2 ᑎᒧᑎ 2
2
ᒋᓴᔅ ᙭ ᐅᒥᔪᐤ ᒪᓯᒐᐤ ᐃᔨᒪ
1ᒋᔾ, ᓂᑯᓯᐧᑲᐅᓐ ᑎᒧᑎ, ᓱᒃ ᐎ ᓱᐧᑲᑎᓯ ᙭ ᒋᓴᔅ ᐅᒋᓴᐛᑎᓯᐅᓂᒡ ᐅᒡ᙮ 2ᔅᒋ ᐸᑐᐅᓐ ᑕᓐ ᑲ ᐃᓯ ᒋᔅᑯᑎᒪᒐᔭᓐ ᐊᓐᑕ ᒪᒂᒡ ᐊ ᒥᒐᑎᓇᓄᐅᒡ᙮ ᐅ ᒪᒃ ᑲ ᐃᓯ ᒋᔅᑯᑎᒪᒐᔭᓐ ᒐ ᐱᔅᑎᓇᑯᒡ ᐊᓐᒡ ᑲ ᑕᑈᐅᒐᔨᑕᑯᓯᒡ ᒐᒋ ᐊᓱ ᒋᔅᑯᑎᒧᐛᒡ ᑯᑎᑲ ᐊᐛᔪᐛ᙮ 3ᓱᒃ ᐎ ᓯᐱᔪᐛᓯ ᐊ ᐊᔨᒧᐎᔨᓐ ᒧᔭᒻ ᙭ ᒋᓴᔅ ᐅᒥᔪᐤ ᒪᓯᒐᐤ ᐃᔨᒪ ᐊ ᐃᑎᔨᒋ᙮ 4ᐛᔅ ᒪᓯᒐᐤ ᐃᔪᐤ ᓱᒃ ᑯᒋᑕᐤ ᒐᒋ ᓇᐊᔨᑎᒪᐊᑦ ᐊᓂᔭ ᑲ ᓂᑲᓂᔅᑲᑯᑦ ᑭᔭ ᓇᒪ ᓇᔅᒡ ᐊᐱᑕᔨᑎᒥᐃᑯᐤ ᒐᒋ ᐎᒋᐃᐛᑦ ᑕᓐ ᐊ ᐃᑎᓇᓄᐎᒡ ᐅᑕ ᐊᔅᒋᒡ᙮ 5ᐱᒪᑎᓯ ᑕᓐ ᐊ ᐃᓯ ᓂᑐᐛᔨᒥᔅᒃ ᒋᓴᒪᓂᑐᐤ ᒐᒋ ᐃᓯ ᐱᒪᑎᓯᐅᑦ᙮ ᐛᔅ ᐊᐛᓐ ᑲ ᐎᒋᐃᐛᑦ ᐊ ᒋᒋᐸᑕᓄᐎᒡ ᓇᒪ ᒋᑭ ᐅᒋ ᑲᓂᔪᐤ ᐸᑐᔅ ᐃᔭᒂ ᓂᓇᑭᑐᐛᔨᑕᒐ ᐊᓂᔭ ᑕᓐ ᐊ ᐃᓯ ᑎᑯᓂᔨᒡ ᒋᐸ ᐃᓯ ᓂᓇᑭᑐᐛᔨᑎᒻ᙮ 6ᑭᔭ ᓂᑕᐅᒋᒐᓱᐤ ᓱᒃ ᑲ ᐊᑐᔅᒐᑦ ᐃᑕᔨᑕᑯᓂᔪᐤ ᐎᔾ ᓂᔅᑎᒻ ᒐᒋ ᐸᒂᓂᒪᓱᑦ ᐊᓂᔭ ᑕᓐ ᑲ ᐃᓯ ᓂᑕᐅᒋᑕᑦ᙮ 7ᒪᒥᑐᓇᔨᑕ ᐅ ᑕᓐ ᑲ ᐃᓯ ᐛᐎᑎᒪᑕᓐ ᐛᔅ ᐅᑎᐸᔨᒋᒐᐤ ᒋᑭ ᐃᑐᑕᒄ ᒐᒋ ᓂᔅᑐᑎᒥᓐ ᒥᓯᐛ ᒐᒂᓐ᙮
2 Timothy 2.8-15 (Proper-23 Year C)
8ᒧᔅ ᑭᔭ ᒐ ᒋᔅᒋᓯᔨᓐ ᑕᓐ ᑲ ᐃᓯ ᐛᐎᑎᒪᓐ ᒥᔽᒋᒧᐅᓐ ᐊ ᐊᔨᒧᒥᒃ ᒋᓴᔅ ᙭ ᐊᒋ ᐅᓂᔅᑲᓇᑭᓄᐅᑦ ᓂᐳᐅᓂᒡ ᐅᒡ ᑭᔭ ᑎᐱᑕ ᐊ ᑕᔨᒋ ᐊᒋ ᐅᒋ ᐊᓂᔅᒐ ᐱᒪᑎᓯᑦ᙮ 9ᐛᔅ ᐊ ᐛᐎᑎᒪᓐ ᐅ ᒥᔽᒋᒧᐅᓐ ᐊᐅᒄ ᐛᒋ ᓂᓇᐧᑲᑕᔨᒧᔭᓐ, ᑭᔭ ᒧᔭᒻ ᐊᐛᓐ ᐊᒋ ᒥᒋᑐᑕᐧᒃ ᑲᒋ ᒪᒪᒋᒂᐱᔅᑲᐛᑭᓄᐅᑦ ᐊᐅᑯᓐ ᐊ ᐃᑐᑕᑯᐅᔭᓐ, ᒥᒄ ᒪᒃ ᓇᒪ ᒋᑭ ᒋ ᒪᒪᒋᒂᐱᔅᑲᐃᑭᓄᐅᔪᐤ ᒋᓴᒪᓂᑐᐤ ᐅᑦ ᐃᔨᒧᐅᓐ᙮ 10ᐊᑯ ᒪᒃ ᐊ ᓱᒋᐱᔨᒡ ᒥᓯᐛ ᒐᒂᓐ ᒐᒋ ᓴᐧᑯᒋᑕᔭᓐ ᑕᓐ ᒐ ᐃᓯ ᓂᓇᐧᑲᒋᐃᑯᐛᓇ, ᐊ ᐱᑯᓴᔨᒧᔭᓐ ᐊᓂᔭᔪᐛ ᒋᓴᒪᓂᑐᐤ ᑲ ᐅᑎᓇᑦ ᒐ ᐅᑦ ᐃᔨᒥᑦ ᒐ ᐊᔭᔨᒋ ᐱᒪᒋᐃᑯᓯᐅᓂᔪᐤ ᑭᔭ ᑲᒋᒡ ᒋᔅᑕᔨᑕᑯᓱᐅᓂᔪᐤ ᙭ ᒋᓴᓴ ᐊ ᑕᔨᒋ ᑲ ᐅᒋᐱᔨᒡ᙮
11ᐛᔅ ᑕᑈᒥᑭᓐ ᐅ ᑲᒋ ᐃᓇᓄᐅᒡ,
“ᒐ ᐎᒋ ᓂᐱᒪᐅᒂ, ᒋᑭ ᐎᒋ ᐱᒪᑎᓯᒪᓄᐤ ᑭᔭ᙮
12ᒧᓯᓇᐤ ᒐ ᓯᐱᔪᐛᓯᔅᑎᒧᐛᐅᒂ ᓂᓇᐧᑲᑕᔨᒧᐅᓐ, ᒋᑭ ᐎᒋ ᑎᐸᔨᒋᒐᒪᓄᐤ᙮
ᑭᔭ ᐃᔅᒋᔄᔭᒂ ᐊᑲ ᒋᔅᒐᔨᒪᐧᒄ, ᑭᔭ ᐎᔾ ᒋᑭ ᐃᔅᒋᔄᐤ ᐊᑲ ᒋᔅᒐᔨᒥᑕᐧᒄ᙮
13ᐊᑲ ᒪᒃ ᑯᐃᔅᒄ ᐃᑎᔭᒂ, ᐃᔭᐱᒡ ᑯᐃᔅᒄ ᒋᑭ ᐃᑐᐤ ᐎᔾ ᙭,
ᐛᔅ ᓇᒪ ᐃᔭᒡ ᒋᑭ ᒋ ᐃᑕᔨᑕᑯᓱᐤ ᑕᓐ ᐊ ᐃᑕᔨᑕᑯᓯᑦ᙮”
ᐊ ᐃᓯ ᓇᐊᔨᑕᑯᓯᑦ ᐊᑐᔅᒐᔭᑭᓐ
14ᒧᔅ ᒪᒃ ᒋᔅᒋᓱᒥᒡ ᒋᑦ ᐃᔨᒥᒡ ᐅᔭᔪᐤ ᑭᔭ ᐅᑎᔅᑯᐤ ᒋᓴᒪᓂᑐᐛ ᐊ ᑕᔨᒋ ᐃᔭᒂᒥᒥᒡ ᒐ ᐊᑲ ᒋ ᒪᒥᒋᐱᔨᐃᑐᒡ ᐃᔨᒧᐅᓂᔪᐤ ᐅᒋ, ᐛᔅ ᓇᒪ ᓇᔅᒡ ᒥᔪ ᐎᒋᐃᐛᒥᑭᓐ ᐅ ᐊ ᐃᑎᓇᓄᐅᒡ᙮ ᑎᑯᓂᔪᐤ ᑕᓐ ᐊ ᐃᓯ ᒥᒋᑐᑕᑯᒡ ᐊᓐᒡ ᑲ ᓂᑐᑐᐛᒡ᙮ 15ᓱᒃ ᒧᔅ ᐎ ᐃᑐᑕ ᐊᓐ ᒪᐅᒡ ᐊ ᑭᔅᒋᐅᔨᓐ ᐊ ᐃᑐᑎᒥᓐ ᒐᒂᓐ ᐊᓂᔭ ᒐ ᓇᐊᔨᑎᒪᐃᑯᑦ ᒋᓴᒪᓂᑐᐤ, ᒧᔭᒻ ᐊᐛᓐ ᓱᒃ ᑲ ᐊᑐᔅᒐᑦ ᐊᑲ ᑎᑯᓂᔨᒡ ᑕᓐ ᒐ ᐃᓯ ᓴᒂᔨᒧᐃᑯᑦ ᐅᑦ ᐊᑐᔅᒐᐅᓐ᙮ ᐊᐛᓐ ᑯᐃᔅᒄ ᑲ ᐃᓯ ᒋᔅᑯᑎᒪᒐᑦ ᑕᓐ ᐊ ᐃᓯ ᑕᑈᒥᑭᓂᔨᒡ ᒋᓴᒪᓂᑐᐤ ᐅᑦ ᐃᔨᒧᐅᓐ ᐊᐅᑯᓐ ᒋᐸ ᐃᑎᓐ᙮
16ᐊᑲᐎᔾ ᐃᔭᔨᒪᔨᑎᒥᐃᑯ ᓂᑎᒥᒄ ᐃᔨᒧᐅᓐ ᐊᑲ ᐊᔨᒧᒪᑭᓄᐅᑦ ᒋᓴᒪᓂᑐᐤ, ᑭᔭ ᐊᑲ ᒋᐧᑲᐛᓯᑕᒂᒡ ᒐᒂᓐ ᐊ ᐃᔭᔨᒺᐛᔪᐛᒡ ᐛᔅ ᓇᒪ ᐎᒋᐃᑯᐤ ᐊᐛᓐ ᐅᔭ ᐊ ᐃᓯ ᐃᔨᒥᓇᓄᐎᒡ᙮ ᐃᑐᑕᑯᐤ ᒥᒄ ᐊᑐᐎᔅ ᒐᒋ ᐊᔭᐛᐱᒪᑦ ᒋᓴᒪᓂᑐᐛ᙮ 17ᐅ ᐊ ᐃᓯ ᐃᔨᒥᓇᓄᐅᒡ ᒧᔭᒻ ᑲ ᒧᐅᐛᒡ ᐊᐧᑯᓱᐅᓐ ᐊᐅᑯᓐ ᒧᔭᒻ ᐊ ᐃᑕᔨᑕᒂᒡ᙮ ᐊᓐᒡ ᒪᒃ ᐃᒥᓇᔭᔅ ᑭᔭ ᐸᐃᓕᑕᔅ ᐊᐅᑯᓐ ᐊ ᐃᑎᒡ ᐊ ᒋᔅᑯᑎᒪᒐᒡ᙮ 18ᒋ ᓂᑭᑎᒧᒡ ᑕᑈᐅᓂᔪᐤ, ᐊᑯ ᑲ ᐃᑐᑐᐛᒡ ᐱᔅᒐ ᐊᓂᔭ ᑲ ᑕᑈᑎᒥᔨᒋ ᒐ ᐊᑲ ᒋ ᐊᑎ ᓴᐸᔨᑎᒥᔨᒋ ᐊ ᑕᑈᑎᒥᔨᒋ, ᐛᔅ ᒋ ᒋᔅᑯᑎᒪᒐᐅᒡ ᐊ ᐃᔅᒋᔄᒡ ᓴᔅ ᐊᒋ ᐅᓂᔅᑲᓇᑭᓄᔨᒋ ᑲ ᑕᑈᑎᒥᔨᒋ᙮ 19ᒥᒄ ᒪᒃ ᐊᓂᔭ ᒋᓴᒪᓂᑐᐤ ᐅᒋᔅᑯᑎᒪᒐᐅᓐ ᑕᓐ ᐊ ᐃᓯ ᑕᑈᒥᑭᓂᔨᒡ ᓇᒪ ᒋᑭ ᒋ ᐊᑎᓂᑭᓄᐅᔪᐤ ᐊ ᐃᔅᐱᔅ ᔭᐃᑎᓂᔨᒡ, ᑭᔭ ᐊᓐ ᑲ ᐃᑎᔅᑕᒡ, “ᐅᑎᐸᔨᒋᒐᐤ ᒋᔅᒐᔨᒪᐤ ᐊᓂᔭᔪᐛ ᐊᐛᔪᐛ ᐎᔾ ᑕᐱᔨᐛᐅᓯᑦ,” ᑭᔭ “ᒥᓯᐛ ᐊᐛᓐ ᐅᑎᐸᔨᒋᒐᐛ ᐊ ᑕᔨᒋ ᑲ ᐃᓯ ᑎᐸᔨᑕᑯᓯᑦ ᒋᐸ ᓂᑭᑎᒻ ᒥᒐᑎᓯᐅᓂᔪᐤ᙮”
20ᐊᓐᑕ ᒥᔅᑎ ᒥᒋᐛᐱᒡ ᑎᑯᓇ ᓂᓇᐧᑯᐤ ᐊ ᐃᓯᓇᒂᒋ ᐎᔭᑭᓇ᙮ ᐱᔅᒐ ᐊᓂᔭᔪᐛ ᐎᔭᑭᓇ ᐎᔄᐅᓱᓇᔭᐱᔅᑯᐅᐛ ᐊᑯ ᑯᑎᑲ ᐛᓴᔭᐱᔅᑲᐛ᙮ ᐱᔅᒐ ᒥᔅᑎᑯᒡ ᒋ ᐅᒋ ᐅᓯᑕᑭᓄᐛ ᐊᑯ ᑯᑎᑲ ᐊᓯᔅᒋᒡ᙮ ᐊᓂᔭᔪᐛ ᑲ ᓱᓇᔭᐅᔨᒋ ᓇᒪ ᓇᔅᒡ ᐊᐱᑎᓇ ᐊᑯ ᐊᓂᔭ ᐊᑲ ᓱᓇᔭᐅᔨᒋ ᐊᐅᑯᓂ ᐊᓂᔭᔪᐛ ᐊᓯᑯᒻ ᒋᓯᑲᐛ ᐃᔭᐱᒋᑕᑭᓄᐅᒋ᙮ 21ᐛᔅ ᒧᔭᒻ ᒪᒃ ᐊᐛᓐ ᐸᔭᒋᐃᓱᒐ ᐊ ᓂᓇᑭᑐᐛᔨᑕᐧᒃ ᒐ ᐊᑲ ᒋ ᐎᓂᐃᑯᑦ ᒥᒐᑎᓯᐅᓂᔪᐤ, ᒋᑭ ᑎᑯᓂᔪᐤ ᐊᓂᔭ ᓇᔅᒡ ᐊ ᒋᔅᑕᔨᑕᑯᓂᔨᒡ ᒐ ᐃᓯ ᐊᐱᒋᐊᑭᓄᐅᑦ, ᓇᔅᒡ ᒋᑭ ᐱᔅᑎᓂᓱᐤ ᒐᒋ ᒥᔪ ᐊᐱᒋᐃᑯᑦ ᐊᓂᔭ ᑲ ᐎ ᐊᐱᒋᐃᑯᑦ ᐊ ᐃᑐᑕᐧᒃ ᒥᒄ ᑕᓐ ᐊ ᐃᑎᓱᒥᑯᑦ᙮
22ᑯᒋᑕ ᒐ ᐊᑲ ᒋ ᐱᐱᔅᑲᑕᔨᑎᒥᐃᑯᔨᓐ ᑕᓐ ᐊᓂᔭᔪᐛ ᓇᓂᑯᑎᓂᔾ ᐊ ᐃᓯ ᒧᔅᑕᓇᔨᑕᐧᒃ ᒐᒋ ᐃᑕᑎᓯᑦ ᐅᔅᒋᓂᒋᓱᐤ᙮ ᐅᔅᑕ ᐃᑕᔨᑎᒥᐃᑯᐤ ᑯᐃᔅᑯᑕᑎᓯᐅᓐ, ᑕᑈᑎᒧᐅᓐ, ᓴᒋᐃᐛᐅᓐ ᑭᔭ ᒋᔭᒪᔨᑎᒧᐅᓐ, ᐊ ᐎᒐᐅᑥᐤ ᐊᓐᒡ ᑲ ᑕᑈᑕᒡ ᐅᑎᐸᔨᒋᒐᐛ ᒐᒋ ᐎᒋᐃᑯᒡ ᐊ ᐸᔭᐧᑭᓂᔨᒋ ᐅᑕᐃᐛᐛ᙮ 23ᐊᑲᐎᔾ ᓇᓂᑐᑕ ᓂᑎᒥᒄ ᐃᔨᒧᐅᓇ ᑭᔭ ᒋᔎ ᐃᔨᒧᐅᓐ, ᐛᔅ ᐊᑯᑕ ᐛᒋᐱᔨᒡ ᒐᒋ ᐅᒋ ᒥᒋᐱᔨᐃᑐᓇᓄᐅᒡ᙮ 24ᐛᔅ ᐊᓐ ᑲ ᐊᐱᒋᐃᑯᑦ ᐅᑎᐸᔨᒋᒐᐛ ᓇᒪ ᒋᐸ ᐅᒋ ᐊᔭᔅᑕᒧᐛᐤ᙮ ᒋᐸ ᒋᔅᑎᒪᒐᔨᒪᐤ ᒥᓯᐛ ᐊᐛᔪᐛ ᑭᔭ ᐊᓂᔭ ᐊ ᒥᔪ ᒋᔅᑯᑎᒪᒐᑦ ᒋᐸ ᓯᐱᔪᐛᓯᔅᑐᐛᐤ ᐊᐛᔪᐛ᙮ 25ᑭᔭ ᒋᔭᒻ ᒋᐸ ᐃᑐᑐᐛᐤ ᐊ ᐎ ᑯᐃᔅᑯᓇᑦ ᐊᓂᔭ ᑲ ᓂᓂᔅᑯᔅᑕᑯᑦ ᐊᐛᔪᐛ᙮ ᒐᒃ ᒪ ᒋᐸ ᒋ ᐃᑐᑕᑯᔪᐛ ᒋᓴᒪᓂᑐᐛ ᒐᒋ ᒂᔅᑲᑎᓯᔨᒋ ᑭᔭ ᒐᒋ ᒋᔅᒐᔨᑎᒥᔨᒋ ᑕᑈᐅᓂᔪᐤ᙮ 26ᑭᔭ ᒐᒋ ᒋᔅᒐᔨᑎᒥᔨᒋ ᑕᓐᑕ ᒐᒋ ᐅᒋ ᐎᐧᑯᒋᐅᒡ ᐊᒋ ᓇᒂᑎᑯᒡ ᒥᒋᒥᓂᑐᐛ ᐊᒋ ᐃᑐᑕᑯᒡ ᒥᒄ ᒐᒋ ᐃᓯ ᓂᓇᐃᑐᐛᒡ ᑕᓐ ᐊ ᐃᑎᓱᒥᑯᒡ᙮
Currently Selected:
2 ᑎᒧᑎ 2: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
