇᓂᑐᐛᔨᑎᒥᒂᓂ ᒐᒂᔪᐤ᙮
ᑈᓪ ᑲ ᐃᔨᒪᐊᑦ ᐊᓂᔭ ᒋᓴᐅᒋᒪᐛ ᐱᓕᑭᓴ ᑭᔭ ᐊᓂᔭ ᐎᐎᔪᐛ
24ᓇᒪ ᒪᒃ ᓇᐅᔅ, ᐊᑯ ᒥᓐ ᑲ ᑎᑯᓯᐧᒃ ᐊᓐ ᒋᓴᐅᒋᒪᐤ ᐱᓕᑭᔅ, ᐎᐛ ᑐᕈᓯᓚ ᐊ ᐸᒋ ᐎᒐᐛᑦ᙮ ᒍᐤ ᒋ ᐃᑎᔅᑲᓇᓯᔪᐤ ᐊᓂᔭ ᐎᐛ᙮ ᐊᑯ ᐱᓕᑭᔅ ᒂ ᐎᓴᒪᑦ ᐊᓂᔭ ᑈᓚ, ᒂ ᓂᑐᑐᐛᑦ ᐊ ᐊᔨᒧᑎᒥᔨᒋ ᐊ ᑕᑈᔭᔨᒪᑭᓄᔨᒋ ᒋᓴᔅ ᙭ᑕ᙮ 25ᐃᔅᐱ ᒪᒃ ᐊ ᐊᑎ ᐊᔨᒧᑎᒥᔨᒋ ᑯᐃᔅᑯᑕᑎᓯᐅᓂᔪᐤ ᑭᔭ ᒐ ᐎ ᒥᔪ ᓂᓇᑭᑐᐛᔨᑎᒥᐃᑯᔨᒋ ᐊᐛᔪᐛ ᑕᓐ ᐊ ᐃᓯ ᐱᒪᑎᓯᔨᒋ, ᑭᔭ ᐊᓂᔭ ᐊᔅᒄ ᒐ ᐅᑎᒋᐱᔨᒡ ᐊ ᒋᓯᑲᔨᒡ ᐊᓐᑕ ᒋᓴᒪᓂᑐᐛ ᒥᓯᐛ ᐊᐛᔪᐛ ᒐ ᑎᐸᔅᑯᓇᔨᒋ, ᒋ ᑯᔅᑕᒍᐤ ᐱᓕᑭᔅ, ᐊᑯ ᒂ ᐃᑕᑦ ᐊᓂᔭ ᑈᓚ, “ᐊᑯᓐ ᐸᑎᒪ᙮ ᓴᔅ ᒋᑭ ᒋ ᔅᑐᑕᓐ᙮ ᐃᔅᐱᔅ ᒥᓐ ᓇᐃᐱᔭᓇ ᐊᑯ ᒥᓐ ᒐ ᐎᓴᒥᑕᓐ᙮” 26ᒥᒄ ᒪᒃ ᒋ ᑎᑯᓂᔨᒐ ᑕᓐ ᑲ ᐃᓯ ᐱᑯᓴᔨᒧᑦ ᐊᓐ ᒋᓴᐅᒋᒪᐤ ᐱᓕᑭᔅ᙮ ᒋ ᐱᑯᓴᔨᒪᒐ ᑈᓚ ᒐᒋ ᒥᔨᑯᑦ ᓱᓇᔭᔪᐤ ᑭᔭ ᒧᔅ ᒂ ᐎᓴᒪᑦ ᒐᒋ ᐃᔨᒥᐃᑯᑦ᙮
27ᓂᓱ ᐱᐳᓇ ᒪᒃ ᐃᔅᐱᔅ ᐊᑯ ᑯᑎᑲ ᐊᐛᔪᐛ ᑲ ᒥᔅᑯᑎᔅᑲᑯᑦ ᐊᓐ ᒋᓴᐅᒋᒪᐤ ᐱᓕᑭᔅ᙮ ᐳᕐᑭᔭᔅ ᐸᔅᑕᔅ ᒋ ᐃᓯᓂᐧᑲᓱᔪᐛ ᐊᓂᔭ ᑲ ᒥᔅᑯᑎᔅᑲᑯᑦ᙮ ᐊᑯ ᒪᒃ ᐱᓕᑭᔅ ᒥᒄ ᐊ ᐎ ᓂᓇᐃᑎᒪᐊᑦ ᐊᓂᔭ ᒍᐤ ᐃᔪᐛ ᐊᑯᑕ ᐊᓐᑕ ᑲᒪᑯᓄᐛᓯᐅᒋᐛᐱᒡ ᑲ ᓂᑭᑕᑦ ᐊᓂᔭᔪᐛ ᑈᓚ᙮
Currently Selected:
ᐊᑈᔅᑕᓇᒡ 24: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
