ᐊᑈᔅᑕᓇᒡ 23
23
1ᐊᑯ ᑈᓪ ᑯᐃᔅᒄ ᑲ ᑭᓄᐛᐱᒪᑦ ᐊᓂᔭ ᑲ ᒪᒧᐱᔅᑎᒥᔨᒋ ᑎᐸᔅᑯᓂᒐᐅᓂᔪᐤ, ᐊᑯ ᑲ ᐃᑕᑦ, “ᓂᐧᑲᓂᓯᑐᒄ, ᑲ ᐃᔅᐱᔅ ᐸᒋ ᐊᑐᔅᑯᐅᒃ ᒋᓴᒪᓂᑐᐤ ᓂ ᒐᔅᑎᓇᐅᓐ ᒧᔅ ᑯᐃᔅᒄ ᐊᒋ ᐃᑎᔭᓐ ᒋᓴᒪᓂᑐᐤ ᐊ ᐱᒪᑎᓯᔅᑐᐅᒃ᙮” 2ᐊᑯ ᐊᓐ ᒋᓴᐊᔭᒥᐊᐅᒋᒪᐤ ᐊᓇᓇᔭᔅ ᑲ ᐃᓯᓂᐧᑲᓱᑦ ᒂ ᐃᑎᓱᒪᑦ ᐊᓂᔭᔪᐛ ᐊᐛᔪᐛ ᒥᒋᒪ ᑈᓚ ᐊ ᑕᔨᒋ ᑲ ᓂᐳᔨᒋ ᒐᒋ ᐅᑕᒥᑐᓇᐛᔨᒋ᙮ 3ᐊᑯ ᑈᓪ ᒂ ᐃᑕᑦ, “ᒋᓴᒪᓂᑐᐤ ᒋᑭ ᐅᑕᒥᒂᐅᒄ, ᒋᔾ ᑲ ᐎ ᒪᒥᔪᓇᑯᐃᓱᔨᓐ ᒪᒂᒡ᙮ ᒋᑦ ᐊᐱᓐ ᐅᑕ ᒐᒋ ᑎᐸᔅᑯᓂᔨᓐ ᐎᓱᐛᐅᓂᒡ ᐃᔅ, ᒋᔾ ᒪᒃ ᓇᓂᑎᒻ ᐊᑲ ᓂᓇᐊᔨᑎᒥᓐ ᐊᓐ ᐎᓱᐛᐅᓐ ᐊᒋ ᐃᑎᓱᐛᔨᓐ ᒐᒋ ᐅᑕᒥᒂᐅᑯᔭᓐ ᐊᔅᒄ ᒪᒃ ᐊᑲ ᑯᐃᔅᒄ ᐅᒋ ᐃᓯ ᑎᐸᔅᑯᓂᑯᔭᓐ᙮”
4ᐊᑯ ᐊᓐᒡ ᒥᒋᒪ ᑈᓚ ᐊ ᑕᔨᒋ ᑲ ᓂᐳᐅᒡ ᑲ ᐃᑕᒡ ᐊᓂᔭ ᑈᓚ, “ᐊᐛ ᒋᐸ ᐃᓯ ᐃᔨᒪᐊᐤ ᐊᓐ ᒋᓴᐊᔭᒥᐊᐅᒋᒪᐤ ᒋᓴᒪᓂᑐᐛ ᑲ ᐅᑎᓂᑯᑦ᙮”
5ᑈᓪ ᒂ ᐃᔅᒋᔄᑦ, “ᓂᐧᑲᓂᓯᑐᒄ, ᐊᑐᒡ ᓂᐸ ᐅᒋ ᐃᑕᐤ ᐅᔭ ᒋ ᒋᔅᒐᔨᒪᐛᒐ ᐊ ᒋᓴᐊᔭᒥᐊᐅᒋᒪᐅᑦ ᐛᔅ ᑭᑈ ᑕᑈ ᐊᑯᓐ ᐊᑎᔅᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ,
ᐊᑲᐎᔾ ᒋᑭ ᐅᒋ ᒥᒋ ᐊᔨᒧᒪᐤ ᐊᐛᓐ ᐊ ᓂᑲᓂᔅᑯᐛᑦ ᒋᑦ ᐃᔨᒪ᙮”
6ᐃᔅᐱ ᒪᒃ ᓇᓯᑕᐅᓄᐛᑦ ᑈᓪ ᑕᐱᔅᑯᓐ ᓴᑎᔪᓯᐊ ᑭᔭ ᐸᕆᓯ ᐊ ᑕᔨᒋ ᐊᓐᑕ ᐊᓂᔭ ᐊ ᒪᒧᐎᔨᒋ ᑲ ᒪᒧᐱᔅᑎᒥᔨᒋ ᑎᐸᔅᑯᓂᒐᐅᓂᔪᐤ, ᒋ ᐃᑕᐤ ᐊ ᒋᔄᐛᑦ, “ᓂᐧᑲᓂᓯᑐᒄ, ᐸᕆᓯ ᓂᔾ, ᑭᔭ ᐊᓂᔭᐧᑲ ᓂᑦ ᐊᓂᔅᒐ ᓂᐧᑲᓂᓯᒡ ᐸᕆᓯ ᒋ ᐃᑎᐳᒡ᙮ ᐊᐅᒄ ᐅ ᐛᒋ ᑎᐸᔅᑯᓂᑯᔭᓐ ᐅ ᐊᓄᒡ, ᐊ ᑕᑈᑎᒪᓐ ᑲ ᓂᐱᒡ ᑲᐤ ᒐ ᐅᓂᔅᑲᒡ᙮” 7ᐃᔅᐱ ᒪᒃ ᐅᔭ ᑲ ᐃᔅᒋᔄᑦ ᑈᓪ, ᐊᓐᒡ ᐸᕆᓯᔨᒡ ᑭᔭ ᐊᓐᒡ ᓴᑎᔪᓯᒡ ᒋ ᒋᒋ ᒥᒋᐱᔪᒡ, ᐛᔅ ᑕᐸ ᐸᐃᑯᓄᒡ ᐅᒋ ᐃᓯ ᑕᑈᑎᒧᒡ ᐅᔭ᙮ 8ᐊᓐᒡ ᓴᑎᔪᓯᒡ ᓇᒪ ᑕᑈᑎᒧᒡ ᒐ ᐅᓂᔅᑲᔨᒋ ᐊᓂᔭ ᑲ ᓂᐱᔨᒋ᙮ ᓇᒪ ᑭᔭ ᑕᑈᑎᒧᒡ ᐊᓐᒋᓇ ᑭᔭ ᐊᒐᒂ ᐊ ᑕᔨᒋ᙮ ᐊᑯ ᒪᒃ ᐎ ᐊᓐᒡ ᐸᕆᓯᔨᒡ ᒥᓯᐛ ᐃᓯ ᑕᑈᑎᒧᒡ ᐅᔭ᙮
9ᐊᑯ ᐊᔭᔅᒃ ᑲ ᐊᑎ ᒥᔅᑎ ᒋᔄᐛᒡ ᐊ ᐃᔨᒥᐃᑐᒡ ᐅᒡ ᐸᕆᓯᔨᒡ ᑭᔭ ᓴᑎᔪᓯᒡ ᐊ ᒥᒋᐱᔨᒡ᙮ ᐊᑯ ᐊᓐᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᐸᕆᓯ ᑲ ᐃᑎᐱᒡ ᒂ ᐱᓯᑯᒡ ᐊᑯ ᒂ ᐃᔅᒋᔄᒡ, “ᓇᒪ ᐎ ᓂᔭᓐ ᓂ ᒥᔅᑭᒺᓇᓐ ᒐᒂᔪᐤ ᒐ ᐅᒋ ᐛᐛᓯᐊᑭᓄᐅᑦ ᐅ ᓇᐸᐤ᙮ ᒐᒃ ᒪ ᑕᑈ ᑲ ᐃᔨᒥᐃᑯᒂ ᐊᒐᒂ ᑭᔭ ᒪᒃ ᐊᓐᒋᓐ᙮”
10ᒐᒃ ᒪᒃ ᐊᓂᔭ ᐊ ᐃᔅᐱᔅ ᒥᔅᑎ ᒥᒋᐱᔨᓇᓄᐎᒡ, ᐊᓐ ᓂᑐᐱᔪᐅ-ᐅᒋᒪᐤ ᒐᒃ ᒋ ᑯᔅᐱᓇᔨᑎᒻ ᒐᒋ ᐎᔭᔅᑐᑐᐛᑭᓄᔨᒋ ᑈᓚ᙮ ᐊᑯ ᒂ ᐃᑕᑦ ᐊᓂᔭ ᐅᑦ ᐊᓯᒪᑭᓂᓯᒻ ᒐᒋ ᐱᑎᑲᐊᔨᒋ ᑈᓚ ᐊᓐᑕ ᐊᓂᔭ ᐊᓯᒪᑭᓂᓯᐅᒋᐛᐱᒡ᙮
11ᐊᓂᔭ ᒪᒃ ᑕᐱᔅᑲᔨᒡ, ᐅᑎᐸᔨᒋᒐᐤ ᒋ ᐸᒋ ᓂᐳᐅᔪᐛ ᐊᓐᑕ ᑈᓪ ᐊ ᑕᑦ ᐊᑯ ᒂ ᐃᑎᑯᑦ, “ᓱᒃ ᐎ ᓱᒋᑕᐊ, ᔅᒋ ᐊᔨᒧᒥᓐ ᐅᑕ ᒋᕈᓯᓕᒥᒡ, ᐊᐅᑯᓐ ᒪᒃ ᒐ ᐃᑎᔨᓐ ᑭᔭ ᐊᓐᑕ ᕈᒥᒡ᙮”
ᒍᐤ ᐃᔪᒡ ᑲ ᐎᔭᔨᑕᒡ ᒐ ᓂᐸᐊᒡ ᑈᓚ
12ᐊᓐ ᒪᒃ ᒥᓐ ᐎᔭᐸᒡ ᒋ ᑕᐅᒡ ᒍᐤ ᐃᔪᒡ ᐊ ᒪᒧᐤ ᓂᔅᑯᒧᒡ ᑭᔭ ᐊ ᒪᒧᐤ ᑕᑈᒡ ᐊ ᐃᔅᒋᔄᒡ ᒐᔅᑎᓇᔅ ᒐ ᐊᑲ ᐅᒋ ᒥᒋᓱᒡ ᑭᔭ ᒐ ᐊᑲ ᐛᐛᒡ ᒥᓂᒡ ᒐᒂᔪᐤ ᐸᑐᔅ ᒋ ᓂᐸᐊᑥᐛ ᑈᓚ᙮ 13ᐅᔅᑕ ᒪᒃ ᓇᐎᔪᐤ ᒋ ᐃᑕᑎᓯᒡ ᐅᒡ ᐅᔭ ᑲ ᐃᔅᒋᔄᒡ᙮ 14ᐊᑯ ᒂ ᓂᑐᐛᐱᒪᒡ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐊᔭᒥᐊᐅᒋᒪᐛ ᑭᔭ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐊᓂᔭᔪᐛ ᐃᔪᐛ ᐊᑯ ᒂ ᐃᑕᒡ, “ᐅᑕ ᐅ ᐊ ᑎᓯᔭᒡ ᓂᒋ ᒪᒧᐤ ᓂᔅᑯᒧᓇᓐ ᒐ ᐊᑲ ᓇᔅᒡ ᐅᒋ ᒥᒋᓱᔭᒡ ᐸᑐᔅ ᒋ ᓂᐸᐃᒋᒐ ᑈᓪ᙮ 15ᒋᔨᐛᐤ ᑭᔭ ᐊᓐᒡ ᑲ ᒪᒧᐱᔅᑕᒡ ᑎᐸᔅᑯᓂᒐᐅᓂᔪᐤ, ᐃᑎᓱᒪᐧᒄ ᑭᔭ ᐊᓐ ᓂᑐᐱᔪᐅ-ᐅᒋᒪᐤ ᒐᒋ ᐸᑥᑕᒄ ᐊᓂᔭ ᑈᓚ, ᒧᔭᒻ ᒥᓐ ᐊ ᐎ ᑯᒂᒋᒪᒄ ᒐᒂᔪᐤ ᒋᐸ ᐃᑐᑐᐛᐛᐤ᙮ ᓂᔭᓐ ᐎ ᓂᑭ ᒋ ᓂᐸᐊᓇᓐ ᑈᓪ ᐊᔅᒄ ᐊᑲ ᐅᑕ ᐸᓱᐛᑭᓄᐅᑦ᙮”
16ᐅᔭ ᒪᒃ ᑲ ᐃᔅᒋᔄᒡ ᐅᒡ ᑲ ᐎ ᓂᐸᐊᒡ ᑈᓚ ᒧᔭᒻ ᒋ ᐃᑕᔨᑯᐱᓇ ᑯᐸᓇᓴ ᐊᓐᑕ ᐊᓂᔭ ᑲ ᑕᒡ᙮ ᑈᓪ ᒪᒃ ᐎᐧᑲᓂᓴ ᐅᔭ ᐅᑯᓯᔪᐛ᙮ ᑭᑈ ᐱᔭᑕᐧᒃ ᐊᓐ ᓇᐸᔅ ᐅᔭ ᐊ ᐃᓯ ᐊᔨᒧᒪᑭᓄᔨᒋ ᐊᓂᔭ ᐅᐧᑯᒥᓴ ᑈᓚ᙮ ᒂ ᐱᒐᑦ ᐊᓐᑕ ᐊᓂᔭ ᐊᓯᒪᑭᓂᓯᐅᒋᐛᐱᔪᐤ ᐊᓐᑕ ᑲ ᑭᓄᐛᔨᒪᑭᓄᔨᒋ ᑈᓚ, ᐊᑯ ᒂ ᐎᑎᒧᐛᑦ ᑕᓐ ᑲ ᐃᓯ ᐸᑕᐧᒃ᙮
17ᑈᓪ ᒂ ᐎᓴᒪᑦ ᐸᐃᒄ ᐊᓂᔭ ᑲ ᓂᑲᓂᔅᑯᐛᔨᒋ ᐊᓯᒪᑭᓂᓴ, ᐊᑯ ᒂ ᐃᑕᑦ, “ᐃᑐᑕᐃ ᐊᓐ ᐅ ᓇᐸᔅ ᓇᑕ ᓂᑐᐱᔪᐅ-ᐅᒋᒪᐛ ᐊ ᑕᔨᒋ᙮ ᑎᑯᓂᔪᐤ ᒐᒂᔪᐤ ᐛᐎᑎᒧᐛᑦ᙮” 18ᐊᑯ ᑭᑈ ᐊᓐ ᑲ ᓂᑲᓂᔅᑯᐛᑦ ᐊᓯᒪᑭᓂᓴ ᒂ ᐃᑐᑕᐊᑦ ᐊᓂᔭ ᓇᐸᓴ ᐊᓐᑕ ᓂᑐᐱᔪᐅ-ᐅᒋᒪᐛ ᐊ ᑕᔨᒋ, ᐊᑯ ᒂ ᐃᑕᑦ ᐊᓂᔭ ᓂᑐᐱᔪᐅ-ᐅᒋᒪᐛ, “ᐊᓐ ᑲ ᒪᑯᓇᑭᓄᐅᑦ ᑈᓪ ᓂᒋ ᐃᑎᒄ ᒐᒋ ᐸᓯᒥᒋ ᐅᔭ ᓇᐸᓴ ᐅᑕ ᐊ ᑕᐅᑦ, ᒋ ᐎ ᐃᑎᑯᔪᐛ ᒐᒂᔪᐤ᙮”
19ᐊᑯ ᐊᓐ ᓂᑐᐱᔪᐅ-ᐅᒋᒪᐤ ᒂ ᐅᑎᓂᒺᑦ ᐊᓂᔭ ᓇᐸᓴ ᐅᑎᒋᔪᐤ, ᒂ ᐃᑐᑕᐊᑦ ᐊᓐᑕ ᒥᒄ ᐎᔨᐛᐤ ᒐᒋ ᓂᓯᒡ, ᐊᑯ ᒂ ᐃᑕᑦ, “ᒐᒂᓐ ᑲ ᐎ ᐸᒋ ᐎᑎᒧᔨᓐ ?”
20ᐊᑯ ᐊᓐ ᓇᐸᔅ ᒂ ᐃᔅᒋᔄᑦ, “ᐊᓐᒡ ᑲ ᓂᑲᓂᔅᑯᐛᒡ ᒍᐤ ᐃᔪᐛ ᒋᑭ ᐃᑎᑯᐅᒡ ᐛᐸᓂᔨᒐ ᒐᒋ ᐃᑐᑕᐃᒪᑯ ᑈᓚ ᓇᑕ ᑲ ᒪᒧᐱᔅᑎᒥᔨᒋ ᑎᐸᔅᑯᓂᒐᐅᓂᔪᐤ ᐊ ᑕᔨᒋ, ᒧᔭᒻ ᒥᓐ ᒐᒂᔪᐤ ᐊ ᐎ ᐃᓯ ᓂᑐ ᒋᔅᒐᔨᒪᒡ ᒋᑭ ᐃᑐᐅᒡ᙮ 21ᐊᑲᐎᔾ ᒥᒄ ᑕᑈᑐᐅᒡ᙮ ᐅᔅᑕ ᓇᐎᔪᐤ ᐃᑕᑎᓯᒡ ᐊᓐᒡ ᐊ ᑎᑯᓂᔨᒡ ᐊᓐᑕ ᑭᔭᓱᒡ ᐊ ᐊᓱᐛᐱᒪᒡ ᒐ ᐃᔅᐱᔅ ᐃᑐᑕᐊᑭᓄᔨᒋ ᐊᓐᑕ ᑎᐸᔅᑯᓂᒐᐅᒋᐛᐱᒡ᙮ ᐛᔅ ᒋ ᓇᔅᐱᒡ ᑕᑈᐅᒡ ᒐ ᐊᑲ ᐅᒋ ᒥᒋᓱᒡ ᑭᔭ ᒐ ᐊᑲ ᐅᒋ ᒥᓂᒡ ᒐᒂᔪᐤ ᐸᑐᔅ ᒋ ᓂᐸᐊᑥᐛ ᐊᓂᔭ ᑈᓚ᙮ ᓴᔅ ᒪᒃ ᐊᔭᔅᑯᐎᔪᒡ ᐅᔭ ᒐ ᐃᑎᒡ, ᒥᒄ ᐊᓱᐛᐱᒪᐅᒡ ᒐ ᐃᔅᐱᔅ ᐃᑐᑕᐊᑭᓄᔨᒋ ᓇᑕ᙮”
22ᐊᑯ ᐊᓐ ᓂᑐᐱᔪᐅ-ᐅᒋᒪᐤ ᒂ ᐃᑕᑦ ᐊᓂᔭ ᓇᐸᓴ, “ᐊᑲᐎᔾ ᐊᐛᓐ ᐎᑎᒧᐤ ᑕᓐ ᑲ ᐃᓯ ᐎᑎᒧᔨᓐ ᐊᓄᒡ᙮” ᐊᑯ ᒂ ᒋᐛᑎᓯᐛᑦ ᐊᓂᔭ ᓇᐸᓴ᙮
ᑈᓪ ᑲ ᐃᑎᓴᐛᑭᓄᐅᑦ ᐊᓐᑕ ᒋᓴᐅᒋᒪᐤ ᐱᓕᑭᓴ ᐊ ᑕᔨᒋ
23ᐊᑯ ᐊᓐ ᓂᑐᐱᔪᐅ-ᐅᒋᒪᐤ ᒂ ᐎᓴᒪᑦ ᓂᓱ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐅᑦ ᐊᓯᒪᑭᓂᓯᒪ, ᐊᑯ ᒂ ᐃᑕᑦ, “ᐊᔭᔅᑯᐎᔨᒡ ᓂᓱ ᒥᑕᓯᒥᑎᓄᐤ ᐊᓯᒪᑭᓂᓯᒡ ᑭᔭ ᓂᔄᐅᑕᒡ ᑕᑐᔪᐤ ᐊᓐᒡ ᑲᐸᐃᑭᔎᐛ ᑲᒋ ᐊᐱᒋᐊᒡ ᐊ ᒪᓯᒐᒡ ᑭᔭ ᓂᓱ ᒥᑕᓯᒥᑎᓄᐤ ᐊᓯᒪᑭᓂᓯᒡ ᒧᐧᑯᒪᓇ ᑲ ᒪᓯᒐᐛᒐᒡ ᒐᒋ ᐃᑐᑕᒡ ᓯᓴᕆᔭᒡ᙮ ᐊᓄᒡ ᒪᒃ ᐅᔭ ᒐ ᐅᑕᑯᓯᔨᒡ ᐸᐃᑯᔅᑕᐤ ᐃᔅᐱᔨᒐ ᒐ ᔅᑐᑕᒡ᙮ 24ᔭᐃᑕᔾ ᐅᑎᓂᒺᒄ ᑈᓪ ᑲᐸᐃᑭᔎᐛ ᒐᒋ ᐱᒧᑕᐃᑯᑦ᙮ ᐊᑯ ᓇᑕ ᒋᓴᐅᒋᒪᐛ ᐱᓕᑭᓴ ᐊ ᑕᔨᒋ ᒐ ᐃᑐᑕᐊᒄ᙮ ᐃᔭᒂ ᓂᓇᑭᑐᐛᔨᒪᐧᒄ ᒐ ᐊᑲ ᒋ ᐎᔭᔅᑐᑕᑯᑦ ᐊᐛᔪᐛ᙮”
25ᐊᑯ ᐊᓐ ᓂᑐᐱᔪᐅ-ᐅᒋᒪᐤ ᒂ ᒥᓯᓇᐃᒐᑦ ᐊ ᐃᑎᔅᑕᑦ,
26“ᓂᔾ ᑲᓗᑎᔭᔅ ᓚᐃᓯᔭᔅ,
ᒋᔾ ᒋᓴᐅᒋᒪᐤ ᐱᓕᑭᔅ ᒋ ᒥᓯᓇᐊᒪᑎᓐ,
27ᐅ ᓇᐸᐤ ᑲ ᐃᑎᓴᐅᒃ ᐊ ᐃᑕᐅᑦ ᒍᐤ ᐃᔪᐛ ᒋ ᒪᑯᓂᑯᐤ, ᑭᔭ ᒋ ᐎ ᓂᐸᐃᑯᐤ᙮ ᐃᔅᐱ ᑲ ᐎᑎᒪᑯᔭᓐ ᕈᒻ ᐊ ᐃᓯ ᒥᓯᓇᓱᑦ, ᐊᑯ ᒂ ᓇᑎᒧᒃ ᓂᑦ ᐊᓯᒪᑭᓂᓯᒻ ᐊᒋ ᐎᒐᐅᒥᒡ᙮ 28ᓂᒋ ᐎ ᓂᑐ ᒋᔅᒐᔨᑎᒺᓐ ᒐᒂᔪᐤ ᐊᓂᔭ ᑲ ᐃᓯ ᒪᒥᓯᒪᒡ, ᐊᑯ ᒂ ᐃᑐᑕᐃᒥᒋ ᐊᓐᑕ ᒍᐤ ᑲ ᒪᒧᐱᔅᑎᒥᔨᒋ ᑎᐸᔅᑯᓂᒐᐅᓂᔪᐤ ᐊ ᑕᔨᒋ᙮ 29ᐃᔅᐱ ᒪᒃ ᐛᑎᒪᑯᔭᓐ ᑕᓐ ᑲ ᐃᓯ ᑎᐸᔅᑯᓇᑭᓄᐅᑦ ᐅ ᓇᐸᐤ ᓇᒪ ᒐᒂᔪᐤ ᐅᒋ ᐃᑐᐤ ᒐᒋ ᐅᒋ ᐛᐛᓯᐊᑭᓄᐅᑦ ᒪᒃ ᒐᒋ ᐅᒋ ᓂᐸᐊᑭᓄᐅᑦ᙮ ᐊᑲ ᒪᒧᔭᒻ ᐊᑐᑕᐧᒃ ᒍᐤ ᐎᓱᐛᐅᓇ ᐊᑯᓐ ᑲ ᐃᓯ ᒪᒥᓯᒪᑭᓄᒂ᙮ 30ᒐᒃ ᒂ ᐎᑎᒪᑯᔭᓐ ᐊ ᑕᔨᒋ ᒍᐤ ᐃᔪᐛ ᐊ ᐎ ᓂᐸᐃᑯᑦ, ᐊᑯ ᒂ ᐃᑕᔨᑎᒪᓐ ᒐᒋ ᐃᑎᓴᐅᒃ ᐊᓐᑕ ᐊ ᑕᔨᓐ᙮ ᐊᑯ ᒪᒃ ᐛ ᐃᑎᒂᐤ ᐊᓐᒡ ᑲ ᐃᔅᒋᔄᒡ ᐊᑲ ᓂᓇᐊᔨᑎᒥᔨᒋ ᐎᓱᐛᐅᓂᔪᐤ, ᒐᒋ ᐎᑎᒪᔅᒡ ᑕᓐ ᐊ ᐃᓯ ᒪᒥᓯᒪᒡ᙮ ᒐ ᐛᑕᔨᑎᒥᓐ ᒪᒃ ᑕᓐ ᒐ ᐃᑐᑐᐛᑭᓄᐅᑦ᙮ ᒋ ᐛᒋᔭᒥᑎᓐ ᒪᒃ᙮”
31ᐊᑯᓐ ᑭᑈ ᑲ ᐃᑎᒡ ᐊᓐᒡ ᐊᓯᒪᑭᓂᓯᒡ ᐊᓂᔭ ᑲ ᐃᑎᓱᒪᑭᓄᐎᒡ᙮ ᒋ ᓂᑐᐛᐱᒪᐅᒡ ᑈᓚ ᐊᓂᔭ ᑕᐱᔅᑲᔨᒡ, ᐊᑯ ᒂ ᔅᑐᑕᐊᒡ᙮ ᐊᓐᑎᐸᑦᕆᔅ ᒪᒃ ᑲ ᐃᓯᓂᐧᑲᑕᔨᒋ ᐅᑕᓇᔪᐤ ᒋ ᐃᔅᐱᔅ ᐃᑐᑕᐊᐅᒡ᙮ 32ᐊᓂᔭ ᒪᒃ ᐎᔭᐱᓂᔨᒡ, ᒋ ᒋᐛᐅᒡ ᐊᓐᒡ ᑲ ᐱᒧᑕᒡ ᐊᓯᒪᑭᓂᓯᒡ᙮ ᐊᑯ ᐊᓐᒡ ᐊᓯᒪᑭᓂᓯᒡ ᑲᐸᐃᑭᔎᐛ ᑲ ᐊᐱᒋᐊᒡ ᒂ ᐎᒐᐛᒡ ᐊᓂᔭ ᑈᓚ᙮ 33ᐊᓐᑕ ᒪᒃ ᓯᓴᕆᔭᒡ ᐊᑯᑕ ᑲ ᐃᑐᑕᐊᒡ᙮ ᐃᔅᐱ ᒪᒃ ᑕᑯᓯᓂᒡ ᐊᓐᑕ ᐊᑯ ᒂ ᒥᔭᒡ ᐊᓂᔭ ᒋᓴᐅᒋᒪᐛ ᐱᓕᑭᓴ ᐊᓂᔭ ᒥᓯᓇᐃᑭᓂᔪᐤ ᑲ ᐊᐱᒋᐊᑭᓄᐎᒡ ᒐᒋ ᒥᔭᒡ᙮ ᑈᓚ ᑭᔭ ᒂ ᐱᔅᑎᓇᒡ ᐊᓐᑕ ᐱᓕᑭᓴ ᐊ ᑕᔨᒋ᙮ 34ᐊᑯ ᐊᓐ ᒋᓴᐅᒋᒪᐤ ᒂ ᐃᔨᒥᑕᑦ ᐊᓂᔭ ᒥᓯᓇᐃᑭᓂᔪᐤ᙮ ᑲᒋ ᐃᓯ ᐃᔨᒥᑕᑦ ᒪᒃ ᐊᑯ ᑲ ᑯᒂᒋᒪᑦ ᐊᓂᔭ ᑈᓚ ᑕᓐᑕ ᐛᒋᔨᒋ᙮ ᐃᔅᐱ ᒐᔅᒐᔨᑕᐧᒃ ᐊᓐᑕ ᓯᓕᓯᔭ ᐊ ᐅᒋᔨᒋ, 35ᒋ ᐃᑕᐤ ᐊᓂᔭ ᑈᓚ, “ᐃᔅᐱ ᑎᑯᓯᒂᐛ ᐊᓐᒡ ᑲ ᐎ ᑎᐸᔅᑯᓂᔅᒡ ᐊᑯᑕ ᐃᔭᒂ ᒐ ᓂᑐᑎᒪᓐ ᑕᓐ ᐛ ᐃᓯ ᑎᐸᔅᑯᓂᑯᐅᓇ᙮” ᐊᑯ ᒂ ᐃᑎᓱᒪᑦ ᐅᑦ ᐊᓯᒪᑭᓂᓯᒻ ᒐᒋ ᓂᓇᑭᑐᐛᔨᒪᔨᒋ ᐊᓂᔭ ᑈᓚ ᐊᓐᑕ ᐊᕈᑕ ᐅᒋᓴᐅᒋᒪᐅᒋᐛᐱᒡ᙮
Currently Selected:
ᐊᑈᔅᑕᓇᒡ 23: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
